How We Can Make Life Work? - United Church of God

dagiti tattao nga agmaneho ti automobil inggana maipakitada ti pannacaammo ken baelda a
mangaramid iti casta iti natalged a wagas. Awan ti managannong a naganac a mangicabil iti
agtutubo nga anacna iti uneg ti automobil ket ibulosna iti tengnga ti calsada a pagtartarayan
dagiti bumanesbes a luglugan a dina sinursuroan nga immuna iti panagmaneho.
Iti cabaroanan a lubongtayo ti panaginnarem saan a maawanan cadagiti peggad. No awanan ti
rumbeng a sursuro, adu dagiti agcabannuag ti agbalin a nacaderderrep, macaala cadagiti sacsakit
nga agtaud iti linalasag nga aramid, mapadasanda ti agsicug iti dida cayat ken pilienda ti biddut
a dalan a casla naragsac ken nalinteg iti dayta a tiempo ngem agturong iti di-mayebcas a rigat
(Proverbio 14:12; 16:25). Masapulda ti nasapa a pannursuro ken agpinnalatipat a panangsalaysay
no sapay ken casano ti panangsalluad dagiti pammateg ti Biblia cadagiti agcabannuag iti cascasta
a panagsagaba.
No awan ti rumbeng a pannursuro, adu dagiti tattao ti saan a pulos macapadas iti naragsac
a callaysa. Dagiti naayat a nagannac dida cayat nga agrigat dagiti annacda. Ngem no baybayanda
ida nga awan ti pannacaammoda talaga nga agturongda iti dalan a pagleddaangan. Ti
natalipuposan a pannacaawat cadagiti pagrucodan ti Dios maipapan iti panaginnarem ken
panagcallaysa isut maysa cadagiti caindaclan a bendision a maawat dagiti annac nga agtaud
cadagiti nagannac.
Nupay casta, adda dadduma a tattao, ti nacalabasen iti dayta a punto, nadanondan ti
nataengan nga edad ken mabalin a naasawaan wenno nakisinada payen. Makita ngarud
ti casayaat ti panangisuro cadagiti agcabannuag ken agtutubo, iti rumbeng a cababalin ti
panaginnarem. Ngem casano ngay dagiti nataenganen? Mabalbaliwan aya daytoy a principio?
Gapu ta laclacay wenno bacbaket dagiti nataengan, mangted aya dayta cadacuada ti ad-adu a
wayawaya ngem dagiti agtutubo? Amin aya a bambanag rumbeng cadagiti agkinnaayatan a
nataengan?
Cas makitatayto, dagiti pagrucodan ti Dios agpaay cadagiti isuamin a tattao iti amin a tawen
ken panawen. Awan Kencuana ti dua a paset ti pangiwanwan – maysa agpaay cadagiti nataengan,
maysa met cadagiti agcabannuag. Ti panangtungpal cadagiti bilbilin ti Biblia agpadpada a
macagungguna uray ania ti edad ti tao. Ti panangsalungasing cadagiti linlinteg ti Dios agpadpada
a macadadael cadagiti tattao iti uray ania nga edad.
Dagiti Cabaroanan A Pagrucodan Iti Panaginnarem
Tapno matarusan ti panaggidiat ti wagas ti Dios ken ti lubong, usigentayo dagiti gagangay
nga aramid dagiti agiinnarem iti Makinlaud a lubong.
Adu dagiti mangibaga a no aginnarem dagiti agayan-ayat, rumbeng ti panagcaiddada a
mangpanecnec ti panagsinnurotanda. Mamatida nga iti panagcaidda (sex) maysa a casisigud a
pangyebcas iti ayan-ayat ti dua a tattao, ket isu dayta ti nainsigudan nga aramid ti agcabbalay
wenno “panagcuyogda” iti bucodda a panagcaddua. No agsinanto dagita nga agcaasmang ket
mangrugida manen a makiinnarem iti sabali, ti gagangay a panangipapan siwayawayada latta a
makicaidda cadagiti baro a caasmangda.
Daytoy aramid a panagsasaruno ti pannakicaidda – ti pannakicaidda iti maymaysa a tao
a di-naasawaan iti maminsan a daras – adu dagiti mangibilang a rumbeng daytoy a wagas ti
panaginnarem ken panangbiroc iti masacbayan nga asawa.
Idiay Estados Unidos agarup dua-a-cacatlo cadagiti naasawaan a babbai agangay 20 ti edadda
nakicaiddadan cadagiti masacbayan a caasmangda sacbay ti panagcallaysada (Roberto Moeller,
“America’s Morality Report Card,” Christian Reader, November-December 1995, pp. 97-100).
4