Convocatoria - Servizos de Persoal - Universidade de Vigo

Cuarta. Relación de persoas admitidas e excluídas.
1. No prazo máximo de 15 días naturais dende o remate do prazo de presentación de
solicitudes publicarase nos lugares indicados na base 2.4. a relación provisional de persoas
admitidas e excluídas, con indicación dos motivos de exclusión. Quen presentase a súa
candidatura disporá dun prazo de cinco días hábiles para a subsanación das causas de exclusión,
de conformidade cos requisitos de participación, así como impugnar os criterios de valoración
aprobados polas Comisións Específicas de Área de acordo coa base 5.4.
2. Posteriormente ditarase unha resolución reitoral aprobando a relación definitiva de persoas
admitidas e excluídas. As reclamacións entenderanse resoltas coa publicación da lista definitiva.
Quinta. Valoración dos méritos.
1. Os méritos serán valorados por unha Comisión Específica de Área, composta por cinco
docentes elixidos polo respectivo Consello de Departamento, que se someterá na súa actuación
ao previsto na Lei 30/1992, e deberá procurar unha composición equilibrada entre mulleres e
homes, salvo que non sexa posible por razóns fundadas e obxectivas, debidamente motivadas. A
Comisión estará formada por docentes da área de coñecemento ou, no seu defecto, de áreas
afíns e con titulación, categoría e adicación igual ou superior á da praza de que se trate.
En base ao previsto no artigo 26 do II Convenio Colectivo para o persoal docente e
investigador, asistirá á comisión con voz e sen voto unha persoa proposta pola representación dos
traballadores sempre e cando sexa designada no prazo de dez días desde a notificación por
parte da universidade.
2. A Comisión quedará validamente constituída coa asistencia de catro membros con voz e
voto e poderá actuar coa participación, cando menos, de tres (con voz e voto), requiríndose
sempre a presencia da persoa que a presida e de quen ocupe a secretaría ou, de ser o caso, das
persoas que as substitúan. En caso de ausencia de quen exerza a presidencia será substituída polo
membro da comisión de maior xerarquía, antigüidade e idade, por esta orde.
3. O baremo para a cualificación de méritos das persoas que concursen será o establecido
no anexo I.
4. No mesmo acto de constitución, a Comisión Específica de Área establecerá os criterios de
valoración de méritos, que poderán matizar ou cuantificar o baremo con maior detalle. Ditos
criterios faranse públicos a partir do día seguinte ao da publicación da presente convocatoria e
como máximo coa relación provisional de persoas admitidas e excluídas. De existir calquera
incompatibilidade, o baremo do anexo I prevalecerá sobre os criterios de valoración da Comisión
Específica de Área. Ditos criterios poderán ser recorridos de acordo co establecido na base 4.
5. Recibida a documentación das persoas aspirantes admitidas, a Comisión Específica de
Área disporá dun prazo de dez días naturais para avaliar os méritos e propor a adxudicación da
praza. De estimalo necesario, poderá acordar a realización de entrevistas. A Comisión adoptará
os seus acordos por maioría dos membros presentes e no caso de empate, decidirá o voto de
quen exerza a presidencia.
Páxina 5 de 26