NUUSBRIEF - Agrisa.co.za

REG: 2002/0249 66/07
REISMONITERING HIERDIE VAKANSIE
0800 911 911 0800 911 911 0800 911 911
NUUSBRIEF
DES 2012
JAAR 10 / UITGAWE 12
℡Bemarkingskantoor: 0861 57 47 47 Administrasie (011) 478 4466
Noodnommer: 0800 911 911 Faks (012) 335 1881
Reismonitering bly steeds die gewildste diens. Woorde wat deur lede sinoniem gebruik word met
reismonitering is, gemoedsrus, selfvertroue, klokslag, professioneel, vriendelik, ens.
Alhoewel geen diens perfek is nie, streef ons daarna om altyd uitmuntende diens aan ons kliënte te
bied. Hoe werk die reismoniteringsdiens?
1. Skakel die noodnommer (op bandjie – 0800 911 911) net voor die reis ʼn aanvang neem.
2. Moet geen opsie kies nie – versoek reismonitering by die persoon wat antwoord.
3. Verskaf die volgende inligting:
(i) Lidnommer, naam en selfoonnommer.
(ii) Roete wat gevolg gaan word.
(iii) Voertuigbesonderhede waarmee gery word.
(iv) Hoeveelheid persone in die voertuig.
(v) Alternatiewe selnommer van iemand in die voertuig indien nie alleen gereis word nie.
(vi) Kontakbesonderhede van ‘n naasbestaande wat gekontak kan word indien die
onvoorsiene gebeur.
4. Die betrokke agent by die oproepsentrum sal met gereelde intervalle skakel.
Let veral op na waar u op die roete is want die agent gaan dit benodig wanneer hy skakel.
PERSOON VAN DIE MAAND – KAREN ZEELIE
Elke Woensdag om 12:00 is daar ʼn kuiertjie op Radio Pretoria saam met Karen
Zeelie wat baie mense nie misloop nie. Wie is Karen Zeelie eintlik? Karen
vertel dat sy ʼn boervrou in murg en been is wat net wag dat haar man begin
boer! Haar kinders, en natuurlik ook haar man, maak haar baie opgewonde in
haar lewe.
Haar passie in die lewe lê in haar Saligmaker. “Sonder Hom wil en kan ek niks
doen nie.”
Kyk nou net waarvan sy hou om te eet: “Alles wat lekker is, maar ʼn goeie slaai
met sade en neute doen dit vir my – al sê my ou lyfie dit nie!”
Karen saai reeds vir byna 15 jaar by Radio Pretoria uit. Haar oorlede pa, Frik Pieterse (wat ʼn groot
gees in radio was), is haar grootste mentor. Alles wat sy van die uitsaaiwese weet, het sy by hom
geleer.
Daar is maar min tyd vir ontspanning, maar ʼn goeie boek of ʼn stywe lyn langs die viswaters is altyd
welkom.
Karen sê die dag toe sy en haar gesin by CrisisOnCall aangesluit het, het dit gevoel hulle word deel
van ʼn groot familie. Haar twee oudste seuns, wat reeds uit die huis is, het aan haar gesit om lid te
word. Vandag is sy baie bly sy het na die kinders “geluister” en is sy nie net lid van die Bloubandjie
Bende nie, maar sommer ook die kaptein.
Om elke Woensdag vir ʼn halfuur saam met Karen te kuier, is voorwaar ʼn voorreg. Sy loop altyd oor
van vriendelikheid en deel nie net die luisteraars se vreugde nie, maar ook hul leed wanneer die
onvoorsiene gebeur. Haar passie vir radio kan aangevoel word en dit is asof sy elkeen van haar
luisteraars persoonlik ken. Voorwaar lekker om saam met haar op die lug te kuier! (Marius Vermaak
– Uitvoerende Direkteur Bemarking)

MAN KRY HARTAANVAL
Ek wil net van hierdie geleentheid gebruik
maak om dankie te sê vir die puik diens wat
jul gelewer het. My man het 'n hartaanval op
'n plot naby die Wahlmansdal-afrit gekry. Ek
het die nommer op my bandjie geskakel vir 'n
ambulans. Hulle het onmiddellik 'n persoon
gestuur wat solank my man gestabiliseer het
tot die ambulans gearriveer het.
Hy het die geval met soveel deernis hanteer
en so mooi en kalm met my man gepraat en
ons almal gekalmeer. Ek wil net baie dankie
sê vir die hulp, anders sou my man dit seker
nie betyds gemaak het nie. Ek wil ook die
persoon bedank wat hom drie keer in die
Intensiewesorgeenheid besoek het.
Ons is baie dankbaar dat ons besluit het om
by CrisisOnCall aan te sluit. – Annatjie
(Sy het ook op 7 November haar verhaal op
Radio Pretoria vertel.)
Dankie aan Wynand Pretorius, paramedikus
van Netcare911, wat Annatjie se man
behandel het en ook gereeld in die hospitaal
besoek het. – CrisisOnCall-bestuur.
(CrisisOnCall beskik nie oor sy eie ambulanse
nie. Die naaste geakkrediteerde beskikbare
ambulansdiens word altyd gebruik om seker
te maak dat waardevolle tyd nie verlore gaan
nie.)
VERDWAAL EN GEHELP
Die omroeper Karen Zeelie beland tydens
'n vertoning langs een van CrisisOnCall se
lede en deur hul CrisisOnCall bandjies, het
hulle onmiddellik ʼn aanknopingspunt.
Delien Vosloo vertel hoe sy altyd op
Woensdae na die gesprek tussen Karen en
CrisisOnCall luister.
Delien het later die volgende e-pos aan
Karen gestuur: “Ek het Paasnaweek na
Kimberley gereis. By Kimberley se Ultra
City besef ek dat my eindbestemming
eintlik op die Douglas-pad is. As gevolg van
pad- en straatveranderings, was ek nie
seker hoe om te ry nie. (My padkaart
verdeel ook net daar waarheen ek moet
gaan.)
Ek besluit om CrisisOnCall te skakel. Die
persoon vra toe of ek ʼn “Blue Tooth”
konneksie het. Ek bevestig, en hy vra dat ek
my foon aanhou. Robot vir robot en draai
vir draai lei hy my tot op die Douglas-pad!
Daarna het ek weer geweet waarheen om
te ry. Dankie CrisisOnCall!”
ONS WAS EERSTE OP DIE TONEEL!
Die volgende e-pos is van Tarien Cooks, BLS
paramedikus ontvang. (Verwys na die artikel
"Man kry hartaanval".)
Graag vertel ek wat Vrydagaand (2 Nov) gebeur
het. Ek en my man was tuis toe een van ons
gemeenskapslede skakel en vertel dat daar by 'n
perseel in ons omgewing ʼn persoon is wat ʼn
hartaanval gekry het. In dieselfde asem sê hy die
persoon het ʼn CrisisOnCall-bandjie aan. Ons vra
vir die unieke nommer op die agterkant en laat
spaander na die pasiënt.
Op pad skakel ek CrisisOnCall en praat met
Aileen by die oproepsentrum. Ek vra dat ʼn
ambulans uitgestuur word en versoek mediese
inligting van die pasiënt. (My eerste keer dat ek
in dié verband skakel, wonderlike diens en
terugvoer!)
Aileen skakel terug met die nuus dat ʼn ambulans
en paramedici van Netcare911 reeds op pad is.
Iemand anders op die toneel (Annatjie) het
vroeër geskakel.
Wynand Pretorius (Gevorderde Lewensondersteuningsparamedikus)
was kort na ons op die
toneel en het onmiddellik met behandeling
begin. Wynand het my gevra of ek by
CrisisOnCall kon vasstel of die Zuid-Afrikaanse
Hospitaal, waar die pasiënt se kardioloog is, ʼn
landingsarea vir ʼn helikopter het sodat die
pasiënt daarheen gevlieg kon word. CrisisOnCall
het uitgevind en ook vasgestel waar die naaste
beskikbare kardioloog was, aangesien die
hospitaal nie ʼn landingsarea het nie.
ʼn Kardioloog was by Montana Hospitaal
beskikbaar wat ook baie naby aan die insident
was - inligting wat ook deur CrisisOnCall verskaf
is.
KLEINIGHEDE MAAK 'N GROOT
VERSKIL
CrisisOnCall werk orals vir my! Ek het op 'n
Saterdag by Metro in die Menlyn Retailpark
gordyne gaan koop. My foon het gelui. Ek het
my beursie op my motor se dak gesit, gordyne in
die motor gelaai en skoon van die beursie
vergeet. Na 15 min het CrisisOnCall my
geskakel. 'n Man by die motorafslaers het my
beursie sien val en opgetel. My geel CrisisOnCall
kaartjie was daarin. Hy het julle gekontak en ek
kon my beursie terugkry. My Koopkragkaart,
kredietkaart, bankkaarte en heelwat kontant
was in die beursie. Ek het alles teruggekry. Dit
was naweek en ek sou gestrand wees tot
Maandag. - Tilla Nel (Rippel 90.5 luisteraar)

DIT IS VAKANSIETYD!
Desember is tradisioneel vakansietyd in Suid-Afrika.
Almal is opgewonde en lus om ʼn jaar af te sluit met ʼn
lekker vakansie, of dalk kom die kinders en/of
kleinkinders kuier.
Water is tog so aanloklik. Ons deel graag die
volgende wenke om te verseker dat die vakansie nie
in ʼn nagmerrie ontaard nie:
• Wanneer jy in die see swem, swem altyd waar
lewensredders is. Bly ook in afgebakende
gebiede.
• Maak seker dat kinders wat nie kan swem nie,
nie maklik toegang tot die swembad kan kry
nie. Hou ook enige kleurvolle items soos
speelgoed uit die water – dit trek hulle aandag.
• Gebruik altyd ʼn waterdigte sonbrandmiddel.
Onthou, al is dit bewolk is daar steeds sonstrale
wat jou vel bereik.
• Vlakke van damme en riviere kan baie
bedrieglik wees. Dit reën elders en skielik is die
rivier in vloed. Handhaaf ʼn veilige afstand van
die water.
• Indien jy op die water roei of in ʼn boot ry, dra
altyd ʼn veiligheidsbaadjie.
Algemene wenke:
• Bye kan baie maklik en ongesiens in 'n
koeldrankblikkie klim. Probeer om nie uit 'n
blikkie te drink wat buite gestaan het nie.
• Maak altyd seker dat die omgewing waarin jy
kuier veilig is.
• Dra altyd jou CrisisOnCall bandjie.
• Moet nooit kinders sonder toesig laat nie.
Kinders verdrink in waterbakke, visdammetjies,
fonteintjies, borrelbaddens, emmers, ens.
• Maak seker dat almal (insluitende die
huiswerker) ʼn noodhulpkursus bywoon.
• Hou CrisisOnCall se nommer altyd byderhand
sou die noodlot toeslaan.
POSKANTOORSTAKINGS
Die afgelope paar maande was gekenmerk deur
stakings deur poskantoorwerkers. Hierdie stakings
het ook die lewering van dokumentasie vanaf die
CrisisOnCall administratiewe kantoor direk geraak.
Die beleid by CrisisOnCall is om alle dokumentasie
binne twee werksdae nadat die aansoekvorm of
ander versoeke ontvang is, te pos.
Indien u nie u bandjies en ander items binne tien
werksdae ontvang het nie, word u versoek om dit
asseblief by die volgende e-pos aan te meld:
rsn@netactive.co.za.
Hierdie is ook die amptelike e-pos adres van die
administratiewe maatskappy, RSN, wat CrisisOnCall
se administrasie hanteer.
SAPAESA EN CRISISONCALL
SAPAESA (South African Private Ambulance
& Emergency Services Association)
en CrisisOnCall het hande gevat ten
einde te verseker dat privaat
ambulansdienste ‘n goeie diens aan
CrisisOnCall-lede verskaf.
Hierdie organisasie bestaan reeds sedert
1994. Dit is hulle passie om seker te maak
dat ambulansdienste nie onprofessioneel
is wanneer dit by dienslewering kom nie.
Die Hoof Uitvoerende
Beampte, Oliver Wright
is ook ʼn lid van
CrisisOnCall.
Volgens Oliver is daar as gevolg van
verskeie redes ʼn gebrek aan die beskikbaarheid
en vloei van kritiese pasiëntinligting
tydens ʼn nood mediese situasie.
Volgens hom moet elke landsburger
toesien dat hulle maklik identifiseerbaar
is en dat lewensbelangrike mediese
inligting soos mediese fonds detail,
kroniese medikasie, allergieë, ens.
beskikbaar is wanneer dit deur medici
benodig word. Die CrisisOnCall-bandjie,
soos ontwikkel deur die gebruiker
(paramedici) is die antwoord!
Die CrisisOnCall-bandjie is een van die
suksesvolste metodes om vir hierdie doel
te gebruik aangesien dit vinnig en
effektief namens die pasiënt praat
wanneer hy/sy self nie kan nie.
DIABETES EN CRISISONCALL
Diabete se kans om in ʼn koma te verval, is
baie hoër as nie-diabete. Daarom moet
hulle lid van CrisisOnCall wees. Die
bandjie aan die arm praat wanneer jy self
nie kan nie.
Nie net speel die feit dat die pasiënt ʼn
diabeet is vir paramedici ʼn belangrike rol
in hul behandeling nie, maar is kennis van
die medikasie wat die pasiënt gebruik van
kardinale belang. (Paramedici kan baie
inligting oor ʼn pasiënt bekom deur net na
die medikasie wat hul gebruik, te kyk.)
Navorsing deur CrisisOnCall het bewys
dat die CrisisOnCall-bandjie ʼn baie veilige
opsie is aangesien dit deur paramedici
onderskryf word en nie deur omstanders
gesteel word nie.

DIE HUISVRIEND
Die maand gesels ons oor die koper en die
moets en moenies waarna gekyk moet word.
• Maak seker dat daar geen slegte
kredietrekords teen jou naam is nie.
Rekeninge wat laat betaal word,
beïnvloed jou kredietwaardigheid
negatief!
• Vra gerus ‘n eiendomsagentskap om jou
te help soek na eiendomme.
• Kommunikeer duidelik jou behoeftes
aan die betrokke agent sodat hy presies
weet waarna om te soek en waar om te
begin.
Die area waar jy koop, speel altyd die
grootste rol. (Hoe beter die area, hoe beter
jou belegging.) Die agent sal begin deur aan
jou te wys wat hy in jou prysklas beskikbaar
het. Dit is baie belangrik om vir die agent
goeie terugvoer te gee oor elke huis wat jy
gesien het. Duidelike kommunikasie is die
sleutel tot sukses en tot jou ideale huis.
Sonder om té ingewikkeld te raak, is my
advies: indien jy die plek gekry het waarin jy
jouself kan sien, hou op soek en koop hom!
Om verder te soek gaan jou net deurmekaar
maak en te veel mense het al die woorde
gehoor: "jammer meneer/mevrou, die
eiendom is klaar verkoop". Eiendomme
verkoop hulself! Volgende maand meer
hieroor. Steijn eiendomme 012 331 3943
IEMAND WORD VERMIS
Vakansietyd kruip nader en nie alle plekke is
veilig nie! Winkelsentrums, strande en
rolprentteaters is vol jong mense wie se gees
hoog loop met vakansiejolyt.
PSARU, 'n sakevennoot van CrisisOnCall, gee
ʼn paar veiligheidswenke:
Weet ten alle tye waar jou
kinders/geliefdes is.
Vertrou geen vreemdelinge nie.
Moenie jou kinders/geliefdes sonder
toesig in winkelsentrums laat nie.
Moenie alkohol of oopgemaakte drank
of koeldrank drink nie.
Wanneer jong mense saans uitgaan, bly
in groepe.
Moenie in die nag op onbekende plekke
rondbeweeg nie.
Wees voorbereid: Indien iemand vermis
raak, skakel die CrisisOnCall-noodnommer en
vra dat jy na PSARU deurgeskakel word.
NB: Hou opgedateerde kleurfoto's van al jou
geliefdes byderhand.
Vir so min as R49 per maand kan jy en jou
gesin nou as deel van CrisisOnCall lid word
van PSARU. Stuur net ʼn e-pos met die woord
PSARU na marketing@crisisoncall.co.za.
VAKANSIE EN VOERTUIGBANDE
Die bandevervaardiger Bridgestone het gesê
motoriste wat op vakansiereis is, moet elke
stilhoukans gebruik om ook seker te maak die
voertuig se bande is nog in ’n goeie toestand.
’n Mens se vakansie kan op talle maniere deur
bandeprobleme langs die pad in die wiele gery
word. Een van die grootste gevare is die
geleidelike verlies aan druk weens foute soos
’n lekkende klep of as gevolg van iets soos ’n
spyker in die band. Die banddruk kan oor ’n
afstand van ’n paar honderd kilometer só
stadig verander dat die bestuurder dit nie
dadelik kan voel nie, hoewel die verminderde
padhouvermoë ’n groot gevaar inhou as die
bestuurder in ’n noodgeval vir iets moet
uitswaai.
Iets wat nog gevaarliker is, is dat ’n band wat
druk verloor, oormatig begin warm word. Dit is
veral op lang vakansiereise ’n groot gevaar
wanneer die voertuig swaar gelaai en vol
passasiers en bagasie is, wat die oorverhitting
weens verminderde druk al erger sal maak.
Oorverhitting kan met lang afstande teen hoë
snelhede uiteindelik daartoe lei dat die band se
rubberlae van mekaar begin trek, wat die band
kan laat bars.
Moet nooit ’n warm band pomp tot dieselfde
banddruk as toe dit koud was nie – jy sal die
druk in werklikheid moet verminder. Indien jy
een van die bande kry waarvan die banddruk
minder as dié van die ander bande is,
ondersoek eers die moontlike oorsaak daarvan
om seker te maak jy kry nie verder probleme
nie.
Bandskade, soos ’n sny in die wand van die
band, kan veroorsaak word deur goed wat
onopgemerk verbygaan, soos ’n skerp klip of
klein stukkie metaal in die pad. Sulke skade
verminder die band se vermoë om die voertuig
se gewig te dra, sowel as die remvermoë,
draaivermoë en versnelling, wat die band kan
laat bars.
Dit is ook die ideale geleentheid om die band
se toestand te ondersoek terwyl die banddruk
nagegaan word. Ondersoek die hele wiel ook
vir goed soos lekkende olie of pak-olie, wat
dalk op komende meganiese probleme kan dui.
Enige probleme met ’n band of ’n wiel dui op
veiligheidskritieke gevare en kan selfs ’n
bedreiging vir die insittendes se lewe inhou.
Maak tydens ’n lang reis seker van
voortgesette bandeveiligheid. Dit is dalk al wat
nodig is om ’n tragedie te voorkom.
Die artikel is saamgestel deur Mandy Lovell van
Bridgestone Suid-Afrika en gepubliseer deur
Arrive Alive Web. (www.arrivealive.co.za)