How We Can Make Life Work? - United Church of God

Agnanayon A Principio Ti Panagballigi
Numan pay agbibiagtayo iti lubong a cancanayon nga agbalbaliw, adda bambanag a saan a
nabalbaliwan iti unos ti rinibu a tawen. Nayadayo unay toy lubongtayo iti Biblia, nupay casta
dagiti pahinana ipalgacda dagiti awan tiempona a principio nga agpaay cadagitoy nga aldaw a
cas met laeng idi damo a naisuratda rinibu a tawenen ti naglabas.
Ti libro ti Proverbio naisangayan a macatulong, saan laeng nga idatagna ti panangiwanwanna
cadatayo no casano t i panagballigitayo iti panggedan no di pay ti pammagbagana cadatayo
no casano ti panagballigitayo cadagiti amin a paset ti biag. Kitaenyo no casano, cadagiti
sumagmamano nga umuna a versiculo, ti panangyebcas ni Ari Solomon iti panggep ti libro ti
Proverbio:
“Dagiti proverbio ni Solomon nga anac ni David ken ari ti Israel. Adtoy dagiti proverbio a
macatulong cadacayo tapno mailasinyo ti kinasirib ken ti nasayaat a pammagbaga. Casta met a
tumulong cadacayo tapno maawatanyo dagiti nauneg a pammagbaga. Maisurodacayo nga agbiag
a manakem, agbiag iti kinalinteg, kinahustisia ken kinatacneng. Mapagbalinda a masirib dagiti
awan padasna ket matulonganda dagiti agtutubo a lallaki nga agbalin a masirib. Manayonan
dagitoy a proverbio ti pannacaammo dagiti masirib. Maidalanda dagiti adda adalna” (Proverbio
1:1-5).
Ti libro ti Proverbio isuronatayo iti kinasirib. Inlanadna dagiti ginasgasut a pammaliiw iti
isuamin a bambanag ti biag ken ti panaglilinnangentayo a sangcapada. Idatagna dagiti ginasgasut
a gameng ti pammagbaga a napadasen bayat ti panaglabas ti tiempo. Usigentay ngarud ti
dadduma a pammagbaga nga ituyangna a macatulong cadatayo nga agballigi cadagiti panggedan
ken careratayo, uray agtrabahotayo iti cabucbucodantayo wenno para ti sabali.
Ti Bassit A Mannursuro A Naggapu Iti Natural A Casasaad
Napnoan sirib ni Solomon. Saan laeng a nalaing a mannurat, mannursuro ken compositor no
di pay ket nagad-adal iti natural a casasaad (nature) ket inlanadna dagiti palpaliiwna maipapan iti
natural a lubong a nanglawlaw kencuana (1 Ar-ari 4:30-34). Maysa cadagiti umuna a nailanad a
principio ti panagballigi iti trabaho, ken iti isuamin a paset ti biag, nagtaud iti panangpaliiwna iti
maysa cadagiti cabassitan a pinarsua ti Dios, ti cuton.
“Rumbeng nga adalen dagiti nasadut a tattao ti panagbiag dagiti cuton. Awan panguloda,
wenno ofisial a mangituray cadacuada, ngem agurnongda iti taraon iti calgaw tapno adda
canenda iti tiempo ti tudtudo. Casano ti cabayag ti panagidda ti sadut? Caanonto ti ibabangonna?
Cunana, ‘Maturogac lat bassit, agdalikepkepac ket aginanaac iti mabiit.’ Ngem bayat ti
pannaturogna, dumteng ti kinapanglaw kencuana, a cas iti iraraut ti mannanacaw nga adda
armasna” (Proverbio 6:6-11).
Ibaga ni Solomon cadatayo nga adu ti masursurotayo cadaydiay bassit ken nalaad a cuton
maipanggep ti naballigian a biag. Umuna, ti cuton saan a masapul nga adda mangibaga iti
aramidenna. Ammona no ania ti masapul nga aramiden ket asicasoenna.
Uray ania a manarawidwid malasinna ti pateg ti empleado a casta ti cagagetna, maysa
mangadal iti trabahona, aramidenna ken saanna a masapul ti mangipalagip no ania ti aramidenna.
Dagiti cancanayon a maibaga ti aramidenda narasay ti panagballigida gapu ta saanda laeng nga
ibusen ti tiempo ken pigsa dagiti manarawidwid cadacuada, no di pay ket bassit ti ipakitada a
bulsot’ nakem wenno laing nga agdur-as.
24