Underdølen - juni 2011 - Oransje webdesign

14 | Underdølen - juni 2011
GEITOSTFESTIVALEN I UNDREDAL
29. – 31. juli 2011
i år satsar me på ein festival med sterkare fokus på geitosten og anna «sakte mat». Ved å servere ostefat med
tilpassa drikke og grillmat av lokale råvarer vil me gje folk nye gode opplevingar i matvegen.
Program
Fredag 29. juli
Som det har vore vanleg på tidlegare festivalar inviterer me til ein «førkveld» før sjølve festivalen opnar, med kulturopplevingar
litt utover vår eigen lokale kultur, som står meir i fokus resten av helga. I år har me vitjing av ein gamal kjenning og undredalsven
Andrea Rice frå Irland. Saman med sine musikarar klarer ho å få fram både dei vare stemningane i irsk musikktradisjon og dei friske
velkjende irske visene som får folk til å synge med. I år har ho med seg ein multiinstrumentalist som kanskje særleg med banjoen
sin vil gje eit nytt uttrykk i musikken hennar.
KL. 19.00 Kyrkjekonsert med irske Andrea Rice der den irske harpa har eit sentral plass forutan Andrea sin nydelege vokal.
KL. 21. – 01.00 Kveldsseta på brygga med eit nytt smakstilbod på ost og utvald god drikke. Musikk ved Andrea Rice Band i ein miks
med konsertstemning og melodiar som får det til å rykke i dansefoten.
Slutt kl 01:00
Laurdag 30. juli
KL. 11.00 Salsbodane opnar med tradisjonelle og nye mat- og handverksprodukt.
Matbodane serverer grillmat, fløytelappar og annan god kaffimat. I år er Haugen Gardsmat invitert til å stå for grilltilbodet, basert
på god handverkstradisjon.
KL. 12.00 Offisiell opning av festivalen og det nye servicebygget. Leikar for liten og stor, der du vert utfordra til å prøva deg på
jurklutkasting, setta spedlen på geiti, andletsmåling og hestaskokasting. Det vil og bli fleire åresal utover dagen med flotte premiar,
underhaldning og musikk. Aktivitetane og salsbodene vil halde ope til ca kl. 17.00. Me avrundar med premieutdeling.
Kveldsprogram
Kl. 18.30 Bordseta på brygga med fjordens kanskje lengste langbord frå parkeringsplassen til bryggjekanten. Menyen er tradisjonen
tru rommagraut, spekemat, flatbrød og i år kan me garantere at Undredalsmylsa er med.
Dei tre trubadurane Olaf, Øystein og Leif Inge vil underhalde og dra folk med i allsang med stoff frå Sivle, Sande og nyare låtskrivarar.
KL. 20:30 Aurland Trekkspelklubb spelar opp til gamaldans
KL. 21:15 Dei tre trubadurane Olaf, Øystein og Leif Inge dreg folk med på velkjende populærmelodiar ispedd litt dansemusikk.
KL. 21:30 Bryggedans med Hilde Fjørtoft Band.
Utover kvelden vert det sal av grilla lokalt produserte burgarar og pølser. Slutt kl 02:00