Libriño sobre a Praza do Perla e o Cine Perla

Non volvín gozar do cine coa mesma emoción
que o facía naquela época; tanto me marcaron
esas vivencias que até investín certo tempo e
algún esforzo en plasmar nun documental todo
aquilo, e intentar descubrir por que ese tipo de
salas desaparecían, dando paso a outras moito
mais sofisticadas (¡ou non!), pero... que xa
non eran o mesmo.
O cine Franlaza hai anos que xa non está, aínda
hoxe cando paso por diante do edificio de
apartamentos que ocupa o seu lugar recordo
que alí vin “Bananas” de Woddy Allen e, de
seguido, “Viaxe ao centro da terra” de Juan
Piquer Simón. Hoxe espertei, e como cada
mañá lin os xornais na súa edición dixital
(prefiro lelos en papel, pero ás Ramblas non
chegan as novas sobre a comarca de Ferrolterra),
puña: “LA DEMOLICION DEL CINE
PERLA DE FENE DEJARA PASO A 30
VIVIENDAS Y UNA PLAZA”.