MELAND KOMMUNE SAKSPAPIR

meiner likevel at behovet for å få til eit større næringsområde i denne sentrale delen av
Meland er eit omsyn som må vektleggjast meir enn reine skogbruksomsyn. Det er og svært
viktig å sikra tilstrekkeleg areal til ein gjenbrukstasjon, sidan eksisterande gjenbrukstasjon er
planlagt flytta frå Knarvik til Kjevikdalen. Ved å etablera ein eigen miljøstasjon i Meland,
unngår ein at innbyggjarane må køyra heilt til Kjevikdalen i Lindås. Det vil i seg sjølv gje ein
positiv miljøgevinst. At ein i tillegg sikrar areal til varmeanlegg for biobrensel like ved
gjenbrukstasjonen, kan vera eit viktig grunnlag for at ein i framtida kan få til miljøvenlege
energiløysingar (med CO2-nøytral energikjelde) til bruk i det kombinerte
forretning/kontor/industriområdet.
Administrasjonen har positivt merka seg at det registrerte verdifulle våtmarksområdet ved
Dalstøtjødna og myrområdet rundt vert føreslått regulert til spesialområde naturvernområde,
og at det bratte partiet med skog vest for bustadfeltet mot Mjåtveitmarka er regulert til
spesialområde friluftsliv. Desse arealføremåla, i tillegg til parkbeltet rundt, er etter
administrasjonen si vurdering viktig for å sikra miljøkvalitetane og naturmangfaldet i
området, samt vera med på å redusera potensiell konfliktgrad mot naboar og andre interesser
i nærområda rundt.
Vidare har administrasjonen merka seg innhaldet i rapporten frå Norsk Natur Informasjon, og
at det vert stilt krav om rammeplan for handtering av overvatn m.m., for å løysa utfordringar
knytt til eventuell avrenning frå næringsområdet.
Vurdering i høve tettstad/ senter/ kommunikasjon:
Administrasjonen har merka seg at det i føresegnene til det kombinerte området står at
forretning berre vert tillete om det gjeld etablering av verksemder for handel med varer som er
plasskrevjande (arealkrevjande varer). Denne juridisk bindande formuleringa, saman med
plankravet om eigen detaljreguleringsplan seinare(§ 1.1.1) er viktig for å sikra at det ikkje
vert opna for noko nytt forretningssenter i dette området, og som i så fall kunne redusera
Frekhaug sin funksjon som kommunesenter i Meland. Administrasjonen meiner difor at
reguleringsplanen slik den no er utforma ikkje vil koma i konflikt med rikspolitiske
retningsliner for kjøpsenter av 27.juni 2008 eller med fylkesdelplan for senterstruktur og
lokalisering av service og handel i Hordaland av 2002, sidan det ikkje vert opna for
detaljhandel innanfor planområdet. Nærmare reglar knytt til dette området og med avgrensing
mot kva type forretningar som eventuelt kan tillatast i dette området er noko som må drøftast
nærmare i samband med utarbeiding av ein detaljreguleringsplan. Området vil, når den nye
riksvegen er utbetra, få busshaldeplassar ved riksvegen. Då vil området verta godt tilgjengeleg
både for bussreisande og for gåande/syklande.
Konklusjon:
Administrasjonen meiner det ligg føre eit gjennomtenkt og gjennomdrøfta framlegg til
reguleringsplan, og at planskildringa har dokumentert og analysert dei viktigaste interessene
og utfordringane som er knytt til innhaldet i planen og til sjølve planområdet. Planarbeidet er
utført etter dei prosessuelle krava gjeve i plan- og bygningslova 27-1, og innhaldet og
konklusjonane i planskildringa samsvarer godt med det juridiske plankartet med føresegner.
Administrasjonen tilrår med dette at 1. gongs framlegg til reguleringsplan for
”Næringsområdet Dalstø-Mjåtveit ” vert lagt ut til offentleg ettersyn i medhald av plan- og
bygningslova sin § 27-1, punkt 2 og på vanlege vilkår.