VERKYKER 1/2016

REDAKTEURSBRIEF
Beste Ovies
“In elkeen van ons se harte brand ‘n vlam vir iets. Dit is ons doel in die lewe om dit te vind en aan die
brand te hou”. – Mary Lou Retton
REDAKTEURS BRIEF
2016 het aangebreek met ‘n groot geskal. Die Matriekuitslae was weereens oorweldigend goed en
Ovies is dan met reg weer as die “Beste Skool in die Noorde” gekroon! Welgedaan aan elke
Matrikulant en baie dankie vir elke onderwyser wat meer gedoen het as wat hulle moes, om te
verseker dat ons Ovies so trots kan staan! Die Chabuxyz, ons nuwe graad 8’s het die Ovie-kultuur
aangeneem en is deur die MLR 2016 op gepaste Ovie-wyse verwelkom. Hulle het klaar hul staal
gewys by die swemgala en Interhoër – welgedaan nuwe Ovies! Daar is soveel aktiwiteite wat in
Ovieland plaasvind, dat ‘n mens behoorlik hardloop om by te bly. Dit was asof 2015 net laasweek
totsiens gesê het, en hier draai ons alweer in die tweede kwartaal van 2016. Op Valentynsdag was al
die meisies heerlik verras, mnr en mej Ovie-kompetisie was ‘n reuse sukses en ons hoop julle geniet
al die mooi foto’s in hierdie uitgawe. Die puik uitslae van ons atlete wys dan ook inderdaad op die
feit dat Ovies “rock”! Dankie aan al die lede van die redaksie wat gereeld foto’s geneem het, en al die
artikels te skryf om hierdie eerste Verkyker uitgawe propvol nuus te maak. Julle is ‘n span duisend!
Ons weet hierdie kwartaal hou ‘n magdom aktiwiteite in en ‘n stewige Junie eksamen wat voorlê,
daarom bring ons vir jou hierdie staaltjie om te sê, hier is wat jy moet doen:
Eendag het al die paddatjies besluit om die groot boom uit te klim. Niemand het dit nog
ooit gemaak tot bo nie. Al die paddatjies het haastig begin op klouter, maar na ‘n rukkie het
hul moed hul begewe en hulle het gegly tot onder op die grond. Later het so baie paddatjies
terug gegly dat die ander begin skree het: “Jy gaan dit nie maak nie!” Een paddatjie het
egter geklim en geklim, hoër en hoër totdat sy maters hom nie meer kon sien nie. Toe hy
uiteindelik bo was, het hy die pragtige uitsig geniet. Toe hy na ‘n baie lang tyd weer afkom,
vra hulle of hy nie gehoor het hoe hulle hom terug roep nie. Die paddatjie het net sy kop
geskud. Hy kon geen negatiewe kommentaar hoor nie, want hy was doof.
Ons moet ons ore oophou vir die positiewe dinge in die lewe en nooit moed opgee of na negatiewe
kommentaar luister nie. Strewe na die hoogste sport en KYK VER!
Lekker lees, voorspoed met die eksamen en hou jou lyf trots Ovie!
Nadia Ayres
Redaktrise
02 VERKYKER 2016
Uitgawe 1