Liederbooklet_Hadernowelesäge_Beat Tschugmall

DE TAXIMAA 

Sitze hine i dem Taxi da am Stür en dunkle Taximaa 

säg im wos söll häre gaht er nickt und stellt dän Fahrtuhr a 

s’Auto rollt de Blinker blinkt ich lueg zum Feischter us 

Gedanke no bi dir so verschwindet Huus für Huus 

känn de Taximaa im Taxi nöd nu gseit wos häre gaht 

blinds Vertraue i de Fahrer das er hoffi sicher Fahrt 

ich dänke so für mich cha dä Züridütsch verstah 

er häd ja nume gnickt de dunkli Taximaa 

huh, huh, de dunkli Taximaa 

und ich luege so vo hine a sin brunrasierte Chopf 

läbt sicher ganz ellei und am Hämd fählt au en Chnopf 

im Rückspiegel spiegled de dunkli Taximaa 

mit grosse runde Auge grinst er mich fründlich a 

villicht e sonen Flüchtling womer jetzt händ übernoh 

vom tüüfe, dunkle Afrika häd Asyl übercho 

de fahrt jetzt mit dem Taxi und cha mich nüd verstah 

langsam wird’s mir mulmig bi dem dunkle Taxi Maa 

huh, huh, bi dem dunkle Taximaa 

ich hoff das lute Tigge isch d’Fahrtuhr vorne dra 

öppe no en Terrorischt de dunkli Taxi Maa 

vermuetlich han grad ich das Glück hock i dem Taxi da 

won ich Explosiv diräkt in Himmel flüge cha 

ich säge dänn zu mir chom stell dich nüd so a 

und sötti dä da vorne mich würklich nüd verstah 

dän fahr ich hald dur Gägend mit em dunkle Taximaa 

säg nüt wot ja kei Lämpe bis de Chare dänn bliebt stah 

huh, huh, vo dem dunkle Taximaa 

plötzlich stoppt de Taxi so mir sind jetzt da 

das macht 25 Franke seit de dunkli Taxi Maa 

im perfekte Züridütsch und grinst mich wieder a 

er seigi da Gebore und ich müess kei Angscht meh ha 

huh, huh, wie wän ich jemals Angscht hed gha 

Text und Melodie Beat Tschugmall / November 2015

CHOM LÄHN DICH A BI MIR 

Chom lähn dich a bi mir klar dörfsch doch truurig si 

lose dir eifach zue d’Nöchi tuet so guet 

zäme hämer Chraft bis es wieder schaffs 

d‘Sunne z’gseh 

Chom lähn dich a bi mir schlüss dich i d’Arme i 

so dunkli Momänt wo d’Seel fascht verbrännt 

dän bin ich da für dich bis es wieder schafsch 


Zum ganze Packet uf dem gmeinsame Wäg 

ghört au di schweri Ziit 

ich bin da für dich und gib dir d‘Hand 

zum zeige wie gern di no han 

Chom lähn dich a bi mir klar dörfsch doch truurig si 

lose dir eifach zue d’Nöchi tuet so guet 

zäme hämer Chraft bis es wieder schaffs 


Chom lähn dich a bi mir schlüss dich i d’Arme i 

so dunkli Momänt wo d’Seel fascht verbrännt 

dän bin ich da für dich bis es wieder schafsch 


Stahn ändlich is Liecht und zeig wer du bisch 

dis Gfühl dini Chraft und Liebi 

wie wertvoll du bisch das weiss ich scho lang 

bin glücklich das ich dich han 

Text und Melodie Beat Tschugmall / Februar 2013

ICH BIN DEGÄGE 

Es isch die Wält wo nüd mini isch 

träg e Maske uf mim Gsicht 

wie es Kamäleon pass ich mich ah 

je nach Farb wo Gsellschaft wot ha 

mängisch wünschmer ich het de Muet zum säge 

jetzt isch Schluss ich bin degäge 

Es isch diee Wält wo nüd mini isch 

bin im Wasserglas de Fisch 

schwümm im Chreis dusse luured Katz 

fühl mich nüd wohl a min Arbedsplatz 




er sitzt breit am Eiche Tisch 

au wän’s nüd stimmt er häd immer rächt 

er isch de Boss ich bin nur de Chnächt 




wo plötzlich im Zwiifel bisch 

ich lueg in Spiegel cha mi nüd erchäne 

bin en Nicker pfuii da mues mi schäme 



Es isch diee Wält wo jetzt mini isch 

won ich Karte nomal neui misch 

luege häre und rüer de erschti Stei 

duen mich wehre und rüefe luut „Nei“ 

stahn häre han ändlich de Muet 

fühl mich Freii das Gfühl tuet guet 

Text und Melodie Beat Tschugmall / Dezember 2016

HUNDERTTUUSIG STERNE 

Ich wünscht ich wär en Luftballon und flügti über d‘Wält 

und chönti all‘s vo obenabe gseh 

da obe wäri Friede chönt uf d‘Wulche liege 

Dummheit vo de Mänsche dunne lah 

und i de Nacht im dunkle mues ich kei Angscht meh ha 

will hunderttuusig Sterne lüchted da 

ich wünscht ich wär en Luftballon und flügti über d‘Wält und chönti all‘s 

vo obenabe gseh 

Ich lah de Wind mich stüre, am Himmel mich verlüre 

i Tröim versunke eifach nume sii 

sitz uf d‘Sunne strahle due mit de Wulche fahre 

gnüss die Rueh bis mich de Tag verlaht 

und i de Nacht im dunkle mues ich kei Angscht meh ha 

will hunderttuusig Sterne lüchted da 

ich wünscht ich wär en Luftballon und flügti über d‘Wält 


de Mänsch nimmt sich wichtig, nur er macht alles richtig 

und stüred Arrogant em Abgrund zue 

d’Hoffnig laht in glaube en Lügner chöni zaubre 

und wählt dän söttig Spinner no a d‘Macht 

und i de Nacht im dunkle mues ich wieder Angscht ha 

statt Sterne lüchted Bombe da 

ich wünscht ich wär en Luftballon und flügti über d‘Wält 


Text und Melodie Beat Tschugmall / Oktober 2014

ICH GLAUBE NÖD 

Will ich das, bruch ich das, mues ich das ha 

ich glaube nöd ich glaube nöd 

hilft mir das, freuit mich das, stahn ich uf das 


Min Nachber häd es Büechli det schriibt er alles ii 

wän ich zum Huus us gang und wer bi mir isch gsii 

öb ich Abfall würklich duen träne 

im Stägehuus laufe nüd ränne 

sonen Bünzli isch ohni Frag ä Mänsche Plag 

Will ich das, bruch ich das, mues ich das ha 


hilft mir das, freuit mich das, stahn ich uf das 


han e offni Frag und lüt em Kundeservic a 

e Stimm seit „Bitte warte si chömed sofort dra“ 

das gaht de ganzi Tag 

han doch nur e chlini Frag 

si bedankt sich fürs warte lüted si morn wieder a 

Will ich das bruch ich das mues ich das ha 


hilft mir das freuit mich das stahn ich uf das 


stahn ruhig, entspannt vor em Gmües-Regal 

da lüted es Händy de Iichauf wird zur Qual 

näbed mir redt e Mändy 

ganz luut mit de Sändy 

und au ich weiss jetzt welli Tampon si muess ha 

Text und Melodie Beat Tschugmall / Januar 2017

MIN MOMÄNT 

Klari Sicht und d’Luft ganz Chalt 

Tröim verschwindet dur’s Wulchemeer 

es gseht fascht us wie wän’s no Räge gäb 

s’isch still will de Tag no schlafe tuet 

es gseht fascht us wie wän’s no Räge gäb 

s’isch still will de Tag no schlafe tuet 

Ich schnuf ganz tüüf die frischi Luft 

mach d’Auge zue gspüre de Wind 

ich duen e so wie wänn ich Flüge chönt 

dä Momänt ich gnüsse die Rueh 

ich duen e so wie wänn ich Flüge chönt 

dä Momänt ich gnüsse die Rueh 

Ziitigsfrau nickt mir zue 

es Lächle dän isch si weg 

i de Luft schwebt en Kaffiduft 

min Momänt schlüss d‘Auge debii 

i de Luft schwebt en Kaffiduft 

min Momänt schlüss d‘Auge debii 

Text und Melodie Beat Tschugmall / Januar 2017

UF EM WÄG 

Schnäll immer schnäller duet alles gah 

Ziit rännt defo ich mage nümme nah 

s’mues häre e Lösig susch wird ich Chrank 

da gits doch sonen Wäg…. Gott sei dank 

en Wunsch ganz tüf ine scho lang isch er da 

de Wäg vom Jakobus chöne z‘gah 

als Pilger sich fühle ganz ohni Zwang 

und zrugglah de tägliche Drang 

s’isch nüd nur über Stock und Stei 

mini Gedanke wit wit weg vo Dehei 

ich gang de Wäg vo de innere Rueh 

lahn ändlich mini Tröim wieder zue 

de Rucksack isch packt d‘Schueh usprobiert 

en Huet für de Räge wo d‘Sunne filtriert 

keis Händy kein Luxus mit mir ganz ellei 

Sorge und Stress lahni ab sofort Dehei 

ich gange de Wäg finde Friede und Rueh 

Gedanke i Zuekunft und d‘Antwort dezue 

mir sälber begägne tüüf i mir drin 

loslah vo dem won ich gfange bin 

s’isch nüd nur über Stock und Stei 

mini Gedanke wit wit weg vo Dehei 

ich gang de Wäg vo de innere Rueh 

lahn ändlich mini Tröim wieder zue 

Text: Charlotte, Karin, Ueli, Beat Melodie: Beat Tschugmall 2016

SCHWARZI DAME 

Tröim verlore alles zuedeckt 

Läbesfreuid hinder Schatte versteckt 

chraftlosi Tage as Läbe verlore 

Müed wehrlos Gliichgültigkeit 

s’Ufer wiit weg keis Schiff wo mi treit 

hilflosi Schmerze d’Seel verletzt 

mhhh, d’Seel verletzt 

Chom stand uf und gib nüd uf 

chom stand uf und gib nüd uf 

bin immer für dich da 

Dunkli Schatte hilflos und träg 

schwarzi Dame du stahsch mir im Wäg 

Läbesangscht sich nur no verstecke 

tüüfi Leeri chalt und gfrore 

Träne statt Lache alles verlore 

es dunkels Loch wo ändlos schiint 

mhhh, ändlos schiint 

Chom stand uf und gib nüd uf 

chom stand uf und gib nüd uf 

bin immer für dich da 

Text und Melodie Beat Tschugmall / April 2011

MIN SCHATTE 

Ich luege so mim Schatte nah wo näbed mir duet gah 

isch mal vorne dän uf de Site staht wän ich due stah 

seit keis Wort lauft näbed mir chli gstabig isch sin Gang 

mues es bitztli schmunzle will d‘Bei sind schaurig lang 

Du und ich sind äng verbunde 

mal bisch da und mal verschwunde 

gsehn i dir mis Schattespiel 

was mich bewegt bewegt au dich 

vo eim Bei schnäll uf‘s ander du Schatte machsch das nah 

duesch dich au verstecke und hinder d‘Wulche stah 

dänn spring ich schnäll i d‘ Sunne scho bisch du wieder da 

mängisch langed sonen Schatte das mer Freuid chan ha 

Du und ich sind äng verbunde 

mal bisch da und mal verschwunde 

gsehn i dir mis Schattespiel 

was mich bewegt bewegt au dich 

mir känned euis es Läbe lang verzell dir vill vo mir 

losisch zue seisch keis Wort das schätz ich so a dir 

bisch chli älter worde liecht träger isch din Tritt 

dän mach ich chlini Schrittli so chunsch du wieder mit 


DU FÄHLSCH MIR 

Mit abgwetzte Hose am Hämp fehlt au en Chnopf 

so sitzt er vor sim Bierli en gheimnissvolle Tropf 

er chunt jede Tag und hockt am gliiche Tisch 

sin Blick chalt und starr wie en tote Fisch 

s’dämpfte Liecht im Egge zeigt sis runzlig Gsicht 

und jedi einzeln Falte häd ihri eigni Gschicht 

ab und zue es Lächle still und ganz verläge 

dänn staht er uf und zallt ohni öppis z‘säge 

Türe gheiit is Schloss dusse blast en Wind 

s’dunkled langsam i er gaht sin Wäg fascht blind 

de Lärme us em Wirtshuus spaziert es Stückli mit 

a de Muur sin Schatte wos Gasseliecht jetzt git 

de Wäg dur die Gass isch er und sini Frau 

hundertmal uf und ab jetzt gaht eren ganz ellei 

im Quartier häd mer’s kännt hüt läbed andri da 

si säged im nur Alte niemer fröged nah 

Ziit häd sich verändered s’isch chalt uf dem Planet 

jede luegt für sich grad wie d’Fahne weht 

Korruptsion und Lüge politisch schön verpackt 

und wer sich duet wehre wird Mundtod gmacht 

s’läbelang gschaffed d’Ränte trotzdem chlii 

vill vo de Obere händ‘s Gfühl sii chönt no chliner sii 

g’spart wir bi de Alte die känned das doch scho 

die düend nüd opponiere die sterbed sich defo 

s’Gäld immer weniger vom g’Sparte nüt meh da 

will Kranched vo de Frau häd nüt meh übrig lah 

er trägi s’Gäld is Wirtshuus so wird im nachegseit 

nur er kännt de Grund warum’s in det häre treit 

uf em Wäg dur die Gass sind d’Bilder wieder da 

dänn duet er wie wän d’Frau no näbed im würd gah 

und im Wirtshuus a sim Tisch schänkt er zwei Gläser ii 

das wenig wo im no bliibt isch d’Erinnerig a Sii 


SEELE OHNI RUEH 

Uf em Friidhof liit e Liich föifti Reihe dritte Platz 

grichted vo de Seele ohni Rueh 

falschi Reihe falsche Platz häd de Totegräber gseit und d’Liich zum 

Friidhof use treit 

vor em Grab mit em Chinderchrüz chnündled en alte Maa 

e Pischtole i de Hand wo er nümm los duet lah 

en Autounfall, sini Schuld doch feig isch er defoo 

nur er kännt das Gheimniss drüber weg isch er nie cho 

Dänn gits en KNALL 

Uf em Friidhof liit e Liich föifti Reihe dritte Platz 


falschi Reihe falsche Platz häd de Totegräber gseit und d’Liich zum 

Friidhof use treit 

Vill z’früeh häsch müese gah staht uf dem Grabsteii da 

langsam verdunkled sich de Himmel 

si lächled vor dem Grab duet’s Gift verschwinde lah 

es Dunnered und Blitz kein Schritt cha si meh gah 


Uf em Friidhof liit e Liich achti Reihe nünte PLatz 


falschi Reihe falsche Platz häd de Totegräber gseit 

und d’Liich zum Friidhof use treit 

Er staht vor dem Chindersarg red vo Gott und Gnad 

näbed im es Chrüz schwer und gross stahts da 

de Pfarrer weiss warum sich das Chind häds Läbe gnoh 

es Bebe vo de Erde das schwere Chrüz laht nah 


Uf em Friidhof liit e Liich vor em chliine Chindersarg 


falschi Reihe falsche Platz häd de Totegräber gseit 

und de Pfarrer zum Friidhof use treit 


MIR LÖND EUIS EIFACH NÜME LOS 

liige näbed dir und lueg dich aa 

wie schön du bisch mit dim graue Haar 

Sind beidi älter worde de Spiegel zeiged d‘Jahr 

gnüssed jede gschänkti Tag 

Chom lahn euis es Tänzli mache wie vor villne Jahr 

nimm dich i min Arm lähn mich a dis graue Haar 

lueged dankbar euis i d’Auge für d‘Jahr wo mir händ gha 

niemer weis wie mänge Tanz mir noch chönd ha 

Ja mir lönd euis, mir lönd euis, mir lönd euis eifach nüme los 


isch es Zuefall das i dem Momänt 

am gliche Ort mir euis i d’Auge glueged händ 

tuusig Schmätterling d‘Vernunft verdrängt 

jedi Sicherig us de Fassig sprängt 

Us dem Momänt häds e Liebesgschicht gäh 

würd de Wäg mit dir sofort wieder näh 

du so ruhig ich verspilt s‘häd müese sii 

gib mir d’Hand sisch euisi Melodie 

Chom lahn euis es Tänzli mache wie vor villne Jahr 

nimm dich i min Arm lähn mich a dis graue Haar 

lueged dankbar euis i d’Auge für d‘Jahr wo mir händ gha 

niemer weis wie mänge Tanz mir noch chönd ha, 




GEBURTSTAGSFIIR 

Mir sitzed ame grosse Tisch und lächled euis lieb a 

känn die meischte Lüüt zwar nöd hock eifach grinsend da 

klar mer mues hald fründlich si ich nick säg immer ja 

lache wo’s ernscht müest si has Hörgrät hald nüd a 

alli si mir zäme cho zum fiire euise Fründ 

di einte händ es g’Schänkli bracht die andere nur d’Hünd 

si reded so vil durenand Problemli det und da 

bin froh um jedi Pause wäns müend go Bisle gah 

genau das isch dänn de Momänt ich schliiche mich defoo 

schnappe no es Gläsli Wii me seit das machi froh 

dänn stönd di grosse Redner uf lobpriised ohni Änd 

bin sicher dass di meischte Lüüt lieber as Büffet wänd 

ändlich klatsch de Fründ i d’Händ s’Büffet isch parat 

mer luegt sich gägesiitig a wer ächt als erschte gaht 

g’spannt verfolged d’Augepaar was uf de Täller liit 

s’Gflüschter hinder mir läck lueg wie de da biigt 

dänn spiilt es Orcheschter uf und macht en riise Lärm 

e fremdi Frau git mir en Chuss und seit „i ha di gern“ 

du Lueder rüeft da mini Frau woher känsch du min Maa 

das Fäscht häd plötzlich Fahrt uf gnoh ich bliibe nochli da 

am Afang sind’s nur bösi Wort dänn flüüged Täsche, Schueh 

ich gang echli uf d’siite und lueg vo usse zue 

plötzlich gits keis Grinse meh die Prügledte duet weh 

de Pfarrer wot beruhige scho chasch en nümme gseh 

s’Dessertbuffet schwebt dur d’Luft und mischt sich under d’Lüüt 

s’Wermicell mit Rahm am Karl uf d’Glaze flüügt 

so gaht es hölle Fäschtli z’änd mer git sich wieder d’Hand 

nur eine de bliibt lige isch mit em Grind dur d’Wand 

dänn gaht mer uf de Heiwäg schwärmt no vo dem Fäscht 

das müest mer wiiderhole dänn liit mer müed is Näscht 

de Fründ wo das Fäscht häd gäh häd nütmeh ghöre lah 

de fiired kein Geburtstag meh häds Datum striiche lah 


HADERNOWELESÄGE 

S’macht mich chriibelig und wild gseh vor mir das Frauebild 

ihre Gang die Elleganz sone Gschmeidigkeit bim Tanz 

jede zärtlichi Blick git mir no de letschi Kick 

mini Auge düend si raube und dänn duen ich mich getraue 

schöni Frau wet si Träffe mal mit ihne goge Ässe 

und dänn chunt de Momänt wo jede Maa sicher kännt 

rede über Wullesocke Lippestift und Haferflocke 

Was ich eigentlich wot säge, s’git nüüt vergäbe! 

Mues no Kundecharte erfasse seit die Frau a de Kasse 

duet uf mini Antwort wart ich säg „nei han kei Charte“ 

sofort schwätzt si uf mich i sone Charte mues doch sii 

ihre Name wird zum Dank hinderleit i de Datebank 

und mir schicked a si dänn Info’s wo si gar nüd wänd 

so chö mir si kontrolliere und zu neuie Chäuif verfüere 

klar entstönd euis Chöschte da wo mir si düned zalle lah 


I mim Mage fangts a Gäre und de Darm wot sich lääre 

alles schiebt sich ohni Rueh immer meh am Ändi zue 

laufe schnäll bliibe stah alli Lüt lueged mir nah 

chläme zäme duen mich Bucke wot de Druck es bitzli lugge 

stahne ändlich vor em WC s’haut mich um was ich det gesh 

hangt e Kasse a de Tür wänd en Fränkler defür 

hinder’s Hüüsli las lah gah plötzlich staht en Schroter da 


Irgendwänn chunt de Tag womer treit mich zum Grab 

mit em Sarg us Edelholz chönt ich’s gseh ich wäri Stolz 

und s’Bestattigsinstidut häd no gletted mini Huut 

träg en Scheitel im Gsicht tritt e so vor’s jüngschte Gricht 

und de Gärtner wie de Wirt, Totegräber, Gotteshirt 

leged d’Rächnig uf de Tisch da bisch froh das gstorbe bisch 

schweb de Himmelspforte zue blased ihr mir doch i d‘Schueh 



WELLE DEPP RED DA VO SPASS 

Und ich Tramppe Tramppe Tramppe 

uf dem Velo duen ich strample 

han de Chopf fascht uf em Länker 

numme jetzt kein dumme Schwänker 

Chalte Wind blast mir um d’Ohre 

mini Finger sind fascht gfrore 

s’fangt a Rägne wird ganz nass 

Welle Depp red da vo Spass 

Und ich Hämmre Hämmre Hämmre 

langsam fangt’s scho afe Dämmre 

suech verzwiifled Stange , Öse 

plötzlich düend sich d’Seili löse 

und das Zält wo sötti stah 

duet sich langsam gheiie lah 

wien ich Gämpingferie hass 


Und ich Sitze Sitze Sitze 

i dem Wägeli wo duet flitze 

immer schnäller uee und abe 

s’überdreht mir fascht de Mage 

Achterbahn bin suscht degäge 

doch min Änkel sitz denäbe 

hock wie ufem Pulverfass 

Welle Depp red da vo Spass

Und ich Hange Hange Hange 

a de Seili und due blange 

dass de Tandemflug duet ände 

nei, scho duet er wieder wände 

und de Wind treit euis nach obe 

a de Felswand nöch en Boge 

mini Angscht isch würklich krass 


Und ich Hüpfe Hüpfe Hüpfe 

i so Ring wo ich mues tüpfe 

ganz verschwitzt isch scho mis Tönü 

gstriche isch au s’Mittagsmönü 

Körper, Geischt im Einklang ha 

numme Saft in Mage lah 

hock am Schluss im Rägefass 


Und ich Boxe Boxe Boxe 

duen als Sparingspartner protze 

eifach schnäll si uf de Bei 

und de Rescht chunt vo ellei 

all die Ratschläg sind so nett 

doch jetz lieg ich i dem Bett 

d’Ärm im Gips, s’Gsicht ganz blass 


Und ich Singe Singe Singe 

mini Lieder sölled klinge 

dass de Sinn ihr chönd verstah 

vo dem was ich z’säge ha 

sötted dänn no Frage sii 

chömed eifach schnäll verbii 

uf mis Publikum isch verlass 

So macht das ganze Spass 

Text und Melodie Beat Tschugmall / Mai 2016

S’ALTE HUUS 

Bin es Huus scho zimmli alt 

stah scho länger eifach leer 

dur zwei Feischter bin ich blind 

dur die andre pfifft de Wind 

Ja im Chäller chnattered Tür 

und mit Chole mues mer no Füüre 

dur’s Dach da rägnets ine 

i de Winde läbed Spinne 

All das gflickte und jede Chratz 

jede Ziegel am falsche Platz 

jedes Chroose und jede Schnuff 

ghört zu mir zum alte Huus 

Vom Chämi staht nur no d’Helfti da 

Rauch häds scho lang nüme durelah 

de Bode isch ghörig verzoge 

Türscharnier sind fascht alli verboge 

Wie wünscht ich mir de Chinderlärm 

de Chuchigschmack de Feischterstern 

de Pfifferauch, de Uhreschlag 

s’gläbte wie vor mängem Jahr 

All das gflickte und jede Chratz 

jede Ziegel am falsche Platz 

jedes Chroose und jede Schnuff 

ghört zu mir zum alte Huus 


S‘SCHÄCHTELI 

Was ich am Schluss wot mitnäh 

häd ime Schächteli platz 

es sind die chliine Sache 

wo’s läbeswert häd gmacht 

All de Luxus ohni Wert 

won ich ghüeted han wie min Schatz 

nei das häd bestimmt 

i mim Schächteli kei Platz 

lege mis grosse Bäckerherz 

und d’Läbesfreuid det dri 

natürlich mini Lieder 

die müned au bi mir sii 

Was ich am Schluss wot mitnäh 

häd ime Schächteli platz 

es sind die chliine Sache 

wo’s läbeswert häd gmacht 

All de Luxus ohni Wert 

won ich ghüeted han wie min Schatz 

nei das häd bestimmt 

i mim Schächteli kei Platz 

en Platz ghört de Familie 

wo mich zum Held häd gmacht 

d’Erinnerig a mini Fründe 

wo gern mit mir händ glacht 

Text und Melodie Beat Tschugmall / 6. April irgendwann

Liederbooklet_Hadernowelesäge_Beat Tschugmall

Erfolgreiche ePaper selbst erstellen

Template löschen?

Als Template speichern?