Die - University of the Free State

Blou Willem
‘Check jou
ou Charlie!’
Toe ek as rou eerstejaartjie daar in
1971 by Reitz-kamerwonings
ingeboek het, het ek geweet ek moet
saggies loop want in dié plek bly Joggie
Jansen en Sakkie van Zyl se foto hang teen
die muur in die gasellie. Maar ek het ook
daai eerste paar dae gehoor van Mich
(Ysterkop) Lindström, volgens oorlewering
die sterkste en gevaarlikste ou wat ooit in
Reitz gebly het.
Mich het nog by Yskor gewerk en het
eers so teen die einde van die
ontgroeningstyd daar by die koshuis
opgedaag. Hy het vir ons as eerstejaars wat
in vrees en bewing op sy kom gewag het,
daai eerste aand soos ’n geestelikversteurde
seerower gelyk met sy vierdagbaard en wille
kyk. Hy’t net so saggies in jou oor gebry:
“Eegstejaag, wie de moeg is ek” en dan
het ons hard en duidelik teruggeskree:
“Oom Mich Ysterkop Lindström, Oom!”
En wee jou as jy die “Mich” of die
“Ysterkop” uitgelaat het.
In elk geval, ou Mich was sekerlik
kilogram vir kilogram die sterkste klein
derduiwel wat ooit vir die Shimlas op
voorry gesak het. ’n Mannetjie wat met sy
ongemaklike skrumstyl en krag selfs vir die
grote Sakkie ’n bron van irritasie in die
skrums was.
Met die Curriebekerfinaal vanjaar,
gesels ek nog daar op die pawiljoen so oor
ses rye sitplekke met ou Martiens le Roux
en ’n paar uur later verongeluk hy ook soos
sy ou Malhuismaat en medestryder in die
voorry, Wouter Hugo. En toe dink ek ver
terug aan die dae toe Martiens nog vir
Malhuis en die o.20’s flank gespeel het. Tot
Oom Sak aan die einde van 1971 besluit
het maar Martiens gaan ’n
voorry word en hom daai
Desember onder hande
neem.
Toe ons na daardie
vakansie terugkom in
Bloemies sien ons die ou
daar by Malhuis rondloop wat
vir ons vaagweg bekend lyk,
maar eers toe hy met ons gesels,
sien ons maar dié moegse meneer
is al die tyd ons maat, ou Charlie
(deur ons so gedoop oor die manne
wat daai jare so die Cortina onder
die een arm vasgeknyp het, en dan
met die duim in die lug gegroet het:
“Check jou Charlie!”) En so het
Charlie ’n Vrystaat legende geword.
Hy was die eerste van die nuwe era van
beweeglike voorrye wat anders as ou Mof
en dié manne meer kon doen as net skrum,
loop en oë knip. Nee, ou Charlie kon
hardloop soos ’n flank, “dummy” soos ’n
senter maar ook skrum soos ’n beer.
En so het hy uiteindelik tussen 1973
en 1986 in 162 wedstryde vir die Vrystaat
gespeel waarvan 25 as kaptein, was hy lid
van die eerste Vrystaatspan wat die
Curriebeker kon vashou en is hy in 1980
gekies vir die Springbokke teen die Britse
Leeus.
Deur die jare het die Shimlas fantastiese
voorrymanne opgelewer: Henning van
Aswegen, Noël van Rensburg, De Wet
Holtzhausen, Bees Steyn, Nico Walters,
Johan Styger, Dawie Theron, Piet Bester,
Ollie le Roux, Dougie Heymans, Daan
Human, Jannie du Plessis, Wiaan du Preez,
Ryno Gerber, Gurthro Steenkamp en nog
talle ander. Van die aangenaamste manne
wat ek ooit teëgekom het, maar tot jy hulle
beter ken, trap jy versigtig.
As ek vir Alexis Steenkamp daar in
Empangeni gaan soek en hoor hy het vir
die Shimlas voorry gespeel, stap ek op my
tone in sy kantoor in. Maar een ding wat al
hierdie manne in gemeen het, is dat hulle
almal êrens die trieks van die “ trade” by of
Oom Sak of by Martiens geleer het. Ek sê
maar weer: “Check jou ou Charlie! Jy gaan
maar altyd daar voor in die Shimlaskrum
saam met die manne druk as dinge rêrig
taai raak!”
Bult •November 06
32