FC Büren an der Aare - FC Täuffelen, 22. April 2023, 16:00 Uhr, Sportplatz Lachen

Näbegrüsch uf em Lachen 1. Akt
Näbscht em Matchprogramm isch mi Abteilig no zueschtändig für d'Matchplakat, d'Matchbrichte wenn
ig drzue chume, Pfleg vor Homepage, Fotos vo de Schpiu, Portraits und Mannschaftsfotos und ferner no
die linggi Hand Gottes, äh nei die linggi Hand vom Willy Rüttimann.
Die zwöiti Passion findet dusse schtatt, dr Platzwart. Wenn me so viu Schtunde uf em Lache verbringt, de
het me nid nume eitel Sonnenschein, blaue Himmu, d'Vögeli wo jubiliere und e schöne saftig grüene
Rase, wo di dran chasch ergötze. Do ghöre ou viu Näbegrüsch drzue, wo bedinge, dass kes Fynöggeli
darfsch sy, nid grad zur Schrotflinte gryfsch, wenn dir öppis nid passt oder nid gfaut, obwou's di juckt a
aune Egge und Ände.
Hundelis und ihri Bedürfnis und ihri ignorante Herrchen
Söttigi Vorkommnis gits gäng und die beschäftige eim no denn, wenn me scho lang deheim im Näscht
liegt. Eis wott ig do zum Beschte gäh. Die Gschicht isch nid so schpannend wie dr Rugelimugger, sie isch
fieser, heimtückischer und schtinkt zum Himu. Ig muess chley ushole. Es het uf em Damm viu Frauchen
und Herrchen, wo mit em Hundeli oder de Hundelis gö go schpaziere, damit sie (d'Hüng) es gwüsses
Gschäft chöi verrichte. So wyt so guet. Frauchen und Herrchen und ig hey üs arrangiert, mir riesse beid
Syte d'Hang y d'Luft und grüesse üs reschpäktvou oder mir bääge enang es stimmigsvous "guete Morge"
oder "schöne Nomittag" übere Platz zue. Mi kennt sich haut und das isch guet so und git Reschpäkt. Ds
Hundeli macht ds Gschäft, ds Frauchen oder Herrchen nimmt ds Seckli, rümpft d'Nase, ine mit däm Ding
und düre isch dä Schpuk. E normale Vorgang. So wyt so guet. Wie bi auem im Läbe gits ou by de
Hundehauter angery Hautertüpe, auso zwe Syte.
Syt langem isch im Beriich Houptplatz öschtleche Teil vom Schtägli by dr Birke bis zum Parkplatz füre,
mängisch im Sächzähner, mängisch im Füfer, oder hinger em Gou düre, e schtinkende Hundehufe
zgfinge. Us däm Frömdhüfele het sich es regurächts Chatz und Muus, reschpäktive Hung- und
Platzwartschpiu entwicklet. Gseht die nid schiessendi Fraktion (ds Herrchen), dass ig uf em Lache by,
wird umkehrt u dr schiessend Teil vom Päärli lot am Schtörefried (das bi ig) es paar bösi wuff oder wau
wau um d'Ohre, dr letscht Akt isch gschriebe. Für üs vom FC scho, aber wüu dä Schpaziergang jo muess e
beschtimmte Zwäck erfüue, muess haut de e angere
Bitz Land dr Gring häre ha. Wenn ig nid uf em Lachen
bi, de isch es de passiert. Das böse Hundeli leit sys
Präsäntli uf e Platz und ds Herrchen muess nid d'Nase
rümpfe, wüu dä mit em deponiere vo de Exkremänt
jo elegant glöst isch - für d'Gägesyte. Jitz chume ig
wieder is Schpiu. Jitz heisst's ufpasse, d'Nase i d'Luft
schteue, d'Ouge usfahre und das stinkende Etwas
lokalisiere und potzwoumäu, nid öppe no
drytschaupe oder mit em Mähjer dryfahe, das rächt
sich de dopplet. Wüu nach dr Büetz, wärde de no
d'Maschine und Grätschafte putzt, das wär de die
zwöiti Begägnig der stinkenden Art und das bruchts
definitiv nid ou no.
Nid wyt vo däm Birkli, reschpektive vo däm Beriich,
wo die unghoblete Vorfäu passiere, hets e Robidog.
Zur Erklärig a die Person, wo sich Hundehauter nennt, das isch ke Briefchaschte oder e Wauurne, dört
ghöre d'Gschäftli vo dim Hundeli dry. Aber de vorhär no es Seckli näh, mit dr Hang dry und süüferli ds
Hüfeli ufläse, ds Seckli umschtüupe, nächhär machsch es Chnüppeli oder zwöi und schwupp, y Chaschte
yneloo. Gut gmacht! Gsehsch, es isch gar nid so schwär!
Seite 13