novembar 06-1 - La Patrie dal Friûl

| LA PATRIE DAL FRIÛL | NOVEMBAR 2006 | 17
E TUTELE LINGUISTICHE
timps, confrontât la lôr vite cun chê dai nonos,
imparât i toponims locâi midiant la leture di storiis e
leiendis dal lûc. Partint de publicazion Olmis di tiere
realizade di Luigino Peressini par cont dal Comun di
Feagne, i arlêfs a àn metût adun un libri ilustrât dal
non Une mape par cjatâsi.
No si à di dismenteâ che propit a Feagne al è il Museu
di Cjase Cocel, dulà che lis scuelis dal Istitût a àn
podût fâ cetantis e significativis esperiencis, cuntune
varietât di propuestis didatichis che a ingolosissin i
arlêfs di dut il Friûl.
Ancje la Scuele secondarie di prin grât e à fat la sô
part: intal Laboratori di Furlan par esempli, i scuelârs
a àn cjatât fûr leiendis e fats storics leâts al teritori
(i brigants de Barançone, i Cosacs in Friûl…) metint
adun libruts e CD ROM a documentazion des lôr
esperiencis. Progjets interessants a son stâts svilupâts
ancje in cjamp musicâl (vilotis e i cjants popolârs) e
tecnologjic (su la tematiche de aghe, la storie de cjadree…).
Cun di plui, in dutis lis classis a son stâts presentâts
modui di lenghe furlane ai fruts che a vevin
fate la opzion, cun cetantis propuestis: la leture dal
test “Prime di sere” di Sgorlon, la scuvierte di contis,
poesiis, tradizions di une volte… A son stadis ancje
elaboradis relazions dissiplinârs par furlan e al è stât
scrit e rapresentât un test teatrâl plurilengâl (furlan,
inglês, talian).
Dal an passât incà il Gjornalin di Istitût, L’Impiccione
viaggiatore, si è insiorât de Pagjine dal furlan: i arlêfs a
àn cjapât gust a realizâ intervistis, articui di cronace,
zûcs… in marilenghe.
Il furlan al à il so puest ancje tal sît di Istitût
(www.fagagnascuola.it), dulà che, inte pagjine Lenghe
furlane, si puedin olmâ un pôcs dai Progjets realizâts
tal Istitût, la Pagjine dal furlan dal Gjornalin, rindude
comentabile, la liste dai libris de Biblioteche dal
Furlan, che ultimementri e je stade insiorâde di une
vore di tescj.
E par finî, la ultime sfide: un Gjornalin in rêt dut par
furlan, che al sedi la vôs dai fruts des scuelis che a
comunichin tra lôr e cul forest, metint adun lis gnovis
tecnologjiis cu la valorizazion de nestre lenghe e de
nestre culture, par continuâ a pandi alc che si stime
impuartant che nol ledi pierdût.
ORNELLA
COMUZZO
ORNELLA
PICCOLI
A Feagne si
impare a scrivi
par furlan fin di
piçui