Caspar Lahme: Vertellt - Sauerlandmundart

18
Hochteyt in Dortmund
Lisebeth wur in Dortmund in Stellung. Un böi't sick sai harr, eät lehrte
ne netten Jungen kennen. Un öit deäm Kennenlehren wur
Loawhäbben. Noh ner Teyt, deän Bruimen harre’t all tehöise värstallt,
kam Post öit Dortmund: Lisebeth woll friggen.
„Vatter, use Lisebeth well friggen. Döi moßt dohenne foihren, dät dät
Mäken nit sai ganz alloane is. Bat söllt doa Lue in Dortmund van us
hallen, wann gar kenner öit Alme noh der Hochteyt kümmet," saggte
Mutter Lena, bo Anton obends van der Fabrik kam. „Ik packe dey aik
en grait Stücke Schinken und Speck in. Un en paar Weerste nimmst’e
aik mier. Dät is beäter ere wann ve süss wuot kaipet."
De Vatter harr kennen rechten Schnobben. Abber et blav me nix
anderes übreg. Fär boade Ellern wur de Fahrt te dür. Un Lena mochte
ge aik uppen Stall un up de Blagen passen.
Am Muorgen vam Hochteytsdage gong et dann mit der Bahn noh
Dortmund. Et wur et oastemol, dät Vatter Anton öit Alme kam - un
dät wur nit sai oanfach. Dann, bo hoa in Dortmund mit seynem
Gepäckel öit deäm Zuge stag un deän oasten besten frogere,
„Bo is dann hey de Hochteyt van use Lisebeth?", kuckern se eähne an
un konnen eähme nit helpen.
„Bat, düt is mey doch ne Welt. Wann in Alme ne Hochteyt is, dät
woat doch jederoane," schannte hoa. Abber alles Schängen hulp nix.
Un wann do nit grade ne Gendarmen stohn härr, boa en Heärte im
Leybe harr un eähne mier up de Wache nahm un van do öit alle
Pastore anroft härr, wür Vatter Anton sicker nit noh der Hochteyt
kummen. Sai abber kam hoa, wann aik late, tai graiten Fier. Un
Lisebeth roffte:
„Vatter, bo kümmest döi dann nöi oas her? Ick dachte all, döi würst
vär't Schütt gohn! Gutt, dät de do bist."