Krumminn október 2014

5. TBL. 1. ÁRG. OKTÓBER 2014 --- DREIFT FRÍTT Á HEIMILI OG FYRIRTÆKI Í HVERAGERÐI OG ÖLFUSI
HVAÐ VITUM
VIÐ EKKI
UM ALDÍSI?
Á vordögum var Aldís Hafsteinsdóttir endurkjörin bæjarstjóri í
Hveragerði þriðja kjörtímabilið í röð. Aldís er uppalin í Hveragerði,
þekkir hér hvern stein og þúfu og flestir íbúar vita einhver deili á
henni en skyldi vera til hlið á Aldísi sem okkur er ókunn og hvaða
framtíðardrauma gengur hún með í maganum? Okkur lék forvitni á
að kynnast þessari hlið á konunni sem setið hefur lengst allra sem
bæjarstjóri í Hveragerði og er fyrst kvenna til að gegna þeirri stöðu.
Í októberbyrjun mæltum við okkur mót við Aldísi á uppáhaldsstaðnum
hennar í Hveragerði en sökum kröftugrar haustlægðar sem
gekk yfir landið þann daginn þá var stefnumótið fært inn í hús
Sjálfstæðisfélagsins í Hveragerði
Framhald á bls. 6-7
GAMAN Í SUMAR
1

www.krumminn.is
krumminn@krumminn.is
Útgefandi: Klettagjá ehf.
Ritstjórar og ábyrgðarmenn:
Hrund Guðmundsdóttir
Ellen Ýr Aðalsteinsdóttir
Umbrot: Hvergi Slf.
Prentun: Prenttækni
Upplag: 2000 stk.
Próförk: Elísabet M. Nickel Stefánsdóttir
Myndir: Guðmundur Erlingsson,
Ösp Vilberg Baldursdóttir og fleira
hæfileikafólk úr Hveragerði
Innsent efni:
Fréttir: frettir@krumminn.is
Aðsendar greinar: krumminn@krumminn.is
Auglýsingar: auglysingar@krumminn.is
HAUSTVERKIN
Þá er sumarfríi Krummans lokið. Ritstjórarnir báðir að byrja að vinna og ungarnir komnir til
dagmömmu. Sumarið flaug frá okkur og vegna veikinda, auglýsingaskorts, rigningatíðar og
allskonar annarra afsakana kom ekkert blað út í júlí eins og við ætluðum okkur.
Vonandi getum við haldið þessu útgáfubrölti samt áfram og næst þegar við höfum ekkert að
gera .... eins og núna ætlum við að gefa út ritröð af bókum úr eigin reynsluheimi: Hvernig á að
gefa út bæjarblað með barn á brjósti. Hvernig á að vélrita með hægri meðan maður gefur brjóst
og talar í símann. Húsráðsbókin Gamlar matarleifar og bananar á gólfi og veggjum. Sálfræðibókin
Glataðar stundir með vanræktu eldra barni - fyrra bindi. Sjálfshálparbókin - Elskum RSK og VSK
og alla sem vinna til 15.30. Svo verður gefinn út dvd-diskur um hvernig maður kemur sér í form -
Blaðaútburður með barnakerrur.
Krumminn er októberbleikur í dag og hann kemur aftur út í kringum aðventuna og verður þá
settur í jóladressið.
Góðar stundir
Hrund og Ellen Ýr
LÍF OG FJÖR Á BLÓM Í BÆ
2

3

STUTTAR FRÉTTIR FRÁ BÆJARSTJÓRA
Skafa þurfti bílinn nokkra morgna í vikunni og sannar það enn og aftur að veturinn á Íslandi verður ekki umflúinn og
það jafnvel ekki þó okkur finnist við eiga annað og betra skilið eftir einstakt rigningarsumar.
Trjágreinar og runnar sem sem gægjast út fyrir lóðamörk eru oftast flestum til ama. Mælst er til þess að íbúar sjái til
þess að slíkt sé ekki gangandi vegfarendum til trafala í vetur og ekki síður snjóruðningstækjunum þegar moka þarf snjó
af gangstéttum.
Hátíðir sumarsins voru haldnar í sól og blíðu og fyrir það erum við þakklát. Fjöldi gesta heimsótti bæinn þessa daga
og tóku bæjarbúar einstaklega vel á móti gestum sínum. Gestrisni og gleði einkennir bæjarhátíðirnar okkar og er ekki að
efa að sá andi skilar sér til þeirra sem hingað koma.
Fasteignasala hefur gengið afar vel það sem af er ári og seljast eignir hratt hér í bæ. Ófremdarástand hefur því miður skapast á leigumarkaði
eins og fjöldi auglýsinga í Bónus er best til vitnis um. Hafa bæjaryfirvöld átt í góðum samskiptum við starfsmenn Íbúðalánasjóðs sem í kjölfarið
hafa auglýst hér íbúðir til leigu.
Tvö raðhús rísa nú hratt í Dalsbrún en í þeim verða 10 nýjar íbúðir. Við Dalsbrún eru ennþá lóðir á lausu bæði fyrir raðhús og parhús svo
áhugasamir eru hvattir til að skoða þær lóðir betur á heimasíðu bæjarins.
Gatnagerð sumarsins er enn í fullum gangi. Malbik er nú komið á Bröttuhlíð en unnið er að frágangi gangstétta og umhverfis. Þverhlíðin verður
einnig malbikuð sem og göngustígar milli Valsheiðar og Lyngheiðar. Bröttuhlíð verður lokað að austan við þessar framkvæmdir svo breytingar
verða á gatnaskipan hverfisins.
Drullusund fær líka andlitslyftingu í vetur og verður þeim merka göngustíg gert hátt undir höfði.
Upplýsingaver hefur verið opnað í grunnskólanum þar sem tölvur og bækur sameinast til gleði fyrir nemendurna. Þar hefur Dúfukot einnig
opnað en það er lítið bókasafn með bókum til yndislesturs fyrir yngstu kynslóðina í grunnskólanum. Þar er notalegt að vera.
Leikskólinn Undraland fékk mikla andlitslyftingu bæði að utan og innan í sumar. Þar var til dæmis skipt um dúka á tveimur deildum en nýjum
gólfdúkum er ætlað að minnka hljóðmengun í skólanum. Samkvæmt starfsmönnum virkar það afar vel.
Drullumall aðstaða er komin upp í báðum leikskólunum og nýjar stórskemmtilegar rólur. Fótboltavöllur af smærri gerðinni hefur vakið mikla
ánægju barna á Undralandi. Sífellt er unnið að því að bæta aðstöðu yngstu barnanna í bæjarfélaginu.
Ljósleiðari er nú lagður í öll íbúðarhús í Hveragerði á vegum Gagnaveitu Reykjavíkur. Er framkvæmdin bæjarbúum að kostnaðarlausu en hún er
hluti af samningi sem gerður var um sölu Hitaveitu Hveragerðis á sínum tíma. Eru íbúar hvattir til að þiggja boðið um lagningu ljósleiðarans í hús
sín en með ljósleiðaranum er í boði hraðasta nettenging sem völ er á.
Bæjarfulltrúar allra flokka vinna nú saman að gerð fjárhagsáætlunar fyrir árið 2015. Ljóst er að gæta þarf ítrustu hagkvæmni en mörg
verkefni kalla nú á fjármuni sem gaman væri að ráðast út í .
Með ósk um notalegt haust,
Aldís Hafsteinsdóttir, bæjarstjóri
Opnunartímar
Gámastöðin
Bláskógum 14 er opin alla daga vikunnar,
nema sunnudaga.
Virkir dagar frá kl.16:00 – 18:00
Laugardagar frá kl. 14:00-18:00
Bókasafnið
Sunnumörk 2
Mánudaga – föstudaga kl.13:00 – 18:30.
Laugardaga kl. 11:00-14:00
Upplýsingamiðstöð ferðamála á Suðurlandi
Sunnumörk 2
Opin virka daga kl. 8:30-16:00
Bæjarskrifstofur
Sunnumörk 2
Afgreiðsla er opin: Mánud. – föstud. kl.10:00-15:00
Sími er opinn: Mánud.-föstud. kl.9:00-16:00
Hveragarðurinn
Hveramörk 13
Sumaropnun 1.apríl – 1.október: Mánudaga – laugardaga
09:00-17:00. Sunnudaga lokað.
Vetraropnun: Opið fyrir stóra hópa samkvæmt
samkomulagi. Hafið samband við Upplýsingamiðstöð
Suðurlands í síma 4834601 eða á netfangið
tourinfo@hveragerdi.is
Sundlaugin Laugaskarði
Mánudaga – fimmtudaga kl. 07:00-20:15
Föstudaga kl. 07:00-17:15
Helgar kl. 10:00-17:15
Hveragerðisbær Sunnumörk 2 810 Hveragerði Sími 4834000 Fax 4834801 hve@hveragerdi.is www.hveragerdi.is
4

KRUNK KRUNK
Pétur Pétursson
Varaslökkviliðsstjóri Brunavarna Árnessýslu
Hvað ætlarðu að verða þegar þú verður stór? Svona vinnulega þá
finn ég mig vel í því sem ég er að gera í dag og vonast til þess að getað
haldið áfram á þeirri braut eftir því sem ég eldist og stækka meira (á
þverveginn). Fjölskyldulega er ég alsæll, ég er nú þegar eiginmaður
og faðir, er hægt að hugsa sér það betra, ja nema kannski að verða
einhvertímann afi.
Hvað myndir þú gera ef þú mættir stjórna Íslandi í einn dag? Þar sem engar skyndilausnir eru
til á vandamálum okkar blessaða lands og þjóðar þá hugsa ég að ég myndi setja á almennan frídag
þennan dag (geri ráð fyrir að þetta væri sólríkur sumardagur), þar sem þjóðin gæti átt góðan „kósýdag“
með sínum nánustu og rifjað upp fyrir sjálfum sér um hvað lífið virkilega snýst.
Hver myndi leika þig ef gerð væri kvikmynd um þig? Ég veit ekki hver myndi leika mig ef svo
ólíklega vildi til að um mig yrði gerð kvikmynd, ég hefði hinsvegar gaman af því að sjá hann Ólaf Darra
gera það, hann er svo skrambi flottur leikari.
CrossFit, skokk eða Zumba? Það sem hentar mér best á þessum tímapunkti í lífinu er CrossFit og
stunda ég það af áfergju um þessar mundir.
Hvar sérðu þig eftir fimm ár? Það ætla ég að vona að eftir fimm ár verði ég áfram
hamingjusamlega giftur faðir búandi í Hveragerði við hestaheilsu.
Hvað ertu hræddur við? Ég hugsa að það sem hræðir mig mest sé ástvinamissir.
Fallegasti staðurinn? Hveragerði er náttúrulega gullfallegur staður, það vita allir! En landsvæðið í
kringum Landmannalaugar er líklega í hópi fallegustu staða á jörðinni.
Hvað gafstu síðast í gjöf? Ég gaf honum Ævar vini mínum Sudoku þrautir til þess að dunda við.
Hverjum myndir þú vilja vera fastur í lyftu með? Ætli það væri ekki farsælast að ég myndi festast
í lyftu með henni Baldvinu minni. Hún er búin að þola mig síðastliðin 22 ár og myndi líklega þola
það að vera föst með mér í einhvern tíma í lyftu. Við höfum líka alltaf endalaus umræðuefni og myndi
okkur líklega ekki leiðast eina mínútu.
Hvað er það vandræðalegasta sem hefur komið fyrir þig? Úff, ég á líklega of mörg of slæm
vandræðaleg augnablik til þess að birta hér, sumt verður bara að fá að deyja með manni. Ég get þó
sagt frá þessu, einu sinni var ég að vinna sem öryggisfulltrúi við töku stórrar bandarískrar auglýsingar
við Kleifarvatn. Ég átti að gæta að öryggi Bandarískrar kvikmyndastjörnu þar sem verið var að mynda
á háhitasvæði og takan átti að fara fram við leirhver. Kvikmyndastjarnan var fönguleg ung kona og að
sjálfsögðu vildi maður allt til vinna til þess að velferð hennar vær trygg.
Ég áleit sem svo að aðstæður væru ekki tryggar þar sem brún hversins væri sleip og þar með hætta á
að stjarnan rynni ofaní hverinn með hræðilegum afleiðingum. Ég bað því um að steinhella yrði flutt
á svæðið til þess að setja undir fæturna á henni við brún hversins. Þetta tók allt heljarinnar tíma, tveir
menn á sexhjóli fóru í að finna móbergshellu í verkið og á meðan biðu einhverjir tugir manna með
tökur. Þetta þótti mér frekar erfitt því ég vill nú frekar að hlutirnir gangi eitthvað og á erfitt með að
þola gauf og ráðaleysi. Loksins komum mennirnir með móbergshelluna á palli sexhjólsins keyrandi
að hvernum. Ég gladdist og sá framá að þessu gaufi færi að ljúka og hægt væri að halda áfram. En
nei, þegar þeir komu með helluna fóru þeir af hjólinu og gengu burt, ég hljóp til þeirra og spurði hvort
þeir ætluðu ekki að setja hana við hverinn en þá sögðu þeir mér að það væri ekki í þeirra verkahring,
aðrir menn kæmu í það. Þetta særði svo sannarlega í mér Íslenska reddaragenið svo ég rauk til og
ákvað bara að redda þessu eins og sönnum Íslendingi sæmir. Ég greip móbergshelluna í fangið, sem
reyndar var ansi þung, og staulaðist með hana að hvernum. Þar fyrir stóð stjarnan og bað ég hana
eins karlmannlega og ég gat að færa sig því ég þyrfti að setja helluna niður við hverinn fyrir hana.
Þetta sagði ég með hálsæðarnar illa þandar af rembingi þar sem hellan var svo þung. Blessuð stjarnan
færði sig um eitt skref og ég gerði mig líklegan til þess að láta helluna niður á sinn stað. Auðvitað rann
bannsett hellan úr höndunum á mér og skall með allnokkru afli niður í leir-drullu svaðið við hverinn.
Það var eins og við manninn mælt að blessuð stjarnan málaðist frá toppi til táar af drullu og varð ekki
sjón að sjá hana blessaða. Nokkrum sekúndum seinna, svona þegar hún hafði jafnað sig af mesta
sjokkinu, lét hún nokkur vel valin orð falla í minn garð. Ég átti þau líklega skilið. Hún hafði jú ekki verið
nema í fjóra tíma í förðun fyrir tökuna og fötin sem hún var í voru úr rússkinni og ekki hægt að þrífa
þau nema í þurrhreinsun (þær upplýsingar fékk ég reyndar eftir að ég reyndi að strjúka af henni mestu
drulluna með gömlu snýtibréfi sem ég hafði í vasa mínum). Það varð úr að tökur á þessu atriði töfðust
um einn sólarhring.
Þetta var allt frekar vandræðalegt og það er skemmst frá því að segja að ég var ekki beðinn um að
vinna að öðru verkefni fyrir þetta ágæta kvikmyndafyrirtæki.
Ég lærði þó þá lexíu af þessu að, allavega í þessum bransa á maður ekkert að vera að vasast í hlutum
sem ekki eru í manns verkahring.
Á hvern skorar þú í næstu yfirheyrslu? Ég myndi vilja skora á hann Sævar Helgason, gamlan
bekkjarbróðir minn og félaga að tækla þessar spurningar.
5

HVAÐ VITUM
VIÐ EKKI
UM ALDÍSI?
Framhald af forsíðu
Við mættum um það leyti sem opið hús
var að klárast og þennan laugardag var
alþingismaðurinn Unnur Brá Konráðsdóttir
í heimsókn og af umræðunum að dæma
mátti greina að þar lágu Hvergerðingar ekki á
skoðunum sínum og hin helstu pólitísku mál
voru skeggrædd af krafti.
„Svo heldur fólk alltaf að hér séu allir heilaþvegnir
sjálfstæðismenn en hér rífst fólk og rífur kjaft við
þingmennina“ segir Aldís að loknum fundi
og bætir við „Sjálfstæðismenn í Hveragerði
hafa alltaf verið þekktir fyrir það að vera svolítið
óþekkir.“
„Það er í rauninni ekkert í mínu
lífi sem getur toppað það sem
mínar formæður á árum áður
þurftu að ganga í gegnum“
Talið berst aftur að uppáhaldsstað hennar sem
er uppi í Reykjafjalli og er að hennar mati alveg
einstakur og þangað leitar hún þegar hún
stendur frammi fyrir erfiðleikum eða mótlæti.
„Þá labba ég göngustíginn meðfram Reykjafjalli,
rölti þetta hægt og rólega, mér finnst þetta alveg
dýrlegt svæði og alveg ofboðslega flott. Og
þegar maður er komin yfir Stórkonugil eru tóftir
sitthvoru megin við veginn, við göngustíginn.
Þetta eru tóftir gamla Reykjahjáleigu bæjarins.
Þegar ég flutti hingað til Hveragerðis, þá var ég
eins árs - þá bjuggum við í eldgömlu og hrörlegu
húsi þar sem Arion banki er í dag og í þarnæsta
húsi bjó gömul kona sem hét Svanborg
Eyjólfsdóttir og hún var síðasti ábúandinn á
Reykjahjáleigubæ. Og þessi kona passaði mig
stundum og mér þótti óskaplega vænt um hana,
þetta var voða góð kona. Seinna meir komst ég
að því að hún hafði búið þarna uppfrá.
Hún átti fullt af börnum en missti manninn sinn
ung frá allri barnahrúgunni og í kjölfarið ákváðu
bændahöfðingjarnir sem þá réðu öllu að hún
gæti ekki búið þarna. Þeir ætluðu bara að leysa
upp heimilið, það átti að koma öllum börnunum
annað og hún átti bara að gerast vinnukona
einhversstaðar. Nema Svanborg var soddans
frenja, sögðu gömlu karlarnir í Hveragerði. Hún
bara barðist eins og ljón gegn þessu og henni
tókst að halda öllum barnahópnum saman og
búa á Reykjahjáleigubænum og koma öllum til
manns.
Þegar maður sest svo þarna í tóftirnar á bænum
hennar þá verða öll mín vandamál svo lítilsigld.
Mér þykir svo gott að sitja þarna og hugsa já, ok.
Ef þú heldur að þú eigir bágt Aldís mín, gleymdu
því! Það er í rauninni ekkert í mínu lífi sem getur
toppað það sem mínar formæður á árum áður
þurftu að ganga í gegnum. Og vandamál mín
hverfa eins og dögg fyrir sólu.“
Aldís er gift Lárusi Inga Friðfinnssyni og eiga
þau fjögur börn og tvö barnabörn. Foreldrar
hennar eru Laufey S. Valdimarsdóttir ættuð frá
Hreiðri í Holtum og Hafsteinn Kristinsson sem
lést 1993 ættaður frá Selfossi en sjálf segist
Aldís vera „sunnlendingur að langfeðgatali“.
Aldís er elst í fjögurra systkina hópi sem
telur ásamt henni þau Valdimar, Guðrúnu og
Sigurbjörgu. „Við Valdi höfum eiginlega alltaf
verið eins og tvíburar enda bara eitt ár á milli
okkar. Við höfum alltaf verið mjög náin og lékum
okkur mikið saman sem börn. Sem fólst aðallega
í því að Valdimar lék sér í mínum leikjum“ segir
Aldís og hlær létt.
Aðspurð telur Aldís að systkinin myndu
lýsa henni sem svolítilli frekju en þau eru
bersýnilega samrýmdur hópur: „Þau myndu
örugglega segja að ég væri frek, en þau myndu
ekki þora að segja það ef ég heyrði það“ segir
Aldís og hlær. „Við erum nokkurn veginn alltaf
sammála um það systurnar að ég segi að
Guðrún sé frekust og hún segir að ég sé frekust.
Við eigum í góðu sambandi miðað við það að
við búum hérna öll og erum í mjög miklum
samskiptum þá hefur þetta verið ótrúlega
hnökralaust því að það er ekkert einfalt fyrir
stóran systkinahóp að búa á sama stað og eins
erum við auðvitað í rekstri. Fjölskyldan á stórt
fyrirtæki og það er ekki alltaf einfalt. En mamma
á nú heiðurinn af þessu öllu saman, hún heldur
heraga á öllu genginu“.
Aldís rifjar upp æskuárin og segir að það hafi
verið afar gaman að alast upp í Hveragerði. Í
næstu húsum við hana var allt fullt af krökkum
og þar eignaðist hún sínar bestu vinkonur
Svakalega kát í fermingamyndatöku
á fyrstu æviárum sínum sem enn halda
sambandi. „Samkvæmt öllum viðmiðunum hjá
vinum mínum þá voru foreldrar mínir ferlega
ströng. Eftirá að hyggja þá finnst mér það bara
miklu, miklu betra og ég var líka ströng við mín
börn. Hjá foreldrum mínum giltu bara ákveðnar
reglur og það átti að fara eftir þeim. Það var samt
alltaf gert þannig að maður fann að það var
með væntumþykju“.
Þegar Aldís var 11 ára byrjaði hún að vinna
hálfan daginn úti í ísgerð. „Ég hef alltaf unnið
mjög mikið og mér finnst það bara gaman. Hef
aldrei litið á það þannig að vinna sé kvöð. Mér
finnst alltaf gaman í vinnunni alveg sama hvað
ég er að gera“.
Fastir rammar henta henni ágætlega og
„ég læt miklu betur að stjórn heldur en
fólk almennt gerir sér grein fyrir“ segir Aldís
hlæjandi. Hún sótti framhaldsskólanám í
Menntaskólanum á Akureyri þar sem regluvirki
skólans hentaði henni vel og var hún gerð að
„yfirnæturverði á heimavistinni“ þar sem hún var
svo regluföst kona.
Aldís stundaði einnig nám í Noregi og
Danmörku en þegar hún vann á Hótel Sögu
þá gripu örlögin inn í og þar féll hún kylliflöt
fyrir kokkanemanum.
En hvernig myndi Lárus eiginmaður Aldísar
lýsa henni? „Ég vona að hann myndi segja að
ég væri skemmtileg. Því við skemmtum okkur
rosalega vel saman. Það er mikið hlegið heima
og mikið fjör yfirleitt. Það eru allir ofboðslega
málglaðir á mínu heimili. Jafnvel þannig að
mér þykir stundum nóg um. Við tölum rosalega
mikið og það gerir reyndar allur Þelamerkurættbálkurinn.
Það er með ólíkindum hvað þetta
er málglatt fólk“.
„Ég er hrikalega góð í handavinnu
og flink að sauma föt“
Aldís situr greinilega sjaldan auðum höndum.
Hún hefur stundað sundleikfimi í yfir tuttugu
ár og segist vera mikill vatnaköttur. En einnig
er Aldís í hinum ýmsu klúbbum sem hittast
reglulega og hafa gert lengi. Hún hittir m.a.
vinkonurnar úr menntaskóla einu sinni í
mánuði. Svo er hún í saumaklúbbi í Hveragerði
sem hafa hist aðra hvora viku í tuttugu ár. Að
auki þá leggur Aldís áherslu á að vera í góðum
tengslum við fjölskylduna.
6

„Það er heilmikil vinna að halda utan um
fjölskyldu og vini“ segir Aldís en til þess að það
gangi allt upp á móti því að sinna krefjandi og
tímafreku starfi þá býr hún til plan enda er hún
afar skipulögð að eigin sögn.
Það vita kannski ekki margir að Aldísi hefur
mjög gaman af hannyrðum og er að eigin
sögn „hrikalega góð í handavinnu og flink að
sauma föt“. Hún gæti hrist fram úr erminni
fóðraða dragt ef hún hefði tíma en það er
líklega tímaskortur sem veldur því að afköstin
eru minni en áhuginn segir til um.
Þar á meðal hefur hún sérstaklega gaman af
krosssaum og er í einum slíkum klúbbi: „Ég er
í krosssaumsklúbbi sem hittist a.m.k. einu sinni
á ári en þá förum í sumarbústað. Til að byrja
með þá var þetta einungis krosssaumsklúbbur
og þá átti maður að koma með almennilegar
hannyrðir. Ekki ámálaðann stramma heldur
úttalin krosssaums stykki en þar sem þetta er
bara ein helgi á ári og ég hef engan tíma í þetta
þá kom ég alltaf með sama stykkið ár eftir ár.
Ég hafði keypt það 1983 - enda bauð ég þeim
sérstaklega í heimsókn þegar myndin mín Eftir
baðið var tilbúin. Þá var haldið afhjúpunargilli -
þannig að þær gera alveg ógeðslega mikið grín
að mér“ segir Aldís. Verkið á nú heiðursess í
krosssaumshorninu heima hjá henni.
Meistarastykkið sem tók 30 ár að klára
Þegar Aldís var 9 ára og átti að teikna mynd af
því sem hún vildi verða þegar hún yrði stór þá
teiknaði hún mynd af sér að afgreiða í bakaríi.
Henni fannst það „geggjað“ og svo vildi hún
verða flugfreyja eins og allar aðrar stelpur.
En að hún yrði síðar bæjarstjóri í Hveragerði
kom ekki til greina þegar hún var ung því
þá tíðkaðist ekki að konur tækju að sér slík
hlutverk.
Aldís er fyrsta konan og fyrsti heimamaðurinn
sem gegnir starfi bæjarstjóra og hún er tilbúin
að vera í starfinu eins lengi og Hvergerðingar
vilja hafa hana. „Mér finnst þetta gaman og
meðan maður heldur að maður hafi eitthvað
að gefa þá getur maður auðvitað verið. En hvað
það er lengi, það veit ég ekki. Það getur vel verið
að þetta hætti að vera skemmtilegt. En akkúrat í
augnablikinu finnst mér þetta gríðarlega gaman
og mér finnst ganga vel .
Það er miklu meiri eining og ró yfir Hveragerði
heldur en í mjög mörg ár og ég held að íbúar
kunni bara ágætlega að meta það.
„…það er alltaf allt vitlaust
í pólitíkinni hjá ykkur“
Á ákveðnu tímabili fór maður ekki út fyrir
bæjarfélagið án þess að maður fengi þessa
frábæru setningu það er alltaf allt vitlaust í
pólitíkinni hjá ykkur. Þetta var viðloðandi í
Hveragerði. En það hefur ekki verið það núna.
Ég held að það sé ofboðslega dýrmætt fyrir
bæjarfélög að geta eytt púðrinu í að berjast fyrir
bænum sínum í heild en vera ekki að slást inn á
við við hvern annan“.
„Það að vera bæjarstjóri er
lífstíll. Ég er alltaf bæjarstjóri.
Ef ég fer í sund hérna þá get ég
ekkert legið í heitapottinum
og sagt; nei nú er ég í fríi“.
Aldís er ekki hrædd við að láta í sér heyra
og ganga þvert á flokkslínur ef sannfæring
hennar segir svo. „Ég hef alveg ofboðslega ríka
réttlætiskennd og hún hefur þvælst fyrir mér á
stundum. Og það er ekkert alltaf vinsælt að segja
hvað manni finnst og það er ekkert alltaf pólitískt
kórrétt að gera það. Það er miklu einfaldara að
segja bara ekki neitt. Það eykur manni kannski
vinsældir að bara sitja og þegja en ég bara get
það ekki. Og við höfum hér í Hveragerði ekkert
verið feimin við það að hafa aðrar skoðanir
heldur en flokkurinn. Til dæmis ef það lítur að
málefnum sem snerta okkar svæði þá hikum við
ekki við það.“
Aðspurð segir Aldís lítið jafnvægi milli vinnu
og einkalífs enda sé starf bæjarstjóra eiginlega
lífsstíll. „Ég lít ekki á þetta sem vinnu. Það er
kúnstin held ég. Það er alveg sama hvar ég hef
unnið – ég labba ekkert út og segi nú er ég búin
í vinnunni og nú hefst einkalífið. Það að vera
manneskja - partur af því er að vera í vinnu
og hana tekur þú með þér heim. Stundum og
stundum ekki og svo áttu fjölskyldu og þú hættir
ekkert að eiga hana þó þú farir í vinnu.
Það að vera bæjarstjóri er lífstíll. Ég er alltaf
bæjarstjóri. Ef ég fer í sund hérna þá get ég ekkert
legið í heitapottinum og sagt; nei nú er ég í fríi.
Eða í Bónus; nei, hringdu í mig á mánudaginn
klukkan átta því þá er viðtalstími. Það er ekkert
þannig. Mér hefur aldrei fundist þetta vera áreiti.“
Þau verkefni sem Aldís er hvað stoltust af það
sem af er bæjarstjóra tíð sinni eru flutningur
dagdvalarinnar inn á dvalarheimilið Ás,
Hamarshöllin, Stætó og gott samstarf minniog
meirihluta í bæjarstjórn.
„Mér fannst svo dýrlegt þegar ég kom upp á Ás
og hitti gamla konu úr Hveragerði sem var svo
brosandi og glöð. Hún hafði verið úti að tína
rifsber og var að koma inn að sulta. Þarna var
köttur og hundur og fullt af fólki. Mér fannst
þetta svo fallegt móment, hvað hún var kát og
glöð. Fannst svo yndislegt að okkur skyldi takast
að skapa öldruðum þessar aðstæður.
„Hérna búa 2300 sendiherrar
fyrir Hveragerðisbæ “
Ég er mjög stolt af því hvernig er búið að
öldruðu fólki í Hveragerði og það er ekki að
ástæðulausu að eldra fólk sækist í að búa hérna.
Félag eldriborgara í Hveragerði er einstakt á
landinu – hvað það tekur vel á móti fólki og hvað
það er mikið og flott starf þarna. Þau eru þvílík
auglýsing fyrir Hveragerði og þannig er það bara.
Hérna búa 2300 sendiherrar fyrir Hveragerðisbæ
og ef þeir eru nógu duglegir að segja frá því hvað
hér er um að vera og hvað það er gott að búa
hérna þá erum við á grænni grein. Þá vantar
okkur bara meira húsnæði.
Auðvitað er ég líka stolt af Hamarshöllinni þó
hún valdi mér nú vægu taugaáfalli í hverju
einasta óveðurskasti. Svo er ég afar stolt af
bæjarstjórninni og þeim bæjarfulltrúum sem ég
hef unnið með því það hefur verið alveg feykilega
gott samstarf milli minni- og meirihluta og
það er ekki sjálfgefið. Það er alveg ofboðslega
dýrmætt fyrir sveitarfélagið að það skuli hafa
náðst.“
Í framtíðinni leitar hugur Aldísar í frekara nám
en ef kosningarnar hefðu farið öðruvísi s.l.
vor segir Aldís að hún hefði byrjað á að fara í
langt ferðalag með eiginmanninum til Asíu
og þá hefði hún eflaust komið tilbaka uppfull
af hugmyndum. „Reyndar geng ég alltaf með
þann draum að reka kaffihús-ísbúð- bar. Ég held
að það sé hrikalega gaman og sérstaklega hér
í Hveragerði. Ég held að það séu svo myljandi
möguleikar hérna“.
Það verður að teljast skondið að lífsmottó
þessarar sterku, lífsglöðu og jákvæðu konu
sem sér möguleika í hverju skúmaskoti skuli
vera á neikvæðu nótunum.
„Ég á svo neikvætt lífsmottó - það er svo
ömurlegt! En mér finnst það alltaf hrikalega gott.
Það er þannig: alltaf að búast við því versta – þá
er ég svo glöð þegar eitthvað gott gerist. Ég
er búin að lifa eftir þessu alltaf og ég geri það
virkilega. Ég býst alltaf við því versta en það gerist
aldrei og þá er ég hreinlega alltaf ánægð. Ég er
yfirleitt aldrei í vondu skapi af því lífið er eiginlega
alltaf miklu betra en ég mögulega hefði getað
ímyndað mér“.
7

HEYRST
HEFUR…
að skólarnir eru byrjaðir og komið er haust
að það verði froðufimi í nýja Fitnessbilinu
að eldri borgarar leiti logandi ljósi að
endurskinsmerkjum
að Elínborg hafi misst af partý í Hverahlíð
að það rigni stundum í Hveragerði
að garðasúpurnar hafi aldrei verið betri
að fræga fólkið flykkist hingað í íbúðaleit
að gulrætur hafi drukknað í Laufskógum
að brjóstamjólkurísinn hafi slegið í gegn
að trjárunnar óski eftir hjálp við að fjarlægja
gamalt blóm í bæ skraut úr sér
að nuddtækið í heitari pottinum sé komið
í lag
að ljósleiðarinn sé mættur
að fyrstubekkingar týni öllu og að stígvél
og úlpur hrúgist nú upp í skólaselinu og
grunnskólanum
að nokkrar konur í bænum hafi orðið súrar
að fá ekki að bera út fleiri Krumma í sumar
að aðal stuðið sé á skemmtikvöldunum í
Þorlákssetri
að Dagur borgarstjóri elski Laugaskarð
að Almar bakari hafi keypt Hverabakarí
að Ístak breikki Hellisheiði og Kambana
að orðaruglið í Útsvari hafi verið ruglerfitt
og í tómu rugli
HVER ERUÐ ÞIÐ?
Jurailux Sveinsson
Jintapat Pinsawat (Nangsee)
Ásta Viktorsdóttir
Gunnar Viktorsson
Friðrik Viktorsson
María Viktorsdóttir
Helstu áhugamál?
Akkúrat núna, að læra íslensku,
en almennt að ferðast og kynnast nýjum heimshornum.
Hvað er langt síðan þið fluttuð til Hveragerðis?
Við komum til Hveragerðis 27. maí 2013.
Hvar bjuggu þið áður og hvers saknið þið mest þaðan?
Við bjuggum í strandbæ í Taílandi sem heitir Hua Hin og ég sakna mest vina minna sem enn
búa þar, annars sakna ég eilíflega fjölskyldu minnar sem býr í Suður-Taílandi. Í Hua Hin áttum við
dásamlegt hús út í sveit og ég verð að viðurkenna að ég sakna þess. Svo er ekki laust við að ég
sakni veðursins í Taílandi.
Af hverju Hveragerði?
Gott fyrir börnin að vera hér. Skólarnir eru góðir. Og það er nauðsynlegt fyrir þau að læra
almennilega íslensku.
Mikilvægast í lífinu?
Fjölskyldan.
#krumminn
Dönsku Smedegaard
hringrásardælurnar
fyrir gólfhita- og
ofnakerfi eru til
á lager hjá okkur
Gæða dælur
á góðu verði
Sími: 482-7880 - GSM: 699-1985 - helgi@helgipipari.is - www.helgipipari.is
8

VELKOMIN Í HEIMINN
Íris Hildur Almarsdóttir
Fæðingardagur: 10. september 2014
Foreldrar: Almar Þór Þorgeirsson og
Ólöf Ingibergsdóttir
Fæðingarþyngd: 5056 gr
Lengd: 52 cm
Birkir Evan Sigurjónsson
Fæðingardagur: 6.maí 2014
Foreldrar: Ása Björk Ásgeirsdóttir
og Sigurjón Axel Guðjónsson
Fæðingarþyngd: 3620 gr
Lengd: 50 cm
Óskar Marel Örlaugsson
Fæðingardagur: 24. júní 2014
Foreldrar: Sonja Ósk Kristjánsdóttir
og Örlaugur Magnússon
Fæðingarþyngd: 4230 gr
Lengd: 53 cm
Júlíus Pétur Jóhannsson
Fæðingardagur: 29.júlí 2014
Foreldrar: Droplaug Guttormsdóttir
og Jóhann Pétur Jensson
Fæðingarþyngd: 3880 gr
Lengd: 54 cm
SPÖRFUGLINN...
Hann sat úti á tröppum húss síns, gamli maðurinn. Slæmur í baki og
hélt um mjóhrygginn. Hafði dottið illa í gær. Jafnvægið ekki alveg í lagi
og fæturnir ákaflega svikulir eftir að hafa borið hann uppi í hartnær 90
ár. Hann hafði göngugrind sér til afnota, en vildi sem minnst af henni
vita. Sagði gjarnan að lappirnar hefðu reynst sér vel og þær skyldu skila
honum út lífið, án aðstoðar málmgrindar á hjólum, með handbremsu
og körfu framan á. Kaffikrús var á stéttinni fyrir framan hann, með
rjómaslettu í. Súdúkú gáta í vinstri hönd hans og gulur Pludo blýantur í
hans hægri hönd. Sólin var að gægjast fram úr skýjum í sumarkveldinu
eftir votviðrasaman dag með breytilegu veðri dagsins.
Hann leit til lofts. Enginn fugl var á flugferli. Hann beið eftir vini sínum.
Hinum blakka vini sínum, sem heimsótt hafði hann á hverjum degi
um langt bil. Skyndilega sá hann skugga á garðflötinni sinni, skugga
í fuglsmynd. Blakkan skugga, sem sveif yfir grænu, nýslegnu grasinu.
Með vængendana klofna í fjaðrir og vinsamlegu krunki.
Fuglinn lenti í garðinum hans á nákvæmlega sama stað og venjulega.
Í miðjum garðinum. Tók þrjú stökk jafnfætis og leit á gamla manninn.
Gaf frá sér vingjarnlegt krunk. Gamli maðurinn sendi vinalegt krunk á
móti.
Gamli maðurinn hafði gjört það að vana sínum að kasta matarleifum í
miðjan garðinn fyrir vin sinn, þann blakka. Spörfuglinn.
Þegar sá blakki réðst á matarleifarnar, stóð sá gamli upp, stirðbusalega
við garðstól, sem hann hafði sett við húströppur sínar.
„Komdu sæll, vinur minn, spörfuglinn minn,“ sagði gamli maðurinn í
afalegum tóni og gekk í átt að vini sínum.
Sá blakki lét sér ekki bregða við hreyfingu gamla mannsins. Hélt áfram
að kroppa í matarleifarnar á garðgrasinu. Kótelettur í raspi. Lúbarðar fyrir
steikingu á þykku tréfjalarbretti.
Gamli maðurinn horfði á vin sinn, blakka spörfuglinn og sagði:
„Já vertu ekki feiminn við þetta....þetta fóður þitt er hvorki úldið né
myglað, þótt ég hafi gleymt því í ísskápnum í nokkra daga!“
Hann brosti til vinar síns á grasflötinni með gleði í augum. Þakklæti
fyrir vinskapinn við þann blakka.
Spörfuglinn gaf honum gleðistund á
hverjum degi.
Hann hafði alist upp með mjög
hjátrúarfullri móður, sem elskaði ekki
spörfuglinn neitt sérstaklega, fannst hann þjófóttur, gargandi hávær og
glysgjarn.
„Mundu það, sonur sæll að krummi er ekki allur þar sem hann
er séður. Ég hef aldrei hrifist af gargandi háværum, þjófóttum og
glysgjörnum mönnum. Þeir eru ekki fyrir minn smekk og krumminn er
samnefnari þeirra!“
Hann svaraði öngvu um þetta við móður sína. Hafði alltaf hrifist að
flögri fuglins og áreynslulegu svifi yfir bæinn með útglenntar fjaðrir
vængjana. Hann tók ástfóstri við þennan skemmtilega blakka fugl,
krummann. Hafði skál á garðhúsgagnaborðinu í garðinum sínum með
krónupeningum í. Sá blakki flaug alltaf á borðið, eftir át sitt og tók einn
krónupening með sér í flug um bæinn, úr garði hans.
„Ég skal segja þér það, sonur minn sæll, að þessi svarti flögrari loftsins
er tengdur mörgum hjátrúar og hindurvitnum og meðal er annars sagt
að fljúgi tveir hrafnar yfir hús þitt í kross, að þá er einhver feigur í því
húsi,“ hafði móðir hans gjarnan tuggið yfir honum í æsku hans.
Gamli maðurinn hafði alltaf talið sér trú um, að hann væri ekki
hjátrúarfullur, þrátt fyrir fyrirlestra móður sinnar um hjátrú og
hindurvitni lífsins. Hann strauk sér fast um mjóhrygginn og hagræddi
líkamsstöðu sinni í jafnvægisleit. Hann horfði á vin sinn, þann blakka
klára að kroppa í sig þriðju kótelettusneiðina með raspinum. Hann
veifaði vini sínum með hæglátri vinstri hönd, beygði sig fram á við eins
og hann væri að hneigja sig.
„Ég ætla að þakka þér og vinum þínum, elsku spörfuglinn minn að
fljúga ekki í kross yfir hús mitt, því mig langar til að lifa svolítið lengur,
þótt illa farinn sé og langt genginn. Þá er lífið þess virði.“
Höfundur: Sigurður Blöndal
1. prentun uppurinn… 2. prentun væntanleg…
Bókin fæst í Shell & Álnavörubúðinni og einnig er hægt að panta hana á netfanginu sblond@hveragerdi.is
…umsögn um bókina…
Bókin er hreint yndisleg, frábær blanda af gaman og alvöru. Sérstaklega hafði ég gaman að þeirri nýbreytni að hafa litlar
hugvekjur inn á milli sagnanna, sem báru hógværa titilinn “orð á pappír.” Hver einasta hugvekja vakti mann til umhugsunar
um lífið sjálft og fylltu mann af hlýju og von.
Rósa Grímsdóttir á Rithringur.is
9

SELFIE Í STRÆTÓ - BIRTA MARÍN DAVÍÐSDÓTTIR
Af hverju ferðast þú með strætó?
Ég æfi fimleika í Stjörnunni og ferðast
því 4 sinnum í viku með strætó á milli
Hveragerðis og Ásgarðs í Garðabæ.
Hvernig styttir þú þér stundir í strætó?
Ég hlusta á tónlist til að stytta mér stundir.
Eftirminnilegasta strætóferðin? Var
þegar ég fór með strætó í fyrsta skipti á
æfingu, þá tók ég vitlausan strætó!! :)
Tekur þú alltaf selfie í strætó?
Nei, en ég hef alveg gert það ;)
KRUMMINN KEMUR ÚT EFTIR DÚK
OG DISK. MINNUM Á AÐ PANTA
AUGLÝSINGAR OG SENDA OKKUR
GREINAR
KRUMMINN@KRUMMINN.IS
KRÚNK KRÁ KRÁ
SKÓLAÞING/NÁMSKEIÐSDAGUR SKÓLAÞJÓNUSTU ÁRNESÞINGS
Mánudaginn 1. september var efnt til
sameiginlegs starfsdags allra starfsmanna
í grunn- og leikskólum í Árnesþingi.
Að skólaþjónustu Árnesþings standa
sjö sveitarfélög á Suðurlandi. Þau eru:
Bláskógabyggð, Flóahreppur, Grímsnesog
Grafningshreppur, Hveragerðisbær,
Hrunamannahreppur, Skeiða- og
Gnúpverjahreppur og Sveitarfélagið Ölfus.
Námskeiðsdagurinn var haldinn í Þorlákshöfn
þar sem rúmlega 300 starfsmenn skólanna
komu saman. Dagurinn hófst á því að farið
var yfir sameiginleg markmið skóla og
skólaþjónustu fram til ársins 2017. Eftir það
hlýddu þátttakendur á erindi Ásdísar Olsen
um hamingju og velferð í skólastarfi með
jákvæðri sálfræði. Óhætt er að segja að erindi
hennar hafi vakið áhuga. Gott er að muna
eftir að njóta augnabliksins, hafa jákvæða
afstöðu til lífsins og skólastarfsins. Þannig
gengur allt betur.
Fram eftir degi voru í boði 20 málstofur
en þátttakendur á þinginu gátu valið tvær
þeirra yfir daginn. Þar voru flutt erindi um
ýmislegt spennandi sem er að gerast í
skólum á svæðinu auk annarra skólatengdra
verkefna. Erindin fjölluðu meðal annars um
Reggio leikskólastarf, lestrarþróun, hreyfingu
barna, nemendur með hegðunarvanda,
áhugasviðsvinnu með nemendum, fjölbreytta
kennsluhætti, spjaldtölvur, barnavernd,
sjálfsskaðandi hegðun, tölvufíkn og jákvætt
hugarfar kennara.
Þingið tókst í alla staði vel enda vel tekið
á mótið hópnum í Þorlákshöfn. Það var
sérstaklega ánægjulegt að sjá alla starfsmenn
leik- og grunnskóla vinna saman á þessum
degi og fá tækifæri til að auka samræðu milli
skólastiganna.
Hrafnhildur Karlsdóttir
og Ólína Þorleifsdóttir
kennsluráðgjafar í Skóla- og velferðarþjónustu
Árnesþings
TOUR DE ÓSKALAND
Mikil gleði ríkti í leikskólanum Óskalandi
á dögunum er leikskólanum barst
höfðingleg gjöf.
Formaður Lionsklúbbsins Eden kom
færandi hendi með tvö ný hjól. Ekki þarf
að orðlengja það að hjólin eru í stöðugri
notkun og eru þau kærkomin viðbót við
búnað leikskólans. Lionsklúbbnum Eden
eru færðar hjartans þakkir fyrir óeigingjarnt
starf og hugulsemi í garð leikskólans.
Sigurður Hrafn Tryggvason
fæddur 7.nóv 1949 látinn 1. sept 2014
Við fjölskyldan viljum þakka öllum fyrir þann hlýhug
og stuðning sem okkur var sýndur
við andlát eiginmanns, föður okkar, tengdaföður,
afa og langaafa.
Guðbjörg Hofland Traustadóttir
Berglind Hofland Sigurðardóttir
Tryggvi Hofland Sigurðsson
Hjördís Harpa Guðlaugsdóttir Wiium
Eva Dögg Hofland
Guðmundur Árni Kjartansson
Ísabella Hofland, Tryggvi Hrafn, Emilía Guðbjörg, Berglind María
10

ÁSKORUN-HREYSTI
SAMFÉLAG-HEILBRIGÐI
FJÖLBREYTNI-LÍFSSTÍLL
ÁRANGUR-GLEÐI-TÆKNI
SAMHELDNI-STYRKUR
ÚTHALD-HEIÐARLEIKI
VELLÍÐAN
Vertu með!
www.crossfithengill.is
HÁRSNYRTISTOFAN
ópus
Breiðumörk 2
Hveragerði
Sími 483 4833
Brauð og kökur í úrvali
Verið velkomin
Lífleg starfsemi er í
Þorlákssetri hjá Félagi eldri
borgara í Hveragerði
Á mánudagsmorgnum
byrjar Bókmenntahópurinn
sem les sjálfvalið efni milli kl.
10:00 og 12:00. Kl. 13:00 er svo
handavinna og brids.
Þriðjudagsmorgna gengur
hópurinn Út um allt á milli
kl. 10:00 og 11:00. Kl. 13:00 er
spiluð félagsvist og kl. 17:30
er kenndur línudans sem er
nýbyrjaður hjá félaginu. Holl,
góð og skemmtileg hreyfing.
Á miðvikudögum mæta
félagar og spila boccia kl.
10:00 og spila í liðlega klst.
Vatnsleikfimi er kl. 14:45 í 45
mín. á Heilsustofnun.
Kl. 19:00 er framsögn og
leikræn tjáning.
Á fimmtudögum eru
fyrirlestrar og spjalldagar kl.
10:00, þá koma gestir til okkar.
Guðrún Eva Mínervudóttir
kemur í fimmtudagsspjall
13. nóv. og 20. nóv. kemur
vinabekkur úr grunnskólanum.
Kl. 13:00 er brids og
Hverafuglar syngja á milli kl.
16:00 og 18:00.
Á föstudögum kl. 10:00
byrjar Félagið á pútti uppi í
Hamarshöll og boccia einnig
kl. 10:00 í Þorlákssetri. Kl.
13:30 til 16:30 er Útskurður í
handavinnuhúsi Grunnskólans.
Auk þess er nýtt í dagskránni,
skemmtikvöld síðasta
föstudag í mánuði kl. 19:30 og
bíósýning fyrsta mánudag í
mánuði kl. 20:00
OPIÐ HÚS
Á Blómstrandi dögum í ágúst var Félag eldri borgara með opið hús
í Þorlákssetri. Dagskrá var í umsjá Bókmenntahópsins en þar lásu
20 félagar sjálfvalið efni. Dagskráin var í um klukkustund hvern dag.
Einnig stóð yfir sýning á Vatnslitamyndum Sæunnar Freydísar.
Bjóðum upp á góðan fundarsal,
gistingu og kvöldmat
fyrir minni hópa
www.frumskógar.is
info@frumskogar.is Sími 896-2780
ALLIR ÚT AÐ HLAUPA!
Skokkhópur Hamars hvetur alla til
að koma út að skokka eða ganga
og nýir meðlimir alltaf velkomnir á
æfingar hjá okkur.
Allir geta verið með og hver
og einn ræður sínum hraða og
vegalengd hverju sinni. Því er
kjörið að byrja með hópnum og
dusta rykið af gömlu skónum,
njóta þess frábæra umhverfis sem
við höfum hér í og við Hveragerði
til góðrar hreyfingar.
Æfingar hjá okkur eru allar frá
sundlauginni Laugaskarði og eru
sem hér segir.
Mánudaga Kl. 17:30
Þriðjudaga Kl. 17:30
(byrjendur sérstaklega velkomnir)
Fimmtudaga Kl. 17:30
(byrjendur sérstaklega velkomnir)
Laugardaga Kl. 9:30
Stefnum við á að endurvekja
gönguhópinn og ætlunin að
hittast upp í sundlauginni
Laugaskarði kl. 16:30 alla þriðjudaga
og fimmtudaga til að byrja
með.
Við munum svo að sjálfsögðu
halda úti fjallgöngunum
okkar vinsælu en undir styrkri
handleiðslu Sverris Geirs
Ingibjartssonar. Fjallaferðir hafa
verið á laugardagsmorgnum
ca. 4-6 vikna fresti þar sem
valið er heppilegt fjall í okkar
nærumhverfi. Fjallgönguferðirnar
verða auglýstar á www.
hamarsport.is og fésbókarsíðu
Skokkhóps Hamars með góðum
fyrirvara.
Ef einhverjar spurningar brenna á
ykkur eða óskir um ráðleggingar
eða hlaupa-prógramm þá er Pétur
Frantzson alltaf við símann og
svarar glaður, sími 844-6617.
Allir alltaf velkomnir, sjáumst.
11

FÓTBOLTASTUÐ Í HAMARSHÖLLINNI
Sunnudaginn 19. október var haldið fótboltamót fyrir efnilegu krakkana okkar í 7. flokki í Hamarshöll. Þau stóðu sig öll með mikilli prýði eins
og sjá má þessum myndum.
Við opnum stærra og mikið endurbætt
Fitness bil að Austurmörk 18
zumba • foam flex • yoga • nuddstofa • infrarauð sauna
• danskóli Rebel • einkaþjálfun og margt fleira
Bjóðum einnig uppá tvo stóra sali fyrir
veislur, afmæli, fundi o.s.frv.
Opnunarpartý 7. nóv kl 20:00
Allir velkomnir
12