Wilde Kus toer 26 Maart 2010 – 8 April 2010 Opsomming ...

Wilde Kus toer
26 Maart 2010 – 8 April 2010
Deur Anton Heiberg
Opsomming
‘n Toer van ± 3000km deur ‘n baie
mooi deel van ons land wat nie
noodwendig baie besoek word nie.
Meeste plekke was 4x4 nie nodig nie
maar nie ‘n roete wat ek met ‘n platkar
sal doen nie. Ons het besprekings
gemaak meestal omdat dit oor Paas
naweek en skoolvakansie geval het
maar ek sal dit nie weer doen nie. In
meeste kamp plekke was ons twee van
3 of 4 voertuie en by die plekke wat
voller was is daar alternatiewe kamp
plek naby gewees. Die Transkei is 'n
arm deel van die land en voertuie is
skaars soos hoender tande maar jy sien
net rondawels en huise maar bitter min
indien enige sink kayas of
plakkershutte. Oorspronklik het ek
gelees dat mense van Durban to Addo
in 3-4 dae doen en het begin wonder of
ons nie te lank beplan vir die toer nie.
Ek dink ons het nog nie die “surface
gescratch” nie en daar is nog baie om
te sien en doen. Sal ek weer gaan?
Defnitief!
Reisgenote
Leon, Lizinda Labuschagne met
Anjone (3) in ‘n Land Cruiser 100 VX.
Ons Heiberg’s, Anton en Setilda met
Zan-Roux (6) en Zerko (3) in Land
Rover Defender 110.
Hoogte punte:
• Die uitsigte op Sani Pass
• See kos by White Clay
• Kanoe en stap toer by Mbotyi
• Baby Hole
Laagte Punte:
• Nog ‘n band wat onherstelbaar
beskadig is met side wall
skade.
• Skade aan Leon se RTT,
roofrack en awning.
• Die reën weer wat ons
genoodsaak het om die
vakansie kort te knip.
• Ek wou baie graag die
Jacaranda skeepswrak gaan kyk
en kon nie.
Roete
Reis verslag
Dag 1 – 26 Maart 2010
Van : Middelburg Mpumalanga
Na : Himeville
Aftand : 712km
Tyd : 9 ure (alle tye sluit stops in)
Ons moes 09:00 vertrek en wonder bo
wonder was die Labuschagnes 8:40
reeds reg om te ry. Ons tel Zan-Roux
net by die skool op en kry hulle by die
huis. Dan val ons in die pad. Die
kosmosse langs die pad is pragtig en
naby Heidelberg is daar sommer sulke
plaate blomme. Ons ry goed en net

voor Underberg begin dit lekker te
reën maar die wind waai so dat ons nie
lus is om die eerste nag al nat te reën
nie en kry plek om te slaap nie te ver
uit Himeville by Glencairn Oak
Cottage & Daffodils. Die vrouens is
nie baie opgewonde oor die
eenvoudige bly plek nie, maar ons
dring aan dat ons overlanders is en nie
jetsetter nie.
Glencairn Oak Cottage & Daffodils
Dag 2 - 27 Maart 2010
Van : Himeville
Na : Sani Pass – Mount Currie
Natuur reservaat
Afstand: 188 km
Tyd : 7uur 40 min
Ons het beplan om agt uur te ry en die
Sani Pass aan te durf. Die
oorspronklike plan was om Sani Pass
te doen en die nag daar by die
backpackers te oornag voor ons
aanskuif Mbotyi toe. Dit was maar
bewolk, mistig en koel. Die pad na die
pas is baie scenic. By die grenspos is
dit net gou paspoorte stempel voor ons
deur is. Ek moet net noem dat die
toilette by die SA kant van die
grenspos baie mooi en netjies was.
Daar was heelwat touring motorfietse
wat ons gekry het maar andersins wat
dit relatief stillerig in terme van
verkeer. Die pass self is baie mooi en
nie te vreeslik uitdagend in terme van
4x4 vernuf nie, maar ek glo in baie
natter weer of sneeu kan dit ‘n heel
ander storie wees.
Net voor die begin van Sani Pass
Ons het albei lae strek gebruik maar
nie eens een keer ‘n wiel gehad wat
gespin het nie. Die pad was klam van
die vorige nag se reen maar nie glad
nie. As ons daai sneeu kettings gemaak
het gaan ons terug kom en kom sneeu
kyk. Ons stop gereeld om fotos te
neem.
Naby die bo punt van Sani Pass
Toe ons bo kom waai die wind sterk en
dit reen. By die Lesotho grenspos se
kant gou weer passpoorte gestempel en
R8 betaal. Die weer is vieslik
omplesierig en ons is nie lus om met
die kinders in die gure weer te kamp
nie. Ons besluit om ‘n vinnige warm
sjokolade en Gluwein in die Sani Pub
deur te werk voor ons weer afgaan.
Gluwein is soos die engelsman sal sê
“an aquired taste” en nie ek of Leon
maak die glas leeg nie.

Die hoogste PUB in Afrika -2874m
Die pad ondertoe is heelwat vinniger
maar die wolke is meer oop getrek en
ons stop amper net so veel keer om
fotos in die beter lig te neem. By die
SA grens pos kry ons GPS uit en soek
‘n moontlike slaap plek nader aan ons
volgende bestemming. Ons besluit op
Mount Currie Natuur Reservaat naby
Kokstad. Die pad soontoe is besonder
goed en baie stil met amper geen
trokke etc. By Mount Currie kry ons
kamp plek teen R55 per volwassene en
R27-50 per kind vir ‘n staanplek met
krag punte. Die kamp plek is teen ‘n
dam en dit is mooi met gras perke en
‘n klomp “mak” zebras wat op die
grasperk wei. Die ablusies in skoon en
netjies. Nodeloos om te se dat die twee
tente met kontrakteurs wat later daar
opgedaag het die wasbakke gebruik het
om te was en dat hulle die krane so
groot oop gehad het dat daar nie ‘n
druppel water by die warm water by
die stortkrane wou uitkom nie. Kort na
9 is almal in die bed
Mount Currie kampeer terrein
Dag 3 - 28 Maart 2010
Van : Mount Currie
Na : Mbotyi River Lodge
Aftand : 155km
Tyd : 3 ure
Die oggend by Mount Currie was baie
mistig en lekker koud. Die mis begin
eers teen 09:00 wyk. Ons het twee keer
koffie geniet en toe begin met ‘n lekker
hoenderlewer brekvis. Ons het rustig
opgepak en begin aanstaltes maak. ‘n
Vinnige stop by die Spar in Kokstad
om ‘n paar los goedjies te koop en toe
is ons vort.
By Mbotyi is daar eers in storie met
die kamp plekke wat aan ons toe geken
is maar ons sort dit vinnig uit. Die
kampterrein is omhein en netjies en ‘n
kort entjie se stap van die strand af.
Die weer is lekker warm en ons is net
na middag ete af strand toe. ‘n Pragtige
strand wat ons so te sê net vir onsself
het,dis nou behalwe vir die paar beeste
wat ook op die strand is.
Ja selfs beeste moet so nou en dan strand toe
gaan by Mbotyi
Pappas moet help met sand kasteel bou
en kort voor lank bou die manne alleen
aan die kasteel.
Die ablusies is groot en netjies maar
obviously weet party mens net nie hoe
om ‘n stort gordyn te gebruik nie, of
soos ek later sou uitvind is die nat vuil
vloere te danke aan tiener seuns wat
mekaar met ‘n emmer koue water nat
gooi as hul maats stort.
Op hierdie punt moet ek net wonder of
ek kan geld maak deur ‘n ordentlik
stort hokkie vir kamptereine te ontwerp

en die aan hulle te verkoop nie. Hoe
min van die plekke het genoeg plek om
jou droë skoon klere te sit en vuil klere
en dalk nog genoeg plek om te kan
afdroog. Of selfs net ‘n mop in die
badkamer te hê as jy met natvoete
moet uitklim, om die vloer skoon te
kan maak. (gee my dan eerder ‘n bos
stort as ‘n vuil en nat badkamer vloer)
Dag 4 - 29 Maart 2010
Van : Mbotyi River Lodge
Na : Mbotyi River lodge
Aftand : 44 km
Tyd : 90 min
Net voor ontbyt kom daar ‘n man
verby wat aanbied om ons vir ‘n 3 ure
toer op sy boot te neem teen R50 per
persoon. Ons spreek af om net na
ontbyt te gaan. Sy boot kan net 4
persone op ‘n slag neem en ons
Heiberg’s gaan eerste en dan die
Labuschagnes. Op die laaste oomblik
besluit ek tog om my kamera saam te
neem en hoop dat dit nie nat sal word
nie, maar met die eerste foto wat ek wil
neem onthou ek dat die battery nog op
laai in die Landy is…stupid, stupid.
Die boot is ‘n kanoe met
stabiliseerings arms en ‘n dek tussen.
Die rit is op die lagoon of meer en
alhoewel dit nie vreeslik vreemd is nie,
is dit tog baie lekker om die natuur
weer uit ‘n ander hoek te beskou. Ons
sien 'n blou visvanger, water dikkoppe,
geelbek eend, hadedas, mikstert
byevanger. Nie lank nie of ons River
Guide genaamd Chickoya (cell
076 288 0492) stop die kanoe en
beduie dat dit nou eers klaar is en ons
moet stap. Hy neem ons op ‘n toer oor
die bult en deur die natuurlike woud.
Hy gee kort kort inligting oor die
tradisionele medisinale gebruike van
plante etc. Die kinders trek bietjie
swaar oor die bult maar hulle geniet
dit. Pa wat die 3 jarige meestal moet
dra sweet ook lekker. Teen twaalf uur
is ons terug en ons gids sê dat hy ons
vanmiddag gratis na die watervalle sal
neem. Teen vier uur ry ons na die
Magwa valle so 30km van Mbotyi af.
Toe ons daar stop is daar dadelik 'n
klomp klonkies wat jou die valle wil
wys en die karre wil oppas. Ons
verduidelik dat ons reeds ‘n gids het en
begin aanstap. Tien tree weg van die
voertuie kyk ek om en van hulle is al
op die Landy se trappie, en ek draai om
om hulle van die voertuie te verwilder.
Met die sien Leon een wat ‘n
skroewedraaier het. Vir een of ander
rede glo ek nie hy wou my Landy
diens nie.
Magwa valle naby Mbotyi
Magwa valle

Ons maak maar beurte om die valle te
sien en die voertuie op te pas. Die valle
is asemrowend. Daarna neem ons gids
ons na die Angel Water valle (sien
T4A dui dit aan as Plantation Falls).
Dis ‘n baie kleiner waterval maar
steeds baie mooi. Teen ses uur is ons
terug in die kamp en dan is dit kinders
kos gee en bad.
Dag 5 - 30 Maart 2010
Van : Mbotyi River Lodge
Na : White Clay
Aftand : 263km
Tyd : 7 ure
Die weer is maar bewolk en dit lyk
reënerig. Die plan was om die 175km
pad wat op T4A is te ry nadat ons by
Port St Johns ‘n paar goedjies gekoop
het. Ons het by Port St John aangedoen
en sommer vol diesel gemaak. Lizinda
merk op dat my een agter band bietjie
pap is en ek pomp dit gou. Net
anderkant Port St Johns roep Leon op
die radio om te hoor hoe styf ek die
band gepomp het, want die linker band
is baie papper as die regter kant. Ons
stop en sien dat die band ‘n klein
skeurtjie in het. Weer ‘n Bridgertone
Dueler AT 693 dieselfde problem as
wat ek op my Kalahari toer verlede
jaar die tyd gehad het (die 694 band
hou so ver nog goed). Ons beluit maar
om op die teerpad te hou en in Mthatha
(Umtata) te kyk of ons ‘n plek kan kry
wat die band dalk beter kan reg maak
as wat ons met ‘n tyre repair kit kan
doen of dalk ‘n tweede handse band te
kry net om as spaar te hou (Daar is
mos 4 nuwe BFG’s in die garage).
Dis ook net voor ons Mthatha ingaan
dat Leon een van die Transkei groot
vyf trap. Die bokke is oor die pad en
Leon moes hard briek maar tref die
bok nog steeds. Die ding rol 'n slag of
wat onder die Cruiser maar staan
vinnig en seker effens gekneus agter
die Cruiser op en loop weg. Gelukkig
het die Cruiser geen skade nie. Later
sou Leon nog 'n groot 5 slagoffer tref
(klein swart varkie) wat nie so
gelukkig was nie.
Mthatha is nogal ‘n unieke Suid
Afrikaanse bestuurders ondervinding
gewees. In die groot stad dink ek daar
was een verkeerslig wat werk. Die
strate is besig en niemand steur hulle
veel aan verkeers reëls nie. Regtig
moeilik om te glo dat jy nie in ’n ander
land is nie maar net in ‘n ander
provinsie in jou eie land. So was daar
amper twee keer dat ‘n voertuig in my
Landy vas gery het. Senutergend as jy
so bietjie sukkel met die navigator wat
nie die GPS so mooi verstaan nie en
dan ook die radio kommunikasie met
die ander voertuig wat opbreek.
Eers by die vydfe bande plek kry ons
‘n band, ‘n nuwe “no name brand” .
Weereens.. stupid…stupid stupid ek
wou ‘n ekstra band sonder velling by
die huis laai maar dag toe, nee dis mos
SA en nie so ver afgelee nie. R1800
later en ons is weer op die pad. Die
40km of so pad na Umthatha in die
Koffiebaai rigting is regtig ‘n slegte
stuk pad met slaggate oor die hele ry
oppervlak en jy weet nie of dit beter is

om langs die pad te ry of wat nie.
Maklik die slegste stuk teerpad wat ek
nog in SA gery het en daar is nerens ‘n
teken dat daar eens ‘n poging
aangewend word om dit te probeer lap
nie. Gee my dan liewer ‘n grondpad.
Ons kom laat middag by White Clay
aan en ons besluit sommer dat ons by
Caren se restaurant gaan eet. Ons slaan
vinnig kamp om en sommer die
awnings ook. Tewyl ons in die
restaurant is begin dit te reën. Die
kalamari, mossels en prawns is uit die
boek lekker en kan dit enige tyd
aanbeveel.
Seekos in die White Clay Restaurant
Dag 6 - 31 Maart 2010
Van : White Clay
Na : White Clay
Aftand : 20km
Tyd : 2 ure 30 min (baie foto tyd)
Kamp by White Clay
Dit reën deur die nag en oggend nog
bietjies. Ons maak ontbyt en pak so
stuk-stuk op soos wat dit lyk of die
goed relatief droog is. Die kinders hou
hulle besig met inkleurboeke onder die
awnings.
Kamp by White Clay
Dankie tog vir inkleurboeke in reen weer
Dan is die plan om te gaan kyk hoe dit
lyk by Hole in the Wall. Dit is net 9km
vanaf White Clay en ons word
aangeraai om by die Hotel te stop en
dan die laaste ent te stap. Die weer hou
goed maar is bewolk en nie die regte
weer vir mooi fotos nie. Die see is
darem ‘n pragtig turkoois blou. Ons het
vir ons twee self aangestelde toergidse
by gekry en of jy wil of nie jy moet
soortvan agter hulle aanloop. Na ons
heelwat fotos geneem het beduie ons
gidse dat hulle ons ook Baby Hole sal
gaan wys as hulle net agter die Landy
kan vashou.

Hole in the wall uit ‘n ander hoek
Hole in the Wall
Ons ry tot naby Baby Hole en maak
maar weer beurte om te gaan kyk en
voertuie op te pas. Daar is ‘n skare van
so ses klonkies en my kinders neem dit
op hulleself om die locals bietjie te
vermaak met ‘n konsert. Dan reken die
self aangestelde gidse dat hulle dienste
R100 werd is.
Die uitsig op Baby Hole
Dag 7 - 1 April 2010
Van : White Clay
Na : Dwesa camp
Aftand : 195km (met 'n helse draai
verkeerd gery ….T4A auto routing)
Tyd : 6 ure 25 min
Ons is vroeg wakker en sien die reen
oor die see aan kom. Ons pak
inderhaas op en net voor dit begin reen
is ons klaar. Ons beplande roete is op
die Wild Coast Eco trail en dit is 95km
volgens T4A en die GPS. Ons is
sommer vinnig op ‘n paadjie wat lyk of
dit na nerens gaan en 50m verder lyk
dit of daar ‘n pad is. Na ‘n vinnige
confirmation met Leon besluit ons om
maar te sien hoe die trail lyk. Dis
sommer dadelik diflock en low range
in die klipperige moddigerige trail. Nie
100m verder nie is dit is disaster vir
Leon. ‘n Bobejaantou het sy RTT
gehaak en die tent, roofrack en awning
het skade.
Ons besluit om liewer om te draai en
die goed net met ratchet straps vas te
maak en dan by die volgende plek die
skade te probeer herstel. Ons het die
GPS’e op auto routing en daar gaat
ons. Op verskeie plekke lyk dit na twee
spoor pad en dan hou ons verby en
recalculate die roete, nie lus vir sukkel
4x4 met die skade en ma wat alreeds
dik van die lag is nie. Tot op ‘n punt
kom T4A en dan in die middel van
erens en nerens wil die ding hê ons
moet omdraai. 60km draai ??Die roete
hou net op en daar is geen pad wat oor
die rivier loop nie. Dan pluk ons die
laptop uit en forseer ‘n ordentlike roete
en stuur dit na die GPS’s. Op ‘n
stadium stop ek om te sien wattter een
van die twee paaie ons moet vat toe ‘n
man uit sy hut kom en sommer sê dat
ons iewers moes verdwaal het en dat
hy ‘n nature guide in Dwesa is. Hy
reken ons toe dat ons oppad is na hek 5
wat nie n ingang is nie en dat ons ‘n
ander pad moet volg na hek 1 waar die
onvangs en ingang is. Die Cruiser raak
laag op diesel en het 'n paar benoude
oomblike met die verdwalery toe hy
uitvind dat daar nie diesel op Dwesa is
nie.

Later daag ons by die hek op maar die
hekwag verstaan nie regtig Afrikaans
of Engels nie. Gelukkig ken Leon
fanagalo en ons kom reg. Die
kampplek het net 2 ander voertuie en
ons kamp onder heerlik koelte bome.
Ons spaddeer ‘n goeie deel van die
middag om bush mechanics te speel en
die RTT, awning, en roofrack soortvan
reg te probeer maak.
Besig om skade te probeer herstel
Dag 8 - 2 April 2010
Van : Dwesa
Na : Dwesa
Aftand : 0km
Tyd : heeldag
Ek en Zan-Roux is vroeg op en gaan
stap op die strand, sit op ‘n rots en kyk
hoe die son opkom. Dis 'n lieflike
sonskyn dag. Ons spoel gou ‘n paar
wasgoedjies uit terwyl dit lyk of dit
vandag kan droog word.
Wasdag
Later gaan almal stand toe en die
kinders geniet hulle gate uit in die
natuurlike getypoel tussen die rotse.
Die res van die dag is rustig en ons
help die Hollander in die kamp met sy
Disco se agterste suspension. Vir
middag ete maak ek weer ‘n paar
pizzas in die swartpot. Lizinda ontdek
van daai klein rooi bosluise op die
kinders wat mens bosluiskoors kan gee
en vandaar word die kinders gereeld
ondersoek.
Lieflike strand by Dwesa
Dag 9 - 3 April 2010
Van : Dwesa
Na : umThombe Kei River Lodge
Aftand : 139km
Tyd : 5 ure
Ons pak weer vroeg en dis sommer al
vroeg warm. As ons teen 08:00 die
tente toe maak tap die sweet ons af.
Ons moes die roete bietjie aanpas om
by 'n vulstasie verby te gaan sodat
Leon kan volmaak. Die plan was om
maar aan te gaan en as hy sonder diesel
gaan staan ‘n paar liter uit die Landy te
tap om hom tot daar te kry. 48km later
is Leon baie verlig om die vulstasie te
kon maak. Ons maak albei vol maar
hulle sukkel om die garage karate deur
te kry. Terwyl ons wag kry ek sommer
gas by die Built It in .
Die ferrie by Kei rivier kos R60 en op
die oomblik is daar baie slik in die
rivier en operate die ferrie nie 1 uur
voor laag water of 2.5 ure daarna nie.
Gelukkig was ons timing goed gewees
en ons maak dit darem sonder om te
wag.

Landy en familie op die Ferrie by Kei mond
Die koste aan die ferrie en die tyd
waarin hulle nie kan werk nie sou ook
later beteken dat ons nie die Jacaranda
skeepswrak kon besoek nie.
Die kamp terrein by umThombe is
relatief leeg en daar is ‘n paar
hengelaars. Daar is groot gras perke en
heelwat koelte bome. Ek het gedink
daar is elekrisiteit maar daar is net ‘n
generator wat soms loop vir die
kantoor en bar. Ek reel met Marius om
net die batterye vol te kan laai maar
nadat ons op geslaan is kan ek nie die
battery (sonder ure se moeite) by die
generator kry nie en Marius het nie ‘n
lang genoeg extension nie. Marius
reken my toe hoekom kry ek nie vir
my 'n solar panel nie. Ek reken hom dis
baie geld daai en hy begin praat van sy
kontak in Oos Londen wat ‘n solar
panel (hy ken nie die watt grote nie net
fisiesie dimensies) vir R400 en met ‘n
regulator vir R200 kan kry. Ek dink dis
dalk te goed om waar te wees maar ons
reel soortvan dat Marius ons later die
week na die ou sal vat en dan sal ek en
Leon kyk en maar R600 waag.
Na aand ete is dit maar winderig en
bewolk en ons besluit om die kinders
toe te laat om ‘n movie op die laptop te
kyk alhoewel ons weet dat die battery
dit nie tot die einde sal maak nie. Sewe
uur die aand begin dit te reën en ons is
sommer almal in die bed.
Dag 10 - 4 April 2010
Van : umThombe Kei River Lodge
Na : umThombe Kei River Lodge
Aftand : 0km
Tyd : heeldag
umThombe Kei kamp
Deur die nag reën dit heeltyd. Ons het
die awning op geslaan maar die wind
waai die misreen so dat jy op die
eenkant van die 3m awning sit en jy
van die ander kant af nat reen. Later
skuif ons met die kinders na die
bar/bibleoteek en hou hulle besig met
boeke, tydskrifte en inkleur. Die tannie
is so gaaf om die generator te laat
opstart sodat hulle kan movie kyk. Ek
gebruik die geleentheid om my trip
report verder te tik en die laptop se
battery te laat laai. Wel in reënweer
eet mens mos pannekoek en ons bak
pannekoek onder die awning in my
reënjas.
Pannekoek bak in die reën
Dit bly bewolk en daar is ‘n konstante
motreën, niks wil droog nie, nie eens
die X-towels wat gewoonlik binne ‘n
half uur droog is nie. Dies maar 'n lang
dag met die kinders as mens nie regtig
onder die awning kan uit nie. Die paar
keer wat dit nie reen nie is maar kort
tydjies en ons probeer om so ent langs
die rivier te stap.

Die storte is die beste uit gelê wat ons
so ver gehad en net ‘n eenvoudige
bamboes reeling maak dit maklik om
klere op te hang sodat dit nie nat word
nie. Die gas junker werk egter nie goed
nie en jy sukkel selfs om ‘n wasbak vol
warm water te kry om skottelgoed te
kan was. Met die reen is alles klam en
die tent se sye is so klam dat dit die
matras plek plek begin nat maak.
Dag 11 - 5 April 2010
Van : umThombe Kei River Lodge
Na : Areena River Resort
Aftand : 100km
Tyd : 3 ure 15 min
Ons is vroeg op en dit bly steeds
bewolk, daar is so klein blou kolletjie
in die lug wat belowend lyk maar dit is
nie lank nie of die trek ook weer toe.
Ek wil nog plastiek sakke op die kante
van die matras sit om te keer dat dit nat
word as ek die tent opslaan, maar toe
ek daarmee begin lyk dit kompleet of
die Kei rivier kortpad onder die matras
deur gevat het. Ons volgende
bestemming sou 2 nagte by Double
Mouth gewees het. Ons besluit
tentatief om maar soontoe te ry en te
kyk hoe dit lyk maar as die weer nie
beter lyk nie om maar die vakansie met
‘n dag of wat kort te knip. Klaar op
gepak begin ons die grondpad uit
umThombe Kei River Lodge en skielik
begin mens verstaan hoekom hulle net
4x4 toelaat. Die grond pad wat ‘n dag
of wat vroeer mak gelyk het is ‘n turf
modder glybaan. Die spore agter ons
lyk of die bestuurders dronk was en as
jy eers in die spoor is kan jy maar die
stuurwiel draai soos jy wil die voertuig
is soos ‘n trein op ‘n spoor. By Kei
mond stop ons eers by The Green
Latern vir ontbyt. Op die selfone kyk
ons gou op
http://www.wunderground.com/ wat
die weervoorspelling is aangesien dit
nog sover redelik akkuraat was. Reen
en bewolkte weer word vir die
volgende 4 dae voorspel. Die kos is
heerlik en ons verdien 'n paar brownie
punte by die vrouens wat ‘n slag die
baie netjiese toilet kan gebruik en
droog kan eet. Daarna skuif ons aan na
Double Mouth. Dit is 'n mooi netjiese
kamp plek maar meestal karavaan
ouens en so aan. Die plek is redelik vol
en jy kan oral sien dat die reën weer sy
to eis met nat klere etc wat hang om
droog te word maar die weer gee
niemand ‘n kans nie. Ons besluit maar
om die besprekings geld te verloor en
aan te skuif na die volgende
bestemming en eerder die kamp
deposito wat ons daar betaal het vir 2
nagte te verruil vir een nag charlet
blyplek. In reën ry ons tot by Areena
River Resort. Ons boek ‘n cottage vir
R1210 vir die klomp van ons saam,
maar ons moet eers tot na 15:00 wag
dat dit skoongemaak word aangesien
hulle nie geweet het dat ons gaan kom
nie. Die cottage is baie netjies met
leerbanke, een dubble bed en 4 enkel
bedjies etc.
Cottage by Areena
Die resort is netjies en langs die rivier.
Soos Leon dit gestel het die mense
kamp ook daar maar “hulle is nie van
ons dam se ganse nie” Dit is meetstal
karavane wat permanent daar staan en
die sy tente se vloere is geteel. Binne
in die tente is sateliet TV, sit
kamerstelle you name it. Seker maar
goed smaak verskil want ek weet nie of
die kamp elke keer op dieselfde plek
met dieselfde bure vir my is nie.
Dag 12 - 6 April 2010

Van : Areena River Resort
Na : Bloemfontein
Aftand : 590 km
Tyd : 10 ure
Ons is vroeg op en ons het probeer om
vir Marius van umThombe te kry om
na die solar panels te gaan kyk in Oos
Londen. Ons kry eers nie antwoord nie
en besluit om solank in Gunoubie te
gaan kyk hoe dit lyk terwyl ons kyk of
ons later met Marius kan kontak maak.
By die hek van Areena kom die
kameelperd wat hulle hans groot
gemaak het kyk of ons nie dalk iets te
ete het nie. Dit is ‘n baie unieke
ondervinding wat die kinders vreeslik
geniet.
Die mak kameelperd by Areena
Dan kry Leon vir Marius in die hande
en dit lyk of hy nie by ons gaan uitkom
nie, hy ken ook nie die nommer van sy
kontak nie en kan nie ‘n adres verskaf
nie. Soos ek gesê het : If it sounds too
good to be true then ussualy it is. Met
die is dit lang pad Bloefontein toe.
Ons kry slaap plek by Home from
Home gaste huis vir R700 vir 'n family
room setup, maar voor ons daar opdaag
begin die Landy se lig skakelaar weer
probleme gee. Ek en Leon spandeer
tyd om dit weer reg te kry. Die plastiek
het gesmelt rondom die kontakte en
ons kry nie n kortsluiting nie en
vermoed dit moet net ‘n “dry joint”
wees wat die hitte veroorsaak.
Home from Home gaste huis
Dag 13 - 7 April 2010
Van : Bloemfontein
Na : Klerksdorp
Aftand : 285km
Tyd : 3 ure
Ons paaie skei van die Labuschagnes
aangesien hulle huistoe gaan en ons
maar ‘n draai by skoonma gaan maak
en sommer ‘n nag daar spandeer.
In Klerksdorp aangekom is dit basies
die eerste keer dat ons ‘n paar ure
sonskyn het en nie besig is om te ry
nie. Ons maak die tente etc oop om
droog te word sodat dit nie begin muf
nie. Ek skakel Land Rover in Potch om
te probeer uitvind wat ‘n nuwe lig
skakelaar sal kos. Ok as jy op 'n stoel
sit en nie sal val of seerkr nie hier is
die prys vir ‘n kort lig skakelaar wat
drie drade aan mekaar verbind
…..R2730 in Witbank kos dit R1900
en die replacement part by Landy Parts
for Africa kos R150 (die original kos
R450) Geen wonder die agente staan
as Stealers bekend nie.
Dag 14 - 8 April 2010
Van : Klerksdorp
Na : Middelburg
Aftand : 340km
Tyd : 4ure 40 min

Net teerpad huistoe met ‘n stop by die
winkels in Witbank en niks interessant
vir die trip report nie.