Enhancing Stability through Sustainable Reintegration of IDPs

Prefásiu
Propózitu ba publika libru kiík “Mai Hari’i Uma Di’ak” ne’e la’o tuir hela ho implementasaun
ba Programa Hamutuk Hari’i Futuru nia pilár ida be importante, “Mai
Hamutuk Hari’i Uma”. OIM (Organizasaun Internasionál ba Migrasaun), nu’udar
Ajénsia Internasionál ida, simu knaar importante ida ba elabora programa idane’e,
ne’ebé Kuartu Governu Konstitusionál, be lidera hosi Primeiru-Ministru, lidér
karismátiku, Xanana Gusmão, identifika tiha nanis kedas bainhira foufoun
kaer ukun, atu hatán ba kestaun dezlokadu internu sira krize polítiku-militár 2006
nian. Governu nia desizaun atu fó osan liuhosi transferénsia direta ba benefisiáriu/dezlokadu
sira ba hari’i-hikas sira-nia uma iha kontekstu rekuperasaun,
foufoun hasoru dezafiu ida makaas. Maibé, aten-brani ne’ebé Governu Konstitusionál
Dahaat ne’e hatudu liuhosi hakat nafatin bá-oin ho polítika ida-ne’e maka
enkoraja tiha dezlokadu sira nia desizaun vontade livre ba prosesu rekuperasaun
no reintegrasaun para sira bele fila ba sira-nia bairu sira uluk.
Maske iha nafatin lakuna oioin, hanesan kiak, kuran polítika urbanizasaun, sistema
rejistu ba uma no ba sira-nia rezidente iha bairu idaidak no deskontrole ba
komunidade sira hafoin krize 1999, sei iha nafatin ézodu no migrasaun populasaun
lubun boot hosi foho mai kapitál Dili para de’it atu buka servisu no hadi’ak
liután sira-nia moris loroloron desde nasaun ne’e hahú hosi ahi-kdesan; maibé
prosesu rekuperasaun to’o tiha ona nia rohan maske buat barak ladauk perfeitu.
Iha ámbitu ida-ne’e maka, MSS (Ministériu Solidariedade Sosiál) no OIM (Organizasaun
Internasionál ba Migrasaun) ho tulun finansiamentu hosi Uniaun Europeia
hakarak lansa libru ki’ik-oan ida-ne’e hodi serve hanesan Matadalan ba
ema hotu-hotu, xefe-família feto eh mane ne’ebé hakarak hari’i hela-fatin ida be
simples no bázika maibé saudável, tuir kbiit finanseira no moris umakain emar
Timór nian.
Ba umakain idaidak ne’ebé hela iha suku no knua sira iha sosiedade ida ne’ebé
sei kaer nafatin ba valór solidariedade ida hanesan lisan “Fetosan-Umane”, uza
ba libru ne’e ho prinsípiu ida katak “ema moris ba aprende no aprende ba moris”.
Ha’u hato’o ha’u-nia agradesimentu ba Uniaun Europeia, OIM liu-liu Xefe-Misaun
iha Timór-Leste, Luiz Vieira no arkiteta Maria Moita.
MARIA DOMINGAS FERNANDES ALVES
Ministra ba Solidariedade Sosiál
IV Governu Konstitusionál Repúblika Demokrátika Timor-Leste nian
1