VOEDINGSGEDRAG VAN KAMEELPERDE ( Giraffa camelopardalis ...

3.1. INLEIDING
3. STUDIEGEBIEDE
Veldwaarnemings van kameelperde in die sentrale Vrystaat is op vier
verskillende studiegebiede in die Bloemfontein-omgewing onderneem. Twee
natuurreservate en twee wildplase, al vier binne ’n straal van 50 km vanaf die
Bloemfonteinse middestad, is hierby ingesluit (Fig. 6). Afgesien van die
Franklin Natuurreservaat wat binne die Bloemfonteinse stadsgrense val, is die
ander natuurreservaat (Wag-‘n-Bietjie) direk noord en die twee wildplase
onderskeidelik oos (Bergkraal) en noordwes (Waveren) van die stad geleë.
Weerkundige gegewens van die Suid-Afrikaanse weerburo by die
Bloemfontein-lughawe is as algemene aanduiding van die heersende
klimaatstoestande vir die vier studiegebiede onder bespreking gebruik.
Hiervolgens neem die nat seisoen vroeg in Oktober ‘n aanvang wanneer die
reënval- die temperatuurkurwe van die klimaatdiagram oorskry, en duur tot aan
die einde van April (Fig. 7). Die gemiddelde jaarlikse reënval van die
Bloemfontein-omgewing is 559 mm, waarvan 84% tussen die maande
November en Maart val. Januarie is die warmste maand van die jaar met ʼn
gemiddelde maksimum temperatuur van 31°C en ʼn absolute maksimum van
39°C. Gedurende die droë wintermaande (Mei – September) daal die
temperatuur tot ’n gemiddelde minimum van -2°C en ʼn absolute minimum van
-10°C in Julie. Sowat 120 rypdae per jaar kom in die tydperk van April tot
Oktober voor.
3.1.1. BERGKRAAL
Bergkraal (29˚ 01' S.B.; 26˚ 27' O.L.) is ongeveer 50 km oos van Bloemfontein
aan die noordekant van die Modderrivier in die Maselspoort-distrik geleë. Die
plaas beslaan ’n oppervlakte van 640 ha waarvan ʼn uitgestrekte grasveldplato
(1 433 m bo seespieël) die grootste gedeelte uitmaak (Fig. 8). Die plantegroei
- 13 -