Cynllun Parcio Cyfnod y Nadolig - Cyngor Gwynedd

ADRODDIAD I’R CABINET
30 Hydref 2012
Aelod Cabinet: Cyng John Wynn Jones, Aelod Cabinet Economi a
Cyng Gareth Roberts, Aelod Cabinet Amgylchedd
Pwnc: Cefnogi Canol Trefi : Parcio am Ddim Nadolig 2012
Swyddog cyswllt: Llyr B. Jones, Uwch Reolwr Economi a Chymuned
Y penderfyniad a geisir/pwrpas yr adroddiad
Cymeradwyo’r bwriad o gynnig a hyrwyddo cynllun parcio am ddim ym
meysydd parcio talu ag arddangos y Cyngor rhwng ac yn cynnwys 15
Rhagfyr a 26 Rhagfyr 2012, er mwyn cefnogi busnesau canol trefi
Bod y trefniadau i’w gweithredu law yn llaw gydag ymgyrch siopa lleol
sydd yn cael ei gweithredu gan yr Adran Economi a Chymuned.
Bod £40,000 o gyllideb y Cynllun Strategol yn cael ei ymrwymo i ariannu'r
trefniant.
Barn yr aelod lleol
Ddim yn fater lleol
Cyflwyniad
Mae ardaloedd canol trefi yn wynebu nifer o sialensau, yn arbennig o
fewn yr hinsawdd ariannol bresennol. Mae angen cadw canol trefi yn
lleoliadau deinamig a diddorol er mwyn gwarchod dyfodol busnesau
lleol, tra hefyd yn denu trigolion lleol ac ymwelwyr i’r stryd fawr.
Mae ymrwymiad tuag at fesurau bywiocau a gwella delwedd canol trefi
wedi ei gynnwys yng Nghynllun Strategol y Cyngor ar gyfer 2012/13. Mae
pecyn o ymyraethau wedi ei datblygu i geisio cynyddu masnach, cadw’r
budd yn lleol a chefnogi canol trefi. Mae cynnig cyfnod o barcio am
ddim yn un o’r camau sydd yn allweddol i’r rhaglen.

Fel rhan o’i ymdrechion i gefnogi busnesau’r Sir, mae Cyngor Gwynedd
wedi darparu parcio am ddim ym meysydd parcio talu ac arddangos a
reolir gan y Cyngor dros gyfnod y Nadolig y 4 mlynedd diwethaf. Y nôd
yw annog trigolion i siopa yn lleol a gwneud y mwyaf o’r amrywiaeth
anrhegion a nwyddau sydd gan Gwynedd i’w gynnig, a thrwy hynny
gynyddu masnach.
Mae mwy a mwy o bobl yn gweld y budd o siopa yn lleol ac mae’r
Cyngor yn ystyried fod y Nadolig yn amser perffaith i gefnogi busnesau
lleol, sef y siopau a busnesau bychain sydd yn gonglfeini i economi
Gwynedd.
Rhesymau dros argymell y penderfyniad
Mae’r Cyngor wedi datblygu pecyn o ymyraethau er mwyn cefnogi
canol trefi, a chynyddu gweithgareddau economaidd o fewn yr
ardaloedd pwysig yma. Fe ystyrir fod y cynllun parcio am ddim yn
agwedd bwysig o’r pecyn ehangach.
Mae’r Cyngor yn ymwybodol fod yr hinsawdd ariannol yn gyfnod heriol
dros ben i siopau a busnesau bychain y Sir. Mabwysiadwyd trefniadau
parcio am ddim dros gyfnod y Nadolig er mwyn annog mwy o bobl i
ymweld â chanol trefi lleol, a chefnogi busnesau lleol yn ystod y cyfnod
allweddol yma.
Mabwysiadwyd trefniadau parcio am ddim dros y blynyddoedd diwethaf
ar sail sefyllfa yr economi ac fel eithriadau blynyddol yn hytrach na
threfniant parhaol. Ond, gan nad ydi’r economi wedi gweld twf dros y
blynyddoedd diwethaf, argymhellir bod y Cyngor yn gweithredu'r cynllun
mewn ymdrech i hyrwyddo gwerthiannau siopau bach a gwarchod
busnesau’r Sir.
Amcangyfrifir fod y cynnig parcio am ddim dros y cyfnod yma yn arwain
at ostyngiad o £40,000 mewn incwm i gyllideb meysydd parcio'r Cyngor.
Er mwyn cynnig consesiwn parcio cyfnod y Nadolig felly, byddai angen
sicrhau trefniant i ddigolledu cyllideb meysydd parcio'r Adran Reoleiddio.
Ar hyn o bryd mae’r Adran Rheoleiddio yn cynnal adolygiad o drefniadau
a ffioedd y Gwasanaeth Parcio. Fel rhan o’r gwaith, bydd ystyriaeth
bellach yn cael ei roi i drefniadau parcio cyfnod y Nadolig i’r dyfodol.
Am eleni, felly, argymhellir fod £40,000 o gyllideb y Cynllun Strategol yn
cael ei ymrwymo i ariannu'r trefniant.

Fe ystyrir yr ymrwymiad yma yn fuddsoddiad i gefnogi canol trefi drwy
annog prynwyr i siopau yng nghanolfannau Gwynedd gan gyfrannu at
hyfywdra’r stryd fawr. Mae’r cynllun parcio hefyd yn plethu gyda phecyn
ehangach eraill sydd ar waith fel rhan o gynllun datblygol Bywiocau a
Gwella Delwedd Canol Trefi, gan gynnwys :
• Comisiynu astudiaeth capasiti manwerthu fel sail ar gyfer ystyried
datblygu polisïau cynllunio i resymoli ardaloedd stryd fawr
• Ymchwilio i gyfleoedd o wneud defnydd o adeiladau gwag, drwy
gynllun Menter Siopau Gwag. Rhagwelir y bydd y cynllun yn
targedu eiddo gwag, yn cynnig cymorth i’w adfer, a chynnig
cefnogaeth i unigolion sydd â’r awydd i fentro mewn byd busnes
• Gwella Delwedd Canol Trefi. Gosodwyd hysbysebion yn y wasg leol
yn ddiweddar yn gwahodd ceisiadau gan berchnogion eiddo
gwag; ynghyd â chynigion gan grwpiau busnes mewn perthynas â
chynlluniau bychan i wella delwedd canol trefi
• Pecyn Datblygu Sector Manwerthu, sydd yn cynnig cymorth drwy
drefnu arolygon busnes annibynnol, cyngor i fusnes a chynllun grant
• Marchnata a hyrwyddo canol trefi fel cyrchfannau siopau.
Wrth ymgymryd â’r ymyraethau hyn, mae’r Cyngor yn cyd-weithio gyda
phartneriaid a grwpiau busnes, a rhagwelir eu bod yn cyfrannu at yr
angen i geisio ail-ganfod eu pwrpas fel prif ganolfannau gwaith a
gwasanaethau, a’u delwedd fel mannau bywiog a deiniadol i drigolion
ac ymwelwyr.
Ystyriaethau perthnasol
Dros y blynyddoedd diwethaf, penderfynwyd i weithredu trefniadau
cynllun parcio am ddim wrth ystyried amgylchiadau o flwyddyn i
flwyddyn. Serch hynny, mae adborth gan fusnesau i’r cynllun yn bositif
iawn, ac mae’n ymddangos fod gryn gefnogaeth i’r cynllun ymysg y
sector fusnes ar draws y Sir.
Fel rhan o’r trefniant, fe ganiateir parcio am ddim am gyfnod penodol
cyn y Nadolig ym meysydd parcio ag arddangos y Cyngor gyda’r nod o
ddenu mwy o siopwyr i ganol trefi. Fodd bynnag, lleisiwyd pryderon
llynedd fod rhai meysydd parcio yn cael eu defnyddio drwy’r dydd gan
weithwyr lleol, gan leihau nifer o fannau parcio ar gael i siopwyr, a thrwy
hynny danseilio’r nod.
Ymddengys felly fod angen adnabod mesurau ychwanegol er mwyn
lleihau achosion o’r fath eleni. Byddai modd addasu’r trefniadau drwy
gyfyngu’r cyfnod parcio am ddim tan ar ôl, dyweder, 10:30 y bore, ond

mae pryderon y gallai hynny arwain at ansicrwydd ar brydiau, ac y gallai
unrhyw anghydfod wrth orfodi amseroedd o’r fath danseilio cefnogaeth
i’r cynllun. O ganlyniad, awgrymir y gellir ceisio ymateb i’r sefyllfa drwy
gyfathrebu a chodi ymwybyddiaeth o’r pryderon ac annog gweithwyr i
ddefnyddio mannau parcio arferol.
Ymddengys hefyd fod cyfleoedd ychwanegol i feithrin cysylltiadau gyda
siamberi masnach a grwpiau busnes lleol fel rhan o’r trefniadau hyrwyddo
a marchnata.
Fel rhan o drefniadau ar gyfer Nadolig 2012, argymhellir hefyd fod gwaith
pellach yn cael ei wneud er mwyn ceisio monitro effaith y cynllun ar yr
ardaloedd masnachol a busnesau cysylltiedig. Bwriedir datblygu’r
manylion mewn ymgynghoriad gydag Uned Gwybodaeth ac Ymchwil y
Cyngor, ond gobeithir y byddai modd ymgorffori’r canlynol i gynllun
monitro:
- Arolwg defnyddwyr meysydd parcio yn ystod y cyfnod (gan
gynnwys patrwm gwariant a rhesymau ymweld)
- Arolwg defnyddwyr / cerddwyr ardaloedd masnachol
- Holiaduron busnesau i geisio gwybodaeth a barn am effaith y
cynllun (i’w drefnu ar ddiwedd y cyfnod).
Mae profiadau dros y blynyddoedd diwethaf hefyd wedi amlygu
pwysigrwydd cynllun parcio am ddim fel rhan annatod o ymgyrch
ehangach i geisio hyrwyddo siopa’n lleol dros gyfnod y Nadolig. O
safbwynt yr agweddau hyrwyddo, credir fod cyfle i adeiladu ar
lwyddiannau blaenorol a datblygu agweddau newydd i’r dyfodol. Fodd
bynnag, rhagwelir y byddai angen ystyried unrhyw gynlluniau datblygol tu
hwnt i 2012/13 yng nghyd-destun adolygiad Cynlluniau Strategol y
Cyngor.
Camau nesaf ac amserlen
Bydd cymeradwyo’r argymhellion yn ein caniatáu i fwrw ymlaen i
gadarnhau trefniadau arfaethedig yn syth.

Barn y swyddogion statudol
Y Prif Weithredwr:
Mae'r ddarpariaeth parcio am ddim dros y Nadolig wedi bod yn
rhywbeth gweddol gyson dros y blynyddoedd diwethaf ac mae
ymrwymiad clir yn y Cynllun Strategol y mae'r Cyngor newydd ei
fabwysiadu ynglŷn â chanol trefi. Gan fod arolwg yr Adran Rheoleiddio ar
waith, mae'n synhwyrol cynnig y ddarpariaeth am eleni er mwyn gallu
asesu'r darlun yn llawn o ran prisiau parcio yn dilyn yr adolygiad. Mae
digon o adnoddau unwaith ac am byth i fedru ariannu hwn os mai dyna
yw dymuniad y Cabinet.
Y Swyddog Monitro:
Mae’r adroddiad yn nodi’r gwahanol ystyriaethau y bydd gofyn i’r
Cabinet eu trafod wrth ddod i benderfyniad ac nid oes unrhyw faterion
ychwanegol o briodoldeb yn codi.
Y Pennaeth Cyllid:
Argymhellir ymrwymo £40,000 unwaith eto allan o gyllideb y Cynllun
Strategol er mwyn ariannu’r trefniant ‘Parcio am Ddim’ rhwng 15 a 27
Rhagfyr i gefnogi busnesau canol trefi Gwynedd.
Mae’r cynllun yma’n ddilyniant o’r gweithredu dros y pedair blynedd
diwethaf i geisio cefnogi busnesau lleol yng Ngwynedd dros gyfnod y
Nadolig, yn arbennig mewn amgylchiadau economaidd heriol iawn, ac i
redeg law yn llaw gyda’r ymgyrch Siopa Lleol.
Rwy’n croesawu’r bwriad i fonitro effaith y cynllun ar yr ardaloedd
masnachol a busnesau cysylltiedig (i’r gorau o’n gallu), gan gynnwys
arolwg o ddefnyddwyr y meysydd parcio yn ystod y cyfnod ‘Parcio am
Ddim’.