Tilsynsrapport matrikkel - Kartverket

4
1. Innleiing
Rapporten er utarbeida etter ei undersøking i Hå kommune i perioden 20. – 21. februar 2013.
Undersøkinga er ein del av Kartverket sin planlagde aktivitet for dette året. 20 av dei 428
kommunane i landet er valt ut. Val av kommunar er gjort gjennom loddtrekking, der grunnlaget
for loddtrekkinga er kor store kommunane er, folketalet og ei fylkesvis fordeling.
Tilsynet er retta inn mot kommunen si organisering av oppgåva som lokalt matrikkelmynde, og
er ein systemrevisjon. Undersøkinga fokuserer på at lov- og forskriftskrav skal haldast, og
rapporten beskriv eventuelle avvik og merknader som vart avdekka under undersøkinga.
Rapporten gir såleis ingen fullstendig vurdering av kommunen sitt arbeid etter matrikkellova.
Følgjande tema inngår i undersøkinga i Hå kommune:
• Korleis kommunen som matrikkelstyremakt sikrar trudom for matrikkelen belyst
gjennom
- organisering av kommunen sine oppgåver som lokal matrikkelstyremakt
- samordning mellom plan- og bygningslov og matrikkellovforvaltninga
- føring av bygningsinformasjon
- føring av adresse
- føring av ikkje fullført oppmålingsforretning
- behandling av krav om retting og ved retting av eige tiltak
- behandling av krav om innsyn i og/eller utlevering av matrikkelopplysningar
- behandling av matrikkelopplysningar i eigen administrasjon
• Ut over dette korleis kommunen opprettar matrikkeleiningar og grensejusteringar belyst
ved saksbehandlinga frå det ligg føre rekvisisjon til saka er ferdig ført i matrikkelen og
arkivert
Undersøkinga vart utført ved gransking av dokument, ved intervju av både sentralt plasserte
personar og fagpersonar i kommunen, og ved verifikasjon av at rutinar, prosedyrar og instruksar
blir følgt opp i praksis. Rapporten omhandlar avvik og merknader som er avdekka under
undersøkinga.
Avvik er mangel på oppfylling av krav fastsett i eller i medhald av lov eller forskrift.
Merknad er eit forhold som ikkje er omfatta av definisjonen for avvik, men der
tilsynsstyremakta med utgangspunkt i krav frå myndigheitene, meiner det er eit potensiale til
forbetring.
2. Omfang
Omfanget av Kartverket si undersøking er nærare omtala i varselet om tilsyn, vedlegg 1.
Kartverket har ikkje vurdert andre område av kommunen si verksemd.