Plani i Përgjithshëm Kombëtar "Shqipëria 2030"

Ky plan u hartua me kontributin e vyer të një numri të gjerë ekspertësh të
fushave të ndryshme të zhvillimit ekonomik, social dhe ekspertë të planifikimit të
territorit, specialistë, teknikë, punonjës të administratës shtetërore, profesorë
dhe përfaqësues të fushave të ndryshme të akademisë, pjesëtarë të organizatave
jofitimprurëse, përfaqësues nga biznesi, përfaqësues nga pushteti vendor, si edhe
qytetarë të ndryshëm, që me pjesëmarrjen aktive në një numër të madh takimesh
konsultative kontribuan në hartimin e vizionit për zhvillimin e Shqipërisë në 15
vitet e ardhshme. Plani është rezultat i punës së përbashkët dhe të palodhur
të specialistëve të Agjencisë Kombëtare të Planifikimit të Territorit (AKPT) dhe
Ministrisë së Zhvillimit Urban (MZHU), të cilët për gati dy vjet kontribuan për
të finalizuar këtë dokument, i cili është i pari i këtij lloji për vendin tonë që sjell
një kornizë të integruar të zhvillimeve territoriale të ndodhura deri më sot dhe
parashtron një model zhvillimi afatgjatë dhe cilësor për Shqipërinë 2030.