FCB - Teams Ins/Müntschemier 28. Oktober 2023

Chöi Chäschüechli Wunde heile?
Oder d'Praktike vom ne säubsternannte Wunderheiler,
umgangssprachlich Pfuscher, uf em Lache!
Bim Spiu vo de Juniore B gäge SV Sumiswald/Huttwil b het dr
David Vuilleumier früeh verletzigsbedingt ds Schpiufäud
müesse ruume. Was isch passiert? Im ne Zwöikampf het dr
Gägner sys Bei uf Chopfhöchi ohni Rücksicht uf Verluschte
ygsetzt und dr Dävu ungerem Oug verwütscht. E
schuderhafti Wunde, wo blüetet het wie es gschtochnigs
Söili isch ds Resultat gsy. Bluetüberströmt isch är ab em Platz
gloffe und die besorgte Müettere vo de Juniore hey nach
Gaze und Yschbütu bääget. Aues was a Pärsonal verfüegbar
isch gsy, het dr Lache z'ungerobsy kehrt und chrampfhaft
nach dene Bütle gsuecht. "Sapperlott, wo sy die Cheibe, mir
hei doch gha, wele Gigu…, und so wyter. Keni Chüeubütu
ume, do nid, dört nid, niene! Uf die Chance het dr
Wunderheiler MK gwartet und toucht mit em ne gfrorne
Pack Chäschüechli uf. "Heilige Strohsack, was wott dä mit
däm Pack Chäschüechli"? D'Müettere hey d'Häng verworfe,
amüsierti Beobachter hey gschmunzlet und dr Dävu het y
auer Seelerueh zuegluegt und gwartet, was ächt no aues
passiert. Chuum gfrogt, scho chläbe die Chäschüechli uf dr
Backe vom Dävu. D'Erika, d'Muetter vom Dävu, het du däm
Triebe es Änd gmacht. "Chum David, mir fahre uf Biel goo nääje"! Sie het Angscht gha, dr MK chöm de
plötzlech no mit Nodle und Fade derhär u schnurpfi das Malör zäme.
Für d'Juniore het sich dä Usfau negativ usgwürkt. Ohni Schpiumacher David Vuilleumier hei sie dä Matsch
mit 4:1 verlore.
Es churzes Gschpräch im Stedtli nach em Match
Guschti: "Bisch uf em Lache gsy"?
Fruschti: "Warum, bisch Häuseher, oder was"?
Guschti: "Lueg doch mou dini Schueh aa u nächhär luegsch de no dis Outo aa! Hesch jitz d'Erlüchtig"?
Fruschti: "Jitz wos seisch! Die schutte fang bi jedem Schiesswätter und dä Parkplatz isch ke Parkplatz, dass isch es
Biotop, wenn's schiffet wie us Chüble".
Guschti: "U das aues wäge de Vögeli, de Füchs, de Dachse, de Marder und schüsch aues was do kröicht und flöicht"!
Fruschti: " Du bisch jitz e Löu! Das het doch mit däm nüt z'tüe. Das isch wägem Grundwasser, mir sy do im Gwässerschutzberych".
Das isch kes Nasewasser du Glögglifrösch. Apropos Frösch, Frösche und Schlange hets de do
ou!--→ wyter uf Syte 31
Seite 27