Caspar Lahme: Vertellt - Sauerlandmundart

26
Schweyneweygen
Im 2. Kreyg, bo alles knapp wur, konn me nai nirrmol schlachten, bat
me woll; aik wann me en Kibbeken im Stalle harr. Schlachten mochte
anmellt weeren. Dann kam enner vam Amt, taxaierte dät Schlachtvoah
un moastens mochte me de Hälfte afgieben.
In Alme harr me dät Taxaiern Hännes updracht, weyl nit jedesmol
enner van Breylen kummen konn. Un dät wur gutt sai. Hännes harr
nämlek en Heärte för de Lue un nam't mit deäm Gewichte nit sai
genai. Moastens froger’e: „Böiviel sall't dann weygen?“. Un dann
machte hoa dat Schweyn taim Kibbeken un dät Kalv taim Hitteken.
Dät gonk saigar saiweyt, dät eähme oanmol ne Frugge, boa nit recht
verstohn harr, bat eähr Kerel mit Hännes avmacht harr, nohloffte un
schannte, sai lichte Schweyne häv' vey nit.
Ne Teyt gonk alles gutt. Abber dann kragen se dät upp'm Amte doch
spitz - sai lichte Schweyne wie in Alme gaffte’t im ganzen Amt
Thuilen nit. Un derümme laten se deän Taxaierer no Breylen kummen.
Doa konn sick schon en Reym drupp maken, bat se van eähme wollen.
Un bo de Amtmann eähne nöi frogere, bat dät fär ne Aiersake härr, dät
de Schweyne sai lichte würen, un dät dät gar nit sien könn, do wure
abber doch verkehrt.
"Hä Jey nix anneres te bedenken. Moane Jey, ick gönk vigelieren und
härr nix anneres te dain, ere hey noh Breylen te laipen?
De Schweyne sind te lichte? Jä, witte Jey dann nit, dät in Alme arme
Fabrikers wuhnt? Doa sind fraih, wann se überhaipt en Schweyn im
Stalle hät. Runkeln un Schrot taim Faiern is ror. Un ment van
Brännitteln un Disseln häbbe ick nai kenne schworen Schweyne sohn.
Un wann Jey beäter taxaiern könnt, dann maker’t doch sölber!" De
Amtmann wur ganz verdattert, harr en Insoahn, un Hännes taxaierte
widder. De Schweyne blaben lichte.