Ndihma e huaj në Shqipëri

22
NISMAT E REJA TË DONATORËVE
Përmes projektit “Forcimi i Kuvendit të Shqipërisë” në kuadrin e Programit Kombëtar IPA 2010, KE-ja do ta
mbështetë parlamentin me një projekt binjakëzimi me buxhet 1.5 milion € për përafrimin e legjislacionit me
acquis dhe përmirësimin e rolit mbikëqyrës.
PRIORITETET E ARDHSHME
Përmirësimi i rolit të Parlamentit në monitorimin e zbatimit të detyrimeve të MSA-së;
Krijimi i sistemit elektronik të votimit.
BASHKËRENDIMI I DONATORËVE
Prezenca e OSBE-së në Shqipëri është pika fokale donatore e GSP-së për zgjedhjet dhe gjendjen civile. Grupi
mblidhet afër periudhës së zgjedhjeve për të diskutuar rreth kontributeve të donatorëve të ndryshëm në
reformën zgjedhore si edhe për shmangien e mbivendosjes së ndihmës.
Media dhe Shoqëria Civile
PANORAMA E SEKTORIT
Qeveria e konsideron median e lirë dhe promovimin e shoqërisë civile si një prioritet madhor. Janë konsoliduar
disa nisma dhe ide të propozuara nga shoqëria civile, si për të drejtat e njeriut, median dhe kërkimin shkencor.
Megjithatë, shoqëria civile varet nga fondet donatore dhe shihet tendenca e organizatave të shoqërisë civile që të
hartojnë projekte sipas objektivave të donatorëve dhe jo sipas prioriteteve dhe nevojave të vendit. GIZ ka mbështetur
ngritjen e Agjencisë për Mbështetjen e Shoqërisë Civile. Kjo Agjenci po mbështet aktivitetet që synojnë nxitjen
e zhvillimit të qëndrueshëm të shoqërisë civile si edhe krijimin e kushteve të favorshme për nismat qytetare.
Kuvendi pritet të miratojë një Kartë të Shoqërisë Civile.
NDIHMA E HUAJ NË 2009-2010
Projektet e reja të filluara gjatë 2009-2010 në mbështetje të medias dhe shoqërisë civile dhe të financuar nga KE,
kanë vlerë totale 4.8 milion € dhe përbëjnë 88% të mbështetjes donatore për këtë sektor; Austria jep 6%, ndërsa
OKB, BB, Suedia dhe prezenca e OSBE në Shqipëri së bashku japin 6% e mbetur të angazhimit total. Lëvrimet
totale për të gjitha projektet në vazhdim janë 8.5 milion €, nga të cilat 4.2 milion € janë lëvruar për projektet e
filluara gjatë 2009-2010.
KE mbështet shoqërinë civile përmes dy nismave: Instrumenti për Shoqërinë Civile - Nismat Qytetare dhe Forcimi i
Kapaciteteve financuar nga IPA 2009 me buxhet 1.5 milion €, si edhe Instrumenti Europian për Demokracinë dhe të
Drejtat e Njeriut (EIDHR) - Skema e Mbështetjes me Bazë Vendi (CBSS 1.2 milion €), që synon të forcojë rolin e shoqërisë
civile në promovimin e të drejtave të njeriut dhe reformat demokratike. Me po të njëjtin synim, Banka Botërore u ka
akorduar grante organizatave të shoqërisë civile në kuadrin e Programit të Granteve të Vogla që në vitin 2001.
NISMAT E REJA TË DONATORËVE
Komisioni Europian do të vazhdojë mbështetjen përmes programit kombëtar IPA dhe përmes EIDHR/CBSS
2010 dhe 2011 me buxhet total 1.2 milion €. Suedia do të japë 0.8 milion € për forcimin e organizatave të
shoqërisë civile që merren me mjedisin.
PRIORITETET E ARDHSHME
Mbështetje për rritjen e kapaciteteve dhe qëndrueshmërisë së OJF-ve, veçanërisht të atyre jashtë Tiranës.
Rritja e kapaciteteve monitoruese dhe burimeve teknike të KKRT-së si dhe reforma e mëtejshme në media
drejt depolitizimit të saj.
| Departamenti i Bashkërendimit të Strategjive dhe Koordinimit të Ndihmës së Huaj