SILÌCUA storia, cultura e costumus (2003 ... - Sa Bertula Antiga

SILÌCUA
storia, cultura e costumus
(2003)
Arregodus e Costumus (parti cuarta)
Sa fastigiadura fiat meda diferenti de cumenti est
immui.
Oi is giovunus tenint medas ocasionis po si biri e
is babus no ddus sus nanta nudda. Antigamenti is
cosas fiant diversas: candu is intervistaus fiant
giovoneddus is posibilidadis po s’agatai fiant
pagus.
Is giovoneddas fiant sempri controlladas e no
podiant fai nudda, sceti duus fueddus podiant
cupromiti sa reputatzioni. Si narat: sa genti chi no
si sciri fai su fatu suu, fait su fatu alleunu.
Is logus innui in piciocus e is piciocas si
incontraiant fiant sempri is proprius: in crèsia me
in s’ora de sa missa o de atras funtzionis, o in
pratza de crèsia, me in domu de amigus, in su
traballu, a is festas, me is cojas o a is interrus, o in
sa bia.
Prima ci fiant is castiadas, chi si praxiant
incumentzaiant a fastigiai.
Fiat s’òmini chi incumentzaiat, chi sciiat scriri,
donaiat una litra a sa picioca, innui naraiat chi fiat
innamorau de issa. Sa litra fiat donada a manu de
s’òmini e totu o de cancunu chi dda conosciat, su
poborimpu. Chi no sciiat scriri si afidaiat a is
amigus o fintzas a su babu e a sa mama, po fai a
biri aici chi teniat intentzionis serias. Is
giovoneddas meda bortas no arrespondiant
subitu po bregùngia o poita timiant cussu chi iant
a ai pòtziu nai su babu e sa mama e fintzas sa
genti allena e naraiant a su giovunu de preguntai
a mamai. Po custu e totu medas bortas is òminis
domandaiant su permissu de fastigiai a su babu e
a sa mama de sa fèmina: ziu, ddu potzu mandai a
babu a dda chisionai poita deu seu cuntentu
meda de sa filla?
Is mamas arrispondiant narendi: deu mi seu
cojada a prexeri miu, cussa at a pigai a prexeri de
cussa, e custu boliat nai chi su piciocu podiat
domandai diretamenti a sa picioca.
4 - Sa fastigiadura
Chi su pretendenti fiat stràngiu su babu e sa
mama cicaiant de sciri cancua cosa de issu e de sa
familia innantis de donai su permissu.
Is duus si podiant incontrai sceti candu fiant fatus
a sposus, candu su babu de su piciocu fiat andau
a domandai a domu de sa picioca.
Fintzas a brintai in domu, s’òmini cicaiat dogna
manera po biri sa picioca e medas bortas sa
fastigiadura fiat sceti po iscritu.
Sa dì chi bessiant a craru, si fadiat una festa
cumenti una coja: is giovunus andaiant a crèsia
impari e a pustis de sa missa su babu e sa mama
de su sposu prandiant in domu de sa sposa e is
duus giovunus papaiant in su stessu pratu poita
de cussu momentu iant a ai pràtziu dogna cosa. A
mericeddu si cumbidaiant parentis e amigus.
Is sus sposus si arregallaiant s’aneddu e, chi su
sposu teniat sa posibilidadi, aciungiat sa cannaca,
is lorigas, su butoni; puru sa sroga a bortas fadiat
un’arregallu a sa nura: s’arrosariu o un’aneddu.
Chi is sus sposus storraiant, medas bortas fintzas
is familias cetaianat e no si chistionaiant prusu.
Po sa fèmina fiat unu problema mannu meda, sa
familia dda poniat in dispati e medas bortas no
agataiat un’antru spusu poita is òminis no boliant
s’arrefudu de is atrus.
Sa fastigiadura duraiat mesis o annus segundu is
posibilidadis de s’òmini. A bortas si andaiat a bivi
in domu de afitu, pero giai sempri cicaiant de si
costruì una domiscedda e fiat fata cun is
arrispramius de su traballu.
Fintzas a pagus tempus, sa domu fuit fata cun
materialis localis e cun s’agiudu de is amigus;
terra cruda po is matonis de lardiri, terra cota po
sa teba, palla, cannas, giuncus e perdas de s’arriu.
Po preparai is matonis de lardiri si fadiat aici: sa
terra, chi beniat de sa forada de su lardiri, beniat
traballada cun su cannaioni de su trigu o cun sa

palla de cannaioni, s’impastu si poniat in su sestu,
una forma fata de linna, e si poniat a sciùtai a su
sobi. Sa bòvida fiat fata de cannas, tentas de
bigas de arridebi o de sinnibiri postas me is murus
lateralis de is aposentus.
In su centru storicu, me is bias de su cursu fintzas
a sa crèsia de Sant’Anna, ci funt ancora medas
domus de lardiri.
In su mentris chi s’òmini fadiat sa domu, sa
fèmina preparaiat sa biancheria. Me is familias
ricas fiant is mamas chi preparaiant totu de
candu is pipias fiant piticheddas, chinou fiant is
giovonedas chi si ddu tessiant in su trobaxiu o
ddu compraiant cun su dinai chi guadangiaiant
traballendi in su satu o a servìtziu.
Sa biancheria fiat composta de: lentzorus,
coscineras, mantas, tiallas, asciugamanus,
pannixeddus de coxina e sa roba de bistì. A
segunda de is posibilidadis fiat totu de doxi o de
seis. Candu totu fiat prontu si allogaiat in sa
cascia chi fadiat parti de sa biancheria.
Sa fèmina dopiat potai puru is cosas de sa domu:
pratus, tassas, cìcaras, cicareddas e cicorera, sa
cafetera, su molinetu, culleras, frochitas,
goteddus, cocenius, turras, cocenois, tianus e
pingiadas, su ferru de stirai. Dopiat potai puru su
strexu de feu: is pobinas, is canisteddus; su
strexu de terra: sa scifedda e is marigas; is
trèbinis, sa palita, is pìtziris, s’achicaju, su suadori.
Chi sa familia de sa fèmina teniat posibilidadi
potaiat puru sa mobilia, chinou dda compraiant a
mes’a pari.
S’òmini, potaiat sa domu e sa roba de bistì.
Is dias prima de sa coja is mamas, is zias e is sorris
limpiaiant e cuncordaiant sa domu po is sus
sposus e po fai a biri sa biancheria e is arregallus
a is invitaus.
Fiat sa mama de su sposu a preparai su letu
matrimoniali e in mesu de is lentzorus poniat
sabi, arrosu e trigu: intelligèntzia, fertilidadi e
richesa.
Custu boliat sa sposa sa dì de su sposoriu: unu
pagheddu de vanidadi e sa beneditzioni de sa
Madonna e de Gesus.
Mamma sa dì chi mi sposu
ghettimì su velu a sa moda de Cabu de susu.
Mamma sa dì chi mi sposu
ndi cabidi de su celu Maria cun Gesus
po fai sa cruxi a nosu.
Ghettimì su velu po fai sa cruxi a nosu
Maria cun Gesus ndi cabidi de su celu,
a sa moda de Cabu de susu.
ndi cabidi de su celu Maria cun Gesus
po fai sa cruxi a nosu.