versione pdf - Sardegna DigitalLibrary

TEMA II: AMORE A SA FAMIGLIA -
AMORE DEU - A SA PATRIA
1. Sozu (1’07’’)
Tzessàdela unu pagu sa puntiglia:
non sias, Bortigale, buldellosu
e po pagos minutos de riposu
no ti fetat in palcu meraviglia:
como che at unu tema famosu,
mi est tocadu s’amore de famiglia.
Est su chi su coro ‘e totus bramat:
chie tenet famiglia est chi l’amat.
2. Piredda (52’’)
Prosighende sa gala a giampu-jampu
dadu ch’imposu l’at sa circustàntzia:
risultadu si ch’est su primu rampu
no si peldet in totu s’isperàntzia.
Consumada sa prima pietantzia
como s’abberit un’àteru campu:
a bos narrer it’est su tema meu
mi est tocadu de amare a Deu.
3. Seu (54’’)
Deo puru lassadu aia arressu
su tema ‘e su nàschere innotzente.
Però sa gara est fatende progressu
pro òrdine de s’illustre presidente.
So eo puru ’e amore in possessu
però tenzo un’amore diferente
e bos devo cantare in poesia
s’amore ch’apo a sa pàtria mia.
33

Bortigali 1959 PEPPE SOZU - ANTONI PIREDDA - JUANNE SEU
34
4. Sozu (1’03’’)
Su comitadu e-i su presidente
nos at traciadu bellìssima istrada.
Ma s’abberu li damos un’ojada
dognunu est a famiglia appartenente:
in sa famiglia bi est dogni parente,
est s’ungia sempre a sa carre atacada.
No disprezto ne pàtria e ne Deu
però sos mios sun sàmbene meu.
5. Piredda (48’’)
Si deo a Deu l’apo veru amore
ca issu solu est s’eternu sovranu
e issu contat su sumu fatore
. . . . . . . . . . . . pianu
dadu ch’este s’eternu criadore,
bénnidos totu da sa sua manu.
Duncas deo nde devo esser gratu
devo amare a chie mi at fatu.
6. Seu (57’’)
Deus l’ischimus chi meritat fama
e in famiglia no b’at mancia peruna.
Ma difendo sa pàtria cun brama,
la dia cherrer in bona fortuna,
ca sa pàtria contat una mama
ca unit sas famiglias totu a una.
E chie est sa mezus mama ‘e grandesa
istimada merìtat e difesa.

TEMA II: AMORE A SA FAMIGLIA - AMORE A DEU - AMORE A SA PATRIA
7. Sozu (59’’)
In sa famiglia bi est dogni recreu,
si mancat cussu amore tando adios.
Po sa famiglia in tempus bellu o feu
dognunu versat su suore a rios.
A mie at fatu mannu babbu meu
e deo mannos fato a fizos mios.
Non dia cherrer chi nisciunu patat,
mezus amore ‘e cussu no si agatat.
8. Piredda (52’’)
Cant’’alet Deu si podet ischire,
este incummentàbbile un’iscena.
In custa terra ognunu a s’ingrandire,
unu s’àteru ponet in cadena.
Ma Deu no permitit a bochire,
ne cheret a tocare cosa anzena
ca puite s’eterna podestade
at preigadu amore e caridade.
9. Seu (1’02’’)
Si semus de amore sitibbundos
creo ch’istimo sa pàtria vera
ca devet esser in coro s’impera
no sun de tzertu amores moribbundos
calicunu s’immolat in s’aera
e chie in sos oceanos profundos
fina sa morte isfidana cun coro
ma pro amare sa patria insoro.
35

Bortigali 1959 PEPPE SOZU - ANTONI PIREDDA - JUANNE SEU
36
10. Sozu (56’’)
Ma inue esr s’amore e-i s’afetu
ch’at sa persona pius genuina?
Da chi sa paghe minetat ruina
betan sa cartolina ‘e pretzetu
ma a recuire de domo a su letu
no bi cheret nemmancu caltolina:
s’amore ti che jamat solu-solu
poite in domo b’at dogni consolu.
11. Piredda (45’’)
Amigos caros, prego de iscultare:
naro a omìne coment’e femina.
E duncas sa peràula divina
po totucantos siat esemplare
ca cando deves fizos educare
lis deves imparare sa dutrina
cumprida de amore e de passéntzia
poi ti purifìcat sa cusséntzia.
12. Seu (55’’)
Cando s’idet sa patria in fastizos
est dovere chi siat aggiuada.
Pro no esser sa terra violada
faghen fin’in sas armas sos manizos.
Adelàide sa mama famada
at mandadu a sa gherra bator fizos:
sa pàtria. in coro tenet frima
e de sos fizos li at pius istima.

TEMA II: AMORE A SA FAMIGLIA - AMORE A DEU - AMORE A SA PATRIA
13. Sozu (1’03’’)
Adelàide a mie po niente
no mi nd’importat, mi paret machine
ca sa famiglia at un’àteru fine:
a la muntennere in paghe sa zente.
Diat cherrer chi dogni continente
làcana no bi tenzat ne confine:
sentza esister ne gherra e ne lua,
dognunu trancuillu in domo sua.
14. Piredda (42’)
Bonu proe ti fetat, bonu proe
si ti difende sa patria romasa.
Però de la difender ite nd’asa?
Semplicemente contas un’eroe.
Ma su chi acuistadu ti as oe
mi’ chi leare ti lu poden crasa.
Mentres po Deu no si leat nudda
e-i sa sede restat sempre cudda.
15. Seu (56’’)
In su mundu si agatat zente mala
e a sa gherra semus obbligados.
Puite est Garibaldi in altos grados?
Ca sa patria at difesu a dogn’ala:
partit dae su portu ‘e Marsala
cun milli volontàrios soldados,
no at tancadu ‘e sa gherra sa janna
fintzas ch’at fatu sa pàtria manna.
37

Bortigali 1959 PEPPE SOZU - ANTONI PIREDDA - JUANNE SEU
38
16. Sozu (54’’)
Vitoriosu e nemmancu isconfitu
deo non chelzo d’istare in cust’ora.
Ammenta Erode su bàrbaru editu
a Cristos pro ‘ochire ‘ogat a fora,
santu Zuseppe cun Nostra Segnora
a d enote si fuin a s’Egittu:
afrontan su desertu a bonu coro
po salvare su caru fizu insoro.
17. Piredda (49’’)
Ite ‘alet sa fama in su terrinu?
Bolat e fuet che-i sa chijina.
Mentres si miras a santu Martinu
chi in coro aiat s’amore divina
unu póveru at àpidu in caminu
e divisu at sa sua mantellina
ca si s’amore ‘e Deu lu providit
fina sa ‘estimenta si dividit.
18. Seu (52’’)
Un’ojada bi dade a su Balilla
mancari siat in tempus lontanu.
Cando non fit sa pàtria trancuilla
ca l’aiat invasa su tiranu
una pedra lanciadu at cun sa manu
e at atzesu sa prima iscintilla.
Tando sa gherra est chi s’est allumada
fintza a chi l’at sa pàtria salvada.

TEMA II: AMORE A SA FAMIGLIA - AMORE A DEU - AMORE A SA PATRIA
19. Sozu (1’04’’)
Tue ‘e Martinu mi as fat’a ischire,
cuntzetu chi mi sonat in s’orija.
Ma da chi in-d-una domo den sufrire
chi no b’at robba in peruna falija
cantas mamas si segan sa camija
po fagher a su fizu su ‘estire.
Est s’amore ‘e sa mama, ite disizu:
s’ispozat issa po ‘estire su fizu.
20. Piredda (45’’)
S’amore ‘e Deu pessa beneita:
sa pius bella, sa pius umile.
Damos una mirada a santa Zita,
selvidora cun zente signorile,
e totacanta sa paga mensile
paltiat a sa zente poverita.
Cuss’est s’amore perenne e sovrana:
a dare pane a cuddos chi no nd’ana.
21. Seu (50’’)
Ja ch’azis bois fentomadu a Deu
cheret a ponner sa patria in pe’
ca l’at promissa a su pópulu ebreu,
a ti nd’ammentas, per mesu ‘e Mosè.
E leadu at s’ispada Giosuè
pro che ‘ogare s’inimigu feu:
duncas si devet sa patria atèndere,
l’at nadu fintzas Deu a la difèndere.
39

Bortigali 1959 PEPPE SOZU - ANTONI PIREDDA - JUANNE SEU
40
22. Sozu (1’04’’)
Deo non ponzo sas gherras in bàlia
ma apo onore a sa famiglia intera.
Nàrami cantos fizos de s’Itàlia
no sun bessidos dae frontiera
e sunu tribagliende in miniera
in su Belgiu, in Olanda, in Austràlia.
Dognunu afrontat penas che unu cane
a sa famiglia pro buscare pane.
23. Piredda (45’’)
Mosè ja fit un’ómine pretzisu
che patriarca ‘e cusséntzia neta
però s’invocat a su paradisu
cand’’idet da s’Egittu sa mineta:
at iscutu tres colpos de bacheta,
sas undas de su mare ada divisu.
Pruite Deus podet provedire,
faghet fintzas sas undas dividire.
24. Seu (54’’)
Beru, su fizu partit in lestresa
pro che ‘ogare a sos fizos s’apititu.
Però cheret sa pàtria difesa
cando li tenes amore infinitu:
ammenta ‘e sa Brigata sassaresa
ch’afrontaiat fogu e ferru fritu.
Ca an’istimadu sa pàtria digna
de gloria ‘estidu an sa Saldigna.

TEMA II: AMORE A SA FAMIGLIA - AMORE A DEU - AMORE A SA PATRIA
25. Sozu (55’’)
Juanne, intende una cosa a s’iscuja
ma no chelzo a nde narrer a Piredda.
Sa pàtria nde leat una chedda
po los fagher a una salamuja:
cando ti ponet in camija niedda,
cando ti ponet in camija ruja.
Ma cussos fizos mortos dae ora
sunu sas mamas pianghinde ancora.
26. Piredda
Est beru, Peppe Sozu no at faddidu:
deo no ti lu poto dennegare:
ca ‘enit obbrigadu un’individu,
a malu coro bi devet andare.
E si càmbio a sa pàtria paltidu
si podet su guvernu cambiare
su guvernu ‘e Deu . . . . . .
. . . . . . . . . . . . . . .
27. Seu
. . . . . . . . . . . . . . . .
. . . . . . . . . . . . . . . .
. . . . . . . improvisadore
dae sa manos mias no si nd’andat
. . . . . . . cambiare su colore
lu faghet solu chie la cumandat
T’ammentas chi sa pàtria nadia
cunservat sempre unu colore ebbia.
41

Bortigali 1959 PEPPE SOZU - ANTONI PIREDDA - JUANNE SEU
42
28. Sozu (51’’)
Sa mama cun su fizu faghet festa
da chi un’ucone ‘e pane bi at in banca.
E s’amorosa istima manifesta
l’at sempre dimustradu a facia franca.
Ma sa pàtria o ti tirat a dresta,
s’atera ‘olta ti tirat a manca.
E tue tentas a issa ‘e l’amare,
no ischis mancu a s’ala ‘e ti che dare.
29. Piredda (47’’)
Mi’ sa vida terrena est unu ‘entu,
pagu ‘alet su ruju e-i su grogu.
Bos ammentades chi a santu Lamentu
l’ana cun sas torturas post’in giogu:
l’an preparadu unu letu de fogu
e l’ana cotu a calore lentu.
Pensende a sas eternas giojas raras
est ispiradu cun Deus in laras.
30. Seu (48’’)
De sa pàtria fatende un’istràtziu
tue pretendes chi a tie m’inchine.
Però non penses chi ancora la fine
ca ti chelzo lassare bene sàtziu.
Sa pàtria significat s’ispàtziu
chi b’est da s’unu a s’àteru confine:
cussu s’amore in su coro mi eternat,
non so cantende a chie la guvernat.

TEMA II: AMORE A SA FAMIGLIA - AMORE A DEU - AMORE A SA PATRIA
31. Sozu (50’’)
Est sa pàtria unu cantu ‘e terrinu
poite tue de l’amare as brama.
Si unu fizu una fiza as vicinu
o tenes unu babbu e una mama
ja ti palpitat su coro in su sinu
chi lu tenet atzesu che fiama
ja no ti ‘enit coro ‘e fagher gherra
po unu cantu o duos in sa terra.
32. Piredda (45’’)
Non diventes, Juanne, unu diàulu
po esser un’eroe leggendàriu.
Una mirada li damos a Sàulu
contr’a a sa dotrina ‘e su rosàriu:
ammenta giovaneddu santu Pàulu
che unu lupu fit sanguinàriu
ma a pena at bidu a Cristos in persone
su lupu diventadu est un’anzone.
33. Seu (46’’)
Peppe, ca sonas su matessi sonu,
a risponder a tie est netzessàriu.
Deves ischire chi unu babbu ‘onu
no la pensat che tue a su contràriu:
s’est sa pàtria sua in abbandonu
mandat fintzas su fizu volontàriu.
Cuddos chi la trascuran note e die
sunu sos chi no l’istiman che a tie.
43

Bortigali 1959 PEPPE SOZU - ANTONI PIREDDA - JUANNE SEU
44
34. Sozu (57’’)
Póberos, ricos in domo si arrean
ca s’amore ‘e sa famiglia piaghet.
Mannos, minores in trabagliu pelean
po chi su carru in via no si ammaghet:
s’as una tanca e chi ti che la lean
a cale siat tipu dispiaghet.
Non nde dao a guvernu e ne a Deu
ca la chelzo lassare a fizu meu.
35. Piredda (47’’)
Po possedire de terra una zona
cun sa manu non tocades s’istella.
Est s’amore de Deu pius bella,
sa pius sacra e-i sa pius bona
ca sant’Antoni est nàschidu in Lisbona
e ch’est mortu in Padova in Arcella:
no at jutu sa pàtria a trofeu,
at preigadu po servire a Deu.
36. Seu (48’’)
Ja est bellu su tou paragone
chi in esémpiu, Peppe, mi as batidu.
Lu dias cherrer su fizu in ritiru
pro . . . . . . . . . . . . . . .
Ma, ‘idu, as finammenta su puzone
faghet sa gherra a difender su nidu:
gai devet s’omìne andare a fua
pro la difender sa pàtria sua.

TEMA II: AMORE A SA FAMIGLIA - AMORE A DEU - AMORE A SA PATRIA
37. Sozu (49’’)
Si fit su paragone a contu tou,
Juanne, caltzaiat a puntinu.
Però su nidu est un’abbitu nou
chi unit signorina e signorinu
e in su nidu si bi faghet s’ou
da ue naschet dogni puddighinu.
Est totu costruidu a meraviglia
po collocare tota sa famiglia.
38. Piredda (40’’)
Po ingrandire su valore meu
pisto sos versos cun sa punta ‘e s’agu.
Ammenta ite at fatu santu Jagu
da chi at bidu su fizu ‘e Deu:
at lassadu sa barca intro su lagu,
s’est separadu dae Zebedeu.
Po ponner fatu a s’eternu padronu
at lassadu su babbu in abbandonu.
39. Seu (55’’)
Procura pro sos fizos peta e trigu
e pensa a profumare sa coghina.
Però cand’est sa pàtria in castigu
la deves aer in coro vicina.
Mi’ chi pro che ‘ogare s’inimigu
Pietro Micca at atzesu una mina:
famìlia no b’at chi aggualat,
pro sa pàtria sa vida regalat.
45

Bortigali 1959 PEPPE SOZU - ANTONI PIREDDA - JUANNE SEU
46
40. Sozu (51’’)
A da chi as fizos a manca e a dresta
dogni recreu in domo bi as afaca.
Finas a da chi sa gherra asa in testa
poite passas sa ‘idea maca?
Ulisse ad afrontadu ogni tempesta
po che torrare a s’isola ‘e Itàca.
E Penelòpe at vint’annos sufridu
isetende a torrare su maridu.
41. Piredda (40’’)
Da ch’aparidu est s’eternu sovranu
s’est unu pagu ‘e zente reunida.
Ponen in sacrefìtziu sa vida
preighende su cultu cristianu:
Santu Pedru est naschidu in Bessaida
e ispiradu est in su Vaticanu
ca sos chi an a Deus in su coro
làssana fina sa pàtria insoro.
42. Seu (53’’)
Pensa a cando fit Roma assediada
dae sos Gallos bàrbaros che moro
e Brenno pro nde l’aer libberada
pretesu at milli lìbberas de oro.
Ma Camillo nd’istupat cun s’ispada
prite teniat sa pàtria in coro:
faghet isfida a Brenno chi cumbatat
e cun s’ispada a Roma nde riscatat.

TEMA II: AMORE A SA FAMIGLIA - AMORE A DEU - AMORE A SA PATRIA
43. Sozu (57’’)
Ma, a cres, da chi est sa pàtria in pena
chi solu faghet leare s’ispada.
Chie at sa famiglia in manu anzena
ite restat a l’aer riscatada?
A Menelau furan a Elena,
pro cussu at tanta zente radunada
e ponet a gherrare su podere
pro difender sa própia muzere.
44. Piredda (41’’)
Nachi sa vera fémina ispartana
de Menelau la cres un’istella.
Tathari in su rione Porcellana
tenet sa tumba de Padre Manzella
ue sa zente cuotidiana
andat, visitan cussa baratella
ca sos ch’aman a Deu e chi meritan
fin’in pellegrinaggiu los visitan.
45. Seu (53’’)
Peppe, si de ischire ses bramosu
dali un’ojada a s’istória fissa.
S’América in tempus burrascosu
fit dae s’Inghilterra sutamissa
però Giorgio Wasghinton famosu
s’ischit chi l’atacheit una rissa
prite at a sa terra afetu ardente
e fata ‘enner l’at indipendente.
47

Bortigali 1959 PEPPE SOZU - ANTONI PIREDDA - JUANNE SEU
48
46. Sozu (50’’)
Padre Manzella bi at sa tumba rara,
ja l’apo ida innanti de a tie.
Però sa veridade naro in cara
s’in Bortigale ch’istas unu die:
marranu su ‘inari de sa gara
chi no bi che lu leas a inie
e ti che l’etas in sa cascia a sa cua
o lu lassas a sa famiglia tua.
47. Piredda (39’’)
Ma su ‘inari che lu juto deo
ca de Manzella no tenzo sos pannos.
Ammenta ite fatesit Clodoveo
chi fit su capu ‘e totu sos tirannos:
da ch’at bidu sa gherra andende in dannos
s’imbenujat nelzende: in Deus creo.
Sa preghiera est pigada a sa glória
e da igue at tentu sa vitória.
48. Seu (54’’)
Sì, sa famiglia cuntentu ti rendede
a da chi l’as in cìrculu in sa banca.
Ma sa pàtria prite si difendet?
Ca est in coro sa lughe bianca.
Enrico Totti gherrat a un’anca
e Baracca in s’aera ja si atzendet
prite an pensadu a sa pàtria ebbia
pro la salvare da sa tirannia.

TEMA II: AMORE A SA FAMIGLIA - AMORE A DEU - AMORE A SA PATRIA
49. Sozu (46’’)
Miras a Clodoveo pro dispetu
da chi padre Manzella fit in gherra.
Ma si torrerat biu a custu tretu
e sentza tenner de domo una perra
non ponias a fizu tou in terra
po che colcare su santu in su letu.
Deo rispeto santos e Gesusu
ma a fizu meu l’istimo ‘e piusu.
50. Piredda (?)
Peppe, m’as fatu una risposta fea
ca de sos santos no nde tenes dolu.
Chie a Deus ada in sa ‘idea
siat continentale o sardignolu
chi no pretendet letu e ne lentolu
si colcaiat subra sa (cadrea?). . . . . . .
. . . . . . . . . . . . . . . . . .
si colcaiat in su terrinu fritu.
51. Seu (52’’)
Manzella pro sos benes no at pensadu,
fit poveritu chi faghiat dolu.
Ma pensa primu s’ómine biadu
devet pensare a sa pàtria solu
ca cuddos chi sa pàtria an amadu
an àpidu in sa pàtria consolu.
E-i sos chi an sa pàtria peldidu
sunu che puzoneddos chentza nidu.
49

Bortigali 1959 PEPPE SOZU - ANTONI PIREDDA - JUANNE SEU
50
52. Sozu (53’’)
Sa famìlia at de pius impoltu,
ja lu cumprenden minores e mannos.
Da ch’a Giuseppe ana fatu unu toltu
sos frades e lu tratan cun ingannos
su babbu prite lu creiat moltu
su fizu at piantu tantos annos.
Da chi sa grascia ‘e l’abbratzare at tentu
at nadu: como ja molzo cuntentu.
53. Piredda (41’’)
It’’alet un’umanu abbitadore
si no amat su Deus soberanu?
S’esémpiu de santu Bastianu
de lu cantare mi faghet onore:
si ribbellat a Diocletzianu,
no l’impoltat de un’imperadore.
S’amore ‘e Deu in su coro li sonat,
sa falsidade ‘e s’imperu abbandonat.
54. Seu (50’’)
Giacobbe ruet in pena severa
ca creiat su fizu in malasorte.
Ma chie amat sa pàtria sintzera
in su coro la sentit pius forte.
T’ammentas de Fratelli Bandiera,
sos chi non tremen de fronte a sa morte?
Risolutos a issa non timende
gridan “viva l’Italia” molzende.

TEMA II: AMORE A SA FAMIGLIA - AMORE A DEU - AMORE A SA PATRIA
55. Sozu (1’00’’)
Da Zuseppe s’ispiju ti nde lea
chi de famiglia sun amore adatos.
Suportadu at sa pena pius fea
cun cummerciantes indignos, ingratos.
Poi sos frades dae Cananea
benin da issu e los at atatos:
pro chi ‘e domo che l’apan postu fora
ca li sun frades los amat ancora.
56. Piredda (49’’)
Da ch’’e sambène as su terrinu infustu
ti malaighet fina su terrinu.
Sa die trinta ‘e su mese ‘e austu
faghen sa festa a santu Austinu
puite amende a Deu lu fit giustu
ch’in coro aiat s’amore divinu.
Como presenta a custa ‘idda intera
sa festa de Fratelli Bandiera.
57. Seu (52’’)
A t’ammentas de Mùtzio romanu?
Volontàriu paltit gherrieri:
at amadu sa pàtria sintzeri
e paltit po che ‘ogare su tiranu,
su colpu at fallidu ma sa manu
postu si ch’at in s’allutu brajeri.
Su coro sou est duru che granitu
e li paret su fogu fintza fritu.
51

Bortigali 1959 PEPPE SOZU - ANTONI PIREDDA - JUANNE SEU
52
58. Sozu (1’04’’)
Nàrami a da chi si brujat sa manu
s’at dadu frutu sa fiamarida.
Cantos babbos trabaglian tota vida
e non connoschen una die de ‘eranu:
da chi isetan s’ispiga ingranida
no la regoglin mancu a mesu ranu
ma tota vida sufrin-in su coro
e dan su pane a sos fizos insoro.
59. Piredda (46’’)
Cando s’amore ‘e Deus tenet criu
chi nisciunu sa fronte non piegat:
Nepomicenu in mesu a unu riu
che l’an betadu e issu nach’annegat,
a Poltolu iscolzadu an sende ‘iu
però sa fide ‘e Deu non rinnegat
ca est s’amore ‘e Deu insuperàbbile
ch’est dae sa vertude inseparàbbile.
60. Seu (49’’)
A Piredda ca est sempre in premura
li chelzo dare una risposta sola.
Osserva ‘e Garibaldi sa figura
ch’est sepultadu in terra saldignola:
oe lu tentan in sa sepoltura
sas sentinellas cun su sotogola.
Ma non tèntana che-i s’eroe meu
mancu sos santos chi an amadu a Deu.

TEMA II: AMORE A SA FAMIGLIA - AMORE A DEU - AMORE A SA PATRIA
61. Sozu (1’06’’)
Ordinadu an su tema ‘e lu finire
ma pensa chi ‘e famìlia at s’amore
faghet ismentigare su sufrire
e faghe allenare su dolore:
in istajone chi no det fiorire
faghet bessire a campu ogni fiore.
E non b’at tracia chi che lu cancellat
ca solu intro ‘e su coro si suggellat.
62. Piredda (47’’)
S’an ordinadu ‘e fagher determinu
che ponimos su tema a una perra.
Deus bénnidu est subra su terrinu,
no at pensadu mai a fagher gherra.
S’ómine at costruidu dae sa terra
ma s’ànima ‘e s’ispìritu divinu.
Però ponimos de su chelu in prua,
bi la torramus ca ja est sa sua.
63. Seu (51’’)
E si su tema ‘ogamus de manu
tando trunco eo puru sa puntiglia.
Ma chie at coro ‘e bonu cristianu
amat sa pàtria sua a meraviglia
ca Mazzini su grande italianu
at nadu: “Dio, Patria e Famiglia”.
Prite amare sa pàtria at cumpresu
che l’at de ‘ois collocada in mesu.
53

Bortigali 1959 PEPPE SOZU - ANTONI PIREDDA - JUANNE SEU
54