enri george felibre de l'autar felibre majourau - Université de Provence

Toun Paire s'es fa sourd e ié vènes en òdi!
A lou prega, testard, n'auras perdu la mòdi
Li pecat dóu bas mounde, ah! lis as pres sus tu?
De lou metre en coulèro an agu la vertu!
Remarco à quant de gènt, de meichant, d'imbecile
Ti doulour e ta mort ié saran inutile:
Dins touti li païs, de tout age, toustèms
N'i'aura tant e pièi mai que n'en saras countènt!.
JÈSU
Paire sant, ausès-me! Se noun pòu, lou calice,
Passa sèns que lou bègue, eh! bèn! vous benesisse!
Que vosto voulounta se fague, e noun la miéu!
Vai-t'en d'aqui, Satan! Vai-t'en, orre roumiéu!
UN ANGE (d'abord voues dins la coulisso de gaucho)
(L'ange se mostro un fau, de davans lou Criste, e tenènt un calice).
An! Dau!! Courage, Agnèu de Diéu!
L'Amour à mouri vous counvido.
Es pas que ié fugue agradiéu;
Mai lou fau pèr d'eterno vido.
Ansin la justiço lou vòu:
Tout dèute uman fau que se pague!
Dou sacrifice agués pas pòu:
Que lou voulé divin se fague!
Que lou vièi dre de Lucifer
Sus la raço d'Adam fenigue!
Que, di reclama pèr l'infèr,
Lou mouloun triste demenigue
Adam e tóuti sis enfant,
Evo, sa femo, emé si fiho
Espèron lou gèste escafant
Em'aquéu que recouncilìo...
Se vòsti doulour, voste sang
Soun pèr d'ùni causo perdudo,
Avisas la tiero di sant
A vòstis iue noun escoundudo.
Vesès d'avanço li souspir,
Li prègo de vòstis amanto,
E lou courage di martir,
E la fe dóu crestian que canto!
Avisas li repentimen
Que naissiran sèns faus acòrdi:
Fau que se posque, eternamen,
Lausa vòsti misericordi!
Ausissès lis inne pious
L'ANGE