VOEDINGSGEDRAG VAN KAMEELPERDE ( Giraffa camelopardalis ...

3.1.3. WAG-'N-BIETJIE PRIVAAT NATUURRESERVAAT
Die Wag-’n-Bietjie Privaat Natuurreservaat (28˚ 56' S.B; 26˚ 18' O.L.) naby
Glen Landboukollege is sowat 40 km direk noord van Bloemfontein geleë en
beslaan ’n oppervlakte van 385 ha. Die gebied is redelik gelykliggend met ’n
hoogteverskil van 1 289 tot 1 313 m bo seespieël en bestaan uit uitgestrekte
grasvlaktes met oewerplantegroei langs twee spruite wat in die nabygeleë
Modderrivier uitmond. ʼn Tersiêre grondpad na Soutpan verdeel die reservaat in
twee (Fig. 10). Slegs die groter noordelike gedeelte word deur ses
kameelperde benut. Houtagtige plantsoorte soos die soetdoring, blinkblaarwag-‘n-bietjie
en katbos domineer in die gebied, maar die suurkaree,
suurtaaibos en wolwedoring (Lycium hirsutum) kom ook verspreid voor.
Afgesien van die groep kameelperde word kleiner en groter boksoorte soos die
blesbok, gemsbok, eland (Taurotragus oryx), gewone duiker (Sylvicapra
grimmia), steenbok (Raphicerus campestris) en waterbok (Kobus
ellipsiprymnus), asook volstruise, verspreid in die gebied aangetref. Troppe
bergkwaggas, rooibokke, springbokke en swartwildebeeste benut groter
gedeeltes van die reservaat.
3.1.4. WAVEREN
Waveren (29˚ 01' S.B.; 26˚ 12' O.L.) is nagenoeg 20 km noordwes van
Bloemfontein op die Kenilworthpad geleë en beslaan ’n oppervlakte van 526 ha
wat wissel van 1 350 tot 1 378 m bo seespieël. In die noordooste van die
wildplaas word gerehabiliteerde landerye tans deur gelykliggende vlaktes met
pioniersgrasse verteenwoordig (Fig. 11). Gedurende Mei 2003 het die onkruid
bakbesembos (Conyza bonariensis) volop in die grasveld voorgekom.
Andersins bestaan die dominante plantegroei, soos in die geval van Wag-'n-
Bietjie Natuurreservaat, uit soetdoring, blinkblaar-wag-‘n-bietjie en katbos.
Kareebome en suurtaaibos kom ook algemeen voor, maar witstinkhoutbome
(Celtis africana) is minder volop. Uitheemse boom- en struiksoorte is opvallend
- 19 -