DE WERF - vv Enter Vooruit

Pupilnvoetbal
Zoaterdagsmorns vrog, achte kleine keerlkes op ’t greune grös.
De leiders, net oet berre, hebt de oogn mear half lös.
Eewn kuiern met de vaas en moos en dan op de vèntjes afgoan:
“Wij wil d’r vandaag in de goole stoan?”
Ze schreeuwt allemoal um ’t hardste: “ikke neet”.
’n Leider mut d’r ene anwiezn, ie wèt wal hoe dat geet.
Noa völle gedram en gehuul,
mut d’r toch ene in de goole, zo’n klein’n buul.
Dan veters strikn, shirt in de bokse en de sökn wat heuger.
Zo könt ze beginn’n, die kleine meuge.
As ’n skeids dan fluit, kan ’t feest beginn’n:
Die keerlkes könt in ’t veeld de vrömdste dinge verzinn’n.
D’r is gèn touwe an vaste te knoopn,
ze begint allemoal duur mekaar te loopn!
Mear noa vief minuut’n begriep i’j ’t al,
woer ’t de meeste keerlkes loopt, doar is ok ’n bal.
’n Eén ’n kan ’t kiekn noar de vuugelkes neet loatn,
terwiel der veerderop wat met mekoar stoat te proatn.
Sommige andern die begriept ’t en die knooit tot de rust vedan.
In de pauze vrög ’n leider: “Jongs, wat vin i’j der zelf van?”
Ok a stoat ze dikke achter, het geet allemoal bes,
het hef nog nooit aans ewès.
Noa de rust geet ’t hele spul vedan,
ééne krig der’n trap tiegn zien knei an.
Den begint dan te huuln, totdat ’n leider zeg: “Eewn op de grond trèèn,
en vuural gèn huulderd wèèn.”
Ze kriegt steeds meer gools um de oorn,
het lik wa of ze vuur ’t verleezn zint geboorn!
Eindelijk is ’t leste fluitsignaal egoan.
Now is ’t tied vuur de penalties, ze goat in de riege stoan.
Dat ze’n wedstried verlöorn hebt, dat intreseert eur gin bal.
Nee, dat penalties scheetn dat is ’t een en al.
Ok al is ‘t 10-0, 7-2 of 5-1, ze verleest nooit de mood,
As den pengel d’r mear in geet, dan is vuur eur ’n dag wier good.
Door: Wim Getkate Uit: Jubileumuitgave Enter Vooruit 60 jaar
32 DE WERF
december 2006