Jaargang 7 nr 2 juni 2008 - Wijkraad Steyl

WÈTS SE NAG… Gelök kèns se neet koupe
Det is ’t motto van de 74 jäörige Coen Driessen, gebaore en getaoge
aan de Rieksewaeg taegeneuver de Kenzesjtraot op Sjteyl.
“Ich woeën heej prachtig aan de rank van Nabbe.
Ich heb heej nag ’n sjtökske lank en me kèn mich
dao in ’t veurjaor de meisten tied vinge. D’r mót gesjpaajd
en gepaot waere. En den de gezelligheid op ’t
lank Sjtraevele wae ’t ieërs de erte en boeëne d’r op
haet sjtaon. Vurrige waek vong dokter Terstappe nag
det ich dit jaor get laat waar. Maar ich haaj mich aan
de iesheilige mèt paote.
Nabbe is nag ’n prachtig sjtökske netuur. Wat is nag
fender as vruug in de morge te wèrke op ’t lank,vlak
beej de baek en loestere nao de veugel. ’n Gans versjael
mèt de veurkank van mien hoes. Toch heb ich
van ’t verkier op de Rieksewaeg gènne las. Minse
dinke des se gèn oug toe duis beej det verkieër. Maar
mèt döbbel glaas huurs se d’r neet vuuel van. En dów
wèns d’r ouch aan.”
Coen is op Sjteyl aan de Parksjtraot nao sjoeël
gegaon. “Ich ging gaer nao sjoeël. Mèt de meisters
Ramakers,Verstrale en Bouwmans kós ich ’t good
vinge. Det ware gójje meisters. As de sjoeël oet waar
bleve weej – mien kammeräöj en ich - nag gaer get
plekke beej ’t gaat van Leenders. Weej ware eigelik
de ieërste hangjongere - sjtraotverkes - van Sjteyl.
Maar weej haolde gèn rotzooi oet of deje get ver-
4
nele. Waal èns aan de appele beej de Paters,maar
det waar ’t den.
Nao de lieëgere sjoeël bön ich euverdaag nao de
ambachsjoeël gegaon en saoves nao de aovendsjoeël.
En as weej verkantie hadde, zóch ich ’n verkantiebaantje.
Ich weit nag det ich beej bekker Baenders
körsepitte oet de körse mós haole. Baenders
gebroekde die körse vur de vlaaj. En as d’r den nag
tied euver waar mósde ich thoes wèrke op ’t lank.
Sjpaje, paote, gaeje, sjoefele, man det waar ’n werk.
Ózze pap had waal dreej morges lank Det lank woort
waal door ’n paerd ömgeploog, maar d’r bleef aan
èlke kank ’n flink sjtök euver det mèt de sjöp ömgesjpaajd
mós waere. En dów wèts, d’n aadste is altied
de klos. Ich gluif neet det ózzen Hay de sjöp dök in de
heng haet gehad. Maar van hel wèrke wuuers se
neet krank.
Toen ich mien opleiding in de metaal aaf had bön ich
ónger angere gaon wèrke beej Sjtóffels op Sjteyl.
Toch waar det vur mich te wieënig oetdaging. Toen
ich beej Nedinsco - instrumentefebriek - aan de
sjlaag kós, had ich ‘t gevónge. Dao bön ich inkele
jaore gebleve. Miene lètstem baas waar Optiwa. Dao
heb ich wies mien pensionering gewèrk, 31 jaor”.
Wae dink det Coen ‘ne saje Piet’ is haet ’t mis. Meziek
make woort ’n belangriek óngerdeil van de invulling
van ziene vrejen tied. Coen zörgde vur ’t rime, de lol
en de organisatie. “Ich bön al jaore lid en penningmeister
van de Sjteyler Blaoskepel. Maar ouch
vruger, toen de kefee van Jeu van de Lange nag besjtóng,
makde ich jiddere Zóndig dao meziek. Same
mèt Cor en Jeu Siebers, Loui van Rayer en Hènke
Beurskes vormde weej ’t orkes de ‘Fischer Freunde’.
Weej sjpulde Duitse meziek en idderein kós ós liedjes
meizinge. En lol det weej hadde. En det alles vur ’n
good glaas beer. Gelök kèns se neet koupe. Vief jaor
lank hebbe weej meziek gemak. En neet allein beej
Jeu van de Lange. Regelmaotig woorte weej ouch
gevraog öm meziek te make in de ömgaeving. Waereldberoemp!!
Zeker 10 jaor hebbe weej in ’t patronaat naeve bekker
Baenders - Piet Haoves woeënt dao nów in
WIJKKRANT Steyl ■ Jaargang 7 ■ nr. 2 ■ juni 2008