FC Büren an der Aare - FC Walperswil 3:2 (1:1), 06.05.2023

Het Walperswil e Schwechi?
We me bim Gägner e Schwechi wott go sueche, de wird me by dr Bilanz vo de erziute Punkt by de
Heimschpiu (18 Punkt) und Auswärtsschpiu (10 Punkt) fündig. Sie träffe uswärts ou müehsamer aus uf
heimischem Platz, so wiise sie e Negativbilanz vo 11:12 Gou us. Aber sech jitz nid vo söttige Ussage lo
yseife. Das Team isch unberächebar und immer für ne Topleischtig guet.
Rehabilitation isch aagseit!
Im Thesaurus schteit: Ehrenrettung, Verteidigung der Ehre oder Wiederherstellung des Ansehens. Ig
weiss, ig ma das jitz villech e chley dramatisiere, aber ig bi haut ou dr Meinig, dass dir in Biel schwär
unger öiem Wärt gschlage worde sit. Aui Gründ drzue go sueche, mache mir nid, änderet nüt und isch
schliesslech am Sportchef und am Trainer sy Sach. Mir wei füreluege und hoffe, dass Lecce im
Räschtprogramm ou no uf Gägner wird schtosse, wo ne chöi e Scheiche schteue (Täuffelen, Walperswil,
Port). Verglieche mir z'Räschtprogramm vo Lecce mit däm vo Büre chame unmüglech säge, wär dr
liechter Wäg het. Der FCB het näbscht Walperswil unger angerem no Aarberg, Port, Aegerten,
Ins/Müntschemier und Lyss. Mir hei d'Hoffnig no nid ufgäh und gloube a die Mannschaft, ou we mir jitz
uf dr Gnepfi schtöh.
Wyterhin im Renne um e Ufschtieg sy Port, Walperswil und Radelfingen. Aegerten isch es Muggeseckeli
hinger däm Trio und cha sich by optimaler Konschtellation ou no chlyni Hoffnige mache.
Gäge Lecce wird nid nume gschuttet!
Dr Denis seit am Francesco Borriello, wo dr Bartli dr Moscht hout.
Mir wünsche beide Teams es guets Schpiu und drücke üsem FCB aui Düme.
Hopp FCB!
Seite 7