Daraasad-Cimilo-Awaal - Heinrich Böll Foundation

4.
Gebogebo iyo Talo-soojeedinno
Gebogebo
Si la mid ah gobollada kale ee dalka, kama jiraan aagga daraasadda laga sameeyey
xarumo habeysan oo lagu kaydsho xogaha cimilada. Ha yeeshee, xogaha laga helay
waraysiyadii lala yeeshay qaar ka mid ah bulshadii lala kulmay, waxa ay innoo
iftiiminayaan in uu jiro is-beddel la arki karo oo la xidhiidha doorsoonka cimilada
muddo ku siman 20kii sano ee la soo dhaafay. Haddii aynu u sii gonda degno arrinkan,
waxa muuqda hoos-u-dhac (marmarka qaarkoodna) kor-u-kac ku yimaadda roobabka
iyo heer-kulka oo isu-celcelin kor u kacay. Xaaladahaas cimilo ee is-gedgeddiga badani
waxa ay badiba keeneen abaaro soo noqnoqda oo marmarka qaarkood u dhaca si
sannadle ah iyo fatahaado biyood oo dhibaato badan geysta.
Daraasado hore oo ay hay’adda Candlelight samaysay ayaa si qotto dheer u soo
ban-dhigay raadaynta doorsoonka cimilo ku yeeshay xoolo-dhaqatada iyo qaabnololeedkooda
6 . Si gaar ah, ayey daraasaddani diiradda u saartay raadka uu
doorsoonka cimilo ku yeeshay xoololey-beeraleyda ku dhaqan Gobolka Gabiley.
Arrinta ugu muuqa dheer leh ee ka soo baxday daraasaddanina waa roobabka oo
sii yaraanaya iyo raadka ay xaaladdaasi ku yeelatay nolosha dhaqan-dhaqaale ee
bulshooyinka ku nool gobolka.
In kasta oo ay beer-falashadu ku cusub tahay gobolka marka loo eego sooyaalka dheer
ee Soomaalida, haddana bulshadu waxa ay leedahay aqoon fi ican oo la xidhiidha
beerista dalagyada caanka ku ah gobolka. Waxana ay sidoo kale la yimaadeen ama
hindiseen tabo u fududeeyey in ay la jaan-qaadaan is-beddelladaas oo ay ka mid
yihiin gedgeddiga dalagyada (crop rotation), isku-dhafka jaadadka kala duwan ee
dalagyada, xilligii shinniyeynta oo wax laga beddelo (change in planting calendar),
xoojinta beerista khudaarta iyo geed-weynta (siiba meelaha ay ka suurtoobayaan),
hab-dhaqashadii iyo jaadadkii xoolaha ay manaafacaadsadaan oo wax laga beddelo.
Beer-biyoodyada ayaa sii tiro badanaaya iyada oo ay dabada ka riixayso baahida
xooggan ee khudaarta iyo midhaha ee ka jirta magaalooyinka. Ha yeeshee meesha
kama maqna dhibaatooyin hor-taagan in hor-u-mar laga gaadho beeraha noocan oo
kale ah. Waxaana ka mid ah: suququlnimada (cidhiidhiga) biyaha, cusbada oo ku
biirta ciidda marba marka ka dambeysa (salinity), qaab-waraab aan habboonayn oo
lumiya biyo badan – haddii ay tahay biyaha oo lagu butaaciyo ciidda ama xilli uumibaxu
badan yahay oo la waraabiyo beeraha.
6 Impact of Climate Change on Pastoral Communities of Salaxley and Balli-Gubadle Districts of Somaliland,
(2010), Candlelight Study.
Candlelight
Case Study
28
CIMILO-AWAAL
Daraasado ku Saabsan Doorsoonka Cimilada