You also want an ePaper? Increase the reach of your titles
YUMPU automatically turns print PDFs into web optimized ePapers that Google loves.
5. TBL. 1. ÁRG. OKTÓBER <strong>2014</strong> --- DREIFT FRÍTT Á HEIMILI OG FYRIRTÆKI Í HVERAGERÐI OG ÖLFUSI<br />
HVAÐ VITUM<br />
VIÐ EKKI<br />
UM ALDÍSI?<br />
Á vordögum var Aldís Hafsteinsdóttir endurkjörin bæjarstjóri í<br />
Hveragerði þriðja kjörtímabilið í röð. Aldís er uppalin í Hveragerði,<br />
þekkir hér hvern stein og þúfu og flestir íbúar vita einhver deili á<br />
henni en skyldi vera til hlið á Aldísi sem okkur er ókunn og hvaða<br />
framtíðardrauma gengur hún með í maganum? Okkur lék forvitni á<br />
að kynnast þessari hlið á konunni sem setið hefur lengst allra sem<br />
bæjarstjóri í Hveragerði og er fyrst kvenna til að gegna þeirri stöðu.<br />
Í <strong>október</strong>byrjun mæltum við okkur mót við Aldísi á uppáhaldsstaðnum<br />
hennar í Hveragerði en sökum kröftugrar haustlægðar sem<br />
gekk yfir landið þann daginn þá var stefnumótið fært inn í hús<br />
Sjálfstæðisfélagsins í Hveragerði<br />
Framhald á bls. 6-7<br />
GAMAN Í SUMAR<br />
1
www.krumminn.is<br />
krumminn@krumminn.is<br />
Útgefandi: Klettagjá ehf.<br />
Ritstjórar og ábyrgðarmenn:<br />
Hrund Guðmundsdóttir<br />
Ellen Ýr Aðalsteinsdóttir<br />
Umbrot: Hvergi Slf.<br />
Prentun: Prenttækni<br />
Upplag: 2000 stk.<br />
Próförk: Elísabet M. Nickel Stefánsdóttir<br />
Myndir: Guðmundur Erlingsson,<br />
Ösp Vilberg Baldursdóttir og fleira<br />
hæfileikafólk úr Hveragerði<br />
Innsent efni:<br />
Fréttir: frettir@krumminn.is<br />
Aðsendar greinar: krumminn@krumminn.is<br />
Auglýsingar: auglysingar@krumminn.is<br />
HAUSTVERKIN<br />
Þá er sumarfríi Krummans lokið. Ritstjórarnir báðir að byrja að vinna og ungarnir komnir til<br />
dagmömmu. Sumarið flaug frá okkur og vegna veikinda, auglýsingaskorts, rigningatíðar og<br />
allskonar annarra afsakana kom ekkert blað út í júlí eins og við ætluðum okkur.<br />
Vonandi getum við haldið þessu útgáfubrölti samt áfram og næst þegar við höfum ekkert að<br />
gera .... eins og núna ætlum við að gefa út ritröð af bókum úr eigin reynsluheimi: Hvernig á að<br />
gefa út bæjarblað með barn á brjósti. Hvernig á að vélrita með hægri meðan maður gefur brjóst<br />
og talar í símann. Húsráðsbókin Gamlar matarleifar og bananar á gólfi og veggjum. Sálfræðibókin<br />
Glataðar stundir með vanræktu eldra barni - fyrra bindi. Sjálfshálparbókin - Elskum RSK og VSK<br />
og alla sem vinna til 15.30. Svo verður gefinn út dvd-diskur um hvernig maður kemur sér í form -<br />
Blaðaútburður með barnakerrur.<br />
<strong>Krumminn</strong> er <strong>október</strong>bleikur í dag og hann kemur aftur út í kringum aðventuna og verður þá<br />
settur í jóladressið.<br />
Góðar stundir<br />
Hrund og Ellen Ýr<br />
LÍF OG FJÖR Á BLÓM Í BÆ<br />
2
3
STUTTAR FRÉTTIR FRÁ BÆJARSTJÓRA<br />
Skafa þurfti bílinn nokkra morgna í vikunni og sannar það enn og aftur að veturinn á Íslandi verður ekki umflúinn og<br />
það jafnvel ekki þó okkur finnist við eiga annað og betra skilið eftir einstakt rigningarsumar.<br />
Trjágreinar og runnar sem sem gægjast út fyrir lóðamörk eru oftast flestum til ama. Mælst er til þess að íbúar sjái til<br />
þess að slíkt sé ekki gangandi vegfarendum til trafala í vetur og ekki síður snjóruðningstækjunum þegar moka þarf snjó<br />
af gangstéttum.<br />
Hátíðir sumarsins voru haldnar í sól og blíðu og fyrir það erum við þakklát. Fjöldi gesta heimsótti bæinn þessa daga<br />
og tóku bæjarbúar einstaklega vel á móti gestum sínum. Gestrisni og gleði einkennir bæjarhátíðirnar okkar og er ekki að<br />
efa að sá andi skilar sér til þeirra sem hingað koma.<br />
Fasteignasala hefur gengið afar vel það sem af er ári og seljast eignir hratt hér í bæ. Ófremdarástand hefur því miður skapast á leigumarkaði<br />
eins og fjöldi auglýsinga í Bónus er best til vitnis um. Hafa bæjaryfirvöld átt í góðum samskiptum við starfsmenn Íbúðalánasjóðs sem í kjölfarið<br />
hafa auglýst hér íbúðir til leigu.<br />
Tvö raðhús rísa nú hratt í Dalsbrún en í þeim verða 10 nýjar íbúðir. Við Dalsbrún eru ennþá lóðir á lausu bæði fyrir raðhús og parhús svo<br />
áhugasamir eru hvattir til að skoða þær lóðir betur á heimasíðu bæjarins.<br />
Gatnagerð sumarsins er enn í fullum gangi. Malbik er nú komið á Bröttuhlíð en unnið er að frágangi gangstétta og umhverfis. Þverhlíðin verður<br />
einnig malbikuð sem og göngustígar milli Valsheiðar og Lyngheiðar. Bröttuhlíð verður lokað að austan við þessar framkvæmdir svo breytingar<br />
verða á gatnaskipan hverfisins.<br />
Drullusund fær líka andlitslyftingu í vetur og verður þeim merka göngustíg gert hátt undir höfði.<br />
Upplýsingaver hefur verið opnað í grunnskólanum þar sem tölvur og bækur sameinast til gleði fyrir nemendurna. Þar hefur Dúfukot einnig<br />
opnað en það er lítið bókasafn með bókum til yndislesturs fyrir yngstu kynslóðina í grunnskólanum. Þar er notalegt að vera.<br />
Leikskólinn Undraland fékk mikla andlitslyftingu bæði að utan og innan í sumar. Þar var til dæmis skipt um dúka á tveimur deildum en nýjum<br />
gólfdúkum er ætlað að minnka hljóðmengun í skólanum. Samkvæmt starfsmönnum virkar það afar vel.<br />
Drullumall aðstaða er komin upp í báðum leikskólunum og nýjar stórskemmtilegar rólur. Fótboltavöllur af smærri gerðinni hefur vakið mikla<br />
ánægju barna á Undralandi. Sífellt er unnið að því að bæta aðstöðu yngstu barnanna í bæjarfélaginu.<br />
Ljósleiðari er nú lagður í öll íbúðarhús í Hveragerði á vegum Gagnaveitu Reykjavíkur. Er framkvæmdin bæjarbúum að kostnaðarlausu en hún er<br />
hluti af samningi sem gerður var um sölu Hitaveitu Hveragerðis á sínum tíma. Eru íbúar hvattir til að þiggja boðið um lagningu ljósleiðarans í hús<br />
sín en með ljósleiðaranum er í boði hraðasta nettenging sem völ er á.<br />
Bæjarfulltrúar allra flokka vinna nú saman að gerð fjárhagsáætlunar fyrir árið 2015. Ljóst er að gæta þarf ítrustu hagkvæmni en mörg<br />
verkefni kalla nú á fjármuni sem gaman væri að ráðast út í .<br />
Með ósk um notalegt haust,<br />
Aldís Hafsteinsdóttir, bæjarstjóri<br />
Opnunartímar<br />
Gámastöðin<br />
Bláskógum 14 er opin alla daga vikunnar,<br />
nema sunnudaga.<br />
Virkir dagar frá kl.16:00 – 18:00<br />
Laugardagar frá kl. 14:00-18:00<br />
Bókasafnið<br />
Sunnumörk 2<br />
Mánudaga – föstudaga kl.13:00 – 18:30.<br />
Laugardaga kl. 11:00-14:00<br />
Upplýsingamiðstöð ferðamála á Suðurlandi<br />
Sunnumörk 2<br />
Opin virka daga kl. 8:30-16:00<br />
Bæjarskrifstofur<br />
Sunnumörk 2<br />
Afgreiðsla er opin: Mánud. – föstud. kl.10:00-15:00<br />
Sími er opinn: Mánud.-föstud. kl.9:00-16:00<br />
Hveragarðurinn<br />
Hveramörk 13<br />
Sumaropnun 1.apríl – 1.<strong>október</strong>: Mánudaga – laugardaga<br />
09:00-17:00. Sunnudaga lokað.<br />
Vetraropnun: Opið fyrir stóra hópa samkvæmt<br />
samkomulagi. Hafið samband við Upplýsingamiðstöð<br />
Suðurlands í síma 4834601 eða á netfangið<br />
tourinfo@hveragerdi.is<br />
Sundlaugin Laugaskarði<br />
Mánudaga – fimmtudaga kl. 07:00-20:15<br />
Föstudaga kl. 07:00-17:15<br />
Helgar kl. 10:00-17:15<br />
Hveragerðisbær Sunnumörk 2 810 Hveragerði Sími 4834000 Fax 4834801 hve@hveragerdi.is www.hveragerdi.is<br />
4
KRUNK KRUNK<br />
Pétur Pétursson<br />
Varaslökkviliðsstjóri Brunavarna Árnessýslu<br />
Hvað ætlarðu að verða þegar þú verður stór? Svona vinnulega þá<br />
finn ég mig vel í því sem ég er að gera í dag og vonast til þess að getað<br />
haldið áfram á þeirri braut eftir því sem ég eldist og stækka meira (á<br />
þverveginn). Fjölskyldulega er ég alsæll, ég er nú þegar eiginmaður<br />
og faðir, er hægt að hugsa sér það betra, ja nema kannski að verða<br />
einhvertímann afi.<br />
Hvað myndir þú gera ef þú mættir stjórna Íslandi í einn dag? Þar sem engar skyndilausnir eru<br />
til á vandamálum okkar blessaða lands og þjóðar þá hugsa ég að ég myndi setja á almennan frídag<br />
þennan dag (geri ráð fyrir að þetta væri sólríkur sumardagur), þar sem þjóðin gæti átt góðan „kósýdag“<br />
með sínum nánustu og rifjað upp fyrir sjálfum sér um hvað lífið virkilega snýst.<br />
Hver myndi leika þig ef gerð væri kvikmynd um þig? Ég veit ekki hver myndi leika mig ef svo<br />
ólíklega vildi til að um mig yrði gerð kvikmynd, ég hefði hinsvegar gaman af því að sjá hann Ólaf Darra<br />
gera það, hann er svo skrambi flottur leikari.<br />
CrossFit, skokk eða Zumba? Það sem hentar mér best á þessum tímapunkti í lífinu er CrossFit og<br />
stunda ég það af áfergju um þessar mundir.<br />
Hvar sérðu þig eftir fimm ár? Það ætla ég að vona að eftir fimm ár verði ég áfram<br />
hamingjusamlega giftur faðir búandi í Hveragerði við hestaheilsu.<br />
Hvað ertu hræddur við? Ég hugsa að það sem hræðir mig mest sé ástvinamissir.<br />
Fallegasti staðurinn? Hveragerði er náttúrulega gullfallegur staður, það vita allir! En landsvæðið í<br />
kringum Landmannalaugar er líklega í hópi fallegustu staða á jörðinni.<br />
Hvað gafstu síðast í gjöf? Ég gaf honum Ævar vini mínum Sudoku þrautir til þess að dunda við.<br />
Hverjum myndir þú vilja vera fastur í lyftu með? Ætli það væri ekki farsælast að ég myndi festast<br />
í lyftu með henni Baldvinu minni. Hún er búin að þola mig síðastliðin 22 ár og myndi líklega þola<br />
það að vera föst með mér í einhvern tíma í lyftu. Við höfum líka alltaf endalaus umræðuefni og myndi<br />
okkur líklega ekki leiðast eina mínútu.<br />
Hvað er það vandræðalegasta sem hefur komið fyrir þig? Úff, ég á líklega of mörg of slæm<br />
vandræðaleg augnablik til þess að birta hér, sumt verður bara að fá að deyja með manni. Ég get þó<br />
sagt frá þessu, einu sinni var ég að vinna sem öryggisfulltrúi við töku stórrar bandarískrar auglýsingar<br />
við Kleifarvatn. Ég átti að gæta að öryggi Bandarískrar kvikmyndastjörnu þar sem verið var að mynda<br />
á háhitasvæði og takan átti að fara fram við leirhver. Kvikmyndastjarnan var fönguleg ung kona og að<br />
sjálfsögðu vildi maður allt til vinna til þess að velferð hennar vær trygg.<br />
Ég áleit sem svo að aðstæður væru ekki tryggar þar sem brún hversins væri sleip og þar með hætta á<br />
að stjarnan rynni ofaní hverinn með hræðilegum afleiðingum. Ég bað því um að steinhella yrði flutt<br />
á svæðið til þess að setja undir fæturna á henni við brún hversins. Þetta tók allt heljarinnar tíma, tveir<br />
menn á sexhjóli fóru í að finna móbergshellu í verkið og á meðan biðu einhverjir tugir manna með<br />
tökur. Þetta þótti mér frekar erfitt því ég vill nú frekar að hlutirnir gangi eitthvað og á erfitt með að<br />
þola gauf og ráðaleysi. Loksins komum mennirnir með móbergshelluna á palli sexhjólsins keyrandi<br />
að hvernum. Ég gladdist og sá framá að þessu gaufi færi að ljúka og hægt væri að halda áfram. En<br />
nei, þegar þeir komu með helluna fóru þeir af hjólinu og gengu burt, ég hljóp til þeirra og spurði hvort<br />
þeir ætluðu ekki að setja hana við hverinn en þá sögðu þeir mér að það væri ekki í þeirra verkahring,<br />
aðrir menn kæmu í það. Þetta særði svo sannarlega í mér Íslenska reddaragenið svo ég rauk til og<br />
ákvað bara að redda þessu eins og sönnum Íslendingi sæmir. Ég greip móbergshelluna í fangið, sem<br />
reyndar var ansi þung, og staulaðist með hana að hvernum. Þar fyrir stóð stjarnan og bað ég hana<br />
eins karlmannlega og ég gat að færa sig því ég þyrfti að setja helluna niður við hverinn fyrir hana.<br />
Þetta sagði ég með hálsæðarnar illa þandar af rembingi þar sem hellan var svo þung. Blessuð stjarnan<br />
færði sig um eitt skref og ég gerði mig líklegan til þess að láta helluna niður á sinn stað. Auðvitað rann<br />
bannsett hellan úr höndunum á mér og skall með allnokkru afli niður í leir-drullu svaðið við hverinn.<br />
Það var eins og við manninn mælt að blessuð stjarnan málaðist frá toppi til táar af drullu og varð ekki<br />
sjón að sjá hana blessaða. Nokkrum sekúndum seinna, svona þegar hún hafði jafnað sig af mesta<br />
sjokkinu, lét hún nokkur vel valin orð falla í minn garð. Ég átti þau líklega skilið. Hún hafði jú ekki verið<br />
nema í fjóra tíma í förðun fyrir tökuna og fötin sem hún var í voru úr rússkinni og ekki hægt að þrífa<br />
þau nema í þurrhreinsun (þær upplýsingar fékk ég reyndar eftir að ég reyndi að strjúka af henni mestu<br />
drulluna með gömlu snýtibréfi sem ég hafði í vasa mínum). Það varð úr að tökur á þessu atriði töfðust<br />
um einn sólarhring.<br />
Þetta var allt frekar vandræðalegt og það er skemmst frá því að segja að ég var ekki beðinn um að<br />
vinna að öðru verkefni fyrir þetta ágæta kvikmyndafyrirtæki.<br />
Ég lærði þó þá lexíu af þessu að, allavega í þessum bransa á maður ekkert að vera að vasast í hlutum<br />
sem ekki eru í manns verkahring.<br />
Á hvern skorar þú í næstu yfirheyrslu? Ég myndi vilja skora á hann Sævar Helgason, gamlan<br />
bekkjarbróðir minn og félaga að tækla þessar spurningar.<br />
5
HVAÐ VITUM<br />
VIÐ EKKI<br />
UM ALDÍSI?<br />
Framhald af forsíðu<br />
Við mættum um það leyti sem opið hús<br />
var að klárast og þennan laugardag var<br />
alþingismaðurinn Unnur Brá Konráðsdóttir<br />
í heimsókn og af umræðunum að dæma<br />
mátti greina að þar lágu Hvergerðingar ekki á<br />
skoðunum sínum og hin helstu pólitísku mál<br />
voru skeggrædd af krafti.<br />
„Svo heldur fólk alltaf að hér séu allir heilaþvegnir<br />
sjálfstæðismenn en hér rífst fólk og rífur kjaft við<br />
þingmennina“ segir Aldís að loknum fundi<br />
og bætir við „Sjálfstæðismenn í Hveragerði<br />
hafa alltaf verið þekktir fyrir það að vera svolítið<br />
óþekkir.“<br />
„Það er í rauninni ekkert í mínu<br />
lífi sem getur toppað það sem<br />
mínar formæður á árum áður<br />
þurftu að ganga í gegnum“<br />
Talið berst aftur að uppáhaldsstað hennar sem<br />
er uppi í Reykjafjalli og er að hennar mati alveg<br />
einstakur og þangað leitar hún þegar hún<br />
stendur frammi fyrir erfiðleikum eða mótlæti.<br />
„Þá labba ég göngustíginn meðfram Reykjafjalli,<br />
rölti þetta hægt og rólega, mér finnst þetta alveg<br />
dýrlegt svæði og alveg ofboðslega flott. Og<br />
þegar maður er komin yfir Stórkonugil eru tóftir<br />
sitthvoru megin við veginn, við göngustíginn.<br />
Þetta eru tóftir gamla Reykjahjáleigu bæjarins.<br />
Þegar ég flutti hingað til Hveragerðis, þá var ég<br />
eins árs - þá bjuggum við í eldgömlu og hrörlegu<br />
húsi þar sem Arion banki er í dag og í þarnæsta<br />
húsi bjó gömul kona sem hét Svanborg<br />
Eyjólfsdóttir og hún var síðasti ábúandinn á<br />
Reykjahjáleigubæ. Og þessi kona passaði mig<br />
stundum og mér þótti óskaplega vænt um hana,<br />
þetta var voða góð kona. Seinna meir komst ég<br />
að því að hún hafði búið þarna uppfrá.<br />
Hún átti fullt af börnum en missti manninn sinn<br />
ung frá allri barnahrúgunni og í kjölfarið ákváðu<br />
bændahöfðingjarnir sem þá réðu öllu að hún<br />
gæti ekki búið þarna. Þeir ætluðu bara að leysa<br />
upp heimilið, það átti að koma öllum börnunum<br />
annað og hún átti bara að gerast vinnukona<br />
einhversstaðar. Nema Svanborg var soddans<br />
frenja, sögðu gömlu karlarnir í Hveragerði. Hún<br />
bara barðist eins og ljón gegn þessu og henni<br />
tókst að halda öllum barnahópnum saman og<br />
búa á Reykjahjáleigubænum og koma öllum til<br />
manns.<br />
Þegar maður sest svo þarna í tóftirnar á bænum<br />
hennar þá verða öll mín vandamál svo lítilsigld.<br />
Mér þykir svo gott að sitja þarna og hugsa já, ok.<br />
Ef þú heldur að þú eigir bágt Aldís mín, gleymdu<br />
því! Það er í rauninni ekkert í mínu lífi sem getur<br />
toppað það sem mínar formæður á árum áður<br />
þurftu að ganga í gegnum. Og vandamál mín<br />
hverfa eins og dögg fyrir sólu.“<br />
Aldís er gift Lárusi Inga Friðfinnssyni og eiga<br />
þau fjögur börn og tvö barnabörn. Foreldrar<br />
hennar eru Laufey S. Valdimarsdóttir ættuð frá<br />
Hreiðri í Holtum og Hafsteinn Kristinsson sem<br />
lést 1993 ættaður frá Selfossi en sjálf segist<br />
Aldís vera „sunnlendingur að langfeðgatali“.<br />
Aldís er elst í fjögurra systkina hópi sem<br />
telur ásamt henni þau Valdimar, Guðrúnu og<br />
Sigurbjörgu. „Við Valdi höfum eiginlega alltaf<br />
verið eins og tvíburar enda bara eitt ár á milli<br />
okkar. Við höfum alltaf verið mjög náin og lékum<br />
okkur mikið saman sem börn. Sem fólst aðallega<br />
í því að Valdimar lék sér í mínum leikjum“ segir<br />
Aldís og hlær létt.<br />
Aðspurð telur Aldís að systkinin myndu<br />
lýsa henni sem svolítilli frekju en þau eru<br />
bersýnilega samrýmdur hópur: „Þau myndu<br />
örugglega segja að ég væri frek, en þau myndu<br />
ekki þora að segja það ef ég heyrði það“ segir<br />
Aldís og hlær. „Við erum nokkurn veginn alltaf<br />
sammála um það systurnar að ég segi að<br />
Guðrún sé frekust og hún segir að ég sé frekust.<br />
Við eigum í góðu sambandi miðað við það að<br />
við búum hérna öll og erum í mjög miklum<br />
samskiptum þá hefur þetta verið ótrúlega<br />
hnökralaust því að það er ekkert einfalt fyrir<br />
stóran systkinahóp að búa á sama stað og eins<br />
erum við auðvitað í rekstri. Fjölskyldan á stórt<br />
fyrirtæki og það er ekki alltaf einfalt. En mamma<br />
á nú heiðurinn af þessu öllu saman, hún heldur<br />
heraga á öllu genginu“.<br />
Aldís rifjar upp æskuárin og segir að það hafi<br />
verið afar gaman að alast upp í Hveragerði. Í<br />
næstu húsum við hana var allt fullt af krökkum<br />
og þar eignaðist hún sínar bestu vinkonur<br />
Svakalega kát í fermingamyndatöku<br />
á fyrstu æviárum sínum sem enn halda<br />
sambandi. „Samkvæmt öllum viðmiðunum hjá<br />
vinum mínum þá voru foreldrar mínir ferlega<br />
ströng. Eftirá að hyggja þá finnst mér það bara<br />
miklu, miklu betra og ég var líka ströng við mín<br />
börn. Hjá foreldrum mínum giltu bara ákveðnar<br />
reglur og það átti að fara eftir þeim. Það var samt<br />
alltaf gert þannig að maður fann að það var<br />
með væntumþykju“.<br />
Þegar Aldís var 11 ára byrjaði hún að vinna<br />
hálfan daginn úti í ísgerð. „Ég hef alltaf unnið<br />
mjög mikið og mér finnst það bara gaman. Hef<br />
aldrei litið á það þannig að vinna sé kvöð. Mér<br />
finnst alltaf gaman í vinnunni alveg sama hvað<br />
ég er að gera“.<br />
Fastir rammar henta henni ágætlega og<br />
„ég læt miklu betur að stjórn heldur en<br />
fólk almennt gerir sér grein fyrir“ segir Aldís<br />
hlæjandi. Hún sótti framhaldsskólanám í<br />
Menntaskólanum á Akureyri þar sem regluvirki<br />
skólans hentaði henni vel og var hún gerð að<br />
„yfirnæturverði á heimavistinni“ þar sem hún var<br />
svo regluföst kona.<br />
Aldís stundaði einnig nám í Noregi og<br />
Danmörku en þegar hún vann á Hótel Sögu<br />
þá gripu örlögin inn í og þar féll hún kylliflöt<br />
fyrir kokkanemanum.<br />
En hvernig myndi Lárus eiginmaður Aldísar<br />
lýsa henni? „Ég vona að hann myndi segja að<br />
ég væri skemmtileg. Því við skemmtum okkur<br />
rosalega vel saman. Það er mikið hlegið heima<br />
og mikið fjör yfirleitt. Það eru allir ofboðslega<br />
málglaðir á mínu heimili. Jafnvel þannig að<br />
mér þykir stundum nóg um. Við tölum rosalega<br />
mikið og það gerir reyndar allur Þelamerkurættbálkurinn.<br />
Það er með ólíkindum hvað þetta<br />
er málglatt fólk“.<br />
„Ég er hrikalega góð í handavinnu<br />
og flink að sauma föt“<br />
Aldís situr greinilega sjaldan auðum höndum.<br />
Hún hefur stundað sundleikfimi í yfir tuttugu<br />
ár og segist vera mikill vatnaköttur. En einnig<br />
er Aldís í hinum ýmsu klúbbum sem hittast<br />
reglulega og hafa gert lengi. Hún hittir m.a.<br />
vinkonurnar úr menntaskóla einu sinni í<br />
mánuði. Svo er hún í saumaklúbbi í Hveragerði<br />
sem hafa hist aðra hvora viku í tuttugu ár. Að<br />
auki þá leggur Aldís áherslu á að vera í góðum<br />
tengslum við fjölskylduna.<br />
6
„Það er heilmikil vinna að halda utan um<br />
fjölskyldu og vini“ segir Aldís en til þess að það<br />
gangi allt upp á móti því að sinna krefjandi og<br />
tímafreku starfi þá býr hún til plan enda er hún<br />
afar skipulögð að eigin sögn.<br />
Það vita kannski ekki margir að Aldísi hefur<br />
mjög gaman af hannyrðum og er að eigin<br />
sögn „hrikalega góð í handavinnu og flink að<br />
sauma föt“. Hún gæti hrist fram úr erminni<br />
fóðraða dragt ef hún hefði tíma en það er<br />
líklega tímaskortur sem veldur því að afköstin<br />
eru minni en áhuginn segir til um.<br />
Þar á meðal hefur hún sérstaklega gaman af<br />
krosssaum og er í einum slíkum klúbbi: „Ég er<br />
í krosssaumsklúbbi sem hittist a.m.k. einu sinni<br />
á ári en þá förum í sumarbústað. Til að byrja<br />
með þá var þetta einungis krosssaumsklúbbur<br />
og þá átti maður að koma með almennilegar<br />
hannyrðir. Ekki ámálaðann stramma heldur<br />
úttalin krosssaums stykki en þar sem þetta er<br />
bara ein helgi á ári og ég hef engan tíma í þetta<br />
þá kom ég alltaf með sama stykkið ár eftir ár.<br />
Ég hafði keypt það 1983 - enda bauð ég þeim<br />
sérstaklega í heimsókn þegar myndin mín Eftir<br />
baðið var tilbúin. Þá var haldið afhjúpunargilli -<br />
þannig að þær gera alveg ógeðslega mikið grín<br />
að mér“ segir Aldís. Verkið á nú heiðursess í<br />
krosssaumshorninu heima hjá henni.<br />
Meistarastykkið sem tók 30 ár að klára<br />
Þegar Aldís var 9 ára og átti að teikna mynd af<br />
því sem hún vildi verða þegar hún yrði stór þá<br />
teiknaði hún mynd af sér að afgreiða í bakaríi.<br />
Henni fannst það „geggjað“ og svo vildi hún<br />
verða flugfreyja eins og allar aðrar stelpur.<br />
En að hún yrði síðar bæjarstjóri í Hveragerði<br />
kom ekki til greina þegar hún var ung því<br />
þá tíðkaðist ekki að konur tækju að sér slík<br />
hlutverk.<br />
Aldís er fyrsta konan og fyrsti heimamaðurinn<br />
sem gegnir starfi bæjarstjóra og hún er tilbúin<br />
að vera í starfinu eins lengi og Hvergerðingar<br />
vilja hafa hana. „Mér finnst þetta gaman og<br />
meðan maður heldur að maður hafi eitthvað<br />
að gefa þá getur maður auðvitað verið. En hvað<br />
það er lengi, það veit ég ekki. Það getur vel verið<br />
að þetta hætti að vera skemmtilegt. En akkúrat í<br />
augnablikinu finnst mér þetta gríðarlega gaman<br />
og mér finnst ganga vel .<br />
Það er miklu meiri eining og ró yfir Hveragerði<br />
heldur en í mjög mörg ár og ég held að íbúar<br />
kunni bara ágætlega að meta það.<br />
„…það er alltaf allt vitlaust<br />
í pólitíkinni hjá ykkur“<br />
Á ákveðnu tímabili fór maður ekki út fyrir<br />
bæjarfélagið án þess að maður fengi þessa<br />
frábæru setningu það er alltaf allt vitlaust í<br />
pólitíkinni hjá ykkur. Þetta var viðloðandi í<br />
Hveragerði. En það hefur ekki verið það núna.<br />
Ég held að það sé ofboðslega dýrmætt fyrir<br />
bæjarfélög að geta eytt púðrinu í að berjast fyrir<br />
bænum sínum í heild en vera ekki að slást inn á<br />
við við hvern annan“.<br />
„Það að vera bæjarstjóri er<br />
lífstíll. Ég er alltaf bæjarstjóri.<br />
Ef ég fer í sund hérna þá get ég<br />
ekkert legið í heitapottinum<br />
og sagt; nei nú er ég í fríi“.<br />
Aldís er ekki hrædd við að láta í sér heyra<br />
og ganga þvert á flokkslínur ef sannfæring<br />
hennar segir svo. „Ég hef alveg ofboðslega ríka<br />
réttlætiskennd og hún hefur þvælst fyrir mér á<br />
stundum. Og það er ekkert alltaf vinsælt að segja<br />
hvað manni finnst og það er ekkert alltaf pólitískt<br />
kórrétt að gera það. Það er miklu einfaldara að<br />
segja bara ekki neitt. Það eykur manni kannski<br />
vinsældir að bara sitja og þegja en ég bara get<br />
það ekki. Og við höfum hér í Hveragerði ekkert<br />
verið feimin við það að hafa aðrar skoðanir<br />
heldur en flokkurinn. Til dæmis ef það lítur að<br />
málefnum sem snerta okkar svæði þá hikum við<br />
ekki við það.“<br />
Aðspurð segir Aldís lítið jafnvægi milli vinnu<br />
og einkalífs enda sé starf bæjarstjóra eiginlega<br />
lífsstíll. „Ég lít ekki á þetta sem vinnu. Það er<br />
kúnstin held ég. Það er alveg sama hvar ég hef<br />
unnið – ég labba ekkert út og segi nú er ég búin<br />
í vinnunni og nú hefst einkalífið. Það að vera<br />
manneskja - partur af því er að vera í vinnu<br />
og hana tekur þú með þér heim. Stundum og<br />
stundum ekki og svo áttu fjölskyldu og þú hættir<br />
ekkert að eiga hana þó þú farir í vinnu.<br />
Það að vera bæjarstjóri er lífstíll. Ég er alltaf<br />
bæjarstjóri. Ef ég fer í sund hérna þá get ég ekkert<br />
legið í heitapottinum og sagt; nei nú er ég í fríi.<br />
Eða í Bónus; nei, hringdu í mig á mánudaginn<br />
klukkan átta því þá er viðtalstími. Það er ekkert<br />
þannig. Mér hefur aldrei fundist þetta vera áreiti.“<br />
Þau verkefni sem Aldís er hvað stoltust af það<br />
sem af er bæjarstjóra tíð sinni eru flutningur<br />
dagdvalarinnar inn á dvalarheimilið Ás,<br />
Hamarshöllin, Stætó og gott samstarf minniog<br />
meirihluta í bæjarstjórn.<br />
„Mér fannst svo dýrlegt þegar ég kom upp á Ás<br />
og hitti gamla konu úr Hveragerði sem var svo<br />
brosandi og glöð. Hún hafði verið úti að tína<br />
rifsber og var að koma inn að sulta. Þarna var<br />
köttur og hundur og fullt af fólki. Mér fannst<br />
þetta svo fallegt móment, hvað hún var kát og<br />
glöð. Fannst svo yndislegt að okkur skyldi takast<br />
að skapa öldruðum þessar aðstæður.<br />
„Hérna búa 2300 sendiherrar<br />
fyrir Hveragerðisbæ “<br />
Ég er mjög stolt af því hvernig er búið að<br />
öldruðu fólki í Hveragerði og það er ekki að<br />
ástæðulausu að eldra fólk sækist í að búa hérna.<br />
Félag eldriborgara í Hveragerði er einstakt á<br />
landinu – hvað það tekur vel á móti fólki og hvað<br />
það er mikið og flott starf þarna. Þau eru þvílík<br />
auglýsing fyrir Hveragerði og þannig er það bara.<br />
Hérna búa 2300 sendiherrar fyrir Hveragerðisbæ<br />
og ef þeir eru nógu duglegir að segja frá því hvað<br />
hér er um að vera og hvað það er gott að búa<br />
hérna þá erum við á grænni grein. Þá vantar<br />
okkur bara meira húsnæði.<br />
Auðvitað er ég líka stolt af Hamarshöllinni þó<br />
hún valdi mér nú vægu taugaáfalli í hverju<br />
einasta óveðurskasti. Svo er ég afar stolt af<br />
bæjarstjórninni og þeim bæjarfulltrúum sem ég<br />
hef unnið með því það hefur verið alveg feykilega<br />
gott samstarf milli minni- og meirihluta og<br />
það er ekki sjálfgefið. Það er alveg ofboðslega<br />
dýrmætt fyrir sveitarfélagið að það skuli hafa<br />
náðst.“<br />
Í framtíðinni leitar hugur Aldísar í frekara nám<br />
en ef kosningarnar hefðu farið öðruvísi s.l.<br />
vor segir Aldís að hún hefði byrjað á að fara í<br />
langt ferðalag með eiginmanninum til Asíu<br />
og þá hefði hún eflaust komið tilbaka uppfull<br />
af hugmyndum. „Reyndar geng ég alltaf með<br />
þann draum að reka kaffihús-ísbúð- bar. Ég held<br />
að það sé hrikalega gaman og sérstaklega hér<br />
í Hveragerði. Ég held að það séu svo myljandi<br />
möguleikar hérna“.<br />
Það verður að teljast skondið að lífsmottó<br />
þessarar sterku, lífsglöðu og jákvæðu konu<br />
sem sér möguleika í hverju skúmaskoti skuli<br />
vera á neikvæðu nótunum.<br />
„Ég á svo neikvætt lífsmottó - það er svo<br />
ömurlegt! En mér finnst það alltaf hrikalega gott.<br />
Það er þannig: alltaf að búast við því versta – þá<br />
er ég svo glöð þegar eitthvað gott gerist. Ég<br />
er búin að lifa eftir þessu alltaf og ég geri það<br />
virkilega. Ég býst alltaf við því versta en það gerist<br />
aldrei og þá er ég hreinlega alltaf ánægð. Ég er<br />
yfirleitt aldrei í vondu skapi af því lífið er eiginlega<br />
alltaf miklu betra en ég mögulega hefði getað<br />
ímyndað mér“.<br />
7
HEYRST<br />
HEFUR…<br />
að skólarnir eru byrjaðir og komið er haust<br />
að það verði froðufimi í nýja Fitnessbilinu<br />
að eldri borgarar leiti logandi ljósi að<br />
endurskinsmerkjum<br />
að Elínborg hafi misst af partý í Hverahlíð<br />
að það rigni stundum í Hveragerði<br />
að garðasúpurnar hafi aldrei verið betri<br />
að fræga fólkið flykkist hingað í íbúðaleit<br />
að gulrætur hafi drukknað í Laufskógum<br />
að brjóstamjólkurísinn hafi slegið í gegn<br />
að trjárunnar óski eftir hjálp við að fjarlægja<br />
gamalt blóm í bæ skraut úr sér<br />
að nuddtækið í heitari pottinum sé komið<br />
í lag<br />
að ljósleiðarinn sé mættur<br />
að fyrstubekkingar týni öllu og að stígvél<br />
og úlpur hrúgist nú upp í skólaselinu og<br />
grunnskólanum<br />
að nokkrar konur í bænum hafi orðið súrar<br />
að fá ekki að bera út fleiri Krumma í sumar<br />
að aðal stuðið sé á skemmtikvöldunum í<br />
Þorlákssetri<br />
að Dagur borgarstjóri elski Laugaskarð<br />
að Almar bakari hafi keypt Hverabakarí<br />
að Ístak breikki Hellisheiði og Kambana<br />
að orðaruglið í Útsvari hafi verið ruglerfitt<br />
og í tómu rugli<br />
HVER ERUÐ ÞIÐ?<br />
Jurailux Sveinsson<br />
Jintapat Pinsawat (Nangsee)<br />
Ásta Viktorsdóttir<br />
Gunnar Viktorsson<br />
Friðrik Viktorsson<br />
María Viktorsdóttir<br />
Helstu áhugamál?<br />
Akkúrat núna, að læra íslensku,<br />
en almennt að ferðast og kynnast nýjum heimshornum.<br />
Hvað er langt síðan þið fluttuð til Hveragerðis?<br />
Við komum til Hveragerðis 27. maí 2013.<br />
Hvar bjuggu þið áður og hvers saknið þið mest þaðan?<br />
Við bjuggum í strandbæ í Taílandi sem heitir Hua Hin og ég sakna mest vina minna sem enn<br />
búa þar, annars sakna ég eilíflega fjölskyldu minnar sem býr í Suður-Taílandi. Í Hua Hin áttum við<br />
dásamlegt hús út í sveit og ég verð að viðurkenna að ég sakna þess. Svo er ekki laust við að ég<br />
sakni veðursins í Taílandi.<br />
Af hverju Hveragerði?<br />
Gott fyrir börnin að vera hér. Skólarnir eru góðir. Og það er nauðsynlegt fyrir þau að læra<br />
almennilega íslensku.<br />
Mikilvægast í lífinu?<br />
Fjölskyldan.<br />
#krumminn<br />
Dönsku Smedegaard<br />
hringrásardælurnar<br />
fyrir gólfhita- og<br />
ofnakerfi eru til<br />
á lager hjá okkur<br />
Gæða dælur<br />
á góðu verði<br />
Sími: 482-7880 - GSM: 699-1985 - helgi@helgipipari.is - www.helgipipari.is<br />
8
VELKOMIN Í HEIMINN<br />
Íris Hildur Almarsdóttir<br />
Fæðingardagur: 10. september <strong>2014</strong><br />
Foreldrar: Almar Þór Þorgeirsson og<br />
Ólöf Ingibergsdóttir<br />
Fæðingarþyngd: 5056 gr<br />
Lengd: 52 cm<br />
Birkir Evan Sigurjónsson<br />
Fæðingardagur: 6.maí <strong>2014</strong><br />
Foreldrar: Ása Björk Ásgeirsdóttir<br />
og Sigurjón Axel Guðjónsson<br />
Fæðingarþyngd: 3620 gr<br />
Lengd: 50 cm<br />
Óskar Marel Örlaugsson<br />
Fæðingardagur: 24. júní <strong>2014</strong><br />
Foreldrar: Sonja Ósk Kristjánsdóttir<br />
og Örlaugur Magnússon<br />
Fæðingarþyngd: 4230 gr<br />
Lengd: 53 cm<br />
Júlíus Pétur Jóhannsson<br />
Fæðingardagur: 29.júlí <strong>2014</strong><br />
Foreldrar: Droplaug Guttormsdóttir<br />
og Jóhann Pétur Jensson<br />
Fæðingarþyngd: 3880 gr<br />
Lengd: 54 cm<br />
SPÖRFUGLINN...<br />
Hann sat úti á tröppum húss síns, gamli maðurinn. Slæmur í baki og<br />
hélt um mjóhrygginn. Hafði dottið illa í gær. Jafnvægið ekki alveg í lagi<br />
og fæturnir ákaflega svikulir eftir að hafa borið hann uppi í hartnær 90<br />
ár. Hann hafði göngugrind sér til afnota, en vildi sem minnst af henni<br />
vita. Sagði gjarnan að lappirnar hefðu reynst sér vel og þær skyldu skila<br />
honum út lífið, án aðstoðar málmgrindar á hjólum, með handbremsu<br />
og körfu framan á. Kaffikrús var á stéttinni fyrir framan hann, með<br />
rjómaslettu í. Súdúkú gáta í vinstri hönd hans og gulur Pludo blýantur í<br />
hans hægri hönd. Sólin var að gægjast fram úr skýjum í sumarkveldinu<br />
eftir votviðrasaman dag með breytilegu veðri dagsins.<br />
Hann leit til lofts. Enginn fugl var á flugferli. Hann beið eftir vini sínum.<br />
Hinum blakka vini sínum, sem heimsótt hafði hann á hverjum degi<br />
um langt bil. Skyndilega sá hann skugga á garðflötinni sinni, skugga<br />
í fuglsmynd. Blakkan skugga, sem sveif yfir grænu, nýslegnu grasinu.<br />
Með vængendana klofna í fjaðrir og vinsamlegu krunki.<br />
Fuglinn lenti í garðinum hans á nákvæmlega sama stað og venjulega.<br />
Í miðjum garðinum. Tók þrjú stökk jafnfætis og leit á gamla manninn.<br />
Gaf frá sér vingjarnlegt krunk. Gamli maðurinn sendi vinalegt krunk á<br />
móti.<br />
Gamli maðurinn hafði gjört það að vana sínum að kasta matarleifum í<br />
miðjan garðinn fyrir vin sinn, þann blakka. Spörfuglinn.<br />
Þegar sá blakki réðst á matarleifarnar, stóð sá gamli upp, stirðbusalega<br />
við garðstól, sem hann hafði sett við húströppur sínar.<br />
„Komdu sæll, vinur minn, spörfuglinn minn,“ sagði gamli maðurinn í<br />
afalegum tóni og gekk í átt að vini sínum.<br />
Sá blakki lét sér ekki bregða við hreyfingu gamla mannsins. Hélt áfram<br />
að kroppa í matarleifarnar á garðgrasinu. Kótelettur í raspi. Lúbarðar fyrir<br />
steikingu á þykku tréfjalarbretti.<br />
Gamli maðurinn horfði á vin sinn, blakka spörfuglinn og sagði:<br />
„Já vertu ekki feiminn við þetta....þetta fóður þitt er hvorki úldið né<br />
myglað, þótt ég hafi gleymt því í ísskápnum í nokkra daga!“<br />
Hann brosti til vinar síns á grasflötinni með gleði í augum. Þakklæti<br />
fyrir vinskapinn við þann blakka.<br />
Spörfuglinn gaf honum gleðistund á<br />
hverjum degi.<br />
Hann hafði alist upp með mjög<br />
hjátrúarfullri móður, sem elskaði ekki<br />
spörfuglinn neitt sérstaklega, fannst hann þjófóttur, gargandi hávær og<br />
glysgjarn.<br />
„Mundu það, sonur sæll að krummi er ekki allur þar sem hann<br />
er séður. Ég hef aldrei hrifist af gargandi háværum, þjófóttum og<br />
glysgjörnum mönnum. Þeir eru ekki fyrir minn smekk og krumminn er<br />
samnefnari þeirra!“<br />
Hann svaraði öngvu um þetta við móður sína. Hafði alltaf hrifist að<br />
flögri fuglins og áreynslulegu svifi yfir bæinn með útglenntar fjaðrir<br />
vængjana. Hann tók ástfóstri við þennan skemmtilega blakka fugl,<br />
krummann. Hafði skál á garðhúsgagnaborðinu í garðinum sínum með<br />
krónupeningum í. Sá blakki flaug alltaf á borðið, eftir át sitt og tók einn<br />
krónupening með sér í flug um bæinn, úr garði hans.<br />
„Ég skal segja þér það, sonur minn sæll, að þessi svarti flögrari loftsins<br />
er tengdur mörgum hjátrúar og hindurvitnum og meðal er annars sagt<br />
að fljúgi tveir hrafnar yfir hús þitt í kross, að þá er einhver feigur í því<br />
húsi,“ hafði móðir hans gjarnan tuggið yfir honum í æsku hans.<br />
Gamli maðurinn hafði alltaf talið sér trú um, að hann væri ekki<br />
hjátrúarfullur, þrátt fyrir fyrirlestra móður sinnar um hjátrú og<br />
hindurvitni lífsins. Hann strauk sér fast um mjóhrygginn og hagræddi<br />
líkamsstöðu sinni í jafnvægisleit. Hann horfði á vin sinn, þann blakka<br />
klára að kroppa í sig þriðju kótelettusneiðina með raspinum. Hann<br />
veifaði vini sínum með hæglátri vinstri hönd, beygði sig fram á við eins<br />
og hann væri að hneigja sig.<br />
„Ég ætla að þakka þér og vinum þínum, elsku spörfuglinn minn að<br />
fljúga ekki í kross yfir hús mitt, því mig langar til að lifa svolítið lengur,<br />
þótt illa farinn sé og langt genginn. Þá er lífið þess virði.“<br />
Höfundur: Sigurður Blöndal<br />
1. prentun uppurinn… 2. prentun væntanleg…<br />
Bókin fæst í Shell & Álnavörubúðinni og einnig er hægt að panta hana á netfanginu sblond@hveragerdi.is<br />
…umsögn um bókina…<br />
Bókin er hreint yndisleg, frábær blanda af gaman og alvöru. Sérstaklega hafði ég gaman að þeirri nýbreytni að hafa litlar<br />
hugvekjur inn á milli sagnanna, sem báru hógværa titilinn “orð á pappír.” Hver einasta hugvekja vakti mann til umhugsunar<br />
um lífið sjálft og fylltu mann af hlýju og von.<br />
Rósa Grímsdóttir á Rithringur.is<br />
9
SELFIE Í STRÆTÓ - BIRTA MARÍN DAVÍÐSDÓTTIR<br />
Af hverju ferðast þú með strætó?<br />
Ég æfi fimleika í Stjörnunni og ferðast<br />
því 4 sinnum í viku með strætó á milli<br />
Hveragerðis og Ásgarðs í Garðabæ.<br />
Hvernig styttir þú þér stundir í strætó?<br />
Ég hlusta á tónlist til að stytta mér stundir.<br />
Eftirminnilegasta strætóferðin? Var<br />
þegar ég fór með strætó í fyrsta skipti á<br />
æfingu, þá tók ég vitlausan strætó!! :)<br />
Tekur þú alltaf selfie í strætó?<br />
Nei, en ég hef alveg gert það ;)<br />
KRUMMINN KEMUR ÚT EFTIR DÚK<br />
OG DISK. MINNUM Á AÐ PANTA<br />
AUGLÝSINGAR OG SENDA OKKUR<br />
GREINAR<br />
KRUMMINN@KRUMMINN.IS<br />
KRÚNK KRÁ KRÁ<br />
SKÓLAÞING/NÁMSKEIÐSDAGUR SKÓLAÞJÓNUSTU ÁRNESÞINGS<br />
Mánudaginn 1. september var efnt til<br />
sameiginlegs starfsdags allra starfsmanna<br />
í grunn- og leikskólum í Árnesþingi.<br />
Að skólaþjónustu Árnesþings standa<br />
sjö sveitarfélög á Suðurlandi. Þau eru:<br />
Bláskógabyggð, Flóahreppur, Grímsnesog<br />
Grafningshreppur, Hveragerðisbær,<br />
Hrunamannahreppur, Skeiða- og<br />
Gnúpverjahreppur og Sveitarfélagið Ölfus.<br />
Námskeiðsdagurinn var haldinn í Þorlákshöfn<br />
þar sem rúmlega 300 starfsmenn skólanna<br />
komu saman. Dagurinn hófst á því að farið<br />
var yfir sameiginleg markmið skóla og<br />
skólaþjónustu fram til ársins 2017. Eftir það<br />
hlýddu þátttakendur á erindi Ásdísar Olsen<br />
um hamingju og velferð í skólastarfi með<br />
jákvæðri sálfræði. Óhætt er að segja að erindi<br />
hennar hafi vakið áhuga. Gott er að muna<br />
eftir að njóta augnabliksins, hafa jákvæða<br />
afstöðu til lífsins og skólastarfsins. Þannig<br />
gengur allt betur.<br />
Fram eftir degi voru í boði 20 málstofur<br />
en þátttakendur á þinginu gátu valið tvær<br />
þeirra yfir daginn. Þar voru flutt erindi um<br />
ýmislegt spennandi sem er að gerast í<br />
skólum á svæðinu auk annarra skólatengdra<br />
verkefna. Erindin fjölluðu meðal annars um<br />
Reggio leikskólastarf, lestrarþróun, hreyfingu<br />
barna, nemendur með hegðunarvanda,<br />
áhugasviðsvinnu með nemendum, fjölbreytta<br />
kennsluhætti, spjaldtölvur, barnavernd,<br />
sjálfsskaðandi hegðun, tölvufíkn og jákvætt<br />
hugarfar kennara.<br />
Þingið tókst í alla staði vel enda vel tekið<br />
á mótið hópnum í Þorlákshöfn. Það var<br />
sérstaklega ánægjulegt að sjá alla starfsmenn<br />
leik- og grunnskóla vinna saman á þessum<br />
degi og fá tækifæri til að auka samræðu milli<br />
skólastiganna.<br />
Hrafnhildur Karlsdóttir<br />
og Ólína Þorleifsdóttir<br />
kennsluráðgjafar í Skóla- og velferðarþjónustu<br />
Árnesþings<br />
TOUR DE ÓSKALAND<br />
Mikil gleði ríkti í leikskólanum Óskalandi<br />
á dögunum er leikskólanum barst<br />
höfðingleg gjöf.<br />
Formaður Lionsklúbbsins Eden kom<br />
færandi hendi með tvö ný hjól. Ekki þarf<br />
að orðlengja það að hjólin eru í stöðugri<br />
notkun og eru þau kærkomin viðbót við<br />
búnað leikskólans. Lionsklúbbnum Eden<br />
eru færðar hjartans þakkir fyrir óeigingjarnt<br />
starf og hugulsemi í garð leikskólans.<br />
Sigurður Hrafn Tryggvason<br />
fæddur 7.nóv 1949 látinn 1. sept <strong>2014</strong><br />
Við fjölskyldan viljum þakka öllum fyrir þann hlýhug<br />
og stuðning sem okkur var sýndur<br />
við andlát eiginmanns, föður okkar, tengdaföður,<br />
afa og langaafa.<br />
Guðbjörg Hofland Traustadóttir<br />
Berglind Hofland Sigurðardóttir<br />
Tryggvi Hofland Sigurðsson<br />
Hjördís Harpa Guðlaugsdóttir Wiium<br />
Eva Dögg Hofland<br />
Guðmundur Árni Kjartansson<br />
Ísabella Hofland, Tryggvi Hrafn, Emilía Guðbjörg, Berglind María<br />
10
ÁSKORUN-HREYSTI<br />
SAMFÉLAG-HEILBRIGÐI<br />
FJÖLBREYTNI-LÍFSSTÍLL<br />
ÁRANGUR-GLEÐI-TÆKNI<br />
SAMHELDNI-STYRKUR<br />
ÚTHALD-HEIÐARLEIKI<br />
VELLÍÐAN<br />
Vertu með!<br />
www.crossfithengill.is<br />
HÁRSNYRTISTOFAN<br />
ópus<br />
Breiðumörk 2<br />
Hveragerði<br />
Sími 483 4833<br />
Brauð og kökur í úrvali<br />
Verið velkomin<br />
Lífleg starfsemi er í<br />
Þorlákssetri hjá Félagi eldri<br />
borgara í Hveragerði<br />
Á mánudagsmorgnum<br />
byrjar Bókmenntahópurinn<br />
sem les sjálfvalið efni milli kl.<br />
10:00 og 12:00. Kl. 13:00 er svo<br />
handavinna og brids.<br />
Þriðjudagsmorgna gengur<br />
hópurinn Út um allt á milli<br />
kl. 10:00 og 11:00. Kl. 13:00 er<br />
spiluð félagsvist og kl. 17:30<br />
er kenndur línudans sem er<br />
nýbyrjaður hjá félaginu. Holl,<br />
góð og skemmtileg hreyfing.<br />
Á miðvikudögum mæta<br />
félagar og spila boccia kl.<br />
10:00 og spila í liðlega klst.<br />
Vatnsleikfimi er kl. 14:45 í 45<br />
mín. á Heilsustofnun.<br />
Kl. 19:00 er framsögn og<br />
leikræn tjáning.<br />
Á fimmtudögum eru<br />
fyrirlestrar og spjalldagar kl.<br />
10:00, þá koma gestir til okkar.<br />
Guðrún Eva Mínervudóttir<br />
kemur í fimmtudagsspjall<br />
13. nóv. og 20. nóv. kemur<br />
vinabekkur úr grunnskólanum.<br />
Kl. 13:00 er brids og<br />
Hverafuglar syngja á milli kl.<br />
16:00 og 18:00.<br />
Á föstudögum kl. 10:00<br />
byrjar Félagið á pútti uppi í<br />
Hamarshöll og boccia einnig<br />
kl. 10:00 í Þorlákssetri. Kl.<br />
13:30 til 16:30 er Útskurður í<br />
handavinnuhúsi Grunnskólans.<br />
Auk þess er nýtt í dagskránni,<br />
skemmtikvöld síðasta<br />
föstudag í mánuði kl. 19:30 og<br />
bíósýning fyrsta mánudag í<br />
mánuði kl. 20:00<br />
OPIÐ HÚS<br />
Á Blómstrandi dögum í ágúst var Félag eldri borgara með opið hús<br />
í Þorlákssetri. Dagskrá var í umsjá Bókmenntahópsins en þar lásu<br />
20 félagar sjálfvalið efni. Dagskráin var í um klukkustund hvern dag.<br />
Einnig stóð yfir sýning á Vatnslitamyndum Sæunnar Freydísar.<br />
Bjóðum upp á góðan fundarsal,<br />
gistingu og kvöldmat<br />
fyrir minni hópa<br />
www.frumskógar.is<br />
info@frumskogar.is Sími 896-2780<br />
ALLIR ÚT AÐ HLAUPA!<br />
Skokkhópur Hamars hvetur alla til<br />
að koma út að skokka eða ganga<br />
og nýir meðlimir alltaf velkomnir á<br />
æfingar hjá okkur.<br />
Allir geta verið með og hver<br />
og einn ræður sínum hraða og<br />
vegalengd hverju sinni. Því er<br />
kjörið að byrja með hópnum og<br />
dusta rykið af gömlu skónum,<br />
njóta þess frábæra umhverfis sem<br />
við höfum hér í og við Hveragerði<br />
til góðrar hreyfingar.<br />
Æfingar hjá okkur eru allar frá<br />
sundlauginni Laugaskarði og eru<br />
sem hér segir.<br />
Mánudaga Kl. 17:30<br />
Þriðjudaga Kl. 17:30<br />
(byrjendur sérstaklega velkomnir)<br />
Fimmtudaga Kl. 17:30<br />
(byrjendur sérstaklega velkomnir)<br />
Laugardaga Kl. 9:30<br />
Stefnum við á að endurvekja<br />
gönguhópinn og ætlunin að<br />
hittast upp í sundlauginni<br />
Laugaskarði kl. 16:30 alla þriðjudaga<br />
og fimmtudaga til að byrja<br />
með.<br />
Við munum svo að sjálfsögðu<br />
halda úti fjallgöngunum<br />
okkar vinsælu en undir styrkri<br />
handleiðslu Sverris Geirs<br />
Ingibjartssonar. Fjallaferðir hafa<br />
verið á laugardagsmorgnum<br />
ca. 4-6 vikna fresti þar sem<br />
valið er heppilegt fjall í okkar<br />
nærumhverfi. Fjallgönguferðirnar<br />
verða auglýstar á www.<br />
hamarsport.is og fésbókarsíðu<br />
Skokkhóps Hamars með góðum<br />
fyrirvara.<br />
Ef einhverjar spurningar brenna á<br />
ykkur eða óskir um ráðleggingar<br />
eða hlaupa-prógramm þá er Pétur<br />
Frantzson alltaf við símann og<br />
svarar glaður, sími 844-6617.<br />
Allir alltaf velkomnir, sjáumst.<br />
11
FÓTBOLTASTUÐ Í HAMARSHÖLLINNI<br />
Sunnudaginn 19. <strong>október</strong> var haldið fótboltamót fyrir efnilegu krakkana okkar í 7. flokki í Hamarshöll. Þau stóðu sig öll með mikilli prýði eins<br />
og sjá má þessum myndum.<br />
Við opnum stærra og mikið endurbætt<br />
Fitness bil að Austurmörk 18<br />
zumba • foam flex • yoga • nuddstofa • infrarauð sauna<br />
• danskóli Rebel • einkaþjálfun og margt fleira<br />
Bjóðum einnig uppá tvo stóra sali fyrir<br />
veislur, afmæli, fundi o.s.frv.<br />
Opnunarpartý 7. nóv kl 20:00<br />
Allir velkomnir<br />
12