Junie 2013 - Murraysburg

ervarings wanneer hy vorige ervarings met verf, kryte,
gom en klei weergee.
De Klerk het die jong ma’s aangeraai om hulle
kinders se skoolgereedheid objektief te beoordeel en
om die kind liewers later skool toe te stuur indien
hulle enigsins twyfel, aangesien dit andersins vir die
kind en sy ervaring van die skool baie nadelig kan
wees. Die graad R-opvoeder sal goeie raad kan gee
soos ook ´n opvoedkundige sielkundige.
Drukkies laat elke kind veilig en geliefd voel en laat
hom ontwikkel terwyl ´n kind, wat deur sy ouers
gedruk word om skool toe te gaan, wanneer hy nog
nie gereed is nie, gekneus word en ´n swak selfbeeld
ontwikkel.
Met hierdie vergadering het die VLV daarin geslaag
om in die behoeftes van die jonger sowel as die ouer
lede te voorsien.
VLV beleef München
By die Meivergadering het Lina van den Berg die lede
laat deel in die daaglikse lewe van die inwoners van
München. Lina en Kotie van den Berg het tydens
hulle onlangse besoek aan hulle seun, Cobus, wat as
chemiese ingenieur vir die internasionale maatskappy
LINDE in München werk, kon deel word van die
plaaslike bevolking en het München heel anders as die
gewone toeris beleef.
Hulle het weer eens onder die indruk van die
uitstekende openbare vervoerstelsel, soos oral in
Europa, gekom. Daar is afgesien van busse en trems
ondergrondse en bo-grondse treine in die
stadsgebiede, streekstreine tussen dorpe en stede en
dan natuurlik die sneltreine, wat so vinnig beweeg dat
die verbyflitsende landskap slegs ´n streep is. Alle
openbare vervoer is skoon en netjies en ALTYD
betyds. Aangesien parkeerruimte in die Europese
stede moeilik bekombaar is, gebruik almal die
openbare vervoer. Gelukkig stel ´n treinkaartjie jou in
-5
staat om ook bus en trein te ry en is afsonderlike
kaartjies nie nodig nie. Goedkoper tariewe buite
spitstye bevorder beter benutting van die treine deur
die dag.
Alhoewel die openbare vervoerstelsel oorwegend
gebruik word, het baie mense hulle eie voertuie en
koop hulle graag Duitse fabrikate soos Porché, BMW,
Mercedes en Volkswagen / Audi. Hierdie voertuie is
in vergelyking met S.A. heel bekostigbaar, in ag
genome die hoër salarisse. Die Duitsers verkies oor
die algemeen "sober" kleure soos silwergrys en swart
vir hulle voertuie, maar die sportmotors is dikwels
rooi of geel! Ou motors word nie baie gesien nie,
veral nie op die Autobahn nie, waar die gemiddelde
spoed net té hoog is.
Die mense van München hou van die buitelewe en
daar is baie parke in die stad. Die "Englischer
Garten" langs die Isarrivier ( ongeveer 300 ha) is die
bekendste en oud en jonk stap, draf, ry fiets, ski, ens.
by elke moontlike geleentheid. Die koue skrik hulle
nie af nie. Daar is binnenshuis ook uitstekende
geriewe om fiks te word en te bly. In die Ostpark
(ongeveer 60 ha groot) aangrensend aan die
woonstelgebou, waar die Van den Bergs se kinders
woon, is daar buite stap- en fietsrypaaie,
oefenapparate, speelparke, ysskaatsbaan vir die
winter, ´n rolskaatsbaan vir die somer, buite- en
binnenshuise tennisbane, buite- en binnenshuise
verwarmde swembaddens, ens. . By die Isarrivier in
die stad is daar ´n kunsmatige brander, waar die
avontuurlustiges winter en somer hulle branderryvaardighede
kan oefen.
Saamkuier in die biertuine is ´n tradisie vir die hele
gesin. Spesifiek in Oktober lok die Oktoberfest
mense van oor die hele wêreld na München. Die
biere is beslis ligter as die S.A. biere met minder gas.
Daarby word die tradisonele Weisswurst met
mosterdsous en "bretzel" geëet. Vir die niebierdrinkers
( waarvan daar min is!) , is die geurige
appelsappe ´n goeie alternatief. Tradisionele
restaurante, waar die kelners en kelnerinne jou
dikwels in tradisionele drag bedien, word ook graag
deur gesinne besoek. Wanneer vriende vir ete genooi
word, is dit meestal in ´n restaurant en word daar nie
dikwels tuis onthaal nie. Koffiekroegies met al die
dekadente soetgebak, "Torten", is baie gewild en daar
is natuurlik ook baie bierbrouerye.
Groot winkelsentrums soos ons dit in ons stede ken,
kry jy slegs aan die buitewyke van die stad, maar in