1 DASTUURKA DALKA JAMHUURIYADDA ... - Somali Talk

QODOBKA 34 aad .
ILAALINTA /DHAWRISTA ANSHAXA GUUD:
Dawladda ayaa ilaalin doonta anshaxa guud si waafaqsan habka sharciga
tilmaamayo.
QODOBKA 35 aad .
WAXBARASHADA
1)- Waxay Dawladda dhiira gelin doontaa waxbarashada oo ah faa’iido
aasaasi u ah Bulshada, waxayna diyaarin doontaa samaynta dugsiyo
Dawladeed oo u furan dhammaan dadweynaha.
2)- Waxbarashada Dugsiga Hoose/Dhexe ee Dugsiyadda Dawaladda waxay
noqonayaan lacag la’aan.
3)- Xorriyadda waxabaridda waxaa dammaana qaadi doona sharciga.
4)- Ururada /Hay’adaha iyo shakhsiyaadka waxay xaq u yeelanayaan in ay
dhistaan samaystaana dugsiyo iyo machadyo waxbarasho, si waafaqsan
sharciga iyo iyagoon wax kaalmo dhaqaale ah aan ka halayn Dawladda.
5)- Dugsiyada iyo machadyada waxbarashada ee gaarka loo leeyahay waxay
yeelan karaan aqoonsi la mid ah tan dugsiyada iyo machadyada Dawladda
xagga shuruudaha u degsan ee sharciga.
6)- Barashada Diinta Islaamka waa ku khasab/waajib Ardayda muslimiinta
ah ee Dugsiyada Hoose/Dhexe iyo Sare ee Dawladda iyo dugsiyada la
heerka aqoonsi leh. Baridda Quraanka Kariimka ah ayaa noqonaysa
tiirka aasaasiga ah ee Muslimiinta ee dugsiyada H/dhexe iyo Sare ee
Dawladda .
7)- Machadyada waxbarshada sar-sare waxay yeelanayaan Urur madaxbannaan
oo ay iska leeyihiin kaasoo ku jira xadka sharcigu tilmaamo.
QODOBKA 36 aad .
BADBAADINTA SHAQADA
1)- Dawladda ayaa badbaadinaysa shaqada, dhiiri gelinaysana qaababkeeda
iyo habka dalabaadkeeda oo dhanba.
2)- Shaqada xoogga iyo khasabka ah ee nooc kastaba, waa mamnuuc.
3)- Xaaladaha ay dhacdo in la amro shaqo militiri ama mid shacab baahi
awgeed ama mid daba-joogta/la xiriirta ciqaab xukun waxaa tilmaami
doona sharciga.
12