Nummer 164 - Nordfriisk Instituut

Maike: Ik teenk, wü nem en litj Kumiin-Snaps
tö di Sop.
Jens: Snaps tö di Sop, jaa ... wat ik jit fraagi wil,
üp disalev Aart üs forleeren Jaar, Maike?
Maike: Üp disalev Aart üs ark Jaar, Jens. Es di
Snaps uk kuul?
Jens: Mal kuul, mal, mal kuul, Maike, haa’k jüst
üt di Isskaap haalet.
Hi gair om Staal trinjombi en skeenkt Kumiin-
Snaps fuar ark Gast iin. Da wel er me di Snapsborel
hen tö Kööken. Diarbi snöfelt er aur di
Tiigerhaur fan’t Fel. He stelt di Borel of, kumt
töbeek tö Staal en staant nü achter di Stööl fan Jap
Brodersen. Hi nemt Japs Glees ön Hun, luket aur
tö Maike, diar uk höör Glees ön Hun halt, en bert
höör tö drinken.
Maike: Jap Brodersen!
Jens: Proost, Maike!
Jens drinkt ön Stair fan Jap Brodersen di Glees
lerig.
Maike: Admiraal Knudsen!
Jens: Admi... mut ik dit jaarlung sii, Maike?
Maike: Dö’t jüst fuar mi tö Lefhair, Jens.
Jens: Jüst fuar di. Mal gur, jaa, jaa... Skålll!
Jens drinkt en knalet de Haken töhop, üs er
„Skålll“ sair, en hi fortair sin Gisicht fuar
Wark.
Maike: Stefan Madsen!
Jens: (me mal hoog Stem) Lekelk nii Jaar, Maike!
Jens drinkt di Glees fuar Stefan Madsen lerig.
Maike: En min lef Sönke Winter!
Jens: (me mal diip Stem) Nü, jir se wü arküðer
weðer, min lef ual Faamen!
Maike: Ik liiv, nü es di Fesk ön di Reeg.
Jens: Fesk. Mal gur, Maike. Heer di Sop smakt?
Maike: Di wiar fiin, Jens, es di āpskailig gur
slaaget.
Jens: Beest Dank, Maike, diar sen ik bliir aur.
Jens gair töbeek tö Kööken en snöfelt weðer aur di
Tiigerhaur. Hi bringt di Fesk fuar Maike.
Jens: Litj bet Skol me Iardapelsalaat. Di Skol es
frisk, haa’k miarlung ön Hörnem Haawen fan en
Feskerbuat koopet.
Maike: Ik teenk, wü ken Wiin tö de Fesk drink.
Jens: Wit of ruar?
Maike: Tö Fesk drinkt em altert witen, Jens!
Jens: Witwiin, na gur. Üp disalev Aart üs forleeren
Jaar?
Maike: Disalev Aart üs ark Jaar, Jens!
Jens: Maaki wü dach.
Jens gair tö Kööken en wel di Wiin haali, diarbi
snöfelt er aur di Tiigerhaur. Hi felt bi ark Gast di
Glees. Bi Jap Brodersen gitert er bluat litjet Wiin iin,
biweeget sin Lepen, üs wan er fraagi wel, of di Wiin
rocht es, en diareeðer maaket er uk Japs Glees fol. Üs
er me di Borel töbeek tö Kööken gair, snöfelt er ek,
man sticht üs en Störk aur di Tiigerhaur. Bluat üs er
weðerkumt, bleft er bi di Haur fan’t Fel hingin.
Maike: Jap Brodersen!
Jens: Proost, Maike, min Faamen!
Jens drinkt weðer di Glees fan ark Gast üt.
Maike: Admiraal Knudsen!
Jens: Oh, mut ik det, Maike?
Maike: Jens, ik ber di diarom.
Jens: Skålll!
Weðer knalet er di Haken töhop, wat en mal siir
dēr.
Maike: Stefan Madsen!
Jens: Lekelk nii Jaar, swet Faamen!
Meike: Sönke Winter!
Jens: Dü sjochst sa jung üt üs jit oler, Maike!
Sa jung üs jit oler, üs jit oler – ha, ha, ha!
Em ken al se, dat Jens muar drunken heer üs er
fordrai ken. Hi wait me sin Jeremer, of en tö bigent
er tö danglin. He nemt Maikes Teler wech en gair
tö Kööken.
Maike: Nü kenst di Hen bring, Jens.
Jens: Di Hen, di Hen ...
Üp Wai tö Kööken snöfelt er aur di Tiigerhaur. Hi
kumt töbeek tö Maike me di Hen, toltert en toltert
hen en weðer.
Maike: Dit is man en wunerbaar Fügel.
Jens: Jaa, en wun... wun... wunerbaar Hen, man
bluat en Sophen fan „Spār“ ön Muasem, mut’k
di fortel. Ik haa’t ek skafet, üp di Weesterlöning
Weekmarker tö wārewin.
Maike: Ik meen, da brük wü en deeg Isbreeker tö
di Hen, töögen dit Fügelgrip-Viirus.
Jens: Isbreeker? Puh... Üp disalev Aart üs forleeren
Jaar, Mai... Maike?
Maike: Üp disalev Aart üs ark Jaar, Jens!
Jens gair tö Kööken, springt me biiring Biin aur
di Tiigerhaur en kumt töbeek me fif Isbreekers. Hi
ken höm knap āprocht hual en toltert altert muar.
Maike: Jap Brodersen!
Jens: Maike, min Lefst!
Maike: Admiraal Knudsen!
Jens: Mut ik, Maike?
Maike: Man Jens!
Jens: Sjkållll!
20 Nordfriesland 164 – Dezember 2008