January/February 2017 Volume 61 | No 1

is Hollands en Rhode se Nomme 20, Delphistraat. Maar dit was ook
’n byeenkoms van ervare stemme, met die digters Diana Ferrus
(Ons komvandaan en I’ve come to take you home) en Daniel Hugo
(onder meer Hanekraai en Takelwerk) en die aanbieder Margot Luyt
van die Radio Sonder Grense-program Vers en Klank, wat van hul
gunstelinggedigte voorgelees het.
Don Pinnock (Gang Town en Wild as it gets) en Marianne
Thamm (Hitler, Verwoerd, Mandela and me), albei joernaliste en
aktualiteitskrywers, se onderhoudvoerder was Dennis Cruywagen,
wie se gewilde The spiritual Mandela pas verskyn het, met ander
hoogtepunte die gesprek tussen Ferrus en Jolyn Phillips oor
laasgenoemde se hoogaangeskrewe nuwe kortverhaalbundel oor
haar grootwordjare in Gansbaai, Tjieng tjang tjerries; asook
filmresensent Leon van Nierop (Daar doer in die fliek) se onderhoudende
vertelling, saam met die akteurs Johann en Lida Botha
van De Rust en Koos Roets van Klaarstroom, oor die geskiedenis van
ons filmbedryf, met spesiale verwysing na die rol van die ‘befoeterde’
Rautenbach … ’n man wat vernuwing in ons filmwese gebring het.
Die kos- en spanningsromanskrywer Sally Andrew se Recipes
for love and murder en The satanic mechanic het van die
Leesfees-boekwinkel se rak gevlieg, ná haar gesprek met die
Flori Schrikker, Margot Luyt en Koelsoem Kamalie
Alle foto’s deur Marlene Malan
Jolyn Phillips, Katinka Heyns en Diana Ferrus
Shirmoney Rhode
koskenner en sjef Bokkie Botha van Prince Albert in
sy restaurant The Olive Branch, en die kosskrywer en
Huisgenoot/You-kosredakteur Carmen Niehaus het haar
gehoor in die Swartberghotel tegelyk onderrig en vermaak
met haar demonstrasie van kos-en-tee-kombinasies.
Geskiedenis is altyd ’n belangrike deel van die fees, veral
in Prince Albert waar die verlede ’n groot rol speel in die
bewaringsinisiatiewe hier. Die boek Ontdekkingsreisiger en
soldaat, deur die Nederlander Luc Panhuysen, is bespreek
deur sy vertaler in Afrikaans, prof Wium van Zyl, met sy
gespreksgenoot, ’n bekende historikus en paleontoloog van
die omgewing, dr Judy Maguire.
Maar die snaaksste en energiekste aanbieding was ongetwyfeld
dié van die debuut-kosskrywers Koelsoem Kamalie
en Flori Schrikker, oor hul boek Kook saam Kaaps, toe hulle
vertel het van hul splinternuwe ervaring van die limelight;
‘om skielik celebs te wees met ons gesigte op billboards’.
‘Haai, Pappa, ek is nogal ’n mooi vrou, nè,’ het Schrikker aan
haar eggenoot gesê toe hulle twee een middag sit en wag
het dat hul boek en gesigte op ’n padreklamebord verskyn,
‘daai soort wat so draai’.
Die aard van die fees mag nie vanweë sy sukses verander
nie, het die Leesfees-komitee op hul nabetragtingsvergadering
besluit. Prince Albert Leesfees kan en wil nie meeding
met die groot literêre feeste nie.
’n Komiteelid en jarelange inwoner van die dorp, Denise
Ohlson, som dit só op: ‘Prince Albert Leesfees het hom
gevestig as ’n gesellige boekemakietie op een van ons land
se mooiste, vriendelikste dorpe. Die eerste naweek van
November sal voortaan aangeteken word vir ’n uittog hierheen
— om lekker te kuier, te eet en vrolik te wees rondom pasgepubliseerde
boeke en hul skrywers, uitgewers, lesers en ontleders.’
Marlene Malan is ’n vryskutjoernalis, -vertaler en -taalversorger en
woon in Prince Albert
Kaapse Bibliotekaris Januarie/Februarie 2017
21