ENAP-CO Tablets COMPOSITION - Pharma Dynamics

SKEDULERINGSTATUS: S3
EIENDOMSNAAM (EN DOSEERVORM):
ENAP-CO (tablet)
SAMESTELLING:
VOUBILJET
Elke ENAP-CO tablet bevat 20 mg enalaprielmaleaat en 12,5 mg hidrochloortiasied.
FARMAKOLOGIESE KLASSIFIKASIE:
A 7.1.3 Vaskulêre medisyne - ander hipotensiewe middels.
FARMAKOLOGIESE WERKING:
ENAP-CO (enalaprielmaleaat en hidrochloortiasied) is ‘n kombinasie van ‘n
angiotensienomsettingsensiem (AOE)-inhibeerder (enalaprielmaleaat) en ‘n diuretikum
(hidrochloortiasied), wat ‘n additiewe antihipertensiewe uitwerking bewerkstellig. Die aktiewe
metaboliet, enalaprilaat, word deur hidrolisering van enalapriel gevorm.
INDIKASIES:
ENAP-CO word aangedui vir die behandeling van hipertensie in pasiënte wat op die individuele
komponente wat teen dieselfde doserings toegedien word, gestabiliseer is.
KONTRA-INDIKASIES:
Anurie.
Hipersensitiwiteit teenoor enige komponent van hierdie produk. In pasiënte met ‘n geskiedenis van
angioneurotiese edeem verwant aan vorige behandeling met ‘n AOE-inhibeerder. Hipersentiwiteit
teenoor ander sulfonamied-afgeleide medisyne. Swanger en borsvoedende moeders (sien
Waarskuwings). Gelyktydige gebruik van litium (sien Interaksies).
WAARSKUWINGS:
Indien ‘n vrou sou swanger raak terwyl sy ‘n AOE-remmer ontvang, moet die behandeling
onmiddellik gestaak word en oorgeskakel word na alternatiewe medikasie.
Indien ‘n vrou swangerskap oorweeg, moet die geneesheer alternatiewe medikasie instel.
AOE-inhibeerders kan fetale en neonatale morbiditeit en mortaliteit veroorsaak wanneer dit toegedien
word aan swanger vroue gedurende die tweede en derde trimesters. AOE-inhibeerders kruis die
plasenta en kan vermoedelik versteuring van fetale bloeddrukreguleringsmeganismes veroorsaak.
Oligohidramnios, wat kontrakture van ledemate, kraniofasiale wanvormings en hipoplastiese
longontwikkeling tot gevolg mag hê, sowel as hipotensie, hiperkalemie, oligurie en anurie is in
pasgeborenes na toediening van AOE-inhibeerders gedurende die tweede en derde trimester,
aangemeld. Gevalle van gebrekkige skedel-ossifisering is waargeneem. Vroeggeboorte en lae
geboortegewig kan voorkom. Intra-uteriene AOE-inhibeerder blootstelling wat die eerste trimester
beperk was, het skynbaar nie hierdie nadelige uitwerkings op die embrio en fetus gehad nie.
Die roetine gebruik van diuretika in andersins gesonde swanger vrouens is nie aangedui nie en dit stel
die moeder en fetus aan onnodige gevaar bloot. Diuretika verhoed nie ontwikkeling van toksemie in
swangerskap en daar bestaan geen bevredigende bewyse dat hierdie middels nuttig in die behandeling
van toksemie kan wees nie. Tiasiede kruis die plasentale skans en verskyn in koordbloed. Gevare sluit
fetale en neonatale geelsug, trombositopenie en moontlik ook ander nadelige reaksies wat in
volwassenes voorkom, in.