Jiva (№ 1, 2014)

№ 1, mes-ot 2014
Jiva
• Personale lingwa-anubav
• Aktuale eventa: 100 yar depos beginsa de
Un-ney Munde Gwer
• Investiga: kosmike ritma e stasa de jen
• Simple texta
1

Swasti!
Walaa un-ney chuka de un-ney jurnal pa Lingwa de
Planeta. Nu he nami it «Jiva» - sim bikos olo es jiva. Pa
jurnal yu mog findi koy rakontas e makalas skriben bay
planetistas, yoshi koy simple texta fo ke yu mog tamrini
yur lidepla, yoshi koy joka e geim fo amusi.
Si yu yao ke pa sekwi-she edita nu adi makala skriben
bay yu, dan sendi ba it a nu, pa Faskitaba to Facebook o
pa Lideplandia-sait lidepla.org.
Nu gro-nadi ke yu pri it!
Lidepla-sait: http://lidepla.org
Lidepla in Faskitaba: https://www.facebook.com/groups/lidepla
Lidepla in VK: http://vk.com/lingwa
Lidepla in LJ: http://lingwadeplaneta.livejournal.com
Jawaba a pazla e enigma (paja 10)
1. talimi, janmi, mata, skay, lerni, nam, kinda, kitaba, chi, mursha, somni, molya, flor,
surya, yunge, syao, patra
2. ridi, shwo, syao, jawabi, gun, docha, son, kinda, kitaba, audi, kan, safari, jamile,
fasile, mushkile
3. Krosworda: 1.bebi 2.somni 3.moneta 4.shop 5.dafta 6.kloka 7.skola 8.stara 9.audi
10.surya
4.1) Jimmi 2) luk 3) 1
Martín Rincón Botero
May anubav om
jengun-ney lingwas
Sedey me wud yao rakonti idyen om may
personale historia gwansi-yen jengun-ney lingwas e
om koy may duma pa sey tema. Kom fo mucho jen,
olo begin-te kun Esperanto.
Mucho yar bak me audi om sey lingwa via may
patra kel shwo a me, ke ye „universale lingwa“ naminey
„Esperanto“. Lu he audi sol nam e konsepta, bat
bu mog shwo pa it. Lu lekti-te om it shayad pa koy
jurnal. Lu dumi pa toy taim ke it es ya koysa nove,
kwasi nove inventa, kom wan kel lekti om nove autoprototip
- toy sorta de teknologia, kel es tanto novem
gaoley, ke it existi haishi sol pa menta de suy kreater.
Lu bu jan-te ke it es koysa yo aika lao, fon prelaste
sekla.
Afte mucho yar, al ke me yo es pa universitet
in Bogota studi-yen komposa, sey tema ek-lai a
may kapa. Me turan yao-te lerni koy nove suonishe
wordaful kosa. Me shuki dan om Esperanto pa
kitabaguan, ewalaa lao lernikitaba den kel-ney nam
me bu remembi al nau.
In beginsa to bin muy amusi-she, tu lerni sey
2

lingwa. Toy lerning bin yoshi aika talimi-she, sikom me
en-samaji mucho om gramatika, por oli sey distintive
finika (examplem -a, -e, -i, -o, -u, -as, -is, -os, etf.) ke
oni sempre yusi fo marki farke gramatike elementa.
Me pri-te Esperanto kom kwasi arta-gunsa. Me to
komposer fasilem mog imajini komo doktor Zamengof
kom vere artista selekti-pren wordas fon westa-ney
lingwas al gro-mediti-analisi li-ney prope karakteres e
ti li hunti mutu na resulta.
Esperanto es al nau zuy shwo-ney jengun-ney
lingwa in munda: sirke 50 mil jen janmog shwo it e
oftem yusi it, e pyu kem 1 milion jen janmog pyu o
meno lekti it.
Doktor Zamengof publiki un-ney syao kitaba om
Esperanto pa yar 1887, afte pluri-yar-ney gunsa. Toy
kitaba konteni introdukta, fule gramatika do 16 regula
e worda-lista (pyu pravem, riza-lista) do sirke haf-mil
worda (riza).
Un-ney kitaba es publiken in Rusia, bat versu
beginsa de 20-ney sekla esperantista ye yo in mucho
landa. Depos 1905 ol-munda-ney esperantista-asembla
gei fai hampi kada yar.
Al nau ye aika mucho jurnal, kitaba, radio etf. pa
Esperanto.
Himna de Esperanto
(beginsa)
Inu munda lai un nove senta
E pa munda go un forte voka;
E bay alas de ajile feng nau
Hay it flai fon lok’ a otre loko.
Bu a duszian toy hema-pyase
Den familia jen-ney it atrakti,
Bat a munda kel dushmani sempre
Den harmonia, libritaa it wadi.
Yedoh afte para mes me findi mushkilitaa pa
sey lingwa. Ye kelke kosa kel es simplem mushkile.
Pa exampla, sey fakta, ke oni mus sim memorisi
transitive e butransitive verbas, dabe pravem yusi
akusativa, it bin mucho pyu kem to ke may kapa mogte
duyfu pa toy taim. Sertem simile problema mog enye
al lerni otre lingwa, examplem, doiche (me jivi al
nau in Lubek e majbur lerni it), bat den Esperanto me
pri-te sol fo amusa, e si it hev sey dela ke oni bu hev
vaika pa espaniol, may mata-lingwa, - se bu es koysa
ni fasile ni drole...
3

Naturalem me geti inu lekting om otre simile
lingwa-proyektas, dabe may amusa wud mog fai for.
Tak me lerni shwo idyen Ido e me lekti om Novial e me
findi mucho tal proyekta, mucho pyu kem me imajinite.
Den Novial me pri osobem, bat it bin buposible
findi jenta kel shwo it, e proyekta es maistegrad frosten.
Dan me findi Lingwa de Planeta. Sey proyekta es
fo me muy interes-ney. It bin un-ney ves ke me vidi
Asia-ney wordas inklusen, e se dai tak-tu-shwo exotike
masala a lingwa. Wordas es hir generalem kurte e
sonore. It suoni a may aures muy hao e gramatika es
muy fasile.
Interlingwa fasilem mog bi pyu riche kem
fransejen shwo na inglish, pyu elegante kem
danskejen shwo na franse, pyu vigorful kem
doiche de koy italianos, pyu jamile kem italiano
de inglish-jenta, pyu nuansaful kem ruski de
doiches e pyu «domlik» kem may janmalingwa
shwo-ney bay ruskis. Sikom nuy lingwa es
helpalingwa, oni mog justem kompari it sol
kun naturale lingwa shwo-ney bay auslander.
Dan ye nixa fo shami.
Otto Jespersen (autor de Novial)
Objeta kontra interlingwa
Oni shwo oftem ke konstrukti-ney lingwa
bu mog bi sam hao kom naturale-la. Ver, nuy
internasion-ney lingwa bu es tanto riche kom
inglish, ni tanto elegante kom franse, ni tanto
vigorful kom doiche, ni tanto jamile kom italiano,
ni tanto nuansaful kom ruski, bu es tanto «domlik»
kom nuy janmalingwa. Oni laudi e valorisi oli sey
hao kwalitaa de nasion-ney lingwa, bat oni fogeti
ke lingwa hev sey kwalitaa sol wen janma-shwoer
yusi it.
Atarafi-yen toy kwasi fanatike sentas kel ye
pa Esperanto-munda, me dumi ke it wud bi muy
hao si mucho pyu jenta wud lerni koy jengun-ney
lingwa. Bu es muy muhim kwel. Si 6 miliarda jen
lerni kolektiva-nem vaika 5 „internasionale lingwa“,
problema de internasionale komunika wud bi
maistem paliaten.
Sey tema mah me remembi lingwistike halat in
Lubek inter auslander. It es maistem drole e konfusishe
pa same taim tu shwo pa doiche kun otre
auslander, osobem kun Asia-jen. Me kwesti swa kwo
li wud dumi om tal lingwa...
4

5
Pa sey yar es 100 yar depos beginsa de
Un-ney Munde Gwer. Es hao kausa fo mah
swa remembi om sey gro-disasta de 20-
ney sekla.
Neutrale statas
Sentre statas
Aliansa-ney statas
Olivier Simon
Un-ney
Munde Gwer
Munde Gwer Un oposi dwa sistema de aliansas:
pa un taraf, Triple Antanta (Frans, Rusia, Unifen
Regilanda), pa otre - «Sentre Imperias» (Doichland,
Osterraih-Majarorsag). In kada koalisia un stata es
tayar fo riski arma-ney konflikta dabe resolvi swa-ney
inen-ney krisa: Imperia Rusia blisifi a revolusion, e
Imperia Osterraih-Majarorsag es vaste konglomerat
de jenmines Dunay-ney, feblisen bay interne
problemas.
Krisa explosi pa 28 mes-sit 2014, afte kila de Franz
Ferdinand, hereder de tron Osterraih-Majarorsagney
in Sarayevo (Bosna), kila om kel kabinet Wienney
mah-responsi direktem Serpska. Afte ultimatum
refusen, Osterraih-Majarorsag ataki Serpska. It-ney
alianser Rusia desidi suporti it, kunpren-yen Frans
e poy Unifen Regilanda, al ke Doiche Imperia hunti
a swa-ney alianser Osterraih-Majarorsag. Pa 2 mesot
1914, Europa es agnisi-ney. Duran sekwi-meses,
turk-Osmanli-Imperia hunti a sentre Imperias, e Italia
zin Antanta. Farke stabas expekti kurte gwer, do ajile
armee muvas. Nulwan gesi komo mucho da agnimahta
de moderne armas mog shanji olo.

6
In westa, doiche armee probi invadi Frans fon
norda, tra Belgie, yedoh sun gei bloki pa Marne riva
(mes-nin 1914). Pa mes-shi ambi armee oltaim trai
sirkumi mutu al fai handak, til ateni Norde Mar. Duran
yar 1915 oni trai rupti sey fronta, bat oli traisa fali, e
muchos gei kili.
In esta, buhao tayaren Rusia subi grave hasimas,
bat grantaa de it-ney teritoria mah-buposible a sentre
Imperias den fin-ney jita.
Fon 1915 a 1918 ye gwer do exosta, osobem kruele
por nove armas, kom toxin-gases. In 1916, probas de
fronta-rupta kili, sin resulta, kelke sto mil jen (batalas
de Verdun, de Somme). In gwer-ney landas sarwe
mobilisa de ekonomike medias gwansi ol populasion
e mah-degradi jiva-kondision. Gwer gwansi mar-ney
pin-daos toshi. Unifen Regilanda e Frans trai marbloki
Doichland, ewalaa it jawabi bay submarine gwer,
torpedi-yen nochauke komerse shipes de landas i
gwer-ney i neutrale, also gwer gwansi oltaim pyu
mucho landa e fa verem munda-ney.
In 1917 fatiga e falta de kuraja fa-gran. Por li enye
gunstopas in Frans, e revolusion in Rusia mah sey
landa stopi batali in mes-tri de 1918. Bat Rusia-ney
lusa es kompensi-ney fo Antanta bay ke Unifen Statas
zin gwer pa swa-ney tur (mes-char 1917).
US suporti Antanta, un-nem ekonomikem, poy
armee-nem, al ke exosta de Doichland fa-gran e
disturbas in Osterraih-Majarorsag ribegin. Sub
unisi-ney komanda de franse general Fosh, Antantamembas
rupti doiche fronta in saif 1918. Pa mes-shiun
Osterraih-Majarorsag stopi batali, al sta pa fule
krusha. Revolusion dan explosi in Doichland al mah
imperia-ney staba demandi gwer-stopa kel eventi pa
11 mes-shi-un 1918.
Al nau situasion pa nuy planeta es snova aika
mushkile, iven danjaful: it mog dukti ya iven a nukleare
munda-gwer.
Generalem, organisa de nuy sivilisasion es buhao.
Kada landa konkuri kun kada otre-la e yao pai pyu profit,
pyu resursa. Pa sey dao jenley mog tabahi. Oni nidi
humanistike transforma de sosietaa, dabe farke landa bu
luchi kun mutu bat helpi mutu. Sol unifen jenley mog
ausjivi e sigurem go inu futur.
Por se devisa de lidepla es «Pro unitaa de Arda!»

Dmitri Ivanov
Kosmike ritma
e stasa de jen
Jen-ney stasa dependi fon mucho faktor,
partikularem fon stasa de surya, fon stasa de ol
surya-sistema. Walaa un interes-ney graf. Kalkula
es basi-ney on sertene astronomike data e reflekti
shanja de pluri fisike parametra de surya-sistema.
On graf ye dwa kurva: blu-la e rude-la. Blu
kurva karakterisi interne HARMONIA de suryasistema,
rude kurva deskribi ENERGIA, aktivenesa.
20.07. 30.07. 9.08. 19.08 29.08 08.09. 18.09. 28.09. 08.10 18.10
Wen blu kurva es sobre nol, stasa es
harmonike e stabile. Es sirke dwa trifen (2/3) de
taim. Wen valu de blu kurva es negative, stasa de
eni organisma bikam noharmonike, nostabile.
Wen rude kurva es sobre nol, stasa es aktive,
ful de energia. Ye vigor, kreativitaa. In tal perioda es
hao tu fai kreative gunsa. Wen rude kurva es sub
nol, jiva-aktivitaa lwo. Es kwasi perioda de reposa.
Tu fai kreative gunsa in tal perioda es mushkile.
Oni vidi ke mes-ot e mes-nin de yar 2014 es
ambi mes do positive harmonia e do maistem positive
energia (exepte beginsa de mes-ot). Fon graf bu es klare
ob energia es positive in beginsa de mes-nin (kurva es
ga bli nol); data shwo ke energia es idyen sobre nol.
7

Budavem un-ney papir-kitaba pa lidepla es
publiken. Es «Alisa-ney Aventura in Divalanda».
Hir nu wud yao prisenti poema to preworda.
On akwa lentem glidi nu
sub golde surya-ray.
Dwa syao bracha bukushal
zai remi ga bukway,
e syao handas bu oltaim
dirigi bota pai.
Tri wan sin pita! Garme es,
me yao somni gro.
Yedoh yu pregi dabe me
koy fabula wud shwo.
E kontra tri pa hunta vos
un sole vos mog kwo?
E Un-ney wan sin dera fai
edikta de «Begin ya!»
E Dwa-ney pregi dabe ye
«absurdika in it ya!»
E Tri-ney interrupti me
bat bu oltaim. Merit’ ya.
E nau yo silensa ye
e fabula begin,
e gela chaukem zai go
tra diva-ney shulin,
amigem shwo kun farke wan
e inu garden zin.
Walaa, fantasia fa-wek,
suy kwan yo suhefai.
«Me finrakonti olo poy,» -
ajorni fin me trai.
Bat «Es yo poy, kontinu ba!»
felise voses krai.
Tak kresi sey rakonta for,
pyu longe it bikam,
eventa chu, un afte un,
ajib e nopinchan.
A dom zai go alegre tim
sub surya do aksham.
Alisa! Pren kitaba sey
e pon a plasa tal,
wo kinda-drima jivi for
sub taim-ney vual,
kom wander kipi faden flor
fon blage landa dal.
8

Si es haishi mushkile fo yu tu lekti gran texta pa lidepla,
hir yu mog lekti dwa syao fasile yuma-rakonta.
In sey dwa texta oli zwo-worda es marken rude e oli
kwo-worda marken blu.
«Simple texta» es originalem bay L.A.Hill, piktura bay Anna Veltfort
Al bi skola-gela, Meri Smit yao-te bikam talimer, bikos
ela gro-lubi kindas. Ewalaa al hev dwashi-un yar, ela
begin talimi in syao skola. Ela es hao talimer, ela ridi
mucho kun kindas tuhun. Li pri ela.
Undey un gela de elay klas shwo: «Mis Smit, way manney
har fa-grey bifoo ta-ney mustash e barba?»
Meri ridi e jawabi: «Me bu jan, Helena. Way suy har
fa-grey bifoo mustash e barba?»
«Me toshi bu jan, mis Smit», Helena jawabi, «bat he
eventi tak an may patra». Otre kindas in klas ridi al
audi se.
Poy un boy shwo: «Me jan, mis Smit. Man-ney har
sempre fa-grey pa un-ney bikos it es pa shi-sit yar pyu
lao kem mustash e barba».
Simple texta
Jinni safari pa Nyu-Ingland bay auto. Unves ela
stopi in syao vilaja dabe kan jamile lao kirka. Bifoo
it ye kabralok, e un lao man zai rasti herba sirkum
kabras.
Jinni chu auto, zin kabralok e kan kelke kabra.
Poy ela go-lai a lao man e shwo a ta: «Hao sabah! Sey
vilaja, ob jenta oftem morti hir?» Lao man stopi gun
fo kelke sekunda, kan Jinni atentem, poy shwo: «Non,
li morti un ves».
Jinni ridi al audi se, poy shwo a lao man: «Skusi.
Me bu he shwo se pravem. Me sal kwesti otrem: sey
vilaja, ob mucho jenta morti hir?»
Lao man snova stopi gun. «Ya», ta shwo, «li oli
morti». Poy ta en-rasti herba snova.
9

Nu plei ba!
1. Findi ba 17 lidepla-worda!
H T A L I M I Y V Z
J A N M I W M A T A
S K A Y L E R N I R
N A M K I N D A P Y
L X G K I T A B A V
C H I M U R S H A K
S O M N I M O L Y A
S F L O R S U R Y A
Y U N G E S Y A O C
Y L P A T R A H P U
2. reposi al klosen okos
6. kosa kel konti taim
7. wo kindas lerni
8. oni vidi it in skay pa nocha
9. kan - vidi, slu - ...
6
4
8
5
10
7
2
3
1
1. muy syao kinda
3. un-ge mani
4. wo oni kupi koysa
5. oni skribi in it
10. it dai a nu luma e
warma
2. Kwel worda es?
idri
hows
ayso
bjaaiw
ugn
ahodc
ons
kdnai
abatik
idau
ank
asfair
liemaj
ilefas
emiuklhs
atam
Jimmi-ney mata hev 4 kinda. Unney-la
nami Undi, dwa-ney-la nami
Dwadi, e tri-ney-la nami Tridi. Kwel
es nam de char-ney kinda?
9
Un yar hev 12 mes.
7 mes hev 31 dey.
Kwanto mes hev 28
dey?
Wen yu mah may derma wek,
me bu plaki. Bat yu plaki gro.
Me es kwo?
10