Su Carnevali Antigamenti s'aria de Carnevali si ... - Sa Bertula Antiga

Su Carnevali
Antigamenti s’aria de Carnevali si intendiat giai
apustis de s’Epifania e duraiat po totu su mesi de
Friaxu. Is fèminas cumentzaiant a friri, a preparai
is drucis de custa festa: is zìpuas.
Po ddas preparai si impastat sa farra cun su
lievitu fatu sciolli in su lati, su tzafanau, su suci de
arangiu e unu pagheddu de filu de ferru.
S’impastu si traballat po meda tempus innantis in
sa mesa e apustis in sa scifedda. Si lassat una
parriga de oras po si ndi pesai e apustis si friint in
s’ollu. No tutus usaiant s’ollu armau, medas
usaiant s’ollestincu, fatu cun modditzi, amesturau
cun s’ollu de procu. Is zìpuas si papant crobetas
de tzucuru.
Atrus drucis de Carnevali funt is cruxionis fritus e
is maraviglias o cruxionis de bentu.
Is dias dedicadas a su Carnevali funt: su giòbia
perdaiò, su martis de cò e su domingu de cò o su
domigu de segai is pingiadas.
In custas dias, si bistiant de mustaioni: is òminis
de fèmina e is fèminas de òmini, cun is facis
crobetas po no si fai a connosci. Bistius aici
andaiant in giru po sa bidda a fai schertzus e tocai
a is portas po domandai zìpuas. A merì si riuniant
in su Monti Granaticu o in domu de cancunu po
baddai.
Su domingu apustis de su Mercuis de Cinixiu,
candu incumentzat sa cuaresima, si apicaiant in
Pratza de ballus, is pingiadas prenas de drucis, de
gatus, topis, terra, perdas, paperi. Is òminis a
cuaddu, bistius in costumu e cun is ogus
crobetus, dopiant cicai de segai is pingiadas cun
bastonis; candu ci arrennesciant su chi ci fiat
aintru arruiat apitzus de issus e de sa genti chi fiat
acanta a castiai. Ci fiat genti chi dda preparadiat
puru in domu.
Me is utimus annus su domingu si organitzant is
carrus e si faiat una sfilada.
Is cantus fiant is gòcius de Carnevali. Antigamenti
fiant sceti religiosus, cun su tempus si usaiant
puru in atras ocasionis po si befiai de cancunu chi
fiat diventau ridìculu po cancua cosa.
Po Carnevali is gòcius si scriiant in foglius chi
beniant donaus a is chi partecipaiant a sa sfilada
po podi cantai totus impari.
I gòcius de Carnevali prus famosus, cantaus
ancora in su 1990, fiant stètius compostus in
1930:
Carnevali de piticheddu
cafelati non di obiat,
e sa mamma pesau ddu iat
totu a forza de binu nieddu,
ma imui chi est matucheddu
No ddu abastat nisciuna cosa.
Andira:
Carnevali clamat agiudu in cust’ora necessitosa.
Amigu est de is cuponis
cubeddas e crocorigas.
Portat obertas is origas
e provistu est de nasoni.
Ddu praxit sa petza de angioni
binu nieddu cun gatzosa.
(Andira)
Parit poburu fiudu
e de continu est prangendu.
Curiosu est bufendu
bufat su binu a imbudu
e po chi du biais brabudu
sa vida si passat gioiosa.
(Andira)
Cun proceddus cotus arrustu
Macarronis cun salamu
issu puru fillu de Adamu
a si spassiai pigat gustu
e ddu praxit fintzas su mustu
cun sa tacula chi est gustosa.
(Andira)
Carnevali est meda gulosu
de friteddas e meraviglias.
Oi visitat is famiglias
andendi cha est fedosu
e poita non est bregungiosu
Aberit buca vistosa.
(Andira)
Carnevali cun bravura
ddu prascint is cosas bellas,
Ciuculatis e caramellas
Amaretus e confetura.
A scrocai non tenit paura
Ca sa faci no est bregungiosa.
(Andira)
Immoi fatzu una proposta
e ollu a m’ascutai:
aiò totus a baddai
su ballu a sa moda nostra
e giai chi fadeus sosta
cumbidai cancuna cosa.
(Andira)
A sa fini de sa sfilada su mustaioni chi
simbolegiaiat su Carnevali fiat abruxiau is su fogu.
Fintzas a pagu tempus, innantis de ddu abruxiai si
fadiat su processu. Si leiat unu testu chi de annu

in annu fiat modificau cun is cosas chi sucediant
in sa vida politica e sociali e sa bidda.
Su carnevali es simbili a is Saturnali de Roma, sa
festa de Saturnu, deus de su trigu, issu puru fatu
morri apustis de ddu ai festegiau. Carnevali e
Saturnali funt duas festas de su satu, si festegiant
in s’ierru pero annunciant su beranu, e sa nascita
de sa natura.
Custa ipotesi agatat arregioni in s’ateru nòmini
cun su calli est connotu su Carnevali in sa
Sardigna merigionali: Canciofali. Su nòmini, chi
arregodat sa canciofa, evidentzit su carateri
agresti de sa festa.
Benau
Tra Martzu e Abrili, si celebrat sa Pasca manna.
Sa cuaresima icnumentzat su Mercuis de Cinixiu,
candu su predi in sa missa usat su cinixiu de su
passiu, sa prama benedexia s’annu innantis po
sinnai sa fronti de is chi partecipant a sa funtzioni.
Custu sinnu e sa formula: arregodadì òmini chi
eres terra e chi as a torrai terra, serbiat po
arregodai chi dogna òmini es mortali. Est una dì
de digiunu.
Aspetendi de sa Cida Santa, me is famiglias si
preparaiat su nenniri, su trigu lassau cresci in su
scuriu, aintru de vasus cun àcua e cotoni po ddu
fai nasci grogu. Secundu certus studiosus su
nenniri rapresentaiat is primus cristianus chi si
reuniant a su scuru me is catacumbas po pregai.
Sa Giobia santa su nenniri, alluxentau cun is
fiobas, si poniat in sa capella chi fiat cuncordada
cumenti sepulcru de Gesus.
A Silìcua po traditzioni, sa cenàbara prima de sa
Cida Santa si fait sa via crucis in sa bidda. Sas
statzionis, preparadas acanta de is portas sempri
is proprias domus, funt indicadas cun dd‐una
cruxi innui asuba, is familias e su bixianu
cuncordat s’altari cun froris e unu cuscinu o unu
tapetu po fai ingenunai su predi.
A metadi de sa cuaresima, ci funt is corantoras:
po tres dias su predi impari a atrus predis chi
benint de is biddas acanta funt a dispostzioni po
is confessionis e po incontrus de preghiera e
adoratzioni.
Antigamenti, si fadiant is cuaresimalis, predicas
de argomentus specificus fatas de is predis o
paras missionarius, in domu de cancu fedeli e
fiant una borta a sa cida. A segunda de su carisma
de su predicadori sa genti chi andaiat fiat meda o
pagu. A Silìcua fiat bravu meda dottor Floris.
In vista de su Domingu de Prama si preparaiant is
pramas. Po primu cosa tocat a cuai is follas
giovonas aintru de is prus bècias po ddas fai
cresci grogas. Apustis benint segadas e
trentzadas.
Su chi fiat considerau su prus bravu a trentzai
fadiat su passiu, sa prama po su predi chi dda
cuncardaiat cun frèsias, gravellus, paperi colorau
e cambixeddus de obia. Sa prama de populu,
cussa chi beniat donada a totus fiat meda prus
semplici.
Su Domigu de Prama, is pramas e is cambus de
obia funt beneditus in sa crèsia de Sant’Anna, e
de ingui is fedelis andant in processioni fintzas a
sa crèsia parrochiali po ascutai sa missa. Is
pramas si apicant me is domus, in conca de letu,
in su giù e innui si traballat.
Is funtzionis de sa Cida Santa incumentzant su
giobia cun sa preparatzioni de su sepulcru chi si
prepat, in sa capella de s’Immacolada. In sa
funtzioni de su merì si portat s’ostia e si fait
s’adoratzioni. S’altari mannu si spollat de totu, po
fintzas de is candebas e de is tiallas e su
tabernàculu sbuidu est lassau obertu.
De su giobia is campanas no tocant in segniu de
lutu. Antigamenti, po arregodai is funtzionis is
preideddus giraiant po sa bidda cun su
scrocciarrà, un’antigu strumentu musicali chi
tenit su sonu simbilli a su craccallai de is
arranans, o is matraccas, tauleddas de linna cun
mànigas de ferru chi candu si movint faiant unu
sonu particolari.
Sa Cenabara santa, est sa dì chi si ndi cabat Gesus
de sa cruxi, su corpus benit postu in sa latera,
cropeta cun dd‐unu velu de tullu trasparenti, e
potau in processioni in totus is bias de sa bidda
sighidu de sa Madonna Addolorada.
Oi su chi est abarrau de su scravamentu, est sa
presentzia, in s’adoratzioni e in sa prucessioni de
Gesus Mortu, de duus pipius chi rapresentant sa
Maddalena e Santu Juanni chi portant duus
cestinus cun is segnius de sa passioni: sa corona
de spinas e is pùncias.
Su Sabudu Santu, si celebrat sa missa de sa
resurretzioni, annunciada cun is campanas chi
sonant A gloria. Fintzas a is primus annus ’60 sa
missa fiat a is dexi de a mengianu. Candu
incumentzaiant a tocai is campanas, is fèmias e is
pipius tocaiant cun bastonis is portas e is murus
de is domus po ndi stesiai su tìau.
Cumenti acabaiat sa missa su predi bessiat po
benedixi is domus, incumentzaiat de sa tzona de
santu Giorgiu e sighiat in sant’Antoni.

Su Domigu de Pasca, ci fiat s’incontru de Gesus
resuscitau e de sa Madonna. De su pratzali de
crèsia partint duas processionis, chi apustis de ai
fatu bias diversas si atòbiant in Pratza de ballus
(oi pratza Costituzione). Su primu, su prus fatu de
fèminas acumpangiat sa Madonna, c’est puru sa
prioressa e is pipius bistius de sa Maddalena e de
Santu Juanni; su segundu, cun su predi e is òminis
acumangiat Gesus resuscitau. Candu Mama e
Fillu si incontrant, si ingenugant e sa prioressa ndi
bogat su velu nieddu chi coberriat sa Madonna.
Sa festa sighit cun su pràngiu de Pasca chi fiat
simbilli a cussu de Paschixedda e de totus is dias
de festa, sceti is drucis fiant diversus. Po
s’ocasioni si preparaiant is parduas e su cocoi cun
s’ou.
Su 23 de Abrili, Silìcua celebrat Santu Giorgiu, su
patronu, chi est sempri stètia sceti una festa
religiosa: si celebrat sa missa e sighit sa
processioni innui partecipant is grupus in
costumu e sa banda musicali. In tempus antigus,
su carru chi trasportaiat sa statua de su Santu fiat
precediu de cuaddus e bois. Candu acabaiat sa
processioni is animabis fiant benidixius in sa
pratza de crèsia, innantis chi su Santu intressit.
Apustis de duas dias is Silicuarxius fiant un’antra
borta in festa po santu Marcu. A is seis de a
mengianu sa processioni partiat de sa crèsia de
Sant’Anna, innui fiat allogada sa Satua de su
Santu e si andaiat fintzas a sa crèsiedda de su
satu. In sa manu de su Santu si poniat una
manughedda de spigas chi cumentzaiant a
ingranì.
Candu fadiat annada maba, sa genti timiat e
segaiant una spiga, e andaiant po da fai benedixi.
Custu ritu benit de sa legenda chi contat chi sa dì
primas de sa festa, santu Marcu passaiat a
cuaddu me is satus a benedixi is terras semiadas.
De custa traditzioni no si ndi scidi nuda chi no me
is arregodos de sa genti de Silìcua.
Su tertzu domingu de su mesi de Maju, si
festegiat Santu Jacu. Puru custa statua est
allogada in sa crèsia de sant’Anna, innui su
Sabudu si celebrat sa missa e partit sa processioni
chi lompit fintzas a sa Madonnina e de ingunis
sighit po sa crèsia de su satu. Su domingu, primas
de sa missa, si fait una prucessioni in su satu e a
merì si torrat a Sant’Anna.
Fintzas a sa segunda guerra mondiali, a sa
torrada, sa processioni si frimaiat in s’ortu de tzia
Drefina innui si cuncordaiant is paradas, e si
baddaiat e si fadiant curri is cuaddus.
Oi sa festa durat tres dias, de sabudu a lunis, est
organitzada de unu comitau chi proponit ballus,
concertus e fogus. Innantis si fadiat totu in pratza
de ballus, o in sa crèsia de su satu, immui si fait
tutu in s’anfiteatru comunali.
Custa festa est s’unica chi est abarrada sempri
uguali.
Antigamenti fiat meda importanti puru sa festa
de sant’Isidoru, su protetori de is agricoltoris,
festegiau su 15 de Maju candu su trigu
incumentzaiat a imbrundì.
Sa statua allogada me in sa crèsia de sant’Anna
arregodat sa legenda de sa vida de su Santu:
Isidoru, innantis de andai a traballai andaiat a
crèsia po pregai e ascutai sa missa, a merì si
dedicaiat a is poburus e a is bisongiosus. Po
premiai sa devotzioni e po ddu fai sighì me is
operas de beni una dì fiat mandau un’angelu po
fai su traballu de issu in su satu.
Sa festa fiat sa missa in sa crèsia de sant’Anna e
sa processioni cun carrus a bois. Oi, duranti sa
missa si benedixit su trigu chi sa genti si portat a
domu.
Istadi
Su nòmini de Làmpadas benit de su latinu
lampas, làmpada, luxi de su sobi. Segundu su
linguista Wagner, s’origini est de cicai in s’usu
paganu de allui fogadonis in onori de sa dea
Cerere, sa dì de su solstìtziu de s’istadi. Candu est
incumentzau su Cristianesimu, custa ritualidadi
est passada a Santu Juanni. Cun dies
lampadarum, dias de is lampadas, si nomenada sa
primu dì de sa festa de su Santu e de ingunis totu
su mesi.
Su 13 de su mesi, sa missa est celebrada in sa
crèsia de sant’Antonio da Padova. Est traditzioni
preparai su pani chi benit benedixiu e donau a sa
genti chi ascutat sa missa.
Antigamenti si fadiant puru is fogus e si
preparaiant is paradas po compai su turroni e sa
carapigna.
Sa festa de Santu Juanni de su 24 si est pèrdia
completamenti, antigamenti ci fiat sa missa, sa
processioni e me is axrobas si fadiat su fogadoni
po baddai e cantai.
Is piciochedas, po spassiu, cun su fenu de is
mànigas, fadiant foghixeddus piticus, seti o otu
totus in fila e si spassiaiant a satai.
Me is dias de custa festa is giovunus si
scioberaiant un’amigu o un’amiga e fadiant su
santuanni, una promissa de amicitzia. Is duus de

cussu momentu fiant mui unidus, si donaiant de
fustei e si tzerriaiant gomai (is fèminas) e gopai (is
òminis). Po ddu diferentziai de su santuanni de su
batiari o de sa cunfirmatzioni si tzerriaiat
santuanni de froris. Is duus candu decidiant de fai
su santuanni recitaiant a manu pigada:
Gomai gomai (gopai gopai)
filla (fillu) de Santu Janni,
filla (fillu) de Deus
gomais (gopais) abarreus
po cantu biveus
sa noti de sa vigilia fiat considerada bona po fai is
previsionis po su tempus e po s’arregota, e fintzas
po s’amori.
Is piciocas chi fiant cichendi popiddu fadiant
s’auspiciu de sa fa. Innantis de si crocai, poniant
asuta de su coscinu tres faas, una spollinca, una
bistia e una mesu spollinca e mesu bistia. A
mengianu, stichiant sa manu asuta, e ndi pigaiant
una: chi fiat cussa spilloncada s’ent a essi coiadas
cun ddu pobiriteddu, chi fiat cussa cun su croxiu
s’omi at a essi stètiu arricu, s’atra rapresentaiat
un’òmini ni arricu ni poburu. Cancua borta si
poniat puru su nòmini de is piciocus de bidda a is
faas.
Po sciri chi su sposu at a essi bagadiu o fiudu si
arregolliat una cugutzua chi apustis de dda
abruschiai si lassaiat in soru de sa ventana totu sa
noti. A mengianu chi sa cugutzua fiat prus frisca
su sposu at a essi stètiu bagadiu chi si fessit
sicada at a essi stètiu fiudu.
Sa noti, is piciocus andaiant a cantai is bagadìas;
si frimaiant ananti de sa porta e cantaiant
mutetus.
Su mesi de Argiobas, fiat dedicau a sa treba. Su
nomini de su mesi benit de su nomini de su logu
innui si fadiat: is argiobas.
Duas fiant is festas importantis de custu mesi: sa
Madonna de su Carmelu su 16 e sant’Anna su 26.
Po sa Madonna de su Carmelu ci fiat sa missa, sa
processioni e is tres dias, chi fiat una funtzioni
innui si recitaiat s’arrosariu e si naraiant
oratzionis a sa Madonna me is tres dias antis de
sa festa.
Unu tempus, sa dì de su Carmelu no si podiat
trebai. Cuesta usantza benit de su chi contaiant
chi in custa dì me in s’argioba de funtana, unu
logu acanta de su Cixerri, un’òmini, chi fiat
trebendi sa dì de festa fiat stètiu ingùtiu de sa
terra cun giù e totu.
Po sant’Anna, fintzas a sa segunda guerra
mondiali si fadiat festa manna. Ci fiat sa
cerimonia religiosa in sa crèsiedda dedicada a sa
Santa e si organitzaiat sa cursa de cuaddus me is
cungiaus chi ci fiant acanta.
De custa festa oi abarrat sceti sa festa religiosa, e
sighit sa traditzioni de cuncordai sa statua cun
oru, froris e s’afrabica fini.
In Austu si celebrat sa festa de sa Madonna
Assunta su cuindixi e de Santu Giuseppi
Calasantziu su bintinoi. Fintzas a bint’annus fait
sa festa fiat manna, su comitau invitaiat is
cantadoris, is grupus folcloristicus is complessus
musicalis e si fadiat totu in su palcu chi si
preparaiat ananti de sa crèsia de santu Giuseppi.
Si organitzaiat s’alberu de cucagna, su fogadoni e
is fogus artificialis. Unu de is intervistaus si
arregodat de is primus fogus candu fiat bessiu su
quadru de Santu Giuseppi puru!
Me is paradas si podiat comprai drucis e fruta
sicada, me is barracas si podiat papai petza, lissa
o anguidda arrustu.