Zweigstelle: Hänigsen - Martin-Luther-Gemeinde Ehlershausen ...

Plattdütsch
Sömmerpsalm
van Marianne Brückmann, Aurich/Ostfriesland
Wo fein, Gott, is de Welt in disse Dagen.
Ik kann mi nich sattkieken.
Mörgens, halv noch in d` Drööm,
vör Dag un Dau,
wenn de Sünn dat eerst Lücht
över de Kimm smitt,
höör ik de Vögels singen.
Du hest hör elk en egen Klang geven,
kien een is as de anner.
Sünnblömen nickoppen mi to.
Un denn eerst de Rosen!
Völklörde Drussels rankeln an `t Holt
un dreihen priesherelk hör Kopp na de Sünn.
Ik dröm, Gott, van di!
De Sööm van dien Kleed is överseit mit Fentjeblömen.
Körvenwies streust du dien Leevde ut.
Roggblöömen un Mahn,
dat riepe Koorn liggt di to Foten.
Wenn de Middag kummt, summen un brummen
dusend Immen över de Heidtoppen.
Du maakst hör satt un lettst ok mi nich smachten.
Danke, Gott, Danke!
Wenn dat soor is, röppst du de Wulken
un lettst sachtjes Regen fallen.
Du verquickst de Grund mit süver Water.
De Sünn lett sük möi in de See fallen.
Man du, Gott, fangst hör up
un settst hör mörgen froh weer up hör Bahn.
Gott, du büst um mi to
van de eerste Mörgenstünn bit in de Nacht.
Mien Ogen könen sük nich satt sehn
an all dien Warken.
Dat is mi as en Wunner
un mien Hart is vergnöögt un vull Dank.
15