Premio Biennale di Poesia in Lingua Sarda “A pes de ... - Luigi Ladu

Tardu a cumparrer, su sole
faghet in presse partida,
ne nos mandat a s'essida
unu raju chi console'.
Non ch'at puzone chi 'ole',
ne chi cantet como a prou;
solu su rigore tou
regnat fissu notte e die,
e largas faldas de nie
bettas in terra de nou.
Càndidu, lughidu tantu
pares a gala bestidu,
però tottu as destruidu
sutta s'ispléndidu mantu.
Ma non ti crettas ch'ispantu
mi fettat su frittu tou,
e pro chi fiocches a prou
de m'iscaldire non tento,
ca gelu in su coro sento
ch'est piùs de su gelu tou.
Gelada m'ant sos affannos,
gelada sos patimentos,
gelada m'ant sos turmentos
meda piùs chi non sos annos.
Sutzessivos disingannos
m'ant postu a sos gustos velu;
solu connoschet su chelu
cales sunt sas penas mias,
che morta in mesu sas bias
su coro meu est de gelu.
15