Premio Valnerina - i 2 Colli

L‘urtimu sensu te ‘sta storia Francesco Palermo
Torchiarolo (BR)
Quante stagioni ca ha minate!
Scuntentu te lu osce, spittandu lu crai,
spirando li paraisi ca te sunnai,
inchiendu li giurni te cose pirdute.
Quante primavere ca ha sprecate,
invece cu ssapuri l’arviri fiurire
pinsavi alle spiagge e allu mare,
cu la capu già alle ferie te lu state!
E quandu rriava la bella stagione,
eccu ca subitu pirdivi la pacienza:
«Ce cautu caface! Ce sofferenza!
Preferiscu lu friscu allu solleone!»
Ma mancu l’autunnu era ‘nagoduria:
cielu gonfiu, ogni arviru stugghiazzatu,
e poi lu nviernu, troppu rricilatu,
a chiutere lu sipariu te la storia.
In ritardu, e quistu ete lu piernu!,
osce ha capitu, era ura!,
ca nu‘ sempre c’è n’aura primavera
a scartare le malisciane te ‘nu ‘nviernu.
Fucendu se cunsuma ogni stagione,
comu allu sule se scuagghia la nie,
e quando curta diventa pe tie,
la vita te moscia la vera ragione:
l’amore, e poi ancora l’amore!
Quistu lu sensu te lu scire te ognunu,
sia essu sutta, sia essu patrunu,
quandu se nasce e quandu se more!
Succederà ca la luna se alterna allu sule
e poi lu nviernu alla primavera
ca sta vita è ‘na giostra ca gira,
ma mai egna nuttata ‘ntra lu core
ne nviernu ‘ntra l’anima toa.
Ama e vivite ogni stagione noa!
Mai, propriu mai, sarà ‘na curpa l’amore!
49