Download PDF - The National Assembly of Seychelles

son fou in leve i en vre nwizans
dan lasosyete.
Tanzantan sa garson i
ganny en led – en vwayzen i donn
li en lasyet manze, ouswa detrwa
lenz, gouvernman i ed li avek
reparasyon son lakaz, tanzantan
i fer en keksoz ki anmenn en lot
dimoun bat li e anvoy li lopital
pou detrwa zour.
Nou annan la Mr Deputy
Speaker legzanp en dimoun dan
lamaz lasosyete. Ler i komet en
lofans i ganny met dan kaso pou
detrwa zour ziska ler i re-ganny
kontrol. Ler son fou i leve i
ganny met dan ward sirkyatrik
pou detrwa zour. Ler i byen i
reste kot li. Me menm ler i byen i
pa kapab okip son prop lekor, i
pa manz konvenableman, i pa
benny ler i fodre, i napa dimoun
pou lav e dres son lenz, alor i
reste sal, i pa pran son pilil.
Eski sa garson i devret
reste dan en kominote kot
dimoun i ignor li o minimanm e
godnard li o maksimanm? Eski
kominote i bezwen en tel dimoun
dan zot milye kot ou pa konnen
si i pou respe ou, ouswa si i pou
komet en lofans lo ou, e lekel ki
responsab pou li, kominote?
Legliz? DA? MNA?
Epi i annan sa lot zenn
onm, i annan paran e i annan ser
ek frer, i viv dan en bon lakaz kot
i annan tou sa ki i bezwen, in al
lekol. Son fanmiy in donn li tou
sa ki zot in kapab me in tonm
dan drog. Son manman i dir ki
set en garson model ler i pa’n
fimen, i travay byen e i devoue
kot lakour. Me ler in fimen son
fou i leve. Sa se en zistwar
Doctor Jackyll and Mr Hyde. I vin
telman vyolan ki ni son manman,
ni son papa pa kapab apez li, i
kraz salon, i kraz divider, i kraz
tou sa ki sa fanmiy in bati dan
en lavi a’n antye. Son paran i
esey fer tou sa ki zot kapab, zot
apel lapolis pou aret sa garson,
zot in anvoy li Mont Royal, zot in
fer mon Per, servis sosyal, tou
sord lotorite koz avek li. Ler i fer
vyolans i pas en zour dan kaso
me apre i ganny large akoz swa i
pa’n vreman komet okenn lofans
akoz son latet pa bon, swa son
fanmiy pa oule fer zafer. I pa fou
alor ward sirkyatrik pa oule li, i
pa sanz son lavi ditou e sa
fanmiy i viv dan en kosmar
toulezour, dan lafreyer ki sa
volkan pou pete a nenport ki
moman. Zot pa konnen kote zot
pou tournen.
Apre i annan sa zenn onm
ki li i napa personn dan lavi. I ti
reste avek en manman sonnyen
me ler son manman sonnyen in
mor in tonm dan lalkol. Personn
pa oule anploy li e annefe i pa
enterese pou li ganny anploye. I
fouy dan bin e vann boutey
plastik pou li ganny son lavi.
Me okontrer sa bann lezot
dimoun ki fer sa travay koman
en ganny-pen, li i fer sa zis pou li
bwar. An fouyan dan bin in
realize ki souvann fwa i annan en
bwat take away avek manze ki
ankor ladan, alor sa zenn onm i
servi bin koman son restoran e i
manz restan lezot dimoun. I
dormi anba lavarang laboutik
ouswa dan en pti gento kek par.
I pa bennyen, i pa sanz son lenz.
In ariv Mr Deputy Speaker o pli
ba ki i posib dan lasosyete.
3