Bybelse beginsels rondom finansies

FINANSIES IN DIE KONINKRYK VAN GOD
GOD SE WIL OMTRENT ONS FINANSIËLE VOORSPOED
In Gen. 24:1 lees ons : “. . . en die HERE het Abraham in alles geseën.”.
Hierdie seën op Abraham se lewe was nie maar toevallig en sonder
betekenis nie. Dit was die direkte gevolg van die verbond wat God met
Abraham (en sy nageslag) gesluit het. Hierdie verbond het spesifieke
beloftes van materiële seën en voorspoed ingesluit (Deut. 8:18). In Deut.
28:1-14 vind ons ‘n lang lys van hierdie verbondseëninge, waarin God se
wens vir die voorspoed van sy mense in detail uitgespel word. Vers 11 sê
byvoorbeeld: “En die HERE sal die goeie aan jou oorvloedig gee . . .”. Vers
12: “. . . en jy sal aan baie nasies uitleen, maar self nie hoef te leen nie.”.
Maar in vers 15-68 word die vloeke wat sou rus op elkeen wat nie bly by
álles wat in die wet geskrywe staan en dit doen nie, gelys en in detail
beskryf. Hierdie vloek raak die mens in al die aspekte van sy lewe. Onder
andere raak dit ook sy finansies (en gesondheid).
Gal. 3:13&14 openbaar God se groot liefde en genade vir sondegeneigde
mense: “Christus het ons losgekoop van die vloek van die wet deur vir ons ‘n
vloek te word – want daar is geskrywe: Vervloek is elkeen wat aan ‘n hout
hang – sodat die seën van Abraham na die heidene kan kom in Christus Jesus,
en dat ons die belofte van die Gees deur die geloof kan ontvang.”. Christus
wat self die wet volkome onderhou het, het die vloek van ons
wetsverbreking op Homself geneem en ons daarvan bevry! In Christus is
hierdie vloek oor ons finansies ook gebreek. Die salwing wat op die
evangelie rus, verbreek ook die vloek van armoede! - Luk. 4:18. Daarom
sê Gal. 3:9 : “Sodat die wat uit die geloof is, geseën word saam met die
gelowige Abraham.”; en vers 29 : “En as julle aan Christus behoort, dan is
julle die nageslag van Abraham en volgens die belofte erfgename.”. Deur
ons geloof en verbintenis met die Here Jesus het ons deel aan Abraham se
verbond en al die geestelike, fisiese en materiële seëninge wat daarmee
saam gaan.
2 Kor. 9:8 bevestig God se wil vir sy kinders op finansiële gebied vanuit ‘n
Nuwe Testamentiese perspektief: “En God is by magte om aan julle alles in
oorvloed te skenk, sodat julle in alle opsigte altyd van alles genoeg kan hê en
volop kan bydra vir elke goeie werk.” (NAV). Vers 11 sê ook: “Hy maak
julle altyd in alles ryk genoeg om by elke geleentheid vrygewig te kan wees.”
(NAV). 1 Tim. 6:17 sê dat die lewende God aan ons “alles ryklik verleen om
te geniet;”.

GOD SE VOORWAARDES
Elke belofte in God se woord het ook ‘n voorwaarde wat daarmee saam
gaan. Uit Deuteronomium 28 is dit duidelik dat al hierdie seëninge
gekoppel is aan die voorwaarde dat ons getrou aan God se verbond moet
bly, Hom sal dien en gehoorsaam. Uit Galasiërs 3 is dit duidelik dat ons net
die seën van Abraham kan ontvang indien ons in Chrístus is.
Finansies in die koninkryk van God werk langs die weg van sekere
beginsels. As ons nie hierdie beginsels eerbiedig nie, sal ons nie die
uitwerking van God se volle plan vir ons finansies kan beleef nie en sal ons
God se seën in hierdie area van ons lewens beperk. Ons geloof en
gehoorsaamheid beperk, òf stel God se seëninge in ons lewens vry (Hebr.
3:18&19).
FINANSIËLE BEGINSELS IN GOD SE KONINKRYK
1. Rentmeesterskap
‘n Rentmeester is verantwoordelik vir iemand anders se eiendom. In
die Bybel lees ons dikwels van die rentmeester as die dienskneg of
opsigter of bestuurder wat aangestel is oor die besittings en belange van
sy meester.
1 Kor. 6:19&20
“Of weet julle nie dat julle liggaam ‘n tempel is van die Heilige Gees wat
in julle is, wat julle van God het, en dat julle nie aan julself behoort nie?
Want julle is duur gekoop. Verheerlik God dan in julle liggaam en in julle
gees wat aan God behoort.”.
Ons as gereddes is rentmeesters voor God van alles wat ons is en besit,
omdat ons gekoop is deur die bloed van Jesus en aan Hóm behoort.
Baie belydende Christene maak aanspraak daarop dat hulle hul lewens
aan die Here oorgegee het, maar gaan steeds voort om vir hulself te
lewe. Ek kan dus nie meer van mý tyd, mý geld praat nie. Dit is God s’n
wat Hy aan my as rentmeester toevertrou het. Van dit álles sal ek
eendag rekenskap moet gee. Die Here Jesus het ‘n paar gelykenisse
vertel in hierdie verband, soos die gelykenis van die talente: Matt.
25:14 - “Want dit is soos ‘n man wat op reis wou gaan en sy diensknegte
roep en aan hulle sy besittings toevertrou.”. Vers 19 (NAV) : “Na ‘n lang
tyd het die eienaar van daardie slawe teruggekom en van hulle rekenskap
gevra.”. In vers 21 sê hy aan die getroue en betroubare rentmeester:

“. . . Mooi so, goeie en getroue dienskneg, oor weinig was jy getrou, oor
veel sal ek jou aanstel. Gaan in in die vreugde van jou heer.”.
Ons is as God se rentmeesters (diensknegte) verantwoordelik vir:
• die nuwe lewe wat ons in Christus ontvang het
• ons vrou en ons kinders
• ons tydsbesteding
• die geld en aardse besittings wat Hy aan ons toevertrou het
• die spesifieke roeping en bediening wat ons van Hom ontvang het
• ons aandeel in die uitvoer van die groot opdrag om dissipels te maak
van al die nasies
As rentmeester van die besittings en finansies wat God aan my
toevertrou, moet ek dus verstaan dat ek van die Heer moet hoor, wat ek
met sý besittings en finansies moet maak en mag maak!
2. Waar jou skat is, daar sal jou hart ook wees
➥ Matt. 6:21
“want waar julle skat is, daar sal julle hart ook wees.”
Die besteding van jou finansies, jou “budget”, sê waar jou
grootste liefde lê!
(By mooi karre, mooi huise, ‘n meisie, drank, sport, ontspanning,
lekker eet . . . of die Here Jesus en sy koninkryk eerste en die
ander mooi dinge daarnaas).
Wys my waar jy jou tyd, geld & energie belê en ek wys vir jou
waar jou hart lê!
➥➥➥➥ Luk. 16:13
Òf jy dien God, òf jy dien Mammon (die geldgod).
3. Gee en vir jou sal gegee word
➥ Luk. 6:38
“Gee, en vir julle sal gegee word : ‘n goeie maat, ingestamp,
geskud en propvol, sal hulle in julle hande gee. Met die maat waarmee
julle meet, sal ook vir julle gemeet word.” (NAV).

Die wêreld se finansies werk volgens die beginsel van koop en
verkoop. Finansies in God se koninkryk werk volgens die
beginsel van: “dit is beter om te gee as om te ontvang”.
Verder leer die Here dat as jy met oorgawe en genade gee, sal
daar met oorgawe en genade weer aan jou gegee word.
Daardeur bepaal jy self die maat waarop daar aan jou gegee gaan
word.
➥ Spr. 11:24
“Daar is mense wat baie weggee en tog altyd meer bykry. Maar daar
is ook mense wat suinig is, en dan op die ou end self gebrek ly.”
(Lewende Bybel).
4. Wie hom ontferm oor die arme, leen aan die Here
➥ Spr. 19:17
“As ‘n mens jou oor ‘n arm mens ontferm, is dit net so goed of jy iets
aan die Here leen. Daarom sal Hy jou sekerlik terugbetaal.” (Lewende
Bybel).
➥ Deut. 15:7-11
“As daar in een van die dorpe in die land wat die Here jou God aan jou
gee, ‘n arme is, ‘n mede-Israeliet, moet jy nie hard en suinig wees
teenoor so ‘n broer van jou wat arm is nie. Wees vrygewig teenoor
hom en leen hom wat hy nodig het . . . Gee vryelik aan jou broer wat
arm is, en moenie sleg voel omdat jy vir hom gegee het nie, want juis
omdat jy vir hom gee, sal die Here jou God jou voorspoedig maak in
alles wat jy doen en aanpak. Daar sal altyd armes in jou land wees, en
daarom het ek jou beveel om vrygewig te wees teenoor jou mede-
Israeliet wat in nood is en arm is.”
5. Jy oes wat jy gesaai het
➥ 2 Kor. 9:6-10 (Lewende Bybel)
“Onthou net: as ‘n mens min saad saai, oes jy ook min, maar as ‘n mens
baie saad saai, kry jy ‘n groot oes. Laat elkeen soveel gee as wat hy self
in sy hart besluit het. Dit moet iets wees wat hy met blydskap doen en
nie omdat hy gedwing word nie. God hou daarvan as iemand vir Hom
iets gee en dit met blydskap doen. God kan julle so oorlaai met sy
goedheid dat julle altyd sal hê wat julle nodig het – en nog baie meer
as wat julle nodig het, sodat julle vir ander ook baie kan gee. Dit is
soos dit in die Skrif staan van die goeie mens: ‘Hy gee baie vir die arm
mense. Sy vrygewigheid kry nooit end nie.’ Dit is God wat vir ‘n boer

saad gee en dit is ook Hy wat dit laat groei sodat daar genoeg kos is om
te eet. Hy sal vir julle ook genoeg gee en dit laat meer word sodat julle
al meer goed daarmee kan doen. God sal vir julle volop gee sodat
julle ook volop kan weggee. As ons dit gaan gee vir die mense wat
behoefte het, sal hulle God prys en dankie sê.”
Dié geestelike beginsel werk net soos die beginsel in die natuur:
Jy kan nie iets oes, as daar nie eers saad in die grond gesaai is
nie.
Vers 10 leer ons om te onderskei tussen saad vir brood (om te
eet) en saad wat bedoel is om weer te saai. Moenie jou saad
opeet wat veronderstel is om vir jou later ‘n oes op te lewer nie.
Daar moet saad in die grond gesit word, anders gaan daar niks
wees wat kan opkom vir jou nie.
Die vermenigvuldigingsbeginsel is ook hier ter sprake: Jy saai
een saad en baie sade word voortgebring uit dié een saad.
Wanneer God ons oes vir ons gee, gee Hy dit in veelvoud.
Het jy saad in die grond, of wil jy heeltyd oes sonder om self ook te
saai?
6. Tiendes en Offergawes
➥ Mal. 3:8-11
Mag ‘n mens God beroof? Want julle beroof My, en julle sê: Waarin het
ons U beroof? In die tiendes en die offergawe. Met die vloek is julle
belaai, en tog beroof julle My, julle, die hele nasie! Bring die hele
tiende na die skathuis, sodat daar spys in my huis kan wees; en beproef
My tog hierin, sê die HERE van die leërskare, of Ek vir julle nie die
vensters van die hemel sal oopmaak en op julle ‘n oorvloedige seën sal
uitstort nie. Ek sal ook die sprinkaan vir julle afweer, sodat hy die
opbrings van julle grond nie sal verwoes nie . . .”
“Bring die héle tiende . . .”
Moenie die Here beroof deur net ‘n gedeelte van jou tiende te
gee nie. Gee jou vólle tiende, elke keer as jy inkomste ontvang –
een maal per maand is prakties. Dit beteken tien persent van jou
vólle inkomste (ook dit wat jy ekstra en as geskenke ontvang).
Spr. 3:9 praat daarvan dat jy die HERE moet vereer met die beste
van ál jou inkomste. In Gen. 14:20 gee Abraham aan Melgisedek

‘n tiende van álles. Die volle seën kom deur volle
gehoorsaamheid.
“. . . na die skathuis . . .”
Dit beteken dat jy jou tiende na die gemeente toe moet bring,
waar jy geestelike voedsel ontvang.
“. . . sodat daar spys in my huis kan wees . . .”
As die lede van die gemeente God gehoorsaam met hulle tiendes,
sal die kerk op alle terreine kan doen wat God wil hê hy moet
doen. Ons sal meer sendelinge kan uitstuur, meer behoeftiges
kan help, meer voltydse personeel kan bekostig, ens.
Is tiendes ‘n Ou Testamentiese beginsel?
Nee! Ons lees alreeds in Gen. 14:20 daarvan dat Abraham aan
Melgisedek (‘n tipe van Christus) ‘n tiende van alles gegee het. In
Gen. 28:22 lees ons ook van Jakob wat aan die Here belowe dat
hy aan Hom van alles wat die Here hom sal gee, die tiendes sal
afstaan. Hierdie twee gebeurtenisse het plaasgevind lánk voordat
Moses die verbond by Sinaï ingestel het. Die gee van tiendes aan
God is dus ‘n ewige beginsel in God se koninkryk!
Die HERE het tiendes later deel van die wet van Moses gemaak
(Lev. 27:30-32 o.a.), om te verseker dat Israel finansieël geseënd
sou wees.
In Luk. 11:42 gee die Here Jesus self erkenning aan die beginsel
van tiendes: “Maar wee julle, Fariseërs, want julle gee tiendes van
die kruisement en die wynruit en elke groentesoort, en julle
verwaarloos die reg en die liefde tot God. HIERDIE DINGE
BEHOORT JULLE TE DOEN sonder om die ander na te laat.”.
“. . . die offergawe. . .”
• Dit kos jou iets 1
• Dit is vrywillig
• Dit is buiten jou tiende
1 Dawid: “Ek wil nie vir die Here iets offer . . . wat my niks gekos het nie” - 1 Kron. 21:24
(Lewende Bybel).

God het nie ons tiendes en offergawes nodig nie. Aan Hom behoort
die vee op ‘n duisend heuwels! Óns het nodig om te gee, sodat ons
God se seën kan ontvang!
7. Die eersteling behoort aan die Here
Die eerstelinge 2 in die Ou Testament het aan die Here behoort,
omdat die Here die Israelitiese eerstelinge gespaar het, toe Hy die
Egiptiese eerstelinge almal met die dood getref het. Die eerstelinge
was die Here s’n – dit was nie onderhandelbaar nie. As die beginsel
van die eersteling geïgnoreer is, het daar ‘n vloek op die skuldige
gerus, wat die eersteling nie aan die Here afgestaan of van die Here
losgekoop het nie:
➥ Ex. 13:2, 12-15
➥ Deut. 18:4
Eer die Here met die eerstelinge en nie met die oorblyfsels nie!
➥ Spr. 3:9&10
“Vereer die HERE uit jou goed en uit die eerstelinge van al jou
inkomste; dan sal jou skure vol word van oorvloed en jou parskuipe
oorloop van mos.”
As ek die heel eerste deel van my inkomste vir die Here gee, nog
voordat ek ‘n sent daarvan vir enigiets anders gebruik, dan is die res
van my inkomste geheilig aan die Here en rus die Here se seën
daarop.
➥ Rom. 11:16
“En as die eerstelinge heilig is, dan die deeg ook;”
2 Die eersteling wat die moederskoot open, sowel as die eerste, beste vrugte van die
vrugte oes en graanoes

SKULD
Skuld is ‘n juk van slawerny, wat God nie op sy kinders wil plaas nie.
➥ Spr. 22:7
“. . . hy wat leen, is ‘n slaaf van die man wat uitleen.”
Die manier vir die kind van God om vry te kom van skuld, is nie in die
eerste plek om meer geld te probeer maak nie, maar is
gehoorsaamheid.
1. Die eerste stap na finansiële herstel is om te gee; nie om te kyk wie
gaan vir jóú gee nie. Gee jou héle tiende, soos die Here gesê het en
maak daardeur ‘n geloofsverklaring dat God jou Bron is en nie
mense of jou werk nie.
2. Die tweede stap na finansiële herstel is om vry te kom van die
strikke wat lei tot skuld:
I. Impulsiewe kopery
➥ Pred. 4:8
II. Onvergenoegdheid
➥ Pred. 5:9&10
➥ 1 Tim. 6:6-10
III. Luiheid
➥ Spr. 6:6-11
TEN SLOTTE
Om aan God te gee vereis geloof, soos dit ook geloof vereis om van Hom
te ontvang.
Satan sal ons geloof, sowel as ons motiewe toets, en as ons motiewe suiwer
is, kan hy nie God se seëninge van ons weerhou nie!