Somalia was in a political chaos and civil strife since ... - Somali Talk

SOCFEX Warbixin sanadeedka xoriyadda Saxaafadda 2007
HORDHAC
Soomaaliya waxay qalalaase siyaasadeed iyo dagaallo sokeeye ku jiray laga soo bilaabo
sanadkii 1991-kii markaas oo la riday xukuumadii keli-taliska ahayd ee Gen. Maxamed
Siyaad Barre, Saxaafadda oo markii hore gacanta ugu jirtay dowladda ayaa isu bedeshay inay
noqoto mid madax bannaan oo inteeda badan ay leeyihiin shirkado iyo dadka caadiga ah.
Ma sahlana sida ay warbaahin ugu shaqeyn karto xaalad la mida tan Soomaaliya tiiyoo aanay
jirin nidaam awood leh oo dalka gacanta ku wada haya isla markaana dhowraya madax
bannaanida saxaafadda, waxaana mar waliba xukunka ku loolamaya kooxo iska horjeeda iyo
garabyo loolan ka dhaxeeyo.
Sanadka 2007-da wuxuu noqday sanadkii badnaa ee dhiigga saxaafadda la daadiyo, nasiib
darraduna wuxuu la kowsaday iyadoo ay dalka gaar ahaan Koonfurta Soomaaliya qabsadeen
ciidamada dowladda KMG ah oo ay taageerayaan kuwa Itoobiya, waxayna awoodda kala
wareegeen maxkamadihii Islaamiga oo muddo lix bilood ah gacanta ku hayay Koonfurta
Soomaaliya.
Saxaafadda madaxa bannaan waxay gashay xaalad cakiran oo halis miiran ah waxayna
dhexda u gashay dagaallo joogto ah oo u dhaxeeya ciidamada Itoobiyaanka iyo kuwa
dowladda KMG ah oo dhinac ka soo jeeda iyo xoogaggii Maxkamadaha Islaamiga oo
dhinaca kale ah, taasoo keentay inay la kulmaan dhibaatooyin isugu jira dil, xarig, jirdil,
handadaad iyo waliba duqeyn qaar ka mida xarumaha warbaahinta. iyadoo sanadka 2007-da
oo qura la dilay 8 saxafiyiin oo isugu jira maamul iyo weriyeyaal.
Warbixinta soo socota waxay si faahfaahsan uga hadleysaa tacadiyadii kala duwanaa ee
sanadka 2007-da soo food saartay saxaafadda iyo saxafiyiinta Soomaaliya, waxaana isku soo
duba riday Isbaheysiga SOCFEX oo u ololeeya difaaca Madax bannaanida saxaafadda,
fekerka xorta iyo horumarinta dimqoraadiyadda.
Ujeedada aanu ka leenahay warbixintan waa inay sawir cad ka bixiso xaaladda halista ah ee
ay ku dhex shaqeynayaan ragga iyo haweenka ku howlan Saxaafadda, warbixinta oo ka
kooban dhacdooyinkii tacdiyada ahaa ee lagula kacay saxaafadda, waxay kaloo bixineysaa
waxyaabihii soo ifbaxay iyo soo jeedin, waxaana soo ururiyay isla markaana soo diyaariyay
isbaheysiga xoriyatul qowlka Soomaaliya SOCFEX.
Isbaheysiga SOCFEX waa isu tag aan faa’iido doon iyo dowli ahayn ujeedadiisuna tahay
hirgelinta xoriyadda fikirka iyo u ololeynta xuquuqda qofka Soomaaliga iyo ururradu u
leeyihiin inay fikirkooda si xor ah u cabiraan una soo bandhigaan iyagoo aan cidna ka
baqeynin.
Isbaheysiga waxaa la dhisay Bishii Ogost 2005-ta, waxaana wada dhistay oo isugu tegay
Dallad ka kooban 48 urur oo isugu jira dhammaan bulshada qeybaheeda kala duwan sida:
Saxaafadda, ururada Bulshada, ururada xuquuqda aadanaha, ururada Waxbarashada,
farshaxanka iyo ururada mihnadleyda ah.
Iyadoo laga duulayo halista sii kordheysa ee ku timid madax bannaanida fekerka iyo
cadaadiska lagu hayo saxaafadda, ururada u dooda xuquuqda aadanaha, dadka nabadda u
dhaqdhaqaaqa iyo aqoonyahanada xirfadda leh ayna ugu wacan tahay sharci la’aanta iyo
fowdada muddada ka jirtay Soomaaliya ayuu dhashay isbaheysigan.
- 2 -