REVISTA ASINEC

Cun sinxelo, singular e belo limiar de Osl, tributado á particular
illa de Sálvora, principio a segunda volta xirada ao concello de Santa
Uxía de Ribeira, centrándome nesta ocasión nalgúns dos seus magníficos
espazos naturais e arquitectónicos que se esparexen de xeito
xeneroso polo marco xeográfico que abranguen as súas nove parroquias:
Aguiño, Artes, Carreira, Castiñeiras, Corrubedo, Oleiros,
Olveira, Palmeira e, como é lóxico, a súa capital, Ribeira. Centrareime
nesta entrega nas que saliento con fondo vermello no mapa
que leva por encabezamento “distribución das parroquias”, e dado que
a primeira colaboración sobre estas máxicas terras aconteceu no
complexo húmido de Corrubedo -por motivos persoais- aos pés da
súa marabillosa duna tomo –para a segunda- como punto de saída a
poboación mariñeira de Corrubedo por estar preto dela.
20.08.2011 – CORRUBEDO
12:30 H.Un resplandecente día. Baixo do vehículo e nunha máis que
afable volta polas coloristas canellas desta poboación déixome levar
pola música que, cal canto de serea, me seduce acaroándome á súa
praza principal. Alí o xentío arremuíñase arredor dalgúns toldos
improvisados tentando acalmar a sede con auga, viño ou cervexas.
Hei de recoñecer que non son amigo das multitudes, máis ben procuro
o sosego e, naquel intre, cato un espazo que se presta a iso: o
espigón. Non tardo en chegar á súa punta na que uns pescadores
tentan á sorte, a verdade, con pouco fado. En vista do “éxito” recollen
os seus aparellos deixando o sitio baleiro o que me permite ollar
a pracer unha belida postal que só a natureza é quen de ceder: os
magníficos areais de Lobeira e Ferreira. Nun segundo plano unha
soberbia vista da sempre omnipresente duna e na parte máis elevada
case acariñando o ceo o monte Tahume, un dos seus protectores.
Mentres albisco –durante un bo anaco- este milagre da natureza
achéganse aos meus oídos as notas do tema Romeo e Xulieta de Pyotr
I. Tchaikosvky, interpretada pola Orquestra Filharmónica de Berlín,
baixo a batuta do xenial Herbert Von Karajan. Que máis podo
pedir, unha incrible paisaxe, unha deliciosa melodía, o lene recendo
que flúe do mar, todo iso nunha agradable compaña.
Monumento a os desaparecidos no mar - Corrubedo.
Cabana nunha das rúas do pobo de Corrubedo.
Faro de Corrubedo, situado no cabo que leva o seu mesmo nome, na compaña dunha xigantesca rocha disposta a fagocitalo - Corrubedo.
Colaboración 27