Die terugkeer van God se heerlikheid na die kerk

Íkabod: Geen heerlikheid!
DIE HUIS VAN GOD (2)
Die terugkeer van God se heerlikheid na die kerk
1Sam. 4:21-22 GW
(21) She called the boy Ichabod [No Glory], saying, "Israel's glory is gone," because the ark of God had been
captured and because her father-in-law and her husband died. (22) "Israel's glory is gone because the ark of
God has been captured," she said.
Die Fillistyne verslaan Israel en neem die verbondark af. Eli, die hoëpriester se seuns Hofni en
Pínehas sterf ook in die geveg. Pínehas se vrou was op die einde van haar swangerskap en
toe sy die nuus ontvang dat die ark van God afgeneem is en dat haar skoonvader Eli en haar
man gesterf het, gee sy geboorte aan ‘n seun en sterf. Sy noem die seuntjie Íkabod, wat
beteken ‘die einde v.d. heerlikheid’ of ‘geen heerlikheid’, na aanleiding v.d. feit dat die
heerlikheid van God uit Israel weggeneem is, omdat die verbondsark weggeneem is.
In 2Sam.6 en ook in 1Kron.13 lees ons hoedat Dawid, toe hy koning word, die leiers en die volk
byeen bring en hulle vra om saam met hom die verbondsark te gaan haal waar dit vir jare vergete
en weggesteek was, sodat God se heerlikheid weer kan terugkeer na Israel en God se heerlikheid
weer sigbaar en prominent kan word in Israel soos in tye vantevore.
Dawid, in sy ywer en passie vir God se teenwoordigheid, gaan in onkunde oorhaastig te werk in
die terugbring v.d. ark en Ussa, een v.d. drywers v.d. wa met die ark op sterf. Dawid se
entoesiasme word gedemp en hy is in ‘n worstelstryd vir drie maande lank. Dan skep hy weer
moed en wend weer ‘n tweede poging aan om die ark terug te bring. Hierdie keer slaag hy, maar
dit nadat hy die Skrifte geraadpleeg het en homself deeglik vergewis het v.d. manier wat deur
God bepaal is waarop die ark hanteer moes word en nadat hy behoorlike voorbereidings getref
het.
Ons, vandag, in die Nuwe Testamentiese kerkopset bevind onsself ook op baie plekke en gevalle
en in baie kerke in ‘n Íkabod-situasie, waar ons dit regkry om kerk te hou, sonder die openbaarmaking
van God se heerlikheid in ons midde.
Die terugkeer van God se heerlikheid na Suid-Afrika
Profetiese woord aangaande SA, Portland Vision, Mei 1920, John G. Lake, stigter van AGS:
The heart of Jesus was once gladdened here through the glory, the grace and the power of
God manifested here. But human pride, formalism and lack of faith have brought
disappointment to the heart of Him we love. But the glory will return, and the tried and true,
those who have suffered and laboured and prayed, will be rewarded. But all self seekers shall
be dethroned.
Ons wie vandag, net soos koning Dawid ‘n passie het vir God se teenwoordigheid, kan uit
hierdie stukkie Bybelgeskiedenis van koning Dawid en die terugkeer v.d. verbondsark baie
leer omtrent die terugkeer van God se heerlikheid na ‘n generasie wie nie meer God se
heerlikheid in sy midde ken nie. Dieselfde beginsels wat tóé van toepassing was, is vandag
nog steeds van toepassing wanneer dit kom by die openbaarmaking van God se heerlikheid
onder mense.

Beginsel 1: DIE “VRA”- BEGINSEL
1Kron. 13:3 AOV
En laat ons die ark van onse God na ons toe oorbring, want in die dae van Saul het ons daar nie na gevra nie.
In die dae van koning Saul het niemand moeite gedoen om die verbondsark weer terug te
bring nie, omdat daar nie ’n verlange en soeke na God se teenwoordigheid en heerlikheid in
die harte v.d. leiers was nie.
Die ark v.d. HERE is eventueel Jerusalem toe gebring, omdat daar ’n koning was met die naam
van Dawid, wie gesê het: Sonder God se heerlikheid in my lewe, kan ek nie hierdie volk lei
nie! Sonder God se heerlikheid in Israel, kan Israel nie God se volk wees nie!
Koning Dawid het God se teenwoordigheid liefgehad en daarna gesmag:
Ps. 26:8
ANV - Here, u woonplek, die tuiste van u heerlikheid, het ek lief.
GW - O LORD, I love the house where you live, the place where your glory dwells.
Ps. 27:4 AOV
Een ding het ek van die HERE begeer, dit sal ek soek: dat ek al die dae van my lewe mag woon in die huis van die
HERE, om die lieflikheid van die HERE te aanskou en te ondersoek in sy tempel.
Ps. 63:1-2 AOV
(1) ‘n Psalm van Dawid, toe hy in die woestyn van Juda was. o God, U is my God, U soek ek; my siel dors na U,
my vlees smag na U, in ‘n dor en uitgedroogde land, sonder water. (2) Só het ek U in die heiligdom aanskou, om
u sterkte en u heerlikheid te sien.
Ps. 65:4 AOV
Welgeluksalig is hy wat U uitkies en laat nader kom, dat hy kan woon in u voorhowe. Ons wil versadig word met
die goeie van u huis, die heiligheid van u paleis.
God openbaar Homself daar waar sy teenwoordigheid gesoek word en verwelkom word, nie
waar Hy verdra of subtiel geignoreer of eenkant toe geskuif word word nie!
Hierdie soeke na God se heerlikheid en teenwoordigheid word uitgedruk in gebed en
aanbidding.
Beginsel 2: DIE “USSA”- BEGINSEL
1Kron. 13:9+10 AOV
(9) Toe hulle by die dorsvloer van Kidon kom, het Ussa sy hand uitgesteek om die ark vas te hou, want die osse het
gestruikel. (10) Daarop het die toorn van die HERE ontvlam teen Ussa, en Hy het hom getref, omdat hy sy hand na
die ark uitgesteek het, sodat hy daar voor die aangesig van God gesterf het.
Dit was hier a.g.v. hierdie voorval dat Dawid homself afsonder vir drie maande en in hierdie tyd
met die Here worstel, terwyl hy homself ondersoek en die Skrifte bestudeer. Dawid besef soos
nog nooit tevore God is heilig en dat God se teenwoordigheid gerespekteer moet word en dat ’n
mens nie onverskillig met God se heerlikheid kan omgaan nie en dat God riglyne neergelê het
waarvolgens sy heerlikheid betree moet word.
Die eerste gemeente in Jerusalem leer ook hierdie selfde beginsel, toe twee gemeentelede in die
kerk, Ananías en sy vrou Saffira neerval en sterf a.g.v. die feit dat hulle ’n leuen vertel het aan die
kerk, in ’n tyd wat die heerlikheid van God op ’n kragtige wyse in hulle midde geopenbaar is
(Hand.5).

Beginsel 3: DIE “WOORD”- BEGINSEL
1Kron. 15:13-15 AOV
(13) Want omdat julle in die begin nie by was nie, het die HERE onse God teen ons uitgebreek, omdat ons Hom nie
gesoek het soos dit behoort nie. (14) Daarop het die priesters en die Leviete hulle geheilig om die ark van die HERE,
die God van Israel, te gaan haal. (15) En die seuns van die Leviete het die ark van God, soos Moses volgens die
woord van die HERE beveel het, op hulle skouers gedra, met die draaghoute op hulle.
God se Gees en God se woord werk v.d. begin v.d. skepping af saam (Gen.1:1-3). Dis nie òf die
woord òf die Gees nie. Dis béíde die woord en die Gees. Die woord van God lê ’n fondasie vir die
werking v.d. Gees. Die Heilige Gees werk waar daar ’n openbaring is v.d. waarheid v.d. woord
van God om die geopenbaarde waarheid te bevestig. As ons die woord in ons lewens afskeep, sal
die Heilige Gees nie kragtig werk nie. Die Gees van God sal nooit buite die woord van God werk
nie.
Lui en ongedissiplineerde gelowiges het somtyds ’n verwagting dat God kragtig moet werk deur
sy Gees, terwyl hulle die woord van God afskeep. Smith Wigglesworth, wie deur God kragtig
gebruik was om o.a. meer as 10 mense uit die dood op te wek, het tereg gesê: “If you don’t go
into the word, you can’t go on.”
Joh. 14:23 ANV
Jesus antwoord en sê vir hom: As iemand My liefhet, sal hy my woord bewaar, en my Vader sal hom liefhê, en Ons
sal na hom toe kom en by hom woning maak.
Gee aan God se woord prominensie in jou lewe en God se heerlikheid sal volg!
Beginsel 4: DIE “GEREEDMAAK”- BEGINSEL
1Kron. 15:1 AOV
En hy het vir hom huise gebou in die stad van Dawid, en ‘n plek reggemaak vir die ark van God en daarvoor ‘n tent
opgeslaan.
Met die eerste poging het Dawid nog nie presies geweet wat hy gaan doen met die verbondsark,
wanneer hy die ark gaan haal het nie, want ons lees dat hy met die tweede poging wel ’n plek
gereed maak vir die ark. Die ark word na Jerusalem, die hoofstad gebring en in ’n spesiale tent
geplaas. Die ark (God se teenwoordigheid) is nie net die middelpunt van aanbidding nie, maar
opnuut die middelpunt v.d. bestaan van Israel gemaak. Dawid het onmiddelik nadat die ark
gearriveer het ‘n vier-en-twintig uur lofprysingsdiens ingestel rondom die ark (1Kron.16 ; 23:5 ;
25).
Wanneer ons bid vir God se heerlikheid in ons kerke en in ons huise, moet ons weet dat ons ons
kerke en ons huise daarvoor moet gereedmaak, want as die heerlikheid van God waarlik kom, sal
dinge nooit weer dieselfde wees nie! God sal nie sy heerlikheid stuur daar waar die kerk nie
gereed is daarvoor en daarvoor voorberei nie. Hoe gaan ons die invloei van mense hanteer?
Voor die groot reëns val, moet ons die damme, die kanale en die vore voorberei, sodat wanneer
die water kom, al die water nie net wegvloei see toe nie. Daar is sekere Bybelse kerkgroeibeginsels
wat ons in plek moet kry voordat die groot geestelike reëns begin val. As ons basiese
dinge soos ’n dissipelskap- en leierskaptoerustingsisteem, ’n kleingroep/huiskerk
versorgingsisteem, ens. in plek het in die kleine, sal dit nie moeilik wees om dit met groter getalle
ook te doen nie. Past. At Boshof van CRC Bloemfontein het toe sy kerk nog onder ‘n 1000
lidmate was, gesê: “Mend the nets, for the catch will be great.” Vandag bedien hulle meer as
30 000 lidmate.

Beginsel 5: DIE “LEVIETE”- BEGINSEL
a. 1Kron. 15:2 AOV
(2) Toe sê Dawid: Niemand mag die ark van God dra nie, behalwe die Leviete; want die HERE het hulle uitverkies
om die ark van God te dra en om Hom tot in ewigheid te dien.
1Kron. 13:7 AOV
En hulle het die ark van God op ‘n nuwe wa vervoer uit die huis van Abinádab, en Ussa en Agjo het die wa
gedrywe.
Dawid vervoer die ark op presies dieselfde manier waarop die Filistyne dit gedoen het, toe
hulle die ark teruggestuur het Israel toe (1Sam.6:7+8). Nadat Ussa sterf en Dawid alles weer
in heroënskou neem, besef hy die fout wat hy gemaak het. Die ark van God is veronderstel
om op die Leviete se skouers gedra te word en nie op ’n nuwe wa, soos wat die Filistyne
gedoen het nie (1Sam.6:7+8). God se heerlikheid kan nie op die wêreld se manier
teruggebring word nie!
Dis hoe ons ook soms in die kerk maak. Ons laat ons lei deur manne met wêreldse wysheid
en vermoeëns, wie nie vol geloof en vol v.d. Gees is nie. Ons kan wêreldse maniere inspan
om God se kerk te bou, maar ons sal nooit die bonatuurlike resultate verkry wat alleen sal
kom as ons die beproefde metodes van God se woord toepas nie. Slegs as ons Bybelse
beginsels toepas, sal ons Bybelse resultate sien!
b. 1Kron. 15:2,11-14 AOV
(11) En Dawid het Sadok en Abjatar, die priesters, en die Leviete Uriël, Asája en Joël, Semája en Éliël en
Amminádab laat roep (12) en aan hulle gesê: Julle is hoofde van families van die Leviete; heilig julle, julle en jul
broers, en bring die ark van die HERE, die God van Israel, op na die plek wat ek daarvoor reggemaak het. (13)
Want omdat julle in die begin nie by was nie, het die HERE onse God teen ons uitgebreek, omdat ons Hom nie
gesoek het soos dit behoort nie. (14) Daarop het die priesters en die Leviete hulle geheilig om die ark van die
HERE, die God van Israel, te gaan haal.
Binne ons konteks van vandag is die priesters en die Leviete húlle in die gemeente met wie
die Here eerste kan begin – hulle sal die gebedslas die swaarste voel. Dit sal hulle wees wat
die sleutelfunksies sal vervul om die heerlikheid terug te bring na ’n kerk wat tevrede is met
‘n kerk sonder God se heerlikheid.
D.i. húlle wie geroep is om:
hulleself af te sonder
en rein te hou
om God te soek in tye van vas en gebed
Hulle betaal ’n groter prys
Soos Noag word hulle gewoonlik misverstaan tot die dag wat die deurbraak kom
Hulle versteur die status quo, waarmee almal tevrede geraak het
Hulle pas nie in die tradisionele, stagnante vorm v.d. ikkabod-kerk nie
Beginsel 6: DIE “LINNEKLEED”- BEGINSEL
1Kron. 15:27
AOV - En Dawid het ‘n mantel van fyn linne aangehad, ook al die Leviete wat die ark gedra het, en die sangers en
Kenánja, die owerste oor die voordrag van die sangers; en Dawid het ‘n linneskouerkleed aangehad.
AMP - David was clothed with a robe of fine linen, as were the Levites who bore the ark, and the singers, and
Chenaniah, director of the music of the singers. David also wore an ephod [a priestly upper garment] of linen.

2Sam. 6:20-23 AOV
(20) Toe Dawid terugkom om sy huisgesin te seën, het Migal, die dogter van Saul, Dawid tegemoetgegaan en gesê:
Hoe het die koning van Israel homself vandag geëer, dat hy homself vandag voor die oë van die slavinne van sy
dienaars ontbloot het soos een van die ligsinnige mense hom somaar ontbloot! (21) Maar Dawid sê vir Migal: Voor
die aangesig van die HERE wat my verkies het bo jou vader en bo sy hele huis, deur my as vors aan te stel oor die volk
van die HERE, oor Israel—ja, voor die aangesig van die HERE sal ek vrolik wees! (22) En ek sal my nog geringer ag as
dit—ek sal nederig wees in my eie oë en met die slavinne van wie jy gepraat het, met hulle sal ek myself eer. (23) En
Migal, die dogter van Saul, het tot die dag van haar dood geen kind gehad nie.
As jy die heerlikheid van God wil terugbring, moet jy die kleed van trots, hoogmoed, status,
waardigheid, jou posisie, formalisme, geleerdheid, rykdom, ens. uittrek soos wat koning Dawid
dit gedoen het in God se teenwoordigheid. In God se teenwoordigheid is almal gelyk – ongeag
sosiale status of posisie! Sommige mense klou vas aan hierdie dinge wat vir hulle sekuriteit in die
lewe gee en mis die volheid van God in die proses!
Beginsel 7: DIE “OFFER”- BEGINSEL
1Kron. 15:26 AOV
En terwyl God die Leviete help wat die verbondsark van die HERE dra, het hulle sewe bulle en sewe ramme geoffer.
2Sam. 6:13 AOV
En toe die draers van die ark van die HERE ses treë geloop het, het hy ‘n bees en ‘n vetgemaakte kalf geoffer.
Die huis van God, die plek waar God se heerlikheid woon, moet eers gereinig word van alle
sonde, voordat God sy woning daar sal maak! Sonder dat daar versoening vir die mense se sonde
gedoen word deur die bloed wat vir die sonde geoffer is, sal God se heerlikheid nooit tussen
mense kan woon nie! Ons kan geen aanspraak maak op die heerlikheid van God, sonder dat ons
sondes eers met God versoen is, deur die bloed van Jesus!
Beginsel 8: DIE “LOFPRYSING MET BLYDSKAP”- BEGINSEL
1Kron. 15:28 AOV
En die hele Israel het die verbondsark van die HERE gaan haal met gejuig en basuingeklank en met trompette en
simbale, onderwyl hulle musiek maak op harpe en siters.
Die atmosfeer in die teenwoordigheid van God rondom die verbondsark was een van
spontaniteit en uitbundige blydskap, gebaseer op die feit dat die HERE ’n goeie God is wie
Hom verheug oor ons en dat daar versadiging van vreugde voor sy aangesig is (Ps.16:11).
Daarom lei Dawid die volk terwyl hy sing en dans, spring en juig van blyskap voor God (2Sam.
6:14-16; 1Kron. 15:25, 28+29) en sê die musikante aan om dieselfde te doen (1Kron.15:16).
Koning Dawid het ook verstaan wat die verband is tussen gesalfde musiek en lofprysing en die
heerlikheid van God (Ps. 47:5). Dit is hý wat die stelling maak: “Tog is U die Heilige wat woon
onder die lofsange van Israel!” (Ps.22:3). Dis asof Dawid ’n openbaring gehad het van die
onophoudelike musiek en aannbidding voor die troon van God. Die atmosfeer v.d. hemel is
gevul met die teenwoordigheid en heerlikheid van God en met die onophoudelike geklank
van sang en musiek soos wat God onophoudelik geloof en aanbid word (Openb. 4:8; 5:8;
14:2+3; 15:2+3). Daarom het Dawid onmiddelik nadat die ark gearriveer het in Jerusalem ‘n
vier-en-twintig uur lofprysingsdiens rondom die ark ingestel (1Kron. 16 ; 23:5 ; 25) – “soos in
die hemel, só ook op die aarde”!
Let daarop dat Dawid musiekinstrumente uit elke hoofgroep van musiekintrumente inspan
om God se lof mee te verkondig: Blaasinstrumente, slaginstrumente en snaarinstrumente.
(Sien Ps. 150:1-6)