Ehrennadel LFV-Nds. für langjährige Dienste 50 Jahre

Seniorengruppe der ehemaligen
Führungskräfte
Dei Seniorenköppel mit dei ehemaoligen Führungskräfte ut`n Landkreis Cloppenborg giff dat nu
all einige Johrn. Anfangen is dat unner Kreisbrandmeister Hans Stör. Dei heff lange schnacken
müssd, bit dei „Rentner aohne Rente“ nich mehr glöwen döen, dat sei dordör nu endgültig tau
dat olde Isen hörn döen.
Gerd Grötzschel ut Schwichteler nöhm dann dei Saoke in dei Hand, un wenn dei wat in dei Hand
nöhm, dann wüdd dat uck wat. Hei wüdd weer Führungskraft in dei „Rentnerband“, brochde
Ordnung in den Laoden un aorbeitede sick dann hoch, un dat wüdd einstimmig beschlaoten,
tau ehren Präsidenten.
Väle Johre heff Gerd Grötzschel den Köppel den Weg wieset. Gern erinnert man sich doran
trügge.
Dann müssde hei ut gesundheitlicken Gründen afdanken. Dat was för üm nich einfach, was hei
doch mit Liev un Seil Füerwehrmann.
Dann wüdd Franz Schwalm ut Bäösel Präsident van den Köppel. Unner dat neie Leit wüdd Oldet
un Bewährtet bibehollen, aober uck Neiet köm dortau. Dei Fraulüe wüdden mehr „integriert“;
sei schullen uck wat tau Seggen hebben un nich blot in `n Huuse.
Bi dei Senioren fang dat Johr an mit ein Kohläten un dei Waohl van den Kohlkäönig. Interessant
is, dat dei Kohl äöwerall anners kaoket wedd. Aober dat is jao uck bi Schluck so, Berentzen
schmecket anners as dei Urolde von Rosche.
Man mot nu nich meenen, dat den ganzen Aobend äöwer Füerwehr schnacket wedd, dat is nich
so. Dei Schluck löset dei Tungen un dat durd nich lange, dann wedd äöwer Gott un dei Welt
schnacket. Dann kummp dei Tiet, wor man nich aal’s glöwen mot, wat dor vertellt wedd,. un dei
Fraulüe sick so `n bäten afsonnert van dei Kerls. Sei kennt sick all väle Johre un wat dei sick tau
vertelln hebbt, dat bruket dei Kerls gaor nich wäten.
Aober wenn dann Döntkes vertellt werd, dann marschiert sei in `ne eiersten Riege mit.
So `n Kohläten wedd immer `n gemütlicken Naomdag. Anfangen deit dat dann mit eine
„Stadtbesichtigung“ unner dat Leit van den Bürgermeister. Meisttiets heff dei uck `ne
Visitenkaorte in `ne Tasken.
Wenn wi dann weer nao Huus feuhern daut, dann hebbt wi nich blot den Buuk vull, wi hebbt
uck dat Füerwehrhus un dei Gemeinde seihn.
Übrigens: Fiern dau wi nich in eine Gastwirtschaft, dat dau wi bi use jungen Kameraoden. Un
man kann nich faoken naug seggen, dat wi us dor düchtig aower fraiet, dat dei us nich vergäten
daut un immer weer inlord.
In `n Sömmer feuher wi dann noch einmaol weer los; dann aober meisttiets `nen ganzen Tag.
Dann kieke wi uck äöwer usen Tellerrand rut, hen in Naoberkreise, Städte un bit nao Holland
sünd wi all wäsen. Un Aobends sünd wi dann weer in use Cloppenborger Rebett bi use jungen
Kameraoden.
Dit Johr schall uck noch eine Adventsfier plaont weern: ganz besinnlick mit Koffee, Tei und
Seutigkeiten.
So mehr weit ick nich, dat is aober doch all heil masse, wat wi so up dei Beine stellen daut. Man
schall dat uck nich äöwerdriewen.
Franz Schwalm, Präsident