Liebi Güggimeitli und Buebe, losid guet zue, i wott eui s ... - 1960er.ch

Liebi Güggimeitli und Buebe, losid guet zue, i wott eui s’einzig und wohri
Gschichtli vom Gügge verzelle:
Es isch emol vor langer Zyt im Freiamt, am Fuess vom Rieteberg es Dorf gsi. I dem Dorf händ e
paar Manne, mer hed ne d’Dorffötzle gseid, anno 1960 im beschte Alter vo 50 Johr, d’Idee gha,
am Schmutzige Donnschtig am Morge am 4i , mit de Schuelbuebe dur’s Dorf go z’gügge. Und
präzis a dem Schmutzige Donnschtig händs au de Güggibrunne bim Landhus obe, wo sie händ
lo mache, igweiht.
Gnau i säbem Johr sind au die tollschte Meitli und Buebe uf d’Wält cho won ehr eui nur chönd
dänke! Wies i dem Dorf Bruch gsi esch, händ au sie en Johrgängerverein gründet und händ sich
regelmässig zu Fäschtli, Usflög, Reisli und gselligem Zämesi troffe. Und de, losid guet zue, so
gäg die 50gi, händ’s wie die ganze, lange Johr, alli Johrgäng vor ihne au, es Fasnachts OK us
ihrne Reihe gwählt. Und sie händ guet gwählt, die 9 sind es guets Team worde. Mit debi isch
d’Lydia, ganz logisch gsi, hed sie doch vo Afang a im 60er Vorstand alli Fäde zoge, iglade und
au för d’Kasse glueget. Sie isch ächli s’Herz und s’Mami vo de 60er. Drom hed au sie im
Fasnachts OK grad witer alles Finanzielle übernoh. Bim Theo händ’s gwüsst, de cha guet vor
Lüüt rede, hed immer Idee, als OK Präsidänt heb er schints au zu zackige und effiziänte Sitzige
iglade. Da hed de Renate so richtig gfalle, isch sie doch för alles Schriftliche zueständig gsi. Sie
esch es Organisationstalänt, hed de Computer voll im Griff, dank ehre sind 60er immer super
informiert gsi. Da isch natürli au no ganz modern über d‘Homepage www.1960er.ch gange, wo
de Roger igrichtet und immer a Jour ghalte hed.
Und liebe Güggimeitli und Buebe, de isch es Frühlig worde anno 2009 und alli wo händ welle
sind i Wald ue zoge zum Stuude mache. Und det hed denn de Walti alles gäh: E sones Dach
bim Holziplatz und de no aagschribe mit „Stude Camp 1960“ hed de ganz sicher no niemmer
vorher gha. Alles hed er top vorbereitet und parat gha. De Rolf Röthlisberger hed ehn
unterstützt und auf för d’Margrit immer alli Chuchisache mit sim Lastwägeli i Wald ue, und au
weder abe transportiert. D’Margrit hed för all die fliessige Stuudemacher super, grad vor Ort,
kochet und so alli fein verköschtiget. Wunderbari Sämschtige händs zäme im Wald, mit
stuudemache, ässe, trinke und gmüetlich ha verbrocht und spot i de Nacht, ghört mer säge,
sigits ami füecht-fröhlich, füechter e paar (schints heb en Frau einisch abem Waldrand
s’Karoauto is Dorf gfahre) fröhlich sicher all, is Dorf abecho. 600 Stuude hebids gmacht und die
händs bim Marcel z’Hilfike i sinere Schüür iglageret.
De Sommer isch verbi gange i dem Johr und im Herbscht hed de Rolf Küng allne zeigt, wie mer
us eme Chuehorn es Güggi macht. De Ledermaa Hans git da alte Handwärch jedes Johr witer.
De Rolf K. hed alles organisiert und so händ all Johrgänger i de Schrinerei Schmid z’Schaffe
gha. De Rolf K. hed för sich s’allergröschti Horn gschabet und reserviert, de Theo degäge
s’Chlinschte, grad so richtig för i Hosesack! Was mer do drus cha ableite überlohni eui liebi
Buebe und Meitli!
Eh wiiter mit em Gschichtli. Am Obig hed’s Znacht gäh im Füürwehrstübli unde, wo d’Margrit
weder kochet hed. Bi dem gmüetliche Zämesi sind au veli Idee fö d‘ Fasnacht uusgheckt worde,
wie de Line Dance, d’Beizefasnacht beläbe und no veles meh.
Liebi Güggibuebe und Meitli mögid ehr no lose? Da Gschechtli isch nämli no lang nid fertig
verzellt..... Jetzt esch nämli d’Rita so richtig aktiv worde. Sie hed jo vel Fähigkeite, aber das
grad sie de Güggibueb bim Brunne set chönne alegge hed sich niemer so rächt chönne
vorstelle. Mer hed scho bedänke gha, dass e 56eri dra chönnti schaffe! Aber nei, kei Angscht,
mit de Unterstützig, Aaleitig und em näherische Könne vo de Monika isch de es wunderschöns
Güggibueb Gwändli entstande. Öppe i de gliche Zyt isch z’Hilfike obe i de Schüür under de
Aleitig vom Marcel und em André am Fasnachtswaage bauet worde. Vorallem d’Buebe händ

flissig gwärchet und so isch es tolls Rigelhuus mit allne Restaurant vo ne 1960gi mit samt
Gartewirtschaft entstande. Bi all dene verschiedene Events sind au ganz viel Fotis gmacht
worde, hauptsächlich vo de Lydia, wo mer de uf de Homepage weder hed chönne aluege. Nur
schad isch de Hompagebetreuer Roger nie live debi gsi, so isch er um mängs luschtigs Fäscht
cho.
Und de am 29. Jänner 2010 händ d‘59er zur Chnebelübergab iglade. De Theo hed d’Asproch
gha und debi de 59er im Name vo de 60er im Tusch gäg de Güggibueb us Holz, en schöne
Hinkelstei übergäh. Zäme hämmer es tolls Fäscht bis i Morge ie gha. D’Vorfreud uf d’Fasnacht
isch immer grösser worde und denn isch es ändli losgange.
Am Mittwoch Obig bim Güggibueb ahösle isch de Theo weder einisch i sim Element gsi. Er hed
sini Red grad met eme Theaterli untermolet, so händ grad all gseh, wies vor 50 Johr gsi isch.
D’Rita und d’Monika händ de schön Güggibueb jetzt i allne zeigt. Und de isch es sowit gsi,
d‘60er sind go gügge!! Mit ehrne blaue Chappe mit de gäle Zözle, chorze Hose, glismete Socke
und Strumpfhose, Röckli und em Schuelersack am Rugge (2i händ enand sogar gägesitig im
Ricardo überbote) sind’s als Güggimeitli und Buebe durs Dorf zoge. Allne vora mit em grosse
Güggi de Rolf K. als Routechef. Si händ zäme de Line Dance, wo’s bim Rolf R. sinere Frau glehrt
händ, tanzet, gsunge und’s eifach guet gha zäme. Si send e ganzi Woche voll ad Fasnacht und
die meischte händ e unbeschwerti Woche, wie als Teenie, erläbt. Zwoi händ da gügge zäme
ganz früsch verliebt erläbt, doch leider hed’s de im Alltag mümme klappet. Aber de Amor hed
über’s Gügge no einisch voll is Herz vo 2i Johrgänger troffe und si send au hüt no es schöns
Paar.
Es isch Sommer worde und am 27. Auguscht händ sich d‘60er zumene gmeinsame 50igschte
Gebortstagsfäscht troffe. Weder einisch hed’s OK super organisiert, de Sepp Sax hed es super
Salat- und Grilladebüffet gleferet, wo all händ chönne neh, was‘s gluschtet hed. De Stefan Koch
hed de no es bombastisches Dessertbüffet mitbrocht. Si händ so richtig gediege, sogar mit
Tanzmusig, gfäschtet.
Liebi Güggibuebe und Meitli, einisch meh isch weder es Johr is Land zoge, und jetzt händ’s ad
Säck müesse. Schaffe isch aagseid gsi. Zerscht händ’s d’Chnebelübergab ad 61er gha. De
Vorstand hed weder alles gäh, Tanzmusig, Isatzplän für‘d 60er erstellt, Tischdekoration und
vieles meh händ’s uf d’Bei gstellt. Mit em Felix Steinmann händs e tolle Feschtwirt gha, wo es
Mega Büffet vorbereitet und mitbrocht hed. D’Nidia und de René händ d’Organisation vo de Bar
übernoh und händ de au no ächli chönne uusteschte well’s jo am SchmuDo sogar 2 Bar’s zum
mänätsche gha händ. Alli händ super gschaffet vo de Johrgänger. Sogar grossi, hölzigi
Güggibuebe sind gmacht worde um a de Dorfigäng Reklame für de SchmuDo Ball z‘mache. Sie
händ de 61er so guet gfalle, dass si die noch langem määrte, fascht gschänkt, de 60er abkauft
händ. Jo jo die 61er!
Am schmutzige Donnschtig händ d‘60er de krampfet! Demol isch de Stefan Koch Koch und
Feschtwirt gsi. Und wie chas au andersch si, au er hed e super Job gmacht! Es isch scho toll,
wenn e Johrgang soviel versierte Lüüt i ehrne Reihe hed. Alles hed super klappet und (e paar
händ grad duure gmacht) am Friitig am Morge am halbi 11i isch d’Mehrzwäckhalle wieder suber
abgäh worde. S’OK, vorab natürli d’Lydia, isch über d’Büecher und es hed finanziell so guet
usgseh, dass sofort wieder händ chönne zäme cho zum för alli flissige 60er, e 2tägigi
Schuelreis z’organisiere. Und öb ehr’s glaubid oder ned, gnau jetz wo n’ech die Gschicht
verzelle, sind die Güggimeitli und Buebe z’mizt of ehrere Schuelreis.
Do si zom Glück ned gschtorbe sind, fired si sicher jetz no und i glaube es isch Zyt, dass all wo
namentlich i dere Gschicht vorchömid rasch ufstöhnd, denn ene ghört es bsonder’s grosses
Dankeschön und e riese Applaus!
August 2011 Doris Steinmann