VAN TOEKA TOT NOU - Laerskool Hennopspark

VAN TOEKA TOT NOU .........
‘n Klein begin met die eerste 15 rekenaars in 1989 tot twee volledig toegeruste
Rekenaarlaboratoriums met 40 rekenaars elk en Internet toegang in 2007. Die afgelope
twee dekades het die Inligtings Tegnologie by Laerskool Hennopspark met rasseskrede
vooruit gegaan.
In Julie 1988 het ‘n Rekenaarkomitee tot stand gekom na ‘n vergadering wat met
belangstellende ouers in die skoolsaal gehou is. Hierdie komitee het in drie subkomitees
verdeel, wat aspekte rondom finansies, hardeware en sagteware deeglik
nagevors het. Na baie ure van harde werk en deursettingsvermoë het Prof D van der
Merwe, mnre D Leibrandt, F Smith, J de Bruyn , mevv M Straus, J Theron, D van
Vuuren en mnr Dawie van Heerden tot die besluit gekom om ons eerste rekenaarsentrum
te implementeer.
Op 2 Februarie 1989 skryf mnr Dawie van Heerden met trots in sy dagboek: “Die
besending rekenaars is vandag afgelewer. Alle beplanning rondom die rekenaarsentrum
verloop volgens skedule danksy ‘n baie mooi span personeel en ouers.”
Die pragtige ondersteuning van ons Hennops ouers en gemeenskap stel ons in staat om op
1 April 1989 die sentrum ingebruik te neem. Die personeel is opgelei om self hul
voogklasse na die sentrum te vergesel. Op 24 April begin die leerders m.b.v die Sergo
wiskunde program vanaf Gr 1 tot Gr 5 met die rekenaars kennis gemaak.
Op 15 Mei 1989 berig mnr van Heerden in sy dagboek: “ Die skool het Vrydagaand die
heuglike voorreg gehad om die rekenaarsentrum amptelik in gebruik te neem. Daar was
sowat 60 gaste teenwoordig. As sprekers het opgetree mnr D Biddulph, namens die
bestuursraad, mnr F Smith, namens die rekenaar komitee en mnr van Heerden het die
bedankings hanteer. ‘n Ouerdag sal later vanjaar plaasvind waar die res van die ouers die
sentrum sal kan besigtig..”
Die volgende inskrywing verskyn op 17 Junie 1989 in meneer se dagboek: “ Ons het
vandag ‘n baie geslaagde ouerdag afgehandel. Sowat 400 ouers het gereageer op die
uitnodiging. Die hoofdoel was om die rekenaarsentrum aan ouers te toon. Verder kon
ouers in groepe deur die skool beweeg om ‘n blik te kry van die nuutste hulpmiddels en
metodes wat in die onderwys aangewend word.” ‘n Spesiale gedenkplaat met die borge
se name is in die sentrum aangebring.
Sommige onderwysers is opgewonde oor die vooruitsig om nie meer Rapporte met die
hand te skryf nie ander lei aan slapelose nagte oor die nuwe wonder van tegnologie wat
die kinders so verbasend gou bemeester.

In 1990 het die sentrum reeds 25 rekenaars en die bestuursraad begin voelers uitsteek om
‘n voltydse fassiliteerder aan te stel. Mev Tonia Barker is dan ook aangestel as die eerste
voltydse rekenaaronderwyser. Insamewerking met Juf Tonia word daar weg beweeg van
die uitsluitlike gebruik van Wiskunde en Leesprogramme na die implementering van
Rekenaarvaardigheid en die gebruik van Microsoft sagteware.
Mev Tonia Barker
Die jare stap aan, die skool bars uit sy nate en die Inligtings Tegnologie ontwikkel
vinniger as wat enige mens kon voorsien. Hennopspark bly groei en word ‘n skool van
uitnemendheid wat selfs oorsee erkenning kry. Die skool bou nuwe klaskamers aan om
met die stroom van leerders tred te hou. Die getal leerders maak dit onmoontlik vir elke
klas om een keer per week die rekenaarsentrum te besoek. Leerders kry nou die
geleentheid om elke tweede week een periode van 30 minute die sentrum te besoek.
Vernuwing en die akkomodasie van elke leerder ten minste een keer per week, word ‘n
nuwe uitdaging vir die rekenaarkomitees en beheerraad. ‘n Tweede rekenaarsentrum
word gebou en toegerus vir die gebruik van die seniorfase leerders. Wat ‘n besondere
voorreg om twee sentrum by een skool te hê! Die feit dat dit geheel en al sonder die
bystand van die Onderwys Departement geskied, is veral merkwaardig. Die ouers en
borge uit die gemeenskap maak dit moontlik om in 2000 die Senior Rekenaarsentrum met
40 nuwe rekenaars en Internet toegang toe te rus. Mev Tonia Barker hou ‘n waaksame
oog oor die ontwikkeling van die nuwe sentrum.
Juffrou Elna Juffrou Jannezelle

Tydelike personeel het gekom en gegaan by die Junior Rekenaarsentrum en in Januarie
2003 het mev Elna de Waal voltyds vanaf die Gr 1 klas oorgeskuif na dié sentrum.
Einde 2005 bedank mev Tonia Barker. Mev De Waal skuif na die Senior sentrum en
mev Jannezelle Gamble na die Junior Sentrum.
Begin 2006 word daar voorraad opname gemaak en gevind dat die hardeware in die
Junior Rekenaarsentrum nie eers meer aan die minimum vereistes van Gauteng Online
(GDO) voldoen nie. Die sentrum is met die ontstaan van die Senior sentrum toegerus
met ou rekenaars uit die Mediasentrum, kantore en ou sentrum. Leerders het steeds met
verouderde sagteware (Windows 95 en 98) gewerk. Rekenaars het probleme begin gee
en was dit was moeilik om parte te kry. Verouderde sagteware is nie meer gerugsteun
deur Microsoft Skole ooreenkoms nie.
November 2006 gee die Beheerraad toestemming tot die vervanging van die Senior
rekenaarsentrum met nuwe tegnologie en die verskuiwing van die huidige rekenaars in
die snr sentrum na die Junior sentrum.
Met die hulp en ondersteuning van die finaskomitee, onderleiding van mev Hanli Botha
word die nuwe rekenaars op 22 Januarie 2007 afgelewer. Daar is geswoeg en gesweet.
Die Junior Sentrum het ‘n nuwe laag verf gekry en op 8 Februarie 2007 is die nuwe
Senior sentrum amptelik ingebruik geneem.
Die juffrouens glimlag breed en......... die kinders juig.

Die Beheerraad en Tegnologiekomitee lede was ons spesiale gaste en by die geleentheid
het die onderwysers en leerders geleentheid gekry om ‘n hartlike Hennops dankie te sê
aan die ouers en beheerraad vir die groot geskenk.
ONS Sê: “ BAIE DANKIE!”
Leerders is nou bevoorreg om met die nuuste tegnologie te werk. Microsoft Office XP
Pro word in die Senior sentrum gebruik en XP Pro in die Junior sentrum. Albei sentrums
het Internet toegang. Leerders en personeel kry die geleentheid om Dinsdae en
Donderdagmiddae naskool gebruik te maak van die fassiliteite in die twee sentrums.
Navorsing, take en huiswerk kan onder toesig gedoen word.
In albei sentrums word kruis kurrikulêr met die ander leerareas gewerk terwyl
rekenaarvaardighede aangeleer word. Daar word egter ook lekker gespeel en oog-hand
koördinasie geoefen met rekenaarspeletjies. “Games” word egter slegs op Dinsdag en
Donderdag pouses gespeel en die leerders staan tou om ‘n beurt te kry.
VOLGENDE KEER: HENNOPS ONNIES RAAK IT- GELETTERD!!