SANTA RITA DE CASSIA Rit. De Gesus ses ... - Sa Bertula Antiga

SANTA RITA DE CASSIA
Rit. De Gesus ses istimada
De Gesus gratzias implora
De impossibilis protetora
Rita ben aventurada
1. Su nòmini e nascimentu
De un angelu est avvisau
A mamma tua svelau
Cun singolari portentu:
O nobili argumentu
Prenda de celu calada. Rit
2. Cun gràtzia batismali
Ti cunservas innocenti
Is abis divinamenti
Donant custu signali,
Ses dultzura universali
Po nosaturus destinada. Rit
3. De Cassia bell’ornamentu
De s’Umbria fecunda palma,
As a essiri glòria e fama
De is Agustinus cuntentu.
Dognunu mirat attentu,
Virtudi privilegiada. Rit
4. Singulari s’ermosura
De virtudis adornada,
Ses de totus istimada,
Angelica creatura,
E in tali bella figura,
De totus ses ammiarada. Rit
5. De sa minori etadi
Sa virtudi as dimostrau,
Candu a Deus as consacrau,
Sa bella virginidadi:
Però contra voluntadi
Pustis beni isposada. Rit.
6. Essendi ancora in s’innocèntzia
Cun rigori giaunasta,
santidadi dimostrasta,
amanti de s’astinèntzia:
Sa puresa e penitèntzia:
stimendi mortificada. Rit.
7. Unu maridu tiranu
Pigas po meda obedièntzia,
Màrtiri de passientzia
Po tratu tantu inumanu,
De su sposu soberanu,
Ses cun carignu tratada. Rit.
8. Cun tanta persecuzioni
Giai tui prus cuntenta,
De tali dura tormenta
Triunfas cun s’oratzioni
Su sposu cun devotzioni
Lassat sa vida malvada. Rit.
9. Candu sa paxi gosai
Ti creis suavementi,
Eccu ti bis de repenti,
A su sposu trucidai;
Ma tu solu a perdonai
Totus se determinada. Rit.
10. Is duus fillus chi teniast
A Deus as bofiu donai,
Po no lompiri a pigai,
sa vengantza chi timiast:
Su stadu chi pretendiast
Solicitas impegnada. Rit.
11. Custu disìgiu divinu
Nega sa regula sagrada
Po chi fèmina fiudada
No podit pero Augustinu
Cun Batista e Tolentinu
Donant ispatziosa intrada. Rit.

12. Is religiosas in totu,
Po su prodigiu spantadas
T’ammitint consoladas
Po tenni tali accunnortu
De Maddalena in s’ortu
Ses pura rosa incarnada. Rit.
13. Essendi in sa religioni,
E novìtzia, e professa
Si mirat in tui espressa
Totali perfetzioni,
Chi sant’emulatzioni
In totu benit causada. Rit.
14. De sa mistica dotrina
Ses maista singulari,
In Cassia grandu esemplari
De scièntzia peregrina,
Ses de sa manu divina
Dottoressa laureada. Rit.
15. In sa santa astinèntzia,
E virtudis peregrinas
Sanguinosas disciplinas
Fais cun meda passièntzia,
Spasmu de penitèntzia,
Chi merescias imitada. Rit.
16. Po essieri prus diciosa
Cun tali prenda divina,
Ti dat Cristu una spina
De sa corona pretziosa,
Penetranti e dolorosa
Cuindix’annus ddas portada. Rit.
17. Su celu po prus portentu
Sa gràtzia prus aumentat
Cuatru annus ti sustentat,
Cun solu su sacramentu,
o inefabili alimentu,
O Santa tantu premiada. Rit.
18. Moris Rita finalmente,
Bella martiri d’amori;
Ti coronat su Signori
In su celu eternamenti,
Aundi d-onnia dolenti
Ses pronta essendi invocada. Rit.